SAN JUAN 1:10 - Chatino Tataltepec

¹⁰ Ndi'i̱ yu bi' lo yuu, la cui' ti cha' nu cua nda ycui' Ni lo'o ñati̱. Lo'o yu bi' ngüiñá Ni chalyuu, pana ná ndyuloo ñati̱ chalyuu ji'i̱ yu bi' li'.

SAN JUAN 1:10 Iomraidhean Croise

SAN MATEO 11:27

Lo'o li' tya ngulu'u la Jesús xi ji'i̱ ngu': ―Lcaa chacuaya' ji'i̱ Sti na' ndyanu ya' na'. Ni sca ñati̱ ná jlo ti' ñi'ya̱ laca cha' nu ntsu'u ne' cresiya 'na nu laca̱ Sñi' ycui' Ni; sca ti ycui' Ndyosi Sti na' jlo ti' ñi'ya̱ laca cha' nu ntsu'u ne' cresiya 'na. Lo'o jua'a̱, ni sca ñati̱ ná jlo ti' ñi'ya̱ laca cha' nu ntsu'u ne' cresiya ji'i̱ Sti na'; sca ti na' nu laca̱ Sñi' ycui' Ni jlo ti' na', lo'o jua'a̱ culu'u na' cha' bi' ji'i̱ ñati̱ nu subi na' ji'i̱ cha' ca tsa'a̱ ngu' 'na.

SAN JUAN 1:11

Ya̱a̱ yu bi' chalyuu su laca tyi nquicha', lo'o jua'a̱ ñati̱ chalyuu nu ngüiñá yu, ná ndyuloo ngu' ji'i̱ yu.

SAN JUAN 1:18

Ni sca ñati̱ ná na'a̱ ngu' ji'i̱ ycui' Ndyosi; sca ti Jesús nu ngulu'u ji'na ñati̱ chalyuu na ñi'ya̱ laca ycui' Ndyosi. Lo'o nu Jesús bi' ni, laca yu nu sca ti Sñi' ycui' Ndyosi, nu tyaca'a tsa ji'i̱ Ni.

SAN JUAN 1:3

Lo'o yu bi' ngüiñá Ni lcaa lo na; ni sca na nu ntsu'u chalyuu, ná ngüiñá Ni ji'i̱ si ná lo'o yu bi'.

SAN JUAN 1:5

Ña'a̱ ti tya ntyiji'i̱ xee bi' su talya nu ntsu'u ne' cresiya ji'i̱ ngu' cuxi, cha' ná caca ji'i̱ ngu' cuxi xubi' xee bi'.

SAN JUAN 17:25

Sti na' ―nacui̱ Jesús―, xcui' cha' liñi ndu'ni nu'u̱. Nslo na' jinu'u̱, masi ná nslo ñati̱ chalyuu jinu'u̱. Pana jlo ti' ñati̱ nu ngusñi cha' jna' cha' nu'u̱ laca nu nda 'na lijya̱a̱ nde chalyuu.

SAN JUAN 5:17

Pana nguxtyacui Jesús cha' lo'o ngu' li': ―Tya lyiji tye cua'ni Sti na' cña ―nacui̱ Jesús―, lo'o jua'a̱ na', tya ndyu'ni na' cña.

LOS HECHOS 14:17

Lo'o jua'a̱ nda Ni lcaa cha' tso'o nu ndyiji ji'na: nda Ni tyo nu nda'ya lo yuu cha' caluu tso'o si'yu nu ntyaa na, cha' tso'o caca clacua ji'na li'; ndyiji cha' bi' ji'na cha' cacu tso'o na, cha' jua'a̱ tso'o tsa caca tyiquee na li'. Jua'a̱ laca cha' nu nclyu'u ycui' Ndyosi ji'na cha' caca cuayá' ti' na tilaca laca Ni.

1 CORINTIOS 1:21

Ngua'ni Ni cha' ná caja ñi'ya̱ tyuloo ñati̱ chalyuu ji'i̱ Ni cha' hique ti ngu'; jua'a̱ tso'o la, ngua ti' ycui' Ndyosi. Pana ndu'ni lyaá Ni ji'i̱ ñati̱ nu xñi cha' ji'i̱ Ni; la cui' cha' nu ndacha' na ji'i̱ ngu', masi cha' tonto nchcui' na, nacui̱ ngu' li'.

1 CORINTIOS 2:8

Ni sca ñati̱ nu laca loo chalyuu, ná ngua cuayá' ti' ngu' cha' bi'. Si ngua jlo ti' ngu' cha' bi', ñi'ya̱ nu ngua ti' ycui' Ndyosi cha' cua'ni Ni, ná ngujui'i̱ ca'a̱ ngu' bi' ji'i̱ Jesús lo crusi li', ycui' Jesús nu Xu'na na nu tlyu tsa cha' tso'o ntsu'u ji'i̱.

1 CORINTIOS 8:6

Pana nu ñati̱ tya'a ntsu'u cha' ji'na lo'o Jesús, sca ti ycui' Ndyosi Sti na jlya ti' na ji'i̱ tsiya' ti; la cui' ti jua'a̱ sca ti ycui' Jesucristo nu Xu'na na ngusñi na cha' ji'i̱. Ngüiñá Ni tyucui ña'a̱ chalyuu, xqui'ya Jesús ndya' lcaa lo na; cuentya ji'i̱ ycui' Jesús laca lcaa lo na nu ntsu'u chalyuu, lo'o jua'a̱ xqui'ya ycui' Jesús ndi'i̱ na chalyuu.

COLOSENSES 1:16

Stu'ba ti ndu̱ yu bi' lo'o ycui' Ndyosi Sti yu lo'o ntucua quiya' ndya' chalyuu, masi lo'o ndya' tyucui ña'a̱ nde cua̱, masi lo'o ndya' tyucui ña'a̱ nde lo yuu. Cua ngüiñá Ni lcaa na nu nchca ña'a̱ na ji'i̱ nde lo yuu chalyuu; lo'o jua'a̱ cua ngüiñá Ni lcaa na nu ná nchca ña'a̱ na ji'i̱, ñi'ya̱ nti' lcaa cui'i̱ nu laca loo nde cua̱; jua'a̱ cua ngüiñá Ni lcaa lo xu'na nu culo cña ji'i̱ ngu', masi nde lo yuu chalyuu, masi nde cua̱. Stu'ba ti ndu̱ Cristo lo'o ycui' Ndyosi Sti yu nu lo'o ngüiñá Ni tyucui ña'a̱ chalyuu; la cui' jua'a̱ xqui'ya yu bi', bi' cha' ndya' lcaa lo na.

HEBREOS 11:3

Jlya ti' na ji'i̱ ycui' Ndyosi, bi' cha' cua ngua cuayá' ti' na cha' clyo nda ycui' Ndyosi cha', lo'o li' ndya' chalyuu nu ña'a̱ na juani; ná na'a̱ na ñi'ya̱ ngua cha' ndya' bi', tsa bi' ti cha' jlya ti' na cha' ngüiñá Ni lcaa cha' nu ña'a̱ na lo yuu chalyuu juani.

1 JUAN 3:1

Tlyu tsa cha' tso'o laca cha' ntsu'u tsa tyiquee ycui' Ndyosi Sti na ña'a̱ Ni ji'i̱ ca ta'a ngu' tya'a ntsu'u cha' ji'na lo'o Jesucristo; bi' cha' laca cha' nchcui' ycui' Ndyosi ji'na cha' sñi' ycui' Ni laca na, lo'o jua'a̱ chañi laca cha' bi'. Ná ntaja'a̱ ñati̱ chalyuu tyuloo ji'na cha' sñi' Ni laca na; la cui' jua'a̱ lo'o nguti'i̱ Jesucristo chalyuu, ná ntaja'a̱ ngu' tyuloo ngu' ji'i̱ yu li'.