EFESIOS 1:13 - Chatino Tataltepec

¹³ Lo'o li' la cui' jua'a̱ ndyaca lo'o cu'ma̱. Clyo ndyuna ma̱ cha' liñi bi' ji'i̱ Cristo; tso'o tsa ngua ti' ma̱ lo'o ndacha' ngu' cha' bi' ji'i̱ ma̱, cha' cua ngua'ni lyaá Ni ji'i̱ ma̱ ya' nu cuxi. Ngusñi ma̱ cha' ji'i̱ Cristo li', lo'o li' nda Ni Xtyi'i ycui' Ni cha' tyanu ne' cresiya ji'i̱ ma̱, ñi'ya̱ si na cua ngusta Ni cuayá' nu ji'i̱ ycui' ca Ni hichu̱' ma̱ cha' laca ma̱ ñati̱ ji'i̱ Ni; la cui' cña nu nacui̱ Ni cha' cua'ni Ni, cua laca ngua'ni Ni li'.

EFESIOS 1:13 Iomraidhean Croise

SAN LUCAS 11:13

Bi' cha' lacua, si jlo ti' ma̱ cha' ta ma̱ na tso'o cacu sñi' ma̱, masi xña'a̱ tyiquee ma̱, la cui' jua'a̱ jlo ti' ycui' Ndyosi Sti ma̱ nu ntucua nde cua̱; lye la cua'ni tya'na ti' Ni ji'i̱ ma̱, cha' tya ta Ni Xtyi'i ycui' Ni tyanu ne' cresiya ji'i̱ ma̱ si jña ma̱ cha' bi' ji'i̱ Ni.

SAN LUCAS 24:49

Lo'o jua'a̱ ta na' Xtyi'i ycui' na' ji'i̱ ma̱, cha' cua nchcui' Sti na' cha' ta Ni Xtyi'i ycui' Ni ji'i̱ ma̱; bi' cha' tyanu ma̱ nde Jerusalén re, ña'a̱ cuayá' nu caja juersa ji'i̱ Xtyi'i ycui' Ndyosi ji'i̱ ma̱. Tyu'u bi' nde cua̱ cha' ca̱a̱ tyanu ne' cresiya ji'i̱ ma̱.

SAN JUAN 1:17

Cua sa'ni nda jyo'o Moisés cha' lo'o ñati̱, lcaa ña'a̱ cña nu ntsu'u cha' cua'ni ñati̱ cuentya ji'i̱ ycui' Ndyosi. Pana nu lo'o ya̱a̱ Jesucristo ni, xa' ña'a̱ ngua'ni Ni; nda tsa Ni cha' xlya'be ji'na, ngulu'u Ni cha' liñi ji'na li'.

SAN JUAN 14:26

Tiya' la li' caca cuayá' la ti' ma̱ lcaa cha', nu lo'o culu'u Xtyi'i ycui' Ndyosi cha' bi' ji'i̱ ma̱ ―nacui̱ Jesús―. Na cua ta ti ycui' Ndyosi Sti na' ji'i̱ Xtyi'i ycui' Ni cha' ca̱a̱ Ni chalyuu cha' xtyucua Ni ji'i̱ ma̱ lcaa hora chacuayá' jna'. Lo'o jua'a̱ cua'ni nu bi' cha' tyi'u ti' ma̱ lcaa cha' nu cua nchcui' na' lo'o ma̱.

SAN JUAN 15:26

’Cua'ni na' cha' ca̱a̱ nu laca Xtyi'i ycui' Ni lo yuu, Xtyi'i nu ndu'u slo ycui' Ndyosi ―nacui̱ Jesús―. Bi' laca nu culu'u ji'i̱ ma̱ lcaa cha' nu liñi ca, bi' laca nu xtyucua ji'i̱ ma̱ lcaa tyempo chacuayá' 'na. Nu lo'o ca̱a̱ nu bi' lo yuu, li' culu'u Ni lcaa cha' liñi nu ntsu'u 'na ji'i̱ ma̱ ―nacui̱ Jesús―.

SAN JUAN 3:33

Si taquiya' na ji'i̱ cha' nu nda Jesús, li' ndu'ni na lo'o tya'a na cha' liñi tsa laca cha' nu nda ycui' Ndyosi lo'o na.

SAN JUAN 6:27

Tso'o la ―nacui̱ Jesús li'―, si cua'ni cña ti' ma̱ cha' caja sca cha' nu talo ji'i̱ ma̱; chañi cha' tyaala' ti' ma̱ li', si caja chalyuu nu ná nga'a̱ cha' tye ji'i̱ ma̱. Nu na cacu na ni, xtyi'i ti talo na bi', yala ti quiñu'u̱ na bi'. Pana na' nu lijya̱a̱ cha' caca na' ñati̱, ta na' sca cha' tso'o ji'i̱ ma̱ nu cua'ni cha' tyaala' ti' ma̱, lo'o ná tye tsiya' ti cha' bi' ji'i̱ ma̱ ―nacui̱―. Na cua nda ycui' Ndyosi Sti na' chacuayá' jna' cha' ta na' cha' tso'o bi' ji'i̱ ma̱.

LOS HECHOS 1:4

Bilya tyaa Jesús lo'o nchcui' yu lo'o ngu' bi', cha' tyanu ngu' quichi̱ Jerusalén. ―Jatya ma̱ ca quichi̱ re ―nacui̱ Jesús ji'i̱ ngu'―, ña'a̱ cuayá' nu ca̱a̱ Xtyi'i ycui' Ndyosi cha' tyanu Ni ne' cresiya ji'i̱ ma̱, ñi'ya̱ nchcui' Sti na' tya sa'ni la; jua'a̱ nda na' la cui' ti cha' lo'o ma̱ tsubi' ti.

LOS HECHOS 13:26

’Lcaa na nu laca na la cui' tya'a ñati̱ ji'i̱ jyo'o Abraham, lo'o jua'a̱ lcaa ma̱ nu ndaquiya' ma̱ ji'i̱ ycui' Ndyosi, cuentya ji'i̱ lcaa na laca cha' tso'o nu nda Ni lo'o na, cha' tso'o nu nchcui' ñi'ya̱ ndu'ni lyaá Ni ji'i̱ ñati̱ chalyuu.

LOS HECHOS 2:33

Li' ñaa ycui' Ndyosi ya̱qui'ya Ni ji'i̱ Jesús cha' tyaa yu ca slo ycui' Ni. Juani ndi'i̱ Jesús nde la'a tsu' cui̱ su tlyu ca su ntucua ycui' Ndyosi. Cua nda ycui' Ndyosi Sti yu Xtyi'i ycui' Ni ji'i̱ Jesús, lo'o nu juani cua nda Jesús Xtyi'i ycui' Ni cha' tyalaa nde chalyuu. Lcaa cha' nu cua ndyuna ma̱, lcaa cha' nu cua na'a̱ ma̱ tsa̱ juani, bi' laca cña nu ngua'ni ycui' Jesús.

ROMANOS 1:16

Ná ntyuju'u ti' na' tsiya' ti cha' culu'u na' cha' tso'o nu ntsu'u ji'i̱ Jesús ji'i̱ ñati̱. Lijya̱ cha' bi' lo'o lcaa chacuayá' ji'i̱ ycui' Ndyosi, cha' cua'ni lyaá Ni ji'i̱ lcaa ñati̱ nu xñi cha' ji'i̱ ycui' Ni. Tya clyo nda Ni cha' tso'o bi' lo'o ngu' judío ti, li' lo'o nda Ni cha' tso'o bi' lo'o ngu' xa' tsu'.

ROMANOS 4:11

ca tiya' la, li' ngulacua̱ yu jua'a̱. Sca cuayá' ti ngua bi', cha' caca cuayá' ti' ngu' cha' ngua tso'o cresiya ji'i̱ yu cuentya ji'i̱ ycui' Ndyosi, nu lo'o jlya ti ti' yu ji'i̱ Ni. Yala la ngua cha' ngusñi yu cha' ji'i̱ ycui' Ndyosi, tiya' la ngulacua̱ yu. Bi' cha' lcaa ma̱ nu ntsu'u ma̱ xa' tsu' nu ngusñi ma̱ cha' ji'i̱ Jesús, laca ma̱ ñi'ya̱ laca si Abraham laca jyo'o cusu' ji'i̱ ma̱ nu ya̱a̱ chalyuu tya clyo la. Lo'o xñi cua ña'a̱ ca na cha' ji'i̱ Jesús, li' quiñi cha' ji'i̱ ycui' Ndyosi lo'o na cha' caca lubii cresiya ji'na.

ROMANOS 6:17

Tso'o tsa nti' na' cha' tyucui tyiquee ma̱ ndyu'ni ma̱ cña ji'i̱ ycui' Ndyosi, tsa ña'a̱ cha' nu ngulu'u ngu' ji'i̱ ma̱. Nu cha' cuxi, bi' laca nu ngua loo ji'i̱ ma̱; pana lo'o cua ngulaá ma̱ ji'i̱ nu cuxi bi', li' nguxana ma̱ ndu'ni ma̱ cña cha' caja chaca chalyuu su caca lubii cresiya ji'i̱ ma̱, cha' ycui' Ndyosi laca loo ji'i̱ ma̱ juani.

2 CORINTIOS 1:22

Ndi'ya̱ laca ñi'ya̱ si ngusta ycui' Ni sca cuayá' nu ji'i̱ Ni hichu̱' na, nu lo'o nda Ni Xtyi'i ycui' Ni nu ndyanu ne' cresiya ji'na. Xtyi'i ycui' Ndyosi laca nu nda ycui' Ndyosi ji'na yala la, cha' caca cuayá' ti' na cha' chañi cha' cua'ni Ni lo'o na lcaa ña'a̱ cha' nu nacui̱ Ni cha' cua'ni Ni.

2 CORINTIOS 6:7

liñi tsa cha' ji'i̱ ycui' Ndyosi nu nchcui' ya lo'o ñati̱, lo'o jua'a̱ tyucui chacuayá' ji'i̱ ycui' Ndyosi nda Ni nu ndya'a̱ lo'o ya. Bi' cha' nu lo'o ña'a̱ ngu' lcaa cha' nu ndyaca ji'i̱ ya, li' taca ca cuayá' ti' ngu' cha' cña ji'i̱ ycui' Ndyosi laca nu ndya'a̱ ya lo'o. Na cua ngua tso'o cresiya ji'i̱ ya juani cuentya ji'i̱ ycui' Ni, bi' cha' cua ngujui juersa ji'i̱ ya cha' taca xu̱u̱ tya'a ya lo'o nu xña'a̱; jua'a̱ taca cua'a ya ji'i̱ nu bi', cha' ná cua'ni ñu'u̱ nu bi' ji'i̱ ya.

GÁLATAS 3:14

Jua'a̱ ngua cha' lo'o ngu' xa' tsu' caja cha' tso'o ji'i̱ ngu' xqui'ya Jesucristo, cha' tso'o nu cua ngüiñi ji'i̱ ycui' Ndyosi lo'o nu jyo'o Abraham bi' nu ngua sa'ni. Li' caca ji'i̱ ngu' xa' tsu' ñi'ya̱ nu nchcui' ycui' Ndyosi lo'o Abraham, cha' caja Xtyi'i ycui' Ni ji'i̱ lcaa na nu lo'o xñi na cha' ji'i̱ Cristo.

EFESIOS 4:21

Chañi cha' cua ndyuna ma̱ cha' ji'i̱ Cristo, cua ngua tsa'a̱ tso'o ma̱ cha' liñi ji'i̱ Jesús nu ngulu'u ngu' ji'i̱ ma̱;

EFESIOS 4:30

Ná cua'ni ma̱ cha' ca xñi'i̱ ti' Xtyi'i ycui' Ndyosi; nu Xtyi'i ycui' Ndyosi ni, ñi'ya̱ laca si cua ngusta Ni cuayá' nu ji'i̱ ycui' ca Ni hichu̱' na, cha' laca na ñati̱ ji'i̱ Ni, jua'a̱ laca bi'. Tyanu bi' lo'o na ña'a̱ cuayá' nu tye chalyuu ji'na, ña'a̱ cuayá' nu tyalaa tsa̱ nu cua'ni lyaá Ni ji'na.

1 TESALONICENSES 2:13

Lo'o jua'a̱ lcaa hora ndya ya xlya'be ji'i̱ ycui' Ndyosi cuentya ji'i̱ ma̱, xqui'ya cha' nu lo'o ndyuna ma̱ cha' tso'o ji'i̱ ycui' Ndyosi, la cui' cha' nu cua nda ya lo'o ma̱, li' jlya ti' ma̱ cha' bi'. Ngua cuayá' ti' ma̱ cha' laca cha' bi' nu cha' liñi ji'i̱ ycui' Ndyosi, si'i cha' ngua'ya hique sca ñati̱ ti; ngusñi ma̱ cha' bi' li', bi' cha' ndyu'ni ycui' Ndyosi cña ne' cresiya ji'i̱ ma̱.

2 TIMOTEO 2:15

Lye tsa cua'ni nu'u̱ cña nu cua nda ycui' Ndyosi jinu'u̱, cha' ná ca tyuju'u ti' nu'u̱ xqui'ya cña nu ngua'ni nu'u̱ nu lo'o tsaa nu'u̱ tyi'i̱ ca slo Ni. Chañi tsa laca cha' ji'i̱ ycui' Ndyosi, bi' cha' tya culu'u la nu'u̱ cha' liñi bi' ji'i̱ ngu' lacua; tso'o ti caca tyiquee Ni ña'a̱ Ni jinu'u̱ li'.

2 TIMOTEO 2:19

Liñi tsa laca cha' nu nchcui' ycui' Ndyosi; cua'ni Ni cha' ná xtyanu na cha' bi', si jlya ti' na cha' nu nchcui' ycui' Ndyosi ndi'ya̱: “Cua nslo ycui' nu Xu'na na tilaca laca ñati̱ ji'i̱ Ni”. Lo'o chaca cha' nchcui' ndi'ya̱: “Cua ña'a̱ ca ñati̱ nu ntsu'u cha' ji'i̱ lo'o Cristo ni, ntsu'u cha' xtyanu ngu' bi' lcaa cha' cuxi”. Jua'a̱ nacui̱ quityi ji'i̱ ycui' Ndyosi.

2 TIMOTEO 3:15

Tya cuañi' tsa nu'u̱ lo'o nguxana nu'u̱ ndyaca tsa'a̱ nu'u̱ lo quityi ji'i̱ ycui' Ndyosi; quityi bi' laca nu culu'u liñi ji'na ñi'ya̱ taca clyaá na ji'i̱ nu cuxi, si xñi tso'o na cha' ji'i̱ Jesucristo.

TITO 2:11

Tso'o tsa ndu'ni ycui' Ndyosi lo'o ñati̱ chalyuu cha' cua nti' Ni cha' clyaá ngu' ji'i̱ nu cuxi;

HEBREOS 2:3

La cui' ti cha' caca ji'na juani, si ná taquiya' na ji'i̱ cha' nu cua ndyuna na bi', cha' clyaá na ji'i̱ nu cuxi; ná caja ñi'ya̱ clyaá na ji'i̱ ycui' Ndyosi lo'o cua ndye chalyuu, nu lo'o cua'ni cuayá' Ni ji'i̱ lcaa ñati̱. Clyo ndacha' ycui' Jesús nu Xu'na na cha' bi' ji'i̱ ñati̱ nu ngua tsa'a̱ ji'i̱ yu, jua'a̱ ndyuna ngu' bi' cha' nu nchcui' yu; tiya' la li', lo'o ji'na ndacha' ngu' bi' cha' bi'. Bi' cha' jlo ti' na cha' chañi laca cha' bi'.

SANTIAGO 1:18

Lcaa cha' nu liñi ca cuentya ji'i̱ ycui' Ndyosi, cua ngulu'u Ni cha' bi' ji'na cha' caca na ñati̱ ji'i̱ ycui' Ni, cha' jua'a̱ nti' Ni cha' caca; cua nti' Ni cha' caca na loo ji'i̱ lcaa ca lo na nu cua ngüiñá ycui' Ni, jua'a̱ nti' Ni.

SANTIAGO 1:21

Lo'o jua'a̱ nga'a̱ cha' culochu̱' na lcaa cha' suba', lcaa cha' cuxi nu tya ntsu'u ne' cresiya ji'na; tucuá na cha' ji'i̱ ycui' Ndyosi lacua, xñi tso'o na lcaa cha' nu nda Ni cha' tyanu ne' cresiya ji'na, cha' bi' laca cha' nu taca cua'ni lyaá ji'na ji'i̱ nu cuxi nu ntsu'u ji'na.

1 PEDRO 2:10

Nu juani laca ma̱ ñati̱ ji'i̱ ycui' Ndyosi, masi nu ngua tya tsubi' la ná ntsu'u cha' ji'i̱ ma̱ lo'o ycui' Ndyosi tsiya' ti. Lo'o jua'a̱ cua nchca cuayá' ti' ma̱ juani cha' ndyu'ni tya'na tsa ti' Ni ji'i̱ ma̱, masi tya tsubi' la ná nchca cuayá' ti' ma̱ cha' ji'i̱ ycui' Ndyosi tsiya' ti.

APOCALIPSIS 7:2

Li' na'a̱ na' ndu'u tucua chaca yu xca̱, nu ndu'u tucua lijya̱ nde su ntyucua cuichaa. Ndyi'ya yu cuayá' nu cua nda ycui' Ndyosi ji'i̱ yu, cha' cua'a̱ yu hichu̱' ñati̱ ji'i̱ ycui' Ndyosi; la cui' Ni nu nda chalyuu ji'na laca bi'. Cui̱i̱ nchcui' yu lo'o nu jacua tya'a xca̱ nu ntsu'u chacuayá' ji'i̱ cha' cua'ni ñu'u̱ ji'i̱ chalyuu lo'o ji'i̱ tyujo'o.