EFESIOS 1:4 - Chatino Tataltepec

⁴ Lo'o tya lyiji tya' chalyuu, tya li' cua ngusubi ycui' Ndyosi ji'na cha' caca na ñati̱ ji'i̱ ycui' Ni, nu lo'o caca stu'ba cha' ji'na lo'o Cristo. Ngua ti' Ni cha' tyu'utsu' na ji'i̱ lcaa lo cha' cuxi, cha' jua'a̱ nga'aa nti' cha' sta Ni qui'ya ji'na tsiya' ti.

EFESIOS 1:4 Iomraidhean Croise

SAN MATEO 24:22

Pana cua nacui̱ ycui' nu Xu'na na cha' xti ti tsa̱ caca tyempo nu chcube' ngu' jua'a̱; si tyiquee' talo tyempo cuxi bi', nga'aa clyaá ni tsaca ñati̱ chalyuu li'. Pana tya'na ti' ycui' Ndyosi ña'a̱ Ni ji'i̱ ñati̱ ji'i̱ Ni, bi' cha' cua'ni Ni cha' xti ti tsa̱ caca tyempo cuxi bi'.

SAN MATEO 24:24

cha' Cristo cuiñi caca nu bi'. Lo'o jua'a̱ tyu'u tucua xi ngu' cuiñi nu chcui' cha' tu'ba ji'i̱ ycui' Ndyosi laca ycui' ca ngu', nu cuiñi ti cua'ni cha' tlyu cha' cube tsa ti' xa' ñati̱; cua'ni ngu' cuiñi bi' jua'a̱, cha' nti' ngu' cua'ni ngu' ngana ji'i̱ ma̱, lo'o jua'a̱ ji'i̱ lcaa ñati̱ nu cua ngusubi ycui' Ndyosi ji'i̱.

SAN MATEO 24:31

Nu lo'o lye cañi cui' chcua̱, li' culo na' cña ji'i̱ quiña'a̱ tsa tya'a xca̱ 'na cha' ca̱a̱ xca̱ bi', cha' xuti'i̱ se'i̱ ti ji'i̱ lcaa ñati̱ nu cua ngusubi ycui' Ni ji'i̱; macala su ndi'i̱ ngu' tyucui ña'a̱ chalyuu tyu'u ngu' ca̱a̱ ngu' li'.

SAN MATEO 25:34

Ca li' lo'o caca na' loo tsiya' ti, chcui' na' lo'o taju ñati̱ nu ndi'i̱ la'a tsu' cui̱ 'na: “Tya̱a̱ ma̱ ca su ntucua ycui' Ni nu laca loo, lcaa cu'ma̱ nu tso'o tsa nti' ycui' Ndyosi Sti na' ña'a̱ Ni ji'i̱ ma̱, cha' cua ngua'ni cho'o ycui' Ni su tyi'i̱ ma̱ slo Ni, tya lo'o ngüiñá Ni chalyuu.

SAN JUAN 10:16

Tya ntsu'u la xa' ñati̱ 'na nu ndi'i̱ xa' quichi̱, nu ná stu'ba nga'a̱ lo'o taju ñati̱ re; nga'a̱ cha' tsa'a na' tsaqui'ya na' ji'i̱ ngu' bi', cha' lo'o ngu' bi' tya̱a̱ ngu' ca ne' lo'o re. Lo'o li' cuna ngu' cha' nu chcui' na' lo'o ngu'; caca ngu' sca ti taju ñati̱ 'na, lo'o jua'a̱ caca na' nu sca ti Xu'na ngu' ―nacui̱ Jesús―.

SAN JUAN 15:16

Si'i cu'ma̱ nu ngusubi ma̱ 'na cha' tya'a̱ ma̱ lo'o na' ―nacui̱ Jesús―, na' laca̱ nu cua nchcui' na' lo'o ma̱ clyo. Tya li' ngulo na' cña ji'i̱ ma̱ cha' xcui' cha' tso'o tyu'u ne' cresiya ji'i̱ ma̱, cha' jua'a̱ talo cña tso'o nu ndu'ni ma̱; li' cua'ni Sti na' lcaa cha' nu jña ma̱ ji'i̱ Ni chacuayá' 'na.

SAN JUAN 17:24

’Sti na' ―nacui̱ Jesús ji'i̱ ycui' Ndyosi Sti yu―, cua nti' na' cha' tyi'i̱ ñati̱ nu nda nu'u̱ 'na ca su tyucua na'. Li' ña'a̱ ngu' bi' 'na nde su tlyu la su nda nu'u̱ 'na, cha' tyaca'a tsa na' jinu'u̱ tya lo'o tya lyiji xana chalyuu.

LOS HECHOS 13:48

Ndyuna nu ngu' xa' tsu' cha' bi', lo'o li' tso'o tsa ntsu'u tyiquee ngu'. Tso'o tsa laca cha' ji'i̱ ycui' Ndyosi nu Xu'na na, ngulacua ti' ngu' bi'; jua'a̱ ngusñi ngu' cha' bi'. Jlya ti' ngu' bi' cha' ji'i̱ Jesús, lcaa ngu' nu cua ngusubi ycui' Ndyosi ji'i̱; ngujui chalyuu nu ná nga'a̱ cha' tye ji'i̱ ngu' bi' li'.

LOS HECHOS 15:18

Jua'a̱ nacui̱ ycui' Ndyosi lo'o nda Ni cha' lo'o jyo'o cusu' nu ngua sa'ni, cha' cua jlo ti' Ni lcaa ña'a̱ cña nu cua'ni Ni nde loo la.

LOS HECHOS 18:10

Ndi'i̱ na' lo'o nu'u̱ cha' xtyucua na' jinu'u̱, bi' cha' nga'aa caca xñi ngu' jinu'u̱ cha' xcube' ngu' hi̱. Lo'o jua'a̱ ntsu'u tsa ngu' quichi̱ re nu taca xñi ngu' cha' jna' nde loo la, si ta nu'u̱ cha' lo'o ngu'.

ROMANOS 8:33

Ná tucui taca sta qui'ya ji'na lacua, cha' cua laca ngusubi ycui' Ndyosi ji'na; ycui' Ndyosi laca nu cua ngulo yabe' ji'i̱ lcaa qui'ya nu ntsu'u ji'na.

1 CORINTIOS 1:8

Ycui' Jesús laca nu cua'ni cha' tyanu tachaa cha' ne' cresiya ji'i̱ ma̱ ña'a̱ cuayá' nu tye chalyuu ji'i̱ ma̱. Lo'o li' ná ntsu'u qui'ya nu sta ycui' Ndyosi hichu̱' ma̱ lo'o ca̱a̱ Jesucristo nu Xu'na na cha' cua'ni cuayá' Ni ji'i̱ ñati̱ chalyuu.

GÁLATAS 5:13

Cua ngusubi ycui' Ndyosi ji'i̱ ma̱ cha' caca tyi'i̱ tso'o ti ma̱ chalyuu. Tsa bi' ti cha', tii ti ti' ma̱ tyi'i̱ ma̱ chalyuu; ná clyana ma̱ cha' cuxi nu cua'ni ma̱ laja lo'o ndi'i̱ tso'o ti ma̱, cha' si'i na ndi'i̱ tso'o ti na cha' culiji na na nu ntsu'u ji'na jua'a̱ ti. Ntsu'u cha' xtyucua na ji'i̱ tya'a ñati̱ na xqui'ya cha' ntsu'u tsa tyiquee na ña'a̱ na ji'i̱ ngu', bi' cha' ndi'i̱ tso'o ti na.

GÁLATAS 5:22

Xa' ña'a̱ cña ndu'ni Xtyi'i ycui' Ndyosi ne' cresiya ji'na: ndu'ni Ni cha' tyu'u tyiquee na ña'a̱ na ji'i̱ tya'a ñati̱ na; jua'a̱ ndu'ni Ni cha' chaa ti' na cuentya ji'i̱ Ni, cha' ti̱ ti tyi'i̱ tyiquee na, cha' talo tyiquee na ji'i̱ tya'a ñati̱ na; jua'a̱ ndu'ni Ni cha' ca tya'na ti' na ña'a̱ na ji'i̱ ñati̱, cha' xcui' tso'o ti cua'ni na lo'o ñati̱, cha' liñi ti cua'ni na lo'o ñati̱;

GÁLATAS 5:6

Lo'o jua'a̱ si chañi cha' stu'ba ntsu'u cha' ji'na lo'o Jesucristo, li' ná ndu'ni cha' masi ngulacua̱ na, masi ná ngulacua̱ na. Sca ti cha' ndulo tsa ji'na cha' cua'ni na, cha' xñi tso'o la na cha' ji'i̱ ycui' Ni; lo'o li' caca cua'ni na cha' tso'o ti tyu'u tyiquee na ña'a̱ na ji'i̱ tya'a ñati̱ na.

EFESIOS 2:10

Na cua ngüiñá Ni ji'i̱ ca ta'a na, cua ngua'ni stu'ba Ni cha' ji'na lo'o Jesucristo; juani cua nti' Ni cha' xcui' cha' tso'o ti cua'ni na lo'o ndi'i̱ na chalyuu, cha' cua laca nda Ni cña tso'o nu taca cua'ni sa scaa na nde chalyuu.

EFESIOS 3:17

ndijña na' ji'i̱ Ni cha' ca cuayá' ti' ma̱ cha' ngua'ni Ni cha' cua ndyanu Xtyi'i ycui' Jesús ne' cresiya ji'i̱ ma̱, nu lo'o ngusñi tso'o ma̱ cha' ji'i̱ ycui' Ndyosi; ndijña na' ji'i̱ Ni cha' tsa cu' ti tyu'u tyiquee ma̱ ña'a̱ ma̱ ji'i̱ tya'a ñati̱ ma̱, xqui'ya cha' tso'o tsa ngusñi su̱u̱ cha' bi' ne' cresiya ji'i̱ ma̱;

EFESIOS 4:2

Ná cua'ni tyucuaa ti' ma̱ lo'o tya'a ñati̱ ma̱, tso'o ti chcui' ma̱ lo'o lcaa ngu', talo tyiquee ma̱ ji'i̱ ngu'; jua'a̱ xtyucua ma̱ ji'i̱ ngu' cha' ca cuayá' ti' xa' ñati̱ cha' chañi cha' ntsu'u tyiquee ma̱ ña'a̱ ma̱ ji'i̱ tya'a ñati̱ ma̱.

EFESIOS 5:2

Tso'o ti tyu'u tyiquee ma̱ ña'a̱ ma̱ ji'i̱ ñati̱, cha' la cui' jua'a̱ ntsu'u tsa tyiquee Cristo ña'a̱ Ni ji'na. Nu lo'o ñaa Jesús chalyuu ni, cua ntaja'a̱ Jesús nda yu tyucui ña'a̱ ycui' ca yu cha' caca sca msta̱ ji'i̱ ycui' Ndyosi cuentya ji'na. Tso'o tsa ngua ti' ycui' Ndyosi li'.

EFESIOS 5:27

Ngua ti' Cristo cha' tyi'i̱ ñati̱ ji'i̱ yu ca slo ycui' Ndyosi lo'o tye chalyuu; tlyu tsa cha' tso'o caca nu lo'o tyi'i̱ na ñati̱ ji'i̱ Ni ca slo Ni tsa tlyu ti, nu lo'o lubii tyiquee na, nu lo'o nga'aa ntsu'u qui'ya ji'na, nu ná lo'o yabe' ji'na, nu ná lo'o chaca cha' cuxi, cha' ná talo ycui' Ndyosi ña'a̱ Ni ji'i̱ ni sca cha' cuxi.

FILIPENSES 2:15

cha' ná caca ñacui̱ ngu' cha' ntsu'u qui'ya ji'i̱ ma̱ li', lo'o jua'a̱ ná caja su lyiji cua'ni ma̱ sca cha' li'. Tso'o la si caca cuayá' ti' ngu' cha' chañi cha' laca ma̱ sñi' ycui' Ndyosi tyucui tyiquee ma̱, masi xcui' ndi'i̱ ti ma̱ chalyuu laja ñati̱ cuxi, laja ñati̱ nu chi̱i̱ nti' ngu' ña'a̱ ji'i̱ tya'a ngu'. Xqui'ya cu'ma̱ nga'a̱ cha' cañi cha' ji'i̱ Jesús lcaa su ndi'i̱ ñati̱ bi'; ñi'ya̱ nu ntyiji'i̱ xee cuii nde talya, jua'a̱ caca ma̱ xee nde chalyuu,

COLOSENSES 1:22

xqui'ya cha' tyucui ña'a̱ ycui' Cristo Sñi' Ni, nchcube' tsa yu lo'o ndyujuii ngu' ji'i̱ lo crusi. Jua'a̱ ngua'ni Ni tya li' cha' taca caca ma̱ ñati̱ ji'i̱ ycui' Ni, ñati̱ nu nga'aa ntsu'u yabe' hichu̱' ma̱ tsiya' ti, cha' nga'aa caca sta ngu' qui'ya ji'i̱ ma̱ lo'o Ni, nu lo'o ca̱a̱ Ni ca̱qui'ya Ni ji'na cha' tsalo'o Ni ji'na ca su ntucua Ni.

COLOSENSES 2:2

Jua'a̱ ndyu'ni na' cña, cha' caca tyucui ti' tyiquee ngu', cha' stu'ba ti caca tyiquee ngu' lo'o xa' la tya'a ngu'. Nga'aa cutsi̱i̱ ngu' nu lo'o chcui' ngu' cha' ji'i̱ Cristo li', xqui'ya cha' tso'o tsa nchca cuayá' ti' ngu' ji'i̱ cha' bi'. Jua'a̱ li' quijeloo cha' ji'i̱ ngu', cha' ycui' Cristo laca cha' bi', la cui' cha' ji'i̱ ycui' Ndyosi nu bilya caca cuayá' ti' ngu' ji'i̱ cua sa'ni la.

COLOSENSES 3:12

Ñati̱ ji'i̱ ycui' Ndyosi laca cu'ma̱ lacua; na cua ngusubi Ni ji'i̱ ma̱, xqui'ya cha' ntsu'u tsa tyiquee Ni ña'a̱ Ni ji'i̱ ma̱. Bi' cha' ntsu'u cha' cua'ni tya'na ti' ma̱ ji'i̱ xa' ñati̱; tso'o ti cua'ni ma̱ lo'o ngu', ni ná cua'ni tyucuaa ti' ma̱ lo'o ngu', masi tiya' ti chcui' ma̱ lo'o ngu', jua'a̱ talo tsa tyiquee ma̱ ji'i̱ ngu'.

1 TESALONICENSES 3:12

Lo'o jua'a̱ ndijña ya ji'i̱ nu Xu'na na cha' cua'ni Ni cha' tso'o la tyu'u tyiquee ma̱ ña'a̱ ma̱ ji'i̱ tya'a ma̱, lo'o jua'a̱ ji'i̱ lcaa ñati̱, cha' ntsu'u tsa tyiquee ya ña'a̱ ya ji'i̱ cu'ma̱ xqui'ya ycui' Ndyosi;

1 TESALONICENSES 4:7

cha' cua ngusubi ycui' Ndyosi ji'na cha' caca na ñati̱ nu lubii cresiya ji'i̱, si'i cha' caca na ñati̱ nu ndyu'ni suba'.

2 TIMOTEO 1:9

cha' ycui' Ndyosi laca nu ngua'ni lyaá ji'na; cua ngusubi Ni ji'na cha' cua'ni na cña nu nti' Ni cha' cua'ni na. Ntaja'a̱ Ni cua'ni lyaá Ni ji'na cha' tso'o tyiquee ti Ni, masi si'i xqui'ya cha' tso'o nu ngua'ni ycui' ca na. Ntsu'u tsa tyiquee Ni ña'a̱ Ni ji'na; jua'a̱ laca cha' nu ngulu'u Jesucristo ji'na, cha' ngua ti' ycui' Ndyosi cua'ni Ni cha' tso'o lo'o na nu lo'o tya lyiji cuiñá Ni chalyuu.

2 TIMOTEO 2:10

bi' cha' talo tyiquee na' ji'i̱ ngu', masi nchcube' tsa ngu' jna'. Talo na' ji'i̱ cha' cuxi bi' cuentya ji'i̱ ca ta'a ñati̱ nu ngusubi ycui' Ndyosi ji'i̱, cha' lo'o ñati̱ bi' ngua'ni lyaá Jesucristo ji'i̱, cha' caja chalyuu nu ná nga'a̱ cha' tye ji'i̱ ñati̱ bi'. Caca tyi'i̱ ngu' bi' ca slo ycui' Ndyosi su tso'o tsa ña'a̱ lcaa cha'.

2 TIMOTEO 2:19

Liñi tsa laca cha' nu nchcui' ycui' Ndyosi; cua'ni Ni cha' ná xtyanu na cha' bi', si jlya ti' na cha' nu nchcui' ycui' Ndyosi ndi'ya̱: “Cua nslo ycui' nu Xu'na na tilaca laca ñati̱ ji'i̱ Ni”. Lo'o chaca cha' nchcui' ndi'ya̱: “Cua ña'a̱ ca ñati̱ nu ntsu'u cha' ji'i̱ lo'o Cristo ni, ntsu'u cha' xtyanu ngu' bi' lcaa cha' cuxi”. Jua'a̱ nacui̱ quityi ji'i̱ ycui' Ndyosi.

SANTIAGO 2:5

Cu'ma̱ ngu' tya'a na nu tyaca'a tsa ma̱ 'na, cui'ya ma̱ cuentya ji'i̱ cha' re: Cua ngusubi ycui' Ndyosi ji'i̱ ñati̱ ti'i cha' taca xñi tso'o ngu' cha' ji'i̱ ycui' Ni; ta Ni chalyuu tso'o ji'i̱ ngu' bi' li', la cui' chalyuu nu nacui̱ Ni cha' caja ji'i̱ ñati̱ nu ntsu'u tsa tyiquee ña'a̱ ji'i̱ ycui' Ni. Masi ti'i tsa ñati̱ bi' nde chalyuu, pana culiya' ngu' cuentya ji'i̱ ycui' Ndyosi.

1 PEDRO 1:2

Tya clyo la cua jlo ti' ycui' Ndyosi Sti na lcaa ña'a̱ cha' nu caca nde loo la, bi' cha' ngusubi ycui' Ni ji'i̱ ma̱. Lo'o juani ndyu'ni Xtyi'i ycui' Ndyosi cña cha' tyanu lubii cresiya ji'i̱ ma̱, cha' taquiya' ma̱ ji'i̱ ycui' Jesucristo; na cua ngujuii yu lo crusi xqui'ya cu'ma̱, ndyalú tañi yu cha' caja ñi'ya̱ caca lubii cresiya ji'i̱ ma̱. Lo'o juani nti' na' cha' ña'a̱ ti tya cua'ni ycui' Ndyosi cha' tso'o lo'o ma̱, cha' jua'a̱ ti̱ ti tyi'i̱ tyiquee ma̱ lcaa hora.

1 PEDRO 1:20

Tya clyo lo'o bilya cuiñá Ni chalyuu, cua jlo ti' ycui' Ndyosi cha' ntsu'u cha' cua'ni Cristo cña tonu bi'; pana ngujuatya ycui' Ni ni jacua' nu tyalaa tyempo bi'. Li' ñaa Cristo, ngua'ni yu cña bi' cuentya ji'na, cha' tyacua cha' tso'o bi' ji'na.

1 PEDRO 2:9

Pana cu'ma̱ ni, cua ngusubi ycui' Ndyosi ji'i̱ cu'ma̱ cha' caca ma̱ ña'a̱ tsaca taju ñati̱ nu ndyu'ni tlyu ji'i̱ ycui' Ni. Laca ma̱ ñi'ya̱ laca sca latya sti jo'ó nu cuentya ji'i̱ ycui' Ndyosi nu laca loo tsiya' ti; ñi'ya̱ tsaca taju ñati̱ lubii laca ma̱ cha' cua'ni tlyu ma̱ ji'i̱ ycui' Ndyosi lcaa tsa̱. Ndu'ni Ni lo'o ma̱: “Ñati̱ 'na laca ma̱”, nacui̱ Ni. Bi' cha' nti' tsa Ni cha' chcui' ma̱ lo'o lcaa ñati̱ lcaa ña'a̱ cha' tso'o nu ngua'ni ycui' Ndyosi lo'o ma̱; cua ngulo Ni ji'i̱ ma̱ ji'i̱ chalyuu cuxi su talya tsa ña'a̱, cha' tya'a̱ ma̱ ca su ndubi tsa xee ji'i̱ ycui' Ni.

2 PEDRO 3:14

Cu'ma̱ tya'a tso'o na, na ndu̱ ti' ma̱ ji'i̱ cha' bi', bi' cha' ntsu'u cha' cua'ni ma̱ xcui' cha' tso'o ti, xcui' cha' lubii ti lo'o tya'a ñati̱ ma̱, cha' ti̱ ti tyi'i̱ tyiquee ma̱ cuentya ji'i̱ ycui' Ni.

1 JUAN 4:16

Ngua cuayá' ti' na li', cha' ntsu'u tsa tyiquee ycui' Ndyosi ña'a̱ Ni ji'na; jua'a̱ jlya ti' na li', cha' xcui' ntsu'u tsa tyiquee ycui' Ni ña'a̱ Ni ji'i̱ ñati̱ chalyuu. Lo'o ñati̱ nu jua'a̱ tso'o nti' ña'a̱ ngu' ji'i̱ tya'a ñati̱, nu xcui' jua'a̱ ndu'ni ngu' laja lo'o ndi'i̱ ngu' chalyuu, cua stu'ba ntsu'u tyiquee ngu' bi' lo'o ycui' Ndyosi; la cui' jua'a̱ stu'ba ntsu'u tyiquee ycui' Ndyosi lo'o ngu' bi' li'.

APOCALIPSIS 13:8

lcaa ñati̱ tyucui ña'a̱ chalyuu cua'ni tlyu ngu' ji'i̱ na'ni bi' li', si ná nscua xtañi ngu' lo quityi ji'i̱ ycui' Ndyosi. Nu ngua tya clyo la lo'o tya lyiji cuiñá Ni chalyuu, tya li' nguscua Ni xtañi ñati̱ nu ná nga'a̱ cha' tye chalyuu ji'i̱. Cua ndyanu quityi bi' cuentya ji'i̱ nu ñi'ya̱ ña'a̱ xlya' nu cua ndyujuii ñati̱ ji'i̱ tsaca quiya'.

APOCALIPSIS 17:8

Na'ni nu cua na'a̱ nu'u̱ jua, ngutu'u bi' nu ngua tya sa'ni la, nga'aa lu'ú bi' juani; pana cua ngulala ti tyu'ú ni' chaca quiya', masi nscua nde tyuquee qui'ñi bi', cha' tyaa ni' ca chalyuu talya su tye ni' cati̱ ni' tsiya' ti ―nacui̱―. Cua ña'a̱ ca ñati̱ nu ná nscua xtañi lo quityi ji'i̱ ycui' Ndyosi, quiña'a̱ tsa cha' culacua ti' ngu' lo'o ña'a̱ ngu' ji'i̱ na'ni bi'; pana tya clyo lo'o tya lyiji xana chalyuu re, cua nscua xtañi ñati̱ nu cua nda ycui' Ndyosi chalyuu nu ná nga'a̱ cha' tye ji'i̱. Ngutu'ú na'ni bi' nu ngua tya sa'ni la, masi nga'aa lu'ú bi' juani; pana ña'a̱ ti tya tyu'ú bi', masi chaca tya quiya'.