APOCALIPSIS 1:8 - Chatino Tataltepec

⁸ “Ñi'ya̱ nti' letra A, jua'a̱ nguxana lcaa cha' lo'o na'; ñi'ya̱ nti' letra Z, jua'a̱ tye lcaa cha' lo'o na'”, nacui̱ ycui' nu Xu'na na nu lcaa cña nchca ji'i̱ Ni. Nu ngua tya clyo lu'ú ycui' Ndyosi, na lu'ú Ni juani, lo'o ña'a̱ ti tya lu'ú Ni tyempo nde loo la.

APOCALIPSIS 1:8 Iomraidhean Croise

2 CORINTIOS 6:18

caca na' Sti ma̱; jua'a̱ cu'ma̱ caca ma̱ sñi' na', masi nu cuna'a̱, masi nu qui'yu. Jua'a̱ nacui̱ ycui' Ndyosi nu Xu'na ma̱, nu lcaa tsiya' ti cña nchca ji'i̱ Ni.

APOCALIPSIS 1:11

Ndi'ya̱ nchcui' nu bi' lo'o na': ―Ñi'ya̱ nti' letra A, jua'a̱ nguxana lcaa cha' lo'o na'; ñi'ya̱ nti' letra Z, jua'a̱ tye lcaa cha' lo'o na' ―nacui̱ nu nchcui' bi'―. Scua clya nu'u̱ lcaa cha' nu cacha' na' jinu'u̱ juani; lcaa cha' nu ña'a̱ nu'u̱ juani, scua clya nu'u̱ ji'i̱ lo quityi. Li' ta nu'u̱ quityi re cha' tsaa slo nu cati tya'a taju ñati̱ nu ntsu'u cha' ji'i̱ lo'o Jesucristo ca quichi̱ tyi ngu', ca loyuu su cuentya Asia nu ñacui̱ na' re: quichi̱ Efeso, jua'a̱ quichi̱ Esmirna, jua'a̱ quichi̱ Pérgamo, jua'a̱ quichi̱ Tiatira, jua'a̱ quichi̱ Sardis, jua'a̱ quichi̱ Filadelfia, jua'a̱ quichi̱ Laodicea.

APOCALIPSIS 1:17

Lo'o cua na'a̱ na' ji'i̱ Ni, tsiya' ca nclyú na' nde quiya' Ni; cua culiji ti ti' na' ngua, xqui'ya cha' ndyutsi̱i̱ tsa na'. Li' ya' tsu' cui̱ Ni ngusta Ni hichu̱' na', ndi'ya̱ nchcui' Ni lo'o na': ―Ná cutsi̱i̱ nu'u̱ ―nacui̱ Ni―. Na' ntucua̱ lo'o nguxana chalyuu, lo'o jua'a̱ la cui' na' tyucua̱ lo'o tye chalyuu.

APOCALIPSIS 1:4

Juan laca na' nu nda̱ quityi re tsaa nde cati tya'a quichi̱ loyuu su cuentya Asia, ca su ndi'i̱ taju ñati̱ nu ngusñi cha' ji'i̱ Jesucristo. Nda na' xlyo ni'i̱ ji'i̱ ma̱ chacuayá' ji'i̱ ycui' Ndyosi Sti na, jua'a̱ chacuayá' ji'i̱ Xtyi'i ycui' Ndyosi, jua'a̱ chacuayá' ji'i̱ Jesucristo. Cua nti' na' cha' ña'a̱ ti cua'ni ycui' Ndyosi cha' tso'o lo'o ma̱, ña'a̱ ti cua'ni Ni cha' ti̱ ti tyi'i̱ tyiquee ma̱. Nu ngua tya clyo lu'ú ycui' Ndyosi, na lu'ú Ni juani, lo'o ña'a̱ ti tya lu'ú Ni tyempo nde loo la. Ntucua Xtyi'i ycui' Ni nde loo su tlyu su ntucua ycui' Ni, la cui' cati tya'a cui'i̱ lubii nu nda Xtyi'i Ni laca bi'.

APOCALIPSIS 11:17

Ndi'ya̱ nchcui' ngu' li': Ndyosi Xu'na ya, nacui̱ ngu', cua nchca jinu'u̱ cua'ni lcaa cña. Na lu'ú nu'u̱ juani, lo'o la cui' ti lu'ú nu'u̱ nu ngua tya clyo la, jua'a̱ tya lu'ú nu'u̱ nde loo la. Tsa xlya'be jinu'u̱ cha' cua nguxana nu'u̱ ndyu'ni nu'u̱ quiña'a̱ tsa cña tlyu nde chalyuu. Ndube tsa ti' ya cha' cua nguxana nu'u̱ laca nu'u̱ loo,

APOCALIPSIS 15:3

Ndyula tu'ba ngu' sca ji̱i̱ nu cua ndyula tu'ba jyo'o Moisés nu ngua sa'ni, la cui' Moisés nu ngua'ni cña ji'i̱ ycui' Ndyosi; lo'o nu ñi'ya̱ ña'a̱ xlya' bi' ndyula tu'ba la cui' ji̱i̱ bi'. Ndi'ya̱ nchcui' ji̱i̱ bi': Ndyosi Xu'na ya, lcaa cña nchca jinu'u̱; tlyu tsa cña ndu'ni nu'u̱, hasta ndube tsa ti' lcaa ñati̱ ji'i̱ cña bi'. Xcui' ndu'ni liñi nu'u̱ lo'o ñati̱ chalyuu, chañi tsa laca lcaa cha' nu nchcui' nu'u̱ lo'o ñati̱. Sca ti nu'u̱ laca Xu'na lcaa ñati̱ tyucui ña'a̱ chalyuu.

APOCALIPSIS 16:14

Msu ji'i̱ nu xña'a̱ laca cuiñaja bi'; nchcutsi̱i̱ bi' ji'i̱ ñati̱, cha' nchca ji'i̱ cua'ni cha' tlyu. Ndya'a̱ cuiñaja bi' nxuti'i̱ ji'i̱ lcaa nu laca loo chalyuu, cha' tya̱a̱ ngu' cha' cusu̱u̱ tsa̱ tlyu lo'o cua tye ti chalyuu. Cua ntsu'u cña nu cua'ni ycui' Ndyosi nu Xu'na na lo'o ndyaca cha' cusu̱u̱ bi'.

APOCALIPSIS 16:7

Li' ndyuna na' cha' nu nchcui' ñati̱ nde su ntucua mesa su ndyaqui̱ msta̱: ―Ndyosi Xu'na ya ―nacui̱ ngu'―, ycui' nu'u̱ ni, lcaa cña nchca jinu'u̱ ―nacui̱ ngu'―. Liñi tsa ndyu'ni nu'u̱ lo'o nchcube' nu'u̱ ji'i̱ ñati̱ bi' jua'a̱; chañi tsa cha' nu nchcui' nu'u̱ ji'i̱ ñati̱ bi', cha' cuxi tsa cña ndu'ni ngu' bi'.

APOCALIPSIS 19:15

Liñi tsa cha' nu ndyu'u tu'ba Ni lo'o nda Ni cha' lo'o ñati̱ chalyuu. Lo'o jua'a̱ tatsaa Ni ji'i̱ ñati̱ tyucui ña'a̱ chalyuu cha' taquiya' ngu' cha' ji'i̱ Ni. Lye tsa culo Ni cña ji'i̱ ngu', jua'a̱ xcube' Ni ji'i̱ ñati̱ cuxi; ñi'ya̱ laca lo'o satá ngu' si'yu losu' tyixi ne' sca pilya quee nu tlyu xi cha' tyu'u hitya si'yu bi', la cui' jua'a̱ xcube' Ni ji'i̱ ñati̱ bi', xqui'ya cha' ñasi̱' tsa ycui' Ndyosi ji'i̱ ngu', ycui' Ni nu nchca ji'i̱ ndu'ni Ni lcaa lo cña.

APOCALIPSIS 19:6

Quiña'a̱ tsa ñati̱ nguañi nchcui' tsa tlyu ti li'. Ñi'ya̱ ndañi ndyalú sca sta'a̱ clyaa to' quee jaa' su cua̱ tsa ndyalú hitya, ñi'ya̱ ndañi lo'o cui̱i̱ tsa nchcui' tyi'yu, jua'a̱ nguañi lo'o nchcui' ñati̱ quiña'a̱ bi', ngua ti' na'. Ndi'ya̱ nchcui' ngu' li': Cua'ni tlyu na ji'i̱ ycui' Ndyosi nu Xu'na na, nu lcaa lo cña nchca ji'i̱ Ni ndu'ni Ni, nacui̱ ngu' ji'i̱ tya'a ngu'. Cua nguxana Ni, laca Ni loo ji'na juani;

APOCALIPSIS 2:8

’Lo'o jua'a̱ scua nu'u̱ cha' re cha' tsaa slo nu ñati̱ nu ndu̱ cuentya jna' nde quichi̱ Esmirna, cha' culu'u cha' ji'i̱ ycui' Ndyosi ji'i̱ ngu' bi': “Ndi'ya̱ nchcui' na' lo'o ma̱, na' nu ntucua̱ lo'o nguxana lcaa cha', la cui' na' nu tya tyucua̱ lo'o tye lcaa cha': Chañi cha' ngujuii na', pana cua ndyu'ú na' chaca quiya'.

APOCALIPSIS 21:22

Ná ntucua laa ca quichi̱ bi', ná na'a̱ na' cha' ntucua bi' tsiya' ti. Tso'o cha' ntucua ycui' Ndyosi nu Xu'na na quichi̱ bi', ycui' Ni nu nchca ji'i̱ ndu'ni Ni lcaa lo cña; la cui' jua'a̱ ntucua nu ñi'ya̱ ña'a̱ xlya' bi'. Bi' cha' ni sca laa nga'aa nti' quichi̱ bi'.

APOCALIPSIS 21:6

Li' nchcui' Ni lo'o na' chaca quiya': ―Jua'a̱ caca lacua. Ñi'ya̱ nti' letra A ―nacui̱ Ni―, jua'a̱ nguxana lcaa cha' lo'o na'; ñi'ya̱ nti' letra Z, jua'a̱ tye lcaa cha' lo'o na' ―nacui̱ Ni―. Xlya'be ti ta na' na co'o ñati̱ nu jña tsa cha' bi' 'na; nu na co'o ngu' bi', tyu'u bi' ca su tyu'u lcaa cha' tso'o nu ta na' ji'i̱ ngu' cha' cua'ni cu'ú cresiya ji'i̱ ngu'.

APOCALIPSIS 22:13

Ñi'ya̱ nti' letra A nti' na', cha' na' ntucua̱ su nguxana lcaa cha'; ñi'ya̱ nti' letra Z, jua'a̱ nti' na', cha' la cui' na' ntucua̱ ca su tye lcaa cha'.

APOCALIPSIS 4:8

Scuá tya'a lu'be ntsu'u ji'i̱ scaa na'ni bi', pana ntucua cloo ni' tyucui ña'a̱ hichu̱' lu'be ni'; lo'o nde ne' lu'be ni', la cui' jua'a̱ ntucua cloo ni'. Nga'aa nchca ti̱ cha' ndula tu'ba ni' tsa̱ lo'o talya: Xcui' na lubii tsa cresiya ji'i̱ ycui' Ndyosi nu nchca ji'i̱ ndu'ni lcaa cña, nacui̱ ni' lo'o ndyula tu'ba ni'. Nu ngua tya clyo lu'ú ycui' Ni, la cui' jua'a̱ na lu'ú Ni juani, lo'o ña'a̱ ti tya lu'ú Ni tyempo nde loo la. Jua'a̱ nacui̱ ni' lo'o ndyula tu'ba ni'.