APOCALIPSIS 2:3 - Chatino Tataltepec

³ Lo'o jua'a̱ jlo ti' na' cha' ná nchca taja ti' ma̱; masi ndyiji tsa cha' ti'í ji'i̱ ma̱, ná ndya'a̱chu̱' ma̱ cha' jna'.

APOCALIPSIS 2:3 Iomraidhean Croise

SAN MARCOS 15:21

Tyucui̱i̱ lo'o ndya'a̱ ngu', li' na'a̱ ngu' sendaru ji'i̱ Simón ngu' Cirene; sti Alejandro lo'o Rufo laca nu Simón bi'. Cua ñaa Simón ca su ndyaa cña ne' quixi̱', lo'o li' ngulo sendaru cña ji'i̱ cha' qui'ya crusi bi' cuentya ji'i̱ Jesús.

SAN LUCAS 14:27

Si ná tyaja'a̱ ma̱ xñi ma̱ tyucui̱i̱ nu culu'u na' ji'i̱ ma̱, ná caca ma̱ ñati̱ jna' li'; ntsu'u cha' xñi ma̱ tyucui̱i̱ bi', masi cujuii ñati̱ ji'i̱ ma̱ xqui'ya cha' jna'.

SAN LUCAS 18:1

Ngulu'u Jesús ji'i̱ ngu' cha' lu'ba ti chcui' ngu' lo'o ycui' Ndyosi, cha' ná ca taja ti' ngu' tsiya' ti lo'o chcui' ngu' lo'o Ni. Ndi'ya̱ ndyu'u cui̱i̱ nu nda Jesús lo'o ngu' li':

SAN LUCAS 21:19

Nu lo'o cua ndalo ma̱ ji'i̱ lcaa cha' cuxi bi', li' tya caja chalyuu ji'i̱ ma̱ lo'o cua ndye cha'.

SAN LUCAS 5:5

Li' nguxacui̱ Simón cha' ji'i̱: ―Cusu' ―nacui̱―, tyucui talya nguta'a̱ ya lo tayu' ngu̱ ya taraya; ni sca na ná ngujui ji'i̱ ya tsiya' ti. Pana si jua'a̱ culo nu'u̱ cña 'na, tsaa ya ca su nacui̱ nu'u̱ cha' cu̱ ya taraya cajua ―nacui̱ Simón li'.

SAN LUCAS 8:15

Ñi'ya̱ laca si'yu nu ndyú su tso'o tsa yuu, jua'a̱ laca lo'o ñati̱ nu tyucui tyiquee ngu' ndyuna ngu' cha' tso'o nu nda ycui' Ndyosi lo'o ngu'; ntaja'a̱ ngu' ndaquiya' ngu' cua ña'a̱ ca cha' nu nda Ni lo'o ngu'. Ndalo ngu' bi' li', ná xutacui ngu' cha' ngusñi ngu' cha' bi'. Li' tso'o tsa cha' tyu'ú ne' cresiya ji'i̱ ngu' bi'.

SAN JUAN 15:21

Jua'a̱ cua'ni ngu' lo'o cu'ma̱ xqui'ya na' ―nacui̱ Jesús―, cha' ná nslo ngu' tilaca laca nu nda 'na lijya̱a̱ nde chalyuu.

ROMANOS 12:12

Ndu'ni cha' tso'o tsa caca tyiquee ma̱ lo'o jatya ma̱ ji'i̱ ycui' Ndyosi cha' ca̱a̱ Ni cua'ni lyaá Ni ji'i̱ ma̱. Ná xtyanu ma̱ ji'i̱ cha' bi', masi ti'í tsa xcube' ngu' ji'i̱ ma̱ su ndi'i̱ ma̱ chalyuu. Lcaa tsa̱ chcui' ma̱ lo'o ycui' Ndyosi Sti na.

ROMANOS 16:12

jua'a̱ ji'i̱ Trifena lo'o Trifosa, nu ndyu'ni tsa cña ji'i̱ ycui' nu Xu'na na; jua'a̱ ji'i̱ Pérsida tya'a tso'o na', cha' quiña'a̱ tsa cña tso'o ji'i̱ ycui' nu Xu'na na ngua'ni ma' bi';

ROMANOS 2:7

sca chalyuu tso'o nu ná nga'a̱ cha' tye, bi' laca nu ta Ni ji'i̱ ngu' tso'o, nu ná nchca taja ti' ndu'ni ngu' cña tso'o lo'o tya'a ngu'. Xcui' ndya'a̱ cha' tyiquee ngu' bi' ji'i̱ cha' tso'o nu ntsu'u ca slo ycui' Ndyosi, xcui' nti' ngu' cha' tyi'i̱ tso'o ti ngu' cuentya ji'i̱ Ni, xcui' ndube ti' ngu' ji'i̱ chalyuu nu lijya̱ nde loo la.

ROMANOS 8:25

Pana lo'o chañi cha' tya ntajatya na ji'i̱ sca cha', li' ntsu'u cha' talo na ji'i̱, masi tya lyiji ña'a̱ na ji'i̱, masi talo na tyiquee' ña'a̱ cuayá' nu ña'a̱ na ji'i̱ cha' cua ndyu'u tucua.

1 CORINTIOS 13:7

Si ntsu'u tyiquee na ña'a̱ na ji'i̱ ñati̱, talo tyiquee na ji'i̱ ngu', masi cua ña'a̱ ca cha' cuxi cua'ni ñati̱ bi'; jlya ti' na cua ña'a̱ ca cha' tso'o, ndu̱ ti' na cha' tso'o la caca cha' nde loo la, masi ná jlo ti' na; jua'a̱ tyiquee' talo na lo'o cua ña'a̱ ca cha' nu ndyaca ji'na.

1 CORINTIOS 16:16

Nti' na' cha' taquiya' ma̱ ji'i̱ ngu' bi'; la cui' jua'a̱ taquiya' ma̱ ji'i̱ lcaa ngu' nu cua'ni cña stu'ba ti lo'o ngu' bi', lo'o jua'a̱ ji'i̱ lcaa ñati̱ nu tso'o tsa cua'ni cña ñi'ya̱ nu ndyu'ni ngu' bi'.

2 CORINTIOS 10:15

Ná ntsu'u cha' chcui' ya ji'i̱ cña nu ndyu'ni xa' ñati̱ cuentya ji'i̱ ycui' Ndyosi, chcui' ya ji'i̱ tsa bi' ti cña nu nda Ni chacuayá' cha' cua'ni ycui' ca ya ca slo ma̱. Na cua nti' ya cha' xñi tso'o la ma̱ cha' ji'i̱ ycui' Ndyosi nde loo la, cha' li' quiña'a̱ la cña taca cua'ni ya laja ngu' tya'a ma̱, ñi'ya̱ nu cua nda Ni chacuayá' cha' cua'ni ya.

2 CORINTIOS 11:23

Nacui̱ ngu' bi', cha' cña ji'i̱ Cristo ndyu'ni ngu'; la cui' cña bi' ndyu'ni na'. Masi tonto ti nchcui' na', pana tso'o la cña nu ndyu'ni na' que cña nu ndyu'ni ngu' bi'; lye la ngua'ni na' cña, lu'ba la ngusu'ba ngu' 'na ne' chcua̱, tyu̱u̱ tsa quiya' cua ngujui'i̱ ngu' juata hichu̱' na', lu'ba ti ndyaca cha' cua cajaa ti na' xqui'ya Cristo.

2 CORINTIOS 4:1

Bi' cha' ná nchca taja ti' ya ji'i̱ cña nu ndyu'ni ya. La cui' ycui' Ndyosi laca nu cua nda cña bi' ji'i̱ ya, xqui'ya cha' tya'na ti' Ni ña'a̱ Ni ji'i̱ ya.

2 CORINTIOS 4:16

Bi' cha' ná nchca taja ti' na ji'i̱ cña nu ndyu'ni na cuentya ji'i̱ ycui' Ndyosi, masi ncliji tyucui ña'a̱ cuaña' na jua'a̱ ti; pana ña'a̱ ti lu'ba ti ndu'ni ycui' Ndyosi cha' ca tso'o la cresiya ji'na.

2 CORINTIOS 5:9

ndyu'ni cña ti' na cha' cua'ni na lcaa ña'a̱ cña nu ndiya' la ti' nu Xu'na na, masi tya lu'ú na, masi cua ngujuii na.

2 CORINTIOS 6:5

Cua ngujui'i̱ juata ngu' ji'i̱ ya, jua'a̱ cua ngusu'ba ngu' ji'i̱ ya ne' chcua̱; cua ndyu'u ti'i̱ tsa tlyu ti ñati̱ ca slo ya cha' cua'ni lya' ti' ngu' ji'i̱ ya; lo'o jua'a̱ ntsu'u quiya' nteje tacui ya cuayá' cña nu ndyu'ni ya, ntsu'u quiya' ná nchca caja' ya, ntsu'u quiya' nu lye tsa ntyute' ya.

GÁLATAS 6:2

Cua'ni ma̱ cha' stu'ba ti caca tyiquee ma̱ lo'o tya'a ma̱, cha' caca xtyucua ma̱ ji'i̱ ngu' lo'o sca cha' nu ntsu'u ji'i̱ ngu', cha' ná cua'ni ngu' sca cha' cuxi. Jua'a̱ taca taquiya' tso'o na lcaa cña nu nda Cristo cha' cua'ni na.

GÁLATAS 6:9

Bi' cha' ná tso'o si ca taja ti' na cha' cua'ni na cha' tso'o laja lo'o ndi'i̱ na chalyuu. Lo'o tyalaa hora bi', li' tyu'u tucua cha' tso'o nu nacui̱ Ni cha' tyacua ji'na nde loo la, la cui' cha' nu tyiquee' tsa ngujuatya na ji'i̱; pana ntsu'u cha' talo na, cha' ná ca taja ti' na ndu'ni na cña tso'o.

FILIPENSES 2:16

nu lo'o ta ma̱ cha' lo'o ngu', si chcui' ma̱ cha' tso'o ji'i̱ Cristo nu taca ta chalyuu nu ná nga'a̱ cha' tye ji'i̱ ngu'. Si jua'a̱ cua'ni ma̱, tso'o tsa caca tyiquee na' ña'a̱ na' ji'i̱ ma̱ lo'o tyalaa tsa̱ nu cua'ni cuayá' Cristo ji'i̱ lcaa ñati̱. Li' taca ca cuayá' ti' na' cha' tso'o ti ngutu'u scua cña bi' 'na, si'i na nguliji yu'u cña bi' jua'a̱ ti.

FILIPENSES 4:3

Lo'o nu'u̱ nu tso'o tsa tya'a ndya'a̱ na cña, cua nti' na' cha' xtyucua nu'u̱ ji'i̱ tyucuaa ma' cusu' bi', cha' taca ca tso'o tyiquee ngu' bi' lo'o tya'a ngu'. Tyucuaa ma' cusu' bi' cua ngua'ni tsa ngu' cña cha' cañi la cha' tso'o ji'i̱ Jesús nquicha'; stu'ba ti ngua'ni ngu' bi' cña lo'o na', lo'o Clemente, lo'o xa' la ngu' tya'a ndya'a̱ ya cña. Cua nscua xtañi lcaa ngu' bi' lo quityi ji'i̱ ycui' Ndyosi, nu nscua xtañi ñati̱ nu caja chalyuu nu ná nga'a̱ cha' tye ji'i̱.

COLOSENSES 1:11

Nguula tsa cña ndu'ni ycui' Ndyosi ca su tlyu ca su ntucua ycui' Ni; bi' cha' cua ndijña na' ji'i̱ Ni cha' ta Ni la cui' juersa bi' ji'i̱ ma̱, cha' caca tso'o ti tyiquee ma̱ talo ma̱ ji'i̱ cua ña'a̱ ca cha' cuxi nu tyacua ji'i̱ ma̱.

1 TESALONICENSES 1:3

Ntsu'u ti' ya cha' ntsu'u tsa cha' tso'o nu ndyu'ni ma̱, cha' ntsu'u tsa tyiquee ma̱ ña'a̱ ma̱ ji'i̱ tya'a ma̱, xqui'ya cha' ngusñi ma̱ cha' ji'i̱ Jesucristo. Ndalo tsa tyiquee ma̱ xqui'ya cha' jlo ti' ma̱ cha' ntucua Jesucristo nu Xu'na na ca slo ycui' Ndyosi Sti na; bi' cha' xcui' cha' tso'o ndyu'ni ma̱, masi tlyu tsa cña.

1 TESALONICENSES 2:9

Cu'ma̱ ngu' tya'a na, tyi'u ti' ma̱ cha' lye tsa ngua'ni ya cña cha' caja ñi'ya̱ tyiji̱ yu'u ya chalyuu; tsa̱ lo'o talya ngua'ni ya cña lo'o ya' ti ya, cha' ná culiji ma̱ cñi ji'i̱ ma̱ lo ya laja lo'o ngulu'u ya cha' tso'o bi' ji'i̱ ma̱.

1 TESALONICENSES 5:12

Cu'ma̱ tya'a ngusñi na cha' ji'i̱ Jesús, ndijña ya ji'i̱ ma̱ cha' cui'ya ma̱ cuentya ji'i̱ lcaa ña'a̱ cha' tso'o nu ndyu'ni ngu' nu laca cña ji'i̱ ma̱. Cua nda ycui' nu Xu'na na cña ji'i̱ ngu' bi' cha' caca ngu' loo, cha' culu'u ngu' bi' ji'i̱ ma̱ cua ña'a̱ ca cha' tso'o nu caca cua'ni ma̱ cuentya ji'i̱ ycui' Ndyosi.

2 TESALONICENSES 3:13

Cu'ma̱ ngu' tya'a na, ná ca taja ti' ma̱ cha' cua'ni ma̱ cha' tso'o lo'o ñati̱.

2 TESALONICENSES 3:5

Lo'o jua'a̱ cua'ni ycui' nu Xu'na na cña ne' cresiya ji'i̱ ma̱, cha' tyi'u ti' ma̱ cha' ntsu'u tsa tyiquee ycui' Ndyosi ña'a̱ Ni ji'i̱ ma̱; li' talo tyiquee ma̱ ñi'ya̱ lo'o ndalo tyiquee ycui' Cristo lo'o nguta'a̱ yu lo'o ñati̱ tya clyo.

2 TESALONICENSES 3:8

Ná ndyacu laja ti ya slo cu'ma̱ nu ngua li'; nda ya caya' cha' nguxacu ma̱ ji'i̱ ya, cha' ngua'ni ya cña cha' cajá ñi'ya̱ nu tyiji̱ yu'u ji'i̱ ya. Tsa̱ lo'o talya ngua'ni ya cña lo'o ya' ti ya, cha' si'i cu'ma̱ nu ngüi'ya ma̱ na nu ndyacu ya li'.

1 TIMOTEO 4:10

Jlya ti' na ji'i̱ ycui' Ndyosi nu lu'ú ca; bi' cha' lye cua'ni na cña ji'i̱ Ni, masi lya' tsa ti' ngu' ji'na. Lo'o ycui' Ndyosi ni, cua'ni lyaá Ni ji'i̱ lcaa ñati̱ si taquiya' ngu' ji'i̱ Ni. Lo'o xñi na cha' ji'i̱ Ni, li' ca cuayá' tso'o la ti' na cha' bi'.

1 TIMOTEO 5:17

Cua'ni chi̱ ma̱ loo ngu' cusu' nu laca loo ji'i̱ taju ji'i̱ ma̱ si tso'o ti ndu'ni ngu' lo'o ma̱. Lye la cua'ni chi̱ ma̱ loo ngu' cusu' nu nchcui' cha' ji'i̱ ycui' Ndyosi lo'o ma̱, ngu' cusu' nu nclu'u cha' bi' ji'i̱ ma̱. Ta ma̱ caya' ji'i̱ ngu' cusu' bi'.

HEBREOS 10:36

Nga'a̱ cha' talo tyiquee ma̱ masi tyiquee', si tya nti' ma̱ cua'ni ma̱ lcaa ña'a̱ cña nu nti' ycui' Ndyosi, si tya nti' ma̱ ña'a̱ ma̱ cha' nu cua nacui̱ Ni cha' caca nde loo la.

HEBREOS 12:1

Lo'o juani, ¿ñi'ya̱ cua'ni na lacua? Ndi'ya̱ cua'ni na nde chalyuu: Ñi'ya̱ si tya ndi'i̱ jyo'o cusu' bi' tsa tlyu ti lo'o na, jua'a̱ cua'ni na, cha' jua'a̱ tyi'u tso'o ti' na lcaa ña'a̱ cha' tlyu nu ngua'ni ngu' bi' tya sa'ni la, xqui'ya cha' jlya ti' ngu' ji'i̱ ycui' Ndyosi. Ndu'ni cha' xtyanu na lcaa cha' nu ndaca'a ji'na cha' ná xñi tso'o na cha' ji'i̱ Jesús; xtyanu na lcaa cha' cuxi nu tiji̱' tsa ti' na ji'i̱, culochu̱' na cha' bi'. Lo'o li' nguula ti' tyiquee na cua'ni na cha' tso'o nde chalyuu, tsa lo cua tyempo nu tya ta ti Ni ji'na.

HEBREOS 13:13

Lo'o jua'a̱ na, tso'o si ná cutsi̱i̱ na, masi tsalo'o ngu' ji'na cha' xcube' ngu' ji'na cuentya ji'i̱ Jesús; stu'ba ti caca ji'na nde chalyuu, ñi'ya̱ nu ngua ji'i̱ Jesús lo'o lya' tsa ti' ngu' ji'i̱ yu.

HEBREOS 6:10

Lo'o jua'a̱ liñi tsa ndu'ni ycui' Ndyosi lo'o na. Ná cjlyaa ti' Ni lcaa cha' tso'o nu cua ndyu'ni ma̱, nu lo'o nxtyucua ma̱ ji'i̱ ngu' tya'a ngusñi na cha' ji'i̱ Jesús, cha' cua quiña'a̱ xi cña ndyu'ni ma̱ cuentya ji'i̱ ngu' bi'. Xqui'ya cha' ndyu'ni ma̱ jua'a̱, bi' cha' jlo ti' xa' ñati̱ cha' ntsu'u tsa tyiquee ma̱ ji'i̱ Jesús, cha' ña'a̱ ti tya ndyu'ni ma̱ cha' tso'o lo'o ngu' juani.

HEBREOS 6:12

Ná nti' ya cha' caca taja ma̱; na cua nti' ya cha' cua'ni ma̱ ñi'ya̱ nu ngua'ni xa' la tya'a ngusñi na cha' ji'i̱ Jesús tya clyo la, nu cua ndalo tsa tyiquee cha' ndu̱ ti' ngu' ji'i̱ ycui' Ndyosi. Bi' cha' cua ngujui lcaa cha' ji'i̱ ngu', ñi'ya̱ nu nacui̱ Ni cha' tyacua ji'i̱ ngu'.

HEBREOS 6:15

Ndalo tsa tyiquee Abraham bi' li', cha' ndu̱ ti' yu ji'i̱ cha' nu nda ycui' Ndyosi lo'o yu; bi' cha' ngutu'u tucua lcaa cha' ji'i̱ yu, ñi'ya̱ nu cua nacui̱ Ni ji'i̱ yu cha' caca ji'i̱.

2 PEDRO 1:6

Ntsu'u cha' ca cuayá' la ti' ma̱ ñi'ya̱ ntsu'u cha' ji'i̱ ycui' Ndyosi; li' taca cua'a tso'o ma̱ ji'i̱ ycui' ca ma̱, cha' nga'aa cua'ni nu cuxi ngana ji'i̱ ma̱. Si taca cua'a tso'o ma̱ ji'i̱ ycui' ca ma̱, li' talo tsa ma̱ ji'i̱ nu cuxi. Nu lo'o taca talo ma̱ ji'i̱ lcaa cha' cuxi, li' taca tyi'i̱ ma̱ ñi'ya̱ nti' ycui' Ni cha' tyi'i̱ ma̱ nde chalyuu.

APOCALIPSIS 1:9

Juan laca na', tya'a ntsu'u cha' ji'na lo'o Jesús laca na'. Ñi'ya̱ nu ndyaca ji'i̱ cu'ma̱, la cui' jua'a̱ ndyaca jna', cha' stu'ba ti ndyiji cha' ti'í ji'na cuentya ji'i̱ Jesús; pana jlya ti' na cha' Cristo laca loo ji'na juani, bi' cha' ndalo na ji'i̱ cha' ti'í nu tyacua ji'na. Nde cha' nu ngua 'na lo'o ndi'i̱ na' loyuu su naa Patmos, sca yuu piti ti nu nscua cla'be hitya. Ca bi' ntsu'u na' ne' chcua̱, xqui'ya cha' ná ntsi̱i̱ na' nchcui' na' cha' ji'i̱ ycui' Ndyosi lo'o ñati̱; nchcui' na' lcaa cha' tso'o nu cua nda Jesús lo'o na.

APOCALIPSIS 3:10

Cua ndyi'u ti' ma̱ cha' nu nacui̱ na' ji'i̱ ma̱ tsubi', cha' talo tyiquee ma̱ cha' tu̱ ti' ma̱ 'na ni tsa̱ tya̱a̱ na' chaca quiya'; bi' cha' juani cua'ni na' cha' ná sca caca ji'i̱ ma̱ lo'o tyalaa tyempo cuxi nde chalyuu. Cua lijya̱ caca cha' cuxi bi', nu cua'ni cuayá' ji'i̱ lcaa ñati̱ chalyuu.