APOCALIPSIS 3:11 - Chatino Tataltepec

¹¹ Cua tya̱a̱ ti na'. Ná ta ma̱ chacuayá' cha' culiji yu'u jua'a̱ ti cha' tso'o nu ntsu'u ne' cresiya ji'i̱ ma̱, tya cua'ni ma̱ ñi'ya̱ nu ngua'ni ma̱ tya sa'ni la. Tii ti ti' tyi'i̱ ma̱ cha' caja chalyuu tso'o nu ta ycui' Ndyosi ji'i̱ ma̱ lo'o tye chalyuu re.

APOCALIPSIS 3:11 Iomraidhean Croise

1 CORINTIOS 9:25

Lo'o cua xna ti ngu' sca posta ni, ná taquiya' ngu' ji'i̱ sca cha' nu cua'a ji'i̱ ngu' cha' ná xna tso'o ngu'; talo ngu' ña'a̱ cuayá' nu tyiji̱loo ngu' ji'i̱ tya'a ngu', cha' cua'ni ngu' ngana. Su cua ndye, li' caja xi cha' tso'o ji'i̱ ngu' nu ngua'ni ngana bi', masi xti ti tyempo talo cha' bi', pana xa' ña'a̱ cha' ndyaca lo'o na. Lye tsa ndyu'ni cña ti' na lcaa hora, ña'a̱ cuayá' ta Ni sca cha' tso'o ji'na, sca cha' nu ná nga'a̱ cha' tye tsiya' ti.

FILIPENSES 4:5

Xcui' cua'ni tya'na tsa ti' ma̱ lo'o lcaa ñati̱, cha' ca cuayá' ti' ñati̱ cha' jua'a̱ ndu'ni ma̱. Cua ngulala ti ca̱a̱ ycui' nu Xu'na na chaca quiya'.

2 TIMOTEO 2:5

Jua'a̱ si ntsu'u sca cha' cuijya ji'i̱ ngu' lo'o tya'a ngu' ni, cua laca nscua cha' ñi'ya̱ nu tso'o la quijya ngu', cha' taca cua'ni tsaca yu ngana ji'i̱ tya'a yu. Si ná taquiya' ngu' ji'i̱ cha' nu cua nscua bi', li' ná caja cha' xlya'be ji'i̱ ñati̱ nu cua ngua'ni ngana ji'i̱ tya'a yu lo'o cua ndye cha' cuijya ji'i̱ ngu' li'.

2 TIMOTEO 4:8

bi' cha' jlo ti' na' cha' ntsu'u sca cha' tso'o nu tyacua 'na; ta ycui' nu Xu'na na cha' tso'o bi' jna' nu lo'o tyalaa tsa̱ lo'o cua'ni cuayá' Ni ji'i̱ lcaa ñati̱, cha' liñi tsa ndu'ni cuayá' ycui' Ndyosi. Ta Ni cha' tso'o bi' ji'i̱ lcaa ñati̱ nu ntajatya tsa ji'i̱ Cristo ni jacua' ca̱a̱ Ni chaca quiya', xqui'ya cha' ntsu'u tsa tyiquee ngu' ña'a̱ ngu' ji'i̱ Ni; si'i jna' ti ta Ni cha' bi'.

SANTIAGO 1:12

Tso'o caca tyiquee ñati̱ nu ña'a̱ ti nxñi cha' ji'i̱ Jesús, masi tyacua cua ña'a̱ ca cha' ti'í ji'i̱ ngu'. Tso'o si talo ngu' tyiquee', ña'a̱ cuayá' tye cha' ti'í bi' ji'i̱ ngu', cha' caja chalyuu nu ná nga'a̱ cha' tye ji'i̱ ngu' bi' li'; bi' laca cha' tso'o nu cua nacui̱ Ni cha' ta Ni ji'i̱ ñati̱ nu ntsu'u tsa tyiquee ña'a̱ ji'i̱ ycui' Ni.

SANTIAGO 5:9

Cu'ma̱ tya'a ngusñi na cha' ji'i̱ ycui' Ni, ná chcui' ma̱ cha' ti'í ji'i̱ ngu' tya'a ma̱, cha' ná sta Ni qui'ya ji'i̱ ma̱ li'. Cua ngulala ti tyalaa ycui' nu Bese nu laca loo ca su ndi'i̱ na.

APOCALIPSIS 1:3

Tso'o tsa caca tyiquee ma̱, ñati̱ nu chcui' lo quityi re, jua'a̱ cu'ma̱ lo'o cuna ma̱ cha' nu nchcui' quityi re, lcaa ña'a̱ cha' nu cua lijya̱ ti cha' caca nde chalyuu; nu lo'o taquiya' na ji'i̱ lcaa cha' nu nscua re, tso'o tsa caca tyiquee na li'. Lo'o jua'a̱ cua ngulala ti caca cha' nu nscua re.

APOCALIPSIS 16:15

“Cua'a̱ jyaca̱ ma̱”, nacui̱ Jesús, “tsiya' ca tyu'u tucua na' tya̱a̱ na' ñi'ya̱ nti' sca nu cuaana. Tso'o caca tyiquee ñati̱ nu tii ti ti' tyi'i̱ chalyuu, xqui'ya cha' ngusñi ngu' cha' jna'; nga'aa ca tyuju'u ti' ngu' bi' slo ñati̱ lo'o tyalaa hora nu tya̱a̱ na' li'.” Jua'a̱ nacui̱ Jesús ji'i̱ ñati̱ ji'i̱ Ni.

APOCALIPSIS 2:10

Ná cutsi̱i̱ ma̱ ji'i̱ cha' ti'í nu caca ji'i̱ ma̱ nde loo la, masi cua'ni nu xña'a̱ cha' tyu̱u̱ tya'a ma̱ tsaa ma̱ xi ne' chcua̱. Cua nti' yu cua'ni cuayá' yu ji'i̱ ma̱ si ña'a̱ ti tya nxñi ma̱ cha' jna'. Pana tii ti tsa̱ xcube' yu ji'i̱ ma̱, nacui̱ Ni. Ña'a̱ ti tyucui tyiquee ma̱ xñi ma̱ cha' ji'i̱ ycui' Ndyosi Sti na', masi cajaa ma̱, cha' ná nga'a̱ cha' tye chalyuu nu ta na' ji'i̱ ma̱ nde loo la li'.

APOCALIPSIS 2:13

Cua jlo ti' na' lcaa ña'a̱ nu ndu'ni ma̱, nacui̱ Ni. Jlo ti' na' cha' laca Satanás loo ca su ndi'i̱ cu'ma̱; pana masi jua'a̱ laca cha', tya tso'o tsa nxñi ma̱ cha' 'na, nacui̱ Ni. Bilya tya'a̱chu̱' ma̱ ji'i̱ cha' jna'; ña'a̱ ti jlya ti' ma̱ 'na, masi tyempo cuxi nu ngua li', nu lo'o ndyujuii ngu' ji'i̱ jyo'o Antipas. Ná ndyutsi̱i̱ yu bi', nchcui' yu cha' 'na ca quichi̱ tyi ma̱ su ntucua Satanás loo.

APOCALIPSIS 2:25

masi sca ti cha' chcui' na' lo'o ma̱, cha' ña'a̱ ti tya tyanu tso'o cha' ne' cresiya ji'i̱ ma̱, lcaa cha' nu cua ndyuna ma̱ tya tsubi' la; tyanu cha' bi' ña'a̱ cuayá' nu ca̱a̱ na', nacui̱ Jesús.

APOCALIPSIS 22:12

―Cua'a̱ jyaca̱ ma̱ ji'i̱ cha' nu chcui' na' re ―nacui̱ ycui' Jesús li'―. Yala ti ca̱a̱ na' chaca quiya'. Lo'o ca̱a̱ na', li' tyi'u ti' na' cha' cua'ni na' lo'o lcaa ñati̱ ñi'ya̱ nu ngua'ni ngu' lo'o ya̱a̱ ngu' chalyuu; tso'o tsa caca ji'i̱ ngu' nu ngua'ni cha' tso'o, lo'o jua'a̱ cha' ti'í caja ji'i̱ ngu' nu ngua'ni cha' cuxi.

APOCALIPSIS 22:20

Ycui' Jesús nchcui' cha' liñi tsa nscua lcaa cha' re: ―Chañi cha' bi'. Yala ti ca̱a̱ na' chaca quiya' ―nacui̱ Ni. Jua'a̱ caca tu'ni. Ca̱a̱ nu'u̱ lacua, La Jesús.

APOCALIPSIS 22:7

―Yala ti tya̱a̱ na' chaca quiya' ―nacui̱ Jesús. Tso'o tsa caca tyiquee lcaa ñati̱ nu taquiya' ji'i̱ cha' nu cua nda Ni lo'o na', nu cua nscua na' lo quityi re; cha' bi' laca nu ndacha' ji'na ñi'ya̱ caca chalyuu nde loo la.

APOCALIPSIS 3:3

Tyi'u ti' ma̱ cha' tso'o tsa ngusñi ma̱ cha' 'na nu lo'o ngulu'u ngu' cha' ji'i̱ ma̱ tya clyo; taquiya' ma̱ ji'i̱ cha' bi' chaca quiya', pana culochu̱' ma̱ cha' cuxi nu ndyu'ni ma̱ juani, nacui̱ Jesús. Si ná tyaja'a̱ ma̱ taquiya' ma̱ cha' 'na, li' tsiya' ca tyu'u tucua na' ca̱a̱ na' slo cu'ma̱, ñi'ya̱ nti' lijya̱ sca nu cuaana; ca̱a̱ na' cha' xcube' na' ji'i̱ ma̱ lo'o ná ca tii ma̱ ni hora laca nu ca̱a̱ na', nacui̱ Ni.

APOCALIPSIS 4:10

Lcaa quiya' lo'o ndyula tu'ba na'ni bi', li' ndyatu̱ sti̱' nu ngu' cusu' bi' nde loo su ntucua ycui' Ni lo yaca xlya tlyu bi'; ndu'ni tlyu ngu' cusu' bi' ji'i̱ ycui' Ni cha' lcaa yija̱ lu'ú Ni. Li' nda'ya ngu' sne' oro nu ntucua hique ngu', nsta ngu' ji'i̱ nde loo su tlyu su ntucua ycui' Ni. Ndi'ya̱ nchcui' ngu' lo'o Ni li':

APOCALIPSIS 4:4

Nde chu̱' la ntucua xa' la yaca xlya; lo yaca bi' ntyucua calaa ntucua jacua tya'a ngu' cusu', tsa lo scuii ti ntucua ngu' tyi'i̱ ca chu̱' su ntucua Ni. Lacu' ngu' bi' late' ngati̱, jua'a̱ ntucua sne' oro hique scaa ngu'.