APOCALIPSIS 3:10 - Chatino Tataltepec

¹⁰ Cua ndyi'u ti' ma̱ cha' nu nacui̱ na' ji'i̱ ma̱ tsubi', cha' talo tyiquee ma̱ cha' tu̱ ti' ma̱ 'na ni tsa̱ tya̱a̱ na' chaca quiya'; bi' cha' juani cua'ni na' cha' ná sca caca ji'i̱ ma̱ lo'o tyalaa tyempo cuxi nde chalyuu. Cua lijya̱ caca cha' cuxi bi', nu cua'ni cuayá' ji'i̱ lcaa ñati̱ chalyuu.

APOCALIPSIS 3:10 Iomraidhean Croise

SAN MATEO 24:14

Ntsu'u cha' culu'u ma̱ cha' jna' ji'i̱ ñati̱, lcaa cha' tso'o nu nchcui' na', ñi'ya̱ caca lo'o laca ycui' Ndyosi loo ne' cresiya ji'i̱ ñati̱; ntsu'u cha' chcui' ma̱ cha' bi' lo'o ñati̱ tyucui ña'a̱ chalyuu, cha' caca cuayá' ti' ngu' ji'i̱ cha' bi' nde lcaa nasiyu̱. Lo'o li' tye chalyuu.

SAN MATEO 26:41

Tii ti ti' ma̱ tyi'i̱ ma̱ juani lacua, cha' chcui' ma̱ lo'o ycui' Ndyosi cha' ná tyiji̱loo nu cuiñaja ji'i̱ ma̱. Jlo ti' na' cha' tyucui tyiquee ma̱ ntaja'a̱ ma̱ cua'ni ma̱ cña re 'na, pana ná tyu'u scua juersa ji'i̱ ma̱, yala tsa ndyaja' ma̱.

SAN MATEO 6:13

Ná ta nu'u̱ chacuayá' cha' cojolaqui cha' cuxi ji'i̱ ya, pana cua'ni lyaá nu'u̱ ji'i̱ ya ya' nu xña'a̱. Nu'u̱ laca loo tsiya' ti; lcaa chacuayá' nu ntsu'u nde chalyuu, lo'o jua'a̱ chacuayá' nu ntsu'u nde cua̱, jinu'u̱ ntsu'u lcaa chacuayá' bi'. Ná nga'a̱ cha' tye cha' tlyu tsa laca nu'u̱. Jua'a̱ caca cha' tu'ni. Jua'a̱ ñacui̱ ma̱ ji'i̱ ycui' Ndyosi.

SAN MARCOS 14:9

Chañi cha' nu chcui' na' lo'o ma̱ juani, cha' lcaa su cañi cha' jna' tyucui ña'a̱ chalyuu, ca bi' cuna ñati̱ lcaa cha' nu ngua'ni nu cuna'a̱ re juani, cha' tyi'u ti' ngu' cha' tso'o tsa cña nu ngua'ni nu cuna'a̱ re.

SAN LUCAS 2:1

Tyempo bi', ñati̱ nu laca loo la tyucui ña'a̱ chalyuu bi' ngua nu emperador; Augusto naa yu, lo'o li' ngulo yu cña cha' xcua xtañi ngu' lcaa quichi̱ lo quityi.

SAN JUAN 17:6

’Lcaa ca cha' ñi'ya̱ laca ycui' nu'u̱ ni, cua ndye nchcui' na' cha' bi' lo'o ñati̱ chalyuu nu cua ngusubi nu'u̱ ji'i̱ cha' caca ñati̱ jna', ña'a̱ cuayá' nu ndyuloo tso'o ngu' jinu'u̱ ―nacui̱―. Ñati̱ jinu'u̱ laca ngu' bi', pana cua nda nu'u̱ ngu' bi' jna'. Cua ndaquiya' ngu' lcaa cha' nu nda nu'u̱ lo'o ngu'.

ROMANOS 1:8

Su nguxana ti quityi re, ndyu'ni tlyu na' ji'i̱ ycui' Ndyosi xqui'ya Jesucristo. Tso'o tsa nti' na' cha' cua ngusñi lcaa tya'a ma̱ cha' ji'i̱ Jesús, ca lcaa quichi̱ ndañi cha' jlya ti' ma̱ cha' bi'.

1 CORINTIOS 10:13

Lcaa quiya' lo'o tyacua sca cha' cuxi ji'i̱ ma̱, ná cube ti' ma̱ li', la cui' jua'a̱ ndyaca ji'i̱ cua ña'a̱ ca ñati̱ chalyuu. Pana ná cube ti' ma̱, ña'a̱ ycui' Ndyosi ji'na; lcaa cña nu nacui̱ Ni cha' cua'ni Ni cuentya ji'na, ndu'ni Ni cña bi'. Ná ta Ni chacuayá' cha' tyiji̱loo sca cha' cuxi ji'i̱ ma̱ ña'a̱ cuayá' nu nga'aa caca xtyanu ma̱ ji'i̱; pana la cui' hora lo'o cua cñilo'o ti cha' cuxi bi' ji'i̱ ma̱, li' xtyucua Ni ji'i̱ ma̱ cha' ná cua'ni ma̱ ji'i̱, lo'o li' taca clyaá ma̱ ji'i̱ cha' cuxi bi'.

EFESIOS 6:13

Pana cha' nu cua nchcui' ycui' Ndyosi lo'o na ni, ñi'ya̱ laca ste' sendaru nu ndya'a̱ cusu̱u̱, jua'a̱ laca cha' bi'; xcui' chcua̱ laca ste' sendaru cha' cua'a ji'i̱ ycui' ca ngu'. Taquiya' ma̱ ji'i̱ cha' bi', xñi tso'o ma̱ ji'i̱ cha' bi' juani; lo'o tyalaa tyempo cuxi bi', li' taca talo ma̱ cha' xu̱u̱ tya'a ma̱ lo'o nu xña'a̱, cha' ngusñi ma̱ cha' tso'o bi', masi tya'a cusu̱u̱ na laca nu xña'a̱ bi'. Si jua'a̱ cua'ni ma̱, nu lo'o tye cha' cusu̱u̱ bi', li' tya tyu̱ ma̱ ñi'ya̱ nu ndu̱ ti ma̱.

2 TIMOTEO 2:12

Si talo na lo'o xcube' ngu' ji'na xqui'ya cha' ji'i̱ Ni, li' caja su tyi'i̱ na lo'o ycui' Jesús ca su laca Ni loo ca bi'. Si ñacui̱ na cha' ná ntsu'u cha' ji'na lo'o Jesucristo, jua'a̱ ycui' Ni, ñacui̱ Ni cha' ná ntsu'u cha' ji'i̱ Ni lo'o na.

SANTIAGO 3:12

Jua'a̱ lo'o yaca si'yu ni; ná taca tyu'u ntsati̱ ji'i̱ yaca quixuu, ni ná taca tyu'u quixuu ji'i̱ yaca ja'ba, cha' ná ca quixa' cha'. Ná caja hitya nu tso'o co'o na ca su ntyucua hitya cñi'.

1 PEDRO 4:12

Cu'ma̱ tya'a tso'o na, masi lye tsa cua'ni lya' ti' ñati̱ ji'i̱ ma̱, ñi'ya̱ nti' si ntsu'u ma̱ ndyaqui̱ ma̱ lo quii', ná ntsu'u cha' cube tsa ti' ma̱; ná tso'o si culacua tsa ti' ma̱ li', ñi'ya̱ si ná tso'o tyacua cha' cuxi ji'i̱ ma̱, nti' ma̱. Jua'a̱ li' nchca cuayá' ti' Ni si chañi cha' ntsu'u cha' ji'i̱ ma̱ lo'o Ni, si ná chañi cha' bi'.

2 PEDRO 2:9

Jua'a̱ caca cuayá' ti' na cha' nchca ji'i̱ ycui' nu Xu'na na cua'ni lyaá Ni ji'i̱ ñati̱ nu tso'o cresiya ji'i̱, cha' ná tyiji̱loo nu cuxi ji'i̱ ngu' bi'. Nu lo'o cua'ni cuayá' Ni ji'i̱ lcaa ñati̱ ni, jlo ti' Ni ti ji'i̱ xcube' Ni. Cua jlo ti' Ni tilaca laca nu ntsu'u cha' cuxi tyiquee.

APOCALIPSIS 1:9

Juan laca na', tya'a ntsu'u cha' ji'na lo'o Jesús laca na'. Ñi'ya̱ nu ndyaca ji'i̱ cu'ma̱, la cui' jua'a̱ ndyaca jna', cha' stu'ba ti ndyiji cha' ti'í ji'na cuentya ji'i̱ Jesús; pana jlya ti' na cha' Cristo laca loo ji'na juani, bi' cha' ndalo na ji'i̱ cha' ti'í nu tyacua ji'na. Nde cha' nu ngua 'na lo'o ndi'i̱ na' loyuu su naa Patmos, sca yuu piti ti nu nscua cla'be hitya. Ca bi' ntsu'u na' ne' chcua̱, xqui'ya cha' ná ntsi̱i̱ na' nchcui' na' cha' ji'i̱ ycui' Ndyosi lo'o ñati̱; nchcui' na' lcaa cha' tso'o nu cua nda Jesús lo'o na.

APOCALIPSIS 11:10

Chaa tsa ti' caca ñati̱ chalyuu cha' cua ngujuii tyucuaa ñati̱ nu ngutu̱ bi', bi' cha' cua'ni ngu' ta'a; lu'ba ti ta ngu' xlya'be tyaa su ndi'i̱ tya'a ngu', cha' chaa tsa ti' ngu'. Xqui'ya tyucuaa jyo'o bi' quiña'a̱ tsa cha' nchcube' ngujui ji'i̱ ñati̱ chalyuu, nacui̱ ngu'.

APOCALIPSIS 13:10

Si lo'o nscua cha' tsalo'o ngu' ji'i̱ tsaca ma̱ ne' chcua̱, jua'a̱ caca lacua. Ná cutsi̱i̱ ma̱ li'. Si lo'o nscua cha' cujuii ñati̱ ji'i̱ tsaca ma̱, masi lo'o maxtyi, jua'a̱ caca lacua. Ná cutsi̱i̱ ma̱ li'. Ndu'ni cha' talo tsaa tyiquee na ji'i̱ cha' cuxi; ndu'ni cha' lcaa tsa̱ taquiya' na ji'i̱ ycui' Ndyosi si ntsu'u cha' ji'na lo'o Ni nde chalyuu.

APOCALIPSIS 13:14

Lo'o jua'a̱ nguñilo'o ni' ji'i̱ lcaa ñati̱ tyucui ña'a̱ chalyuu xqui'ya cha' tlyu nu ndyu'ni ni' lo'o ndi'i̱ ni' slo nu na'ni nu ya̱a̱ tya clyo bi'. Li' nchcui' ni' lo'o lcaa ñati̱ chalyuu cha' cuiñá ngu' sca lcui̱ tyu̱, cha' cua'ni tlyu ngu' ji'i̱ lcui̱ bi'; ngüiñá ngu' lcui̱ ji'i̱ nu na'ni nu ya̱a̱ tya clyo bi' li', na'ni nu ngua tso'o masi ti'í tsa ngula'a hique ni'.

APOCALIPSIS 13:8

lcaa ñati̱ tyucui ña'a̱ chalyuu cua'ni tlyu ngu' ji'i̱ na'ni bi' li', si ná nscua xtañi ngu' lo quityi ji'i̱ ycui' Ndyosi. Nu ngua tya clyo la lo'o tya lyiji cuiñá Ni chalyuu, tya li' nguscua Ni xtañi ñati̱ nu ná nga'a̱ cha' tye chalyuu ji'i̱. Cua ndyanu quityi bi' cuentya ji'i̱ nu ñi'ya̱ ña'a̱ xlya' nu cua ndyujuii ñati̱ ji'i̱ tsaca quiya'.

APOCALIPSIS 14:12

Lo'o nu na ni, talo na ji'i̱ cha' cuxi sca ti si ntsu'u cha' ji'na lo'o ycui' Ndyosi, sca ti si taquiya' na cña nu ngulo Ni ji'na, sca ti si xñi tso'o na cha' ji'i̱ Jesús; sca ti jua'a̱ taca ji'na talo na ji'i̱ nu cha' cuxi bi'.

APOCALIPSIS 14:6

Na'a̱ na' ndyaa chaca xca̱ ji'i̱ ycui' Ndyosi li', nu cua̱ tsa ndacui ndyaa; ndyalo'o bi' ji'i̱ sca cha' tso'o nu ngua ti' ycui' Ndyosi chcui' lo'o lcaa ñati̱ chalyuu, sca cha' nu ndulo tsa ji'i̱ ñati̱ cha' cuna ngu'. Lcaa tyempo ná tye chca cha' bi'. Slo lcaa lo ñati̱ chalyuu tyucui ña'a̱ chalyuu mala su ndi'i̱ ñati̱, cua ña'a̱ ca quichi̱ tyi ngu', ñati̱ nu nchcui' cua ña'a̱ ca lo cha'cña nu nchcui' ñati̱ chalyuu, ca bi' ndyaa xca̱ bi', cha' chcui' lo'o lcaa ñati̱.

APOCALIPSIS 16:14

Msu ji'i̱ nu xña'a̱ laca cuiñaja bi'; nchcutsi̱i̱ bi' ji'i̱ ñati̱, cha' nchca ji'i̱ cua'ni cha' tlyu. Ndya'a̱ cuiñaja bi' nxuti'i̱ ji'i̱ lcaa nu laca loo chalyuu, cha' tya̱a̱ ngu' cha' cusu̱u̱ tsa̱ tlyu lo'o cua tye ti chalyuu. Cua ntsu'u cña nu cua'ni ycui' Ndyosi nu Xu'na na lo'o ndyaca cha' cusu̱u̱ bi'.

APOCALIPSIS 17:2

Quiña'a̱ tsa cha' suba' ndyu'ni ngu' nu laca loo nde chalyuu, cha' tyu̱u̱ tsa tya'a jo'ó ntsu'u ji'i̱ ngu' xqui'ya ngu' quichi̱ tlyu bi'; jua'a̱ ngunu'u̱ tyiquee ñati̱ tyucui ña'a̱ chalyuu xqui'ya cha' suba' nu ndyu'ni ngu' bi'.

APOCALIPSIS 17:8

Na'ni nu cua na'a̱ nu'u̱ jua, ngutu'u bi' nu ngua tya sa'ni la, nga'aa lu'ú bi' juani; pana cua ngulala ti tyu'ú ni' chaca quiya', masi nscua nde tyuquee qui'ñi bi', cha' tyaa ni' ca chalyuu talya su tye ni' cati̱ ni' tsiya' ti ―nacui̱―. Cua ña'a̱ ca ñati̱ nu ná nscua xtañi lo quityi ji'i̱ ycui' Ndyosi, quiña'a̱ tsa cha' culacua ti' ngu' lo'o ña'a̱ ngu' ji'i̱ na'ni bi'; pana tya clyo lo'o tya lyiji xana chalyuu re, cua nscua xtañi ñati̱ nu cua nda ycui' Ndyosi chalyuu nu ná nga'a̱ cha' tye ji'i̱. Ngutu'ú na'ni bi' nu ngua tya sa'ni la, masi nga'aa lu'ú bi' juani; pana ña'a̱ ti tya tyu'ú bi', masi chaca tya quiya'.

APOCALIPSIS 2:10

Ná cutsi̱i̱ ma̱ ji'i̱ cha' ti'í nu caca ji'i̱ ma̱ nde loo la, masi cua'ni nu xña'a̱ cha' tyu̱u̱ tya'a ma̱ tsaa ma̱ xi ne' chcua̱. Cua nti' yu cua'ni cuayá' yu ji'i̱ ma̱ si ña'a̱ ti tya nxñi ma̱ cha' jna'. Pana tii ti tsa̱ xcube' yu ji'i̱ ma̱, nacui̱ Ni. Ña'a̱ ti tyucui tyiquee ma̱ xñi ma̱ cha' ji'i̱ ycui' Ndyosi Sti na', masi cajaa ma̱, cha' ná nga'a̱ cha' tye chalyuu nu ta na' ji'i̱ ma̱ nde loo la li'.

APOCALIPSIS 3:8

Nda na' cuentya ji'i̱ lcaa ña'a̱ nu ndu'ni ma̱, nacui̱ Ni. Cua nda na' sca cña tso'o cha' cua'ni ma̱, lo'o ná tucui taca tacu̱' cha' ji'i̱ ma̱ li', masi jlo ti' na' cha' ná caca ji'i̱ ma̱ chcui' lye ma̱ lo'o ñati̱ cuentya jna', cha' ná nguula ti' tyiquee ma̱ tsiya' ti; pana ña'a̱ ti tya ndaquiya' ma̱ ji'i̱ lcaa cha' nu nclyu'u na' ji'i̱ ma̱, bilya xtyanu ma̱ 'na.

APOCALIPSIS 6:10

Cui̱i̱ ngusi'ya jyo'o bi': ―Ndyosi Xu'na ya ―nacui̱ ngu'―, xcui' lubii tsa cresiya jinu'u̱; xcui' cha' liñi ndu'ni nu'u̱ ―nacui̱ jyo'o bi'―. ¿Ha tya tiya' tsa cua'ni cuayá' nu'u̱ ji'i̱ ñati̱ chalyuu? ¿Ha tya tiya' tsa xcube' nu'u̱ ji'i̱ ngu' xqui'ya cha' cua ndyujuii ngu' ji'i̱ ya? ―nacui̱ jyo'o bi'.

APOCALIPSIS 8:13

Li' na'a̱ na' su ndacui sca xca̱ cla'be cua̱ nu ñi'ya̱ ña'a̱ cua'ya ña'a̱ bi'. Ndyuna na' cha' cui̱i̱ tsa ngusi'ya yu: ―Tya'na tsa cu'ma̱ lo'o cula'á tya xna tya'a xca̱ bi' lo'o cui'chcua̱ ji'i̱ ngu' ca tiya' la xi; tya'na tsa caca lcaa ñati̱ nu tya ndyanu chalyuu lo'o cañi bi' li'.