APOCALIPSIS 12:9 - Chatino Tataltepec

⁹ cua ngulo'o Ni ji'i̱ ngu' nu ndu̱ cuentya ji'i̱ nu cuaña bi' li'. Sa'ni ndya'a̱ nu cuaña bi', ycui' nu xña'a̱ naa bi'; la cui' bi' laca nu naa Satanás. Xcui' na ñilo'o bi' ji'i̱ ñati̱ tyucui ña'a̱ chalyuu. Pana cua ngulo'o ycui' Ni ji'i̱ nu xña'a̱ lo'o xca̱ ji'i̱, ndyaa ngu' nde lo yuu chalyuu li'.

APOCALIPSIS 12:9 Iomraidhean Croise

SAN MATEO 13:39

cha' tya'a cusu̱u̱ na' laca nu ngusañi si'yu quixi̱' bi' lo xtya̱ 'na; la cui' nu xña'a̱ laca bi'. Tsa̱ nu lo'o xana clyaja xtya̱ ni, bi' laca ñi'ya̱ laca tsa̱ tlyu lo'o tye chalyuu; lo'o ñati̱ nu si'yu quixi̱' lo xtya̱ bi' ni, bi' laca ñi'ya̱ laca xca̱ ji'i̱ ycui' Ndyosi.

SAN MATEO 24:24

cha' Cristo cuiñi caca nu bi'. Lo'o jua'a̱ tyu'u tucua xi ngu' cuiñi nu chcui' cha' tu'ba ji'i̱ ycui' Ndyosi laca ycui' ca ngu', nu cuiñi ti cua'ni cha' tlyu cha' cube tsa ti' xa' ñati̱; cua'ni ngu' cuiñi bi' jua'a̱, cha' nti' ngu' cua'ni ngu' ngana ji'i̱ ma̱, lo'o jua'a̱ ji'i̱ lcaa ñati̱ nu cua ngusubi ycui' Ndyosi ji'i̱.

SAN MATEO 25:41

’Lo'o li' chcui' na' lo'o taju ñati̱ nu ndi'i̱ la'a tsu' coca 'na: “Tyu'u ma̱ liya', cu'ma̱ nu ná ntsu'u su tyi'i̱ ma̱ slo ycui' Ndyosi. Yaa clya ma̱ ca su ná tye tsiya' ti cha' ndyaqui̱ quii', cha' stu'ba ti tyi'i̱ ma̱ lo'o nu laca xu'na cuiñaja lo'o lcaa xca̱ ji'i̱, lcaa cui'i̱ cuxi; cuentya ji'i̱ nu cuiñaja bi' nguxtyu'u ycui' Ni quii' bi'.

SAN MATEO 4:1

Lo'o li' ndyaa lo'o Xtyi'i ycui' Ndyosi ji'i̱ Jesús ca ne' quixi̱' su btyi tsa yuu, su ná ndi'i̱ ñati̱, cha' tyacua tya'a yu lo'o nu xu'na cuiñaja cajua. Ngua ti' nu bi' tyiji̱loo ji'i̱ Jesús.

SAN MATEO 4:10

Li' nguxacui̱ Jesús cha' ji'i̱ nu xña'a̱ bi': ―Tyaatsu' nu'u̱ slo na', Satanás ―nacui̱ Jesús―. Yaa clya nu'u̱. Cua nscua sca cha' lo quityi ji'i̱ ycui' Ndyosi ndi'ya̱: “Sca ti ji'i̱ ycui' Ndyosi nu Xu'na ma̱ cua'ni tlyu ma̱ ji'i̱, sca ti cha' ji'i̱ ycui' Ni nga'a̱ cha' taquiya' ma̱ ji'i̱ nde chalyuu”, nacui̱ quityi.

SAN MATEO 4:5

Lo'o li' ndyaa lo'o nu xu'na cuiñaja ji'i̱ Jesús nde quichi̱ Jerusalén, su tyaca'a tsa ji'i̱ ycui' Ndyosi; ca hique laa tonu ji'i̱ quichi̱ bi' ndyaa ngu', cua̱ tsa ntucua ngu' li'.

SAN MATEO 4:8

Lo'o ndye nchcui' ngu', xa' ndyaa lo'o nu xu'na cuiñaja ji'i̱ Jesús nde sca lo xlya ca'ya nu cua̱ tsa. Li' ngulu'u nu xña'a̱ bi' lcaa nasiyu̱ tyucui ña'a̱ chalyuu ji'i̱ Jesús, cha' tso'o tsa ña'a̱ chalyuu bi'.

SAN LUCAS 10:18

Nchcui' Jesús lo'o ngu' li': ―Jua'a̱ tu'ni. Lo'o na' na'a̱ na' ji'i̱ Satanás lo'o ndyú yu lo yuu; ñi'ya̱ ndyalú tyi'yu nde lo yuu, jua'a̱ ndyú yu. Ngulo'o ycui' Ndyosi ji'i̱ nu xña'a̱ bi' ca su tlyu su ntucua Ni nde cua̱, ndyú yu lo yuu li'; bi' cha' ndaquiya' cui'i̱ cuxi bi' ji'i̱ cha' nu nchcui' ma̱ juani.

SAN LUCAS 13:16

Lo'o jua'a̱ nu cuna'a̱ re nu la cui' tya'a ñati̱ ji'i̱ jyo'o Abraham ni, cua ti'ñu xna yija̱ nguta'a̱ ma' ndatsaa Satanás ji'i̱ ma'. ¿Ha ná tso'o nti' ma̱ si cua'ni lyaá na' ji'i̱ ma', masi tsa̱ ta'a? ―nacui̱ Jesús.

SAN LUCAS 22:3

Li' ndyatí̱ ycui' nu xña'a̱ nu naa Satanás ne' cresiya ji'i̱ Judas Iscariote, masi la cui' tya'a ngu' nu ndyaca tsa'a̱ ji'i̱ Jesús laca yu bi'.

SAN LUCAS 22:31

Lo'o li' nchcui' Jesús lo'o Simón Pedro bi': ―Simón ―nacui̱―, laca cha' ñi'ya̱ laca si cua ngüijña Satanás chacuayá' cha' cua'ni lya' ti' ji'i̱ lcaa cu'ma̱; cua nti' yu cua'ni cuayá' yu ji'i̱ ma̱, cha' xcutsi̱i̱ yu ji'i̱ ma̱. Ñi'ya̱ laca lo'o nscui̱i̱ ngu' ji'i̱ si'yu trigo cha' tyubii ji'i̱, jua'a̱ cua'ni yu lo'o ma̱, nti' yu.

SAN LUCAS 8:12

Ñi'ya̱ laca nu tsa ycu' si'yu nu ndyú tyucui̱i̱ bi', jua'a̱ laca lo'o ñati̱ nu cua ndyuna cha' tso'o bi' nquicha', lo'o li' hora ti lijya̱ nu xña'a̱ cha' cuityi̱ cha' tso'o nu ntsu'u ne' cresiya ji'i̱ ngu' bi'; nga'aa ndyi'u ti' ngu' cha' tso'o bi', ni ná nchca clyaá ngu' bi' ji'i̱ nu cuxi li'.

SAN JUAN 12:31

Cua ndyalaa hora cha' cua'ni cuayá' Ni ji'i̱ lcaa ñati̱ chalyuu, nu lo'o tyiji̱loo na' tsiya' ti ji'i̱ nu xña'a̱ nu laca loo nde chalyuu ―nacui̱ Jesús ji'i̱ ngu'―.

SAN JUAN 14:30

’Nga'aa quiña'a̱ tsa cha' chcui' na' lo'o ma̱ juani ―nacui̱ Jesús li'―. Cua lijya̱ nu xña'a̱ nu laca loo nde chalyuu, cua lijya̱ nu bi' ca su ndi'i̱ na re. Ná ntsu'u chacuayá' ji'i̱ nu bi' cha' caca loo jna'.

SAN JUAN 16:11

Jua'a̱ cua'ni Ni cha' ca cuayá' ti' ngu' cha' ntsu'u cha' cua'ni cuayá' ycui' Ndyosi ji'i̱ lcaa ñati̱ chalyuu, xqui'ya cha' cua ngusta Ni yabe' hichu̱' nu xña'a̱ nu laca loo ji'i̱ ñati̱ chalyuu.

SAN JUAN 8:44

Ycui' nu xña'a̱ laca sti cu'ma̱, lo'o jua'a̱ nti' ma̱ cua'ni ma̱ la cui' cña nu ngulo nu bi' ji'i̱ ma̱. Tya lo'o nguxana chalyuu, tya li' nguxana ndyu'ni ñu'u̱ nu bi' ji'i̱ cresiya ji'i̱ ñati̱ ―nacui̱ Jesús―. Ná ngutu'u nu bi' ca su ntsu'u su̱u̱ cha' liñi, ná ntsu'u cha' liñi ji'i̱ nu bi' tsiya' ti ―nacui̱―. Lo'o ñilo'o nu bi' ji'i̱ ñati̱, xquicha' ycui' ca laca cha' cuiñi nu nda nu bi' lo'o ngu'. Sca nu cuiñi laca nu xña'a̱, bi' laca sti lcaa nu cuiñi.

LOS HECHOS 26:18

cha' ñi'ya̱ si ndya'a̱ ngu' cuityi̱', jua'a̱ ndya'a̱ ñati̱ bi' chalyuu; ñi'ya̱ si talya tsa ña'a̱ su ndya'a̱ ngu', jua'a̱ ndyu'ni ngu' bi'. Bi' cha' ntsu'u cha' culu'u nu'u̱ cha' jna' ji'i̱ ngu' bi', cha' xñi ngu' cha' jna'. Li' nga'aa tya'a̱ ngu' su talya ña'a̱, ñi'ya̱ si cuityi̱' ti ngu'; taca tya'a̱ ngu' tyucui̱i̱ su xee cuentya ji'i̱ ycui' Ndyosi, taca ña'a̱ ngu' li'. Satanás laca nu nclyo cña ji'i̱ ngu' bi' juani, pana ca li' caca ngu' ñati̱ ji'i̱ ycui' Ndyosi. Ntsu'u cha' xñi ngu' bi' cha' jna', cha' taca cui'ya ycui' Ni cha' clyu ti' ji'i̱ cha' cuxi nu ntsu'u ji'i̱ ngu' bi'. Li' caca stu'ba cha' ji'i̱ ngu' bi' lo'o ñati̱ nu cua lubii cresiya ji'i̱ xqui'ya na'”, nacui̱ ycui' Jesús 'na li'.

LOS HECHOS 5:3

Nchcui' Pedro lo'o yu li': ―Ananías ―nacui̱―, ¿na laca ngua hi̱? ¿Ni cha' laca nda nu'u̱ chacuayá' ji'i̱ nu xña'a̱ nu naa Satanás cha' caca loo ne' cresiya jinu'u̱? Bi' laca nu ngua'ni cha' nguñilo'o nu'u̱ ji'i̱ Xtyi'i ycui' Ndyosi ―nacui̱ Pedro ji'i̱ yu bi'―. Nacui̱ nu'u̱ cha' nde laca lcaa cñi nu ngujui jinu'u̱ lo yuu bi', lo'o si'i lcaa cñi laca re.

ROMANOS 16:18

cha' si'i cña ji'i̱ Cristo laca bi', si xa' la cha' nchcui' ngu' lo'o ma̱. Ndu'ni ngu' bi' lcaa cha' cuxi nu nclyacua ti' ycui' ngu' cha' cua'ni ngu'. Lo'o jua'a̱ ndyu'ni ngu' cha' quichi̱ yaa cha' hique ngu' ti'i, cha' tso'o tsa ndañi cha' nu nda ngu', cha' tajua' ti nchcui' ngu'.

ROMANOS 16:20

Ná tyu̱u̱ tsa̱ lyiji cha' cua'ni tye ycui' Ndyosi ji'i̱ nu xña'a̱, cha' nga'aa tyaca̱' cña cuxi nu ndu'ni nu xña'a̱ bi' tsiya' ti. Cua'ni Ni cha' ti̱ ti tyi'i̱ tyiquee ma̱, ñi'ya̱ ntsu'u tyiquee ycui' Ni; lo'o jua'a̱ ña'a̱ ti cua'ni Jesucristo nu Xu'na na cha' tso'o lo'o lcaa tya'a ma̱.

2 CORINTIOS 11:14

Ná tlyu cña laca cha' ndu'ni ngu' bi' jua'a̱, cha' lo'o nu xña'a̱ nu naa Satanás taca ji'i̱ ñilo'o ji'i̱ ñati̱, nu lo'o xa' ña'a̱ cua'ni loo yu ña'a̱ cuayá' nu ca ti' ngu' cha' laca yu sca xca̱ nu ndyu'u tucua lo'o xee ji'i̱ ycui' Ndyosi; pana ná chañi laca cha' bi'.

2 CORINTIOS 11:3

ndube tsa ti' na' si quiñu'u̱ chca cresiya ji'i̱ ma̱. Tya sa'ni ni, cua nguñilo'o nu cuaña ji'i̱ Eva, cha' tajua' tsa nchcui' nu xña'a̱ bi'. Pana ná nti' na' cha' quiñu'u̱ cha' ji'i̱ ma̱ lo'o Cristo jua'a̱, ná nti' na' cha' ñilo'o nu xña'a ji'i̱ ma̱ xqui'ya xa' ñati̱; juani tso'o tsa cha' tyucui tyiquee ma̱ cua ngusñi ma̱ cha' ji'i̱ ycui' Cristo.

2 CORINTIOS 12:7

Lo'o li' nda ycui' Ndyosi chacuayá' cha' caja xi cha' chcube' na', cha' ná lye tsa caca tyucuaa ti' na' lo'o ñati̱ xqui'ya cha' tlyu ca nde cua̱ nu cua na'a̱ na' laja xcalá̱; nda Ni sca lo quicha 'na nu ti'í tsa ndyu'ni lo'o na'. Lo'o jua'a̱ laca bi' ñi'ya̱ laca lo'o ntsu'u na ya' nu xña'a̱ nchcube' ji'na, cha' ti'í tsa ndyu'ni quicha bi' lo'o na', cha' ná caca tyucuaa ti' na' lo'o xa' ñati̱.

2 CORINTIOS 2:11

cha' ná caca tyiji̱loo nu xña'a̱ nu naa Satanás ji'na; cua jlo tsa ti' na cha' tajua' tsa nu xña'a̱ bi'.

2 CORINTIOS 4:4

Ná ntaja'a̱ ngu' bi' xñi ngu' cha' bi' xqui'ya nu xña'a̱ nu ñilo'o ji'i̱ ñati̱ chalyuu. Ndacu̱' nu cuxi bi' cha' ji'i̱ ngu' cha' ná cuna ngu' cha' tso'o nu cuentya ji'i̱ Cristo, bi' cha' ná nchca tyanu xee lubii ji'i̱ Cristo ne' cresiya ji'i̱ ngu' bi'. Tlyu tsa cha' laca ji'i̱ Cristo; lcaa cha' nu ntsu'u ji'i̱ Ni, stu'ba ntsu'u cha' ji'i̱ Ni lo'o ycui' Ndyosi Sti Ni ca su ntucua Ni juani.

EFESIOS 4:14

Li' nga'aa cua'ni na ñi'ya̱ ndu'ni nu sube nu lu'ba ti ncha'a̱ cña ji'i̱, cha' nu ndijya ngu'; ni ná ta na chacuayá' cojolaqui ngu' ji'na xa' tyucui̱i̱, nu lo'o chcui' ngu' lo'o na cua ña'a̱ ca cha' nu bilya cuna na ji'i̱. Ntsu'u tsa cha' cuiñi nu nda ñati̱ nu tajua' tsa nchcui' lo'o na, ñati̱ nu nti' tsa cha' tsalo'o ji'na nde tyucui̱i̱ cuxi.

2 TESALONICENSES 2:3

Ná taquiya' ma̱ ji'i̱ ngu' cuiñi nu chcui' jua'a̱. Nu lo'o tya lyiji tyalaa tsa̱ bi', lye tsa xu̱u̱ tya'a ñati̱ chalyuu lo'o ycui' Ndyosi; li' ca̱a̱ sca ñati̱ nu ndu'ni cña ji'i̱ nu xña'a̱ nde chalyuu, nu ntsu'u cha' tsaa ca bilyaa lo'o tye chalyuu.

1 TIMOTEO 2:14

Lo'o jua'a̱ si'i ji'i̱ jyo'o Adán bi' ngua'ni nu xña'a̱ ngana tyempo bi'; ji'i̱ nu cuna'a̱ ji'i̱ yu ngua'ni bi' ngana, nu lo'o ngua'ni jyo'o Eva bi' cha' cuxi.

2 TIMOTEO 3:13

Pana ngu' nu ndu'ni cha' cuxi ni, cua nscua cha' tya cuxi la cua'ni ngu' bi'; ngu' cuiñi ni, cua nscua cha' tya cuiñi la cua'ni ngu', jua'a̱ ña'a̱ ti tya jlya la ti' ycui' ca ngu' cha' cuiñi li'.

HEBREOS 2:14

Nu na, ñati̱ chalyuu na ni, sca ti cuaña' na, sca ti tañi na lo'o ngu' cusu' ji'na, jua'a̱ lo'o ngu' tya'a na. Ca ta'a na nu cua ngusñi na cha' ji'i̱ Jesús laca na ñati̱ chalyuu; bi' cha' lo'o nu Jesús bi' ngua yu ñati̱, cha' li' ngua ji'i̱ yu ngujuii yu cuentya ji'na. Sca ti jua'a̱ ngujui ñi'ya̱ tyiji̱loo yu ji'i̱ nu xña'a̱ nu nclyo cña nde ca bilyaa, su nti' nu xña'a̱ bi' cha' tsaa cresiya ji'i̱ lcaa ñati̱.

1 PEDRO 5:8

¡Tii ti ti' ma̱ tyi'i̱ ma̱ chalyuu! Ná caja' ma̱, cha' tya'a cusu̱u̱ ma̱ laca ycui' nu xña'a̱, lo'o jua'a̱ cacua tsa ndu̱ bi' slo ma̱. Ñi'ya̱ nti' sca cuichi nu tyaala tsa nu nclyana ji'i̱ sca ñati̱ cha' cacu ni', jua'a̱ nti' ndya'a̱ yu'u nu xña'a̱ bi' chalyuu.

1 JUAN 5:19

Jlo ti' na cha' ñati̱ ji'i̱ ycui' Ndyosi laca na, xqui'ya cha' cua ngusñi na cha' ji'i̱ Jesucristo; pana xa' la ñati̱ chalyuu nu ná ndaquiya' ji'i̱ Ni tsiya' ti, ña'a̱ ti tya laca nu xña'a̱ loo ji'i̱ ñati̱ bi'.

JUDAS 1:9

Pana si'i jua'a̱ ngua'ni Miguel nu laca loo ji'i̱ xca̱ ji'i̱ ycui' Ndyosi; nu lo'o ngusu̱u̱ tya'a nu Miguel bi' lo'o nu xña'a̱ xqui'ya jyo'o Moisés, ná nchcui' ni sca cha' cuxi lo'o nu xña'a̱ bi'. Ndi'ya̱ ti nchcui' lo'o: “Ycui' nu Xu'na na' ntsu'u cha' cua'a jinu'u̱”, nacui̱ Miguel ji'i̱ nu xña'a̱ bi' li'.

APOCALIPSIS 12:12

Bi' cha' juani ―nacui̱ nu ntucua nde cua̱ bi'―, ca chaa ti' cu'ma̱ nu ndi'i̱ ma̱ nde su ntucua ycui' Ndyosi; pana tya'na tsa caca cu'ma̱ nu ndi'i̱ ma̱ nde chalyuu, nu ndi'i̱ ma̱ nde lo tyujo'o. Cua ngua'ya ycui' nu xña'a̱ nde su ndi'i̱ ma̱, lo'o juani ñasi̱' tsa bi' ndya'a̱; cua jlo ti' bi' cha' tya xi tya tsa̱ ndyanu ji'i̱ cha' cua'ni lya' ti' ji'i̱ ñati̱ chalyuu.

APOCALIPSIS 12:3

Yala ti ndyu'u tucua chaca cuayá' nde cua̱ li'; sca cuaña tlyu nu nga'a ña'a̱ laca bi', nu cati tya'a scua' que ni' ntucua. Jua'a̱ sca sne' oro ntucua ca ta'a scua' que ni' bi', lo'o jua'a̱ ntucua tii tya'a sata ni'.

APOCALIPSIS 12:7

Li' nguxana cha' cusu̱u̱ ca su ntucua ycui' Ndyosi. Ndu̱ Miguel nu laca xu'na xca̱ ji'i̱ ycui' Ndyosi, ndu̱ lo'o xca̱ nu cuentya ji'i̱ Ni; jua'a̱ cua ndu̱ nu cuaña tonu lo'o xca̱ ji'i̱. Ti'í tsa ngusu̱u̱ tya'a ngu' li'.

APOCALIPSIS 12:8

Pana cua ntiji̱loo Miguel ji'i̱ nu cuaña bi', nga'aa ngua ji'i̱ nu cuaña bi' tyanu ca slo ycui' Ndyosi lo'o xca̱ ji'i̱ Ni li';

APOCALIPSIS 13:14

Lo'o jua'a̱ nguñilo'o ni' ji'i̱ lcaa ñati̱ tyucui ña'a̱ chalyuu xqui'ya cha' tlyu nu ndyu'ni ni' lo'o ndi'i̱ ni' slo nu na'ni nu ya̱a̱ tya clyo bi'. Li' nchcui' ni' lo'o lcaa ñati̱ chalyuu cha' cuiñá ngu' sca lcui̱ tyu̱, cha' cua'ni tlyu ngu' ji'i̱ lcui̱ bi'; ngüiñá ngu' lcui̱ ji'i̱ nu na'ni nu ya̱a̱ tya clyo bi' li', na'ni nu ngua tso'o masi ti'í tsa ngula'a hique ni'.

APOCALIPSIS 16:14

Msu ji'i̱ nu xña'a̱ laca cuiñaja bi'; nchcutsi̱i̱ bi' ji'i̱ ñati̱, cha' nchca ji'i̱ cua'ni cha' tlyu. Ndya'a̱ cuiñaja bi' nxuti'i̱ ji'i̱ lcaa nu laca loo chalyuu, cha' tya̱a̱ ngu' cha' cusu̱u̱ tsa̱ tlyu lo'o cua tye ti chalyuu. Cua ntsu'u cña nu cua'ni ycui' Ndyosi nu Xu'na na lo'o ndyaca cha' cusu̱u̱ bi'.

APOCALIPSIS 18:2

Cui̱i̱ tsa nchcui' xca̱ bi': ―Cua ndye cha' ji'i̱ quichi̱ Babilonia bi' ―nacui̱―, ndye quichi̱ tlyu bi' nguti̱. Ca su nguti'i̱ quichi̱ bi' cua tsubi' la, ca bi' laca to' tyi cuxee juani, masi tyi cuiñaja laca bi' juani. Ca bi' ntucua to' tyi lcaa lo cui'i̱ cuxi, lcaa lo na'ni cuityi nu ntucua lu'be nu chiya'a̱ ña'a̱.

APOCALIPSIS 18:23

nga'aa tyaca̱' tsiya' ti tyu'u xee toni'i̱ ji'i̱ ngu' quichi̱, nga'aa cañi chcui' ngu' cuañi' lo'o tya'a ngujui clyo'o ca ti ngu'. Tya sa'ni la ná ntsu'u ngu' culiya' tyucui ña'a̱ chalyuu ñi'ya̱ nu culiya' cu'ma̱ quichi̱ bi'; pana cua nñilo'o ma̱ ji'i̱ quiña'a̱ tya'a ñati̱ chalyuu, xqui'ya cha' tlyu tsa cha' cucha'a̱ nchca ji'i̱ ma̱.

APOCALIPSIS 19:20

Nxu̱u̱ tya'a ngu', lo'o li' ngua nu na'ni chiya'a̱ ña'a̱ bi' preso; lo'o jua'a̱ nu cuiñi nu ndu'ni cha' tu'ba ji'i̱ ycui' Ndyosi laca, lo'o bi' ngua preso. La cui' nu cuiñi bi' ngua'ni cha' tlyu ca slo na'ni bi' tya tsubi' la, cha' xcutsi̱i̱ ji'i̱ ñati̱; cua ngüiñilo'o bi' ji'i̱ lcaa ñati̱, bi' cha' nda ngu' chacuayá' chca'a̱ cuayá' ji'i̱ na'ni chiya'a̱ ña'a̱ bi' nde tyaca̱a̱ ngu', jua'a̱ ngua'ni tlyu ngu' ji'i̱ lcui̱ ji'i̱ ni' li'. Lo'o li' nchcua̱a̱ ycui' Ndyosi ji'i̱ nu na'ni chiya'a̱ ña'a̱ bi' lo'o nu cuiñi bi', ndyaa ngu' ña'a̱ lu'ú ti ngu' nde lo tayu' su ntsu'u quii' tlyu nu ti'í tsa ndyumi̱' ngu' cha' lo'o yuu sufri ndyaqui̱.

APOCALIPSIS 2:13

Cua jlo ti' na' lcaa ña'a̱ nu ndu'ni ma̱, nacui̱ Ni. Jlo ti' na' cha' laca Satanás loo ca su ndi'i̱ cu'ma̱; pana masi jua'a̱ laca cha', tya tso'o tsa nxñi ma̱ cha' 'na, nacui̱ Ni. Bilya tya'a̱chu̱' ma̱ ji'i̱ cha' jna'; ña'a̱ ti jlya ti' ma̱ 'na, masi tyempo cuxi nu ngua li', nu lo'o ndyujuii ngu' ji'i̱ jyo'o Antipas. Ná ndyutsi̱i̱ yu bi', nchcui' yu cha' 'na ca quichi̱ tyi ma̱ su ntucua Satanás loo.

APOCALIPSIS 2:24

Juani chcui' na' xi lo'o cu'ma̱ tya'a ngusñi ma̱ cha' jna', nu ndyanu ma̱ nde Tiatira, cu'ma̱ nu ná ngusñi ma̱ cha' cuxi nu nclyu'u nu cuna'a̱ cuxi bi': ná jlo ti' ma̱ cua'ni ma̱ cha' cuxi nu nacui̱ ngu' bi' cha' sca cha' nu tucui tsa nu ntsu'u ji'i̱ Satanás laca, lo'o jua'a̱ laca cha' cuxi bi'. Tso'o ndu'ni ma̱ lacua. Ná ta na' xa' cña nu cua'ni ma̱, nacui̱ Ni,

APOCALIPSIS 2:9

Jlo ti' na' lcaa ña'a̱ nu ndu'ni cu'ma̱, nacui̱ Ni. Jlo ti' na' cha' lye tsa ndyu'ni lya' ti' ngu' ji'i̱ ma̱, cha' ti'i tsa ma̱ cuentya ji'i̱ ngu' bi', masi liñi la ñacui̱ na cha' ntsu'u tsa cha' tso'o ji'i̱ cu'ma̱ cuentya jna', nacui̱ Ni. Lo'o jua'a̱ jlo ti' na' cha' cuxi tsa nchcui' ngu' ji'i̱ ma̱. Nacui̱ ngu' cha' sñi' ycui' Ndyosi laca ycui' ngu'; pana sca cha' ndu'ni ti ngu' laca cha' bi', cha' stu'ba ntsu'u cha' ji'i̱ ngu' bi' lo'o Satanás, nacui̱ Ni.

APOCALIPSIS 20:10

Lo'o li' tyucua ya' Ni ji'i̱ nu xña'a̱ nu ngüiñilo'o ji'i̱ ngu' tya clyo, tyalo'o Ni ji'i̱ lo tayu' su ntsu'u quii' ndyaqui̱ lo'o yuu sufri; la cui' se'i̱ laca su cua nchcua̱a̱ Ni ji'i̱ nu na'ni chiya'a̱ ña'a̱ bi', su cua nchcua̱a̱ Ni ji'i̱ nu cuiñi nu nacui̱ cha' tu'ba ji'i̱ ycui' Ndyosi laca. Tsa̱ lo'o talya ná tye cha' ti'í tsa chcube' ngu' ca bi'.

APOCALIPSIS 20:8

tsaa laja ti nu Satanás bi' xi cha' cñilo'o yu xi ji'i̱ lcaa ñati̱ tyucui ña'a̱ chalyuu, lcaa tya'a cusu̱u̱ ycui' Ndyosi; ngu' Gog lo'o ngu' Magog laca ñati̱ bi'. Ñi'ya̱ nu ná caca ji'na culacua na ni lcua tya'a satya yusi̱ ndi'i̱ to' tyujo'o, jua'a̱ ná caca culacua na ni tsa lo cua tya'a ñati̱ nu xuti'i̱ Satanás ji'i̱ cha' xu̱u̱ tya'a ngu' lo'o ycui' Ndyosi.

APOCALIPSIS 3:9

Ntsu'u xi taju ñati̱ nu cuiñi ti nda cha' lo'o tya'a ngu' cha' ñati̱ jna' laca ngu'; liñi la ñacui̱ na cha' ntsu'u cha' ji'i̱ ngu' bi' lo'o Satanás. Ca tiya' la xi cuane na' ji'i̱ ngu' bi', cha' tya̱a̱ ngu' ca slo cu'ma̱, tyu̱ sti̱' ngu' slo ma̱ cha' cua'ni tlyu ngu' ji'i̱ ma̱ li'; caca cuayá' ti' ngu' jua'a̱ cha' tyaca'a tsa cu'ma̱ 'na.

APOCALIPSIS 9:1

Li' ngula'á xca̱ nu nchca ca'yu lo'o cui'chcua̱ ji'i̱; hora ti na'a̱ na' ngua'ya sca nu cuxi nde chalyuu. Masi cua ngua yu sca nu laca loo nde cua̱ nquicha', pana ndyú yu lo yuu li', ñi'ya̱ ndyú sca cuii. Cua ngujui ya' ji'i̱ yu cha' saala yu to' tyuquee su ndi'i̱ lcaa nu cuiñaja.

APOCALIPSIS 9:20

Pana ña'a̱ ti tya ngua'ni ngu' cha' cuxi, nu ñati̱ nu ná ngujuii lo'o quicha bi'; ná nguxtyanu ngu' cha' cuxi nu ndu'ni ngu'. Ña'a̱ ti tya ndyu'ni tlyu ngu' ji'i̱ cui'i̱ cuxi, jua'a̱ ji'i̱ lcui̱ jo'ó nu ndya' lo'o oro, masi jo'ó ndya' lo'o plata, masi jo'ó ndya' lo'o chcua̱ ngatsi, masi jo'ó ndya' lo'o quee, masi jo'ó ndya' lo'o yaca ti; ña'a̱ ti ndyu'ni tlyu ngu' ji'i̱ jo'ó nu ná nchca ji'i̱ ña'a̱ ji'na, ni ná nduna cha' nu nchcui' na, ni ná nchca ji'i̱ jo'ó bi' tya'a̱.