1 JUAN 5:7 - Chatino Tataltepec

⁷ Nde cua̱ ntucua sna tya'a ngu' nu nchcui' cha' chañi laca cha' ji'i̱ Jesús bi': ycui' Ndyosi Sti yu laca tsaca ngu' bi'; jua'a̱ Jesucristo nu ntsu'u tyucui cha' ji'i̱ ycui' Ndyosi ji'i̱, bi' laca chaca; lo'o jua'a̱ Xtyi'i ycui' Ni, chaca laca bi'. Stu'ba ti nchcui' nu ca ta'a sna bi', cha' chañi laca cha' bi'.

1 JUAN 5:7 Iomraidhean Croise

SAN MATEO 17:5

Pana laja lo'o nchcui' Pedro, li' ndu'u tucua sca coo nu ngati̱ tsa ña'a̱, nu ndubi tsa ña'a̱, ngüixi̱i̱ chu̱' ngu', tyucui ña'a̱ su ndu̱ ngu'. Li' nguañi xtyi'i sca ñati̱. Hora ti ngua cuayá' ti' ngu' bi', cha' nchcui' ycui' Ndyosi lo'o ngu' laja coo bi': ―La cui' yu re laca Sñi' na', tyaca'a tsa yu 'na ―nacui̱ Ni―. Tso'o tsa ntsu'u tyiquee na' ña'a̱ na' ji'i̱ yu. Cua'a̱ tso'o jyaca̱ ma̱ ji'i̱ lcaa cha' nu chcui' Sñi' na' re lo'o ma̱.

SAN MATEO 18:16

Pana si ná tyaja'a̱ ngu' tya'a ma̱ bi' cuna ngu' cha' nu nchcui' ma̱ lo'o ngu', tso'o la si tsaa ma̱ slo ngu' bi' chaca quiya'; pana lo'o xi xa' la ngu' tya'a ma̱ tsaa ma̱ li', cha' lo'o ngu' bi' cuna ngu' cha' nu chcui' tyucuaa ma̱, cha' caca ngu' bi' testigo.

SAN MATEO 28:19

Yaa ma̱ lcaa quichi̱ nde chalyuu cha' ca tsa'a̱ lcaa ñati̱ cha' jna'. Li' tyucuatya ma̱ ji'i̱ ngu' chacuayá' ji'i̱ ycui' Ndyosi Sti na', jua'a̱ chacuayá' jna' nu laca̱ Sñi' ycui' Ndyosi, jua'a̱ chacuayá' ji'i̱ Xtyi'i ycui' Ndyosi.

SAN JUAN 1:1

Nu ngua tya clyo la ndi'i̱ ycui' Ndyosi, lo'o jua'a̱ ndi'i̱ yu nu laca tyucui cha' ji'i̱ ycui' Ndyosi; nguti'i̱ yu bi' lo'o ycui' Ndyosi. Nu yu nu laca cha' bi', stu'ba ntsu'u cha' ji'i̱ yu lo'o ycui' Ndyosi.

SAN JUAN 10:30

Lo'o jua'a̱ stu'ba ntsu'u cha' ji'i̱ ycui' Ndyosi Sti na' lo'o na' ―nacui̱ Jesús.

SAN JUAN 12:28

Li' nchcui' Jesús lo'o ycui' Ndyosi Sti yu: ―Sti na', tso'o la si caca tlyu ycui' nu'u̱. Li' nguañi nchcui' ycui' Ndyosi nde cua̱. Ndi'ya̱ nchcui' Ni: ―Cua laca ndu'ni tlyu ngu' ji'i̱ ycui' ca na', lo'o jua'a̱ tya caca tlyu la na' chaca quiya' xqui'ya nu'u̱.

SAN JUAN 14:17

Ná caca tyanu Xtyi'i ycui' Ndyosi ne' cresiya ji'i̱ ñati̱ cuxi, cha' ná nchca ña'a̱ ngu' bi' ji'i̱ Ni, ná nslo ngu' tilaca laca ycui' Ni. Nu cu'ma̱, nslo ma̱ ji'i̱ Ni xqui'ya cha' ndi'i̱ nu bi' lo'o ma̱, lo'o jua'a̱ cua tyanu ti Ni ne' cresiya ji'i̱ ma̱ ―nacui̱ Jesús ji'i̱ ngu'―.

SAN JUAN 15:26

’Cua'ni na' cha' ca̱a̱ nu laca Xtyi'i ycui' Ni lo yuu, Xtyi'i nu ndu'u slo ycui' Ndyosi ―nacui̱ Jesús―. Bi' laca nu culu'u ji'i̱ ma̱ lcaa cha' nu liñi ca, bi' laca nu xtyucua ji'i̱ ma̱ lcaa tyempo chacuayá' 'na. Nu lo'o ca̱a̱ nu bi' lo yuu, li' culu'u Ni lcaa cha' liñi nu ntsu'u 'na ji'i̱ ma̱ ―nacui̱ Jesús―.

SAN JUAN 5:26

Nchca ji'i̱ ycui' Ndyosi Sti na' cua'ni cha' xtyacui cresiya ji'i̱ ngu' cuxi bi', nchca ji'i̱ Ni ta Ni chalyuu nu ná nga'a̱ cha' tye ji'i̱ ngu'. Lo'o jua'a̱ stu'ba nchca jna' lo'o Sti na', cha' cua nda Sti na' chacuayá' cha' cua'ni na' jua'a̱ ―nacui̱ Jesús―.

SAN JUAN 8:18

Tsaca ngu' bi' laca na' ―nacui̱ Jesús―, cha' nchcui' na' cha' liñi cuentya ji'i̱ ycui' ca na'; nu chaca ngu' bi' laca Sti na' nu nda jna' lijya̱a̱ re.

SAN JUAN 8:54

Lo'o li' nacui̱ Jesús: ―Ná tso'o na' tsiya' ti si cua'ni na' cha' caca tlyu ycui' ca ti na', pana ycui' Ndyosi Sti na' ndu'ni cha' caca tlyu na' ―nacui̱―. Ndu'ni ma̱ cha' Sti ma̱ laca ycui' Ndyosi;

LOS HECHOS 2:33

Li' ñaa ycui' Ndyosi ya̱qui'ya Ni ji'i̱ Jesús cha' tyaa yu ca slo ycui' Ni. Juani ndi'i̱ Jesús nde la'a tsu' cui̱ su tlyu ca su ntucua ycui' Ndyosi. Cua nda ycui' Ndyosi Sti yu Xtyi'i ycui' Ni ji'i̱ Jesús, lo'o nu juani cua nda Jesús Xtyi'i ycui' Ni cha' tyalaa nde chalyuu. Lcaa cha' nu cua ndyuna ma̱, lcaa cha' nu cua na'a̱ ma̱ tsa̱ juani, bi' laca cña nu ngua'ni ycui' Jesús.

LOS HECHOS 5:32

Cha' liñi nchcui' ya lo'o ma̱ cha' cua na'a̱ ya ji'i̱ ycui' Jesús bi'. Cua nda ycui' Ndyosi Xtyi'i ycui' Ni cha' tyanu ne' cresiya ji'i̱ lcaa ñati̱ nu ndu'ni cña nu ngulo Ni ji'i̱ ngu'. Lo'o jua'a̱ Xtyi'i ycui' Ndyosi laca nu ndu'ni cha' taca ca jlo ti' ya cha' chañi laca cha' ji'i̱ Jesucristo nu nclyu'u ya ji'i̱ lcaa ñati̱.

2 CORINTIOS 13:14

Lo'o juani nti' tsa na' cha' ná tye cha' stu'ba cha' ji'i̱ lcaa cu'ma̱ cajua lo'o Jesucristo nu Xu'na na, la cui' Ni laca nu quiña'a̱ tsa cha' tso'o ndu'ni lo'o na lcaa tsa̱. Jua'a̱ nti' na' cha' lcaa tsa̱ caca stu'ba cha' ji'i̱ ma̱ lo'o ycui' Ndyosi, la cui' Ni laca nu ntsu'u tsa tyiquee Ni ña'a̱ Ni ji'na. Jua'a̱ nti' na' cha' tyanu Xtyi'i ycui' Ndyosi ne' cresiya ji'i̱ ma̱, la cui' Ni laca nu ndu'ni cha' stu'ba ntsu'u cha' ji'na lo'o Ni, jua'a̱ lo'o xa' la ngu' tya'a ngusñi na cha' ji'i̱ ycui' Ndyosi. Jua'a̱ caca cha' lacua.

1 JUAN 1:1

Cua laca ntucua Jesús lo'o ycui' Ndyosi Sti yu nu lo'o nguxana chalyuu tya clyo; la cui' yu laca nu nchcui' ya ji'i̱, nu lo'o nscua ya tilaca laca Jesucristo. Cua jlo tso'o ti' ya cha' bi', cha' cua na'a̱ tso'o ya ji'i̱ yu lo'o cloo ya, cha' stu'ba ti nguta'a̱ ya lo'o yu; cua ndyuloo ya ji'i̱ yu lo'o cua ngua'ni ca'a̱ ya' ya ji'i̱ ycui' yu. Cua nchcui' ya lo'o cu'ma̱ cha' Jesucristo laca nu nda chaca chalyuu cucui ji'i̱ ñati̱.

1 JUAN 5:6

Nu sca ti Sñi' ycui' ca Ndyosi laca Jesucristo, nu ya̱a̱ chalyuu. Ntyucuatya ngu' ji'i̱ yu li'. Ngujuii yu lo crusi, ndyalú tañi ycui' yu li'. Si'i xqui'ya cha' nu cua ntyucuatya ti yu, masi lo'o xqui'ya cha' cua ngujuii yu lo crusi ndyalú tañi yu, bi' cha' nchca cuayá' ti' na juani cha' nu sca ti Sñi' ycui' Ndyosi laca Jesucristo. Bi' laca cha' nu ndacha' Xtyi'i ycui' Ndyosi ji'na, lo'o jua'a̱ chañi tsa laca cha' bi'.

1 JUAN 5:8

Lo'o jua'a̱ nde lo yuu cua ngua sna quiya' lo'o nchcui' ycui' Ndyosi cha' chañi laca cha' Jesucristo laca nu sca ti Sñi' ycui' Ni: tsaca laca cha' nu nchcui' Xtyi'i ycui' Ndyosi lo'o na; jua'a̱ chaca laca cha' nu nchcui' Ni laja lo'o ntyucuatya Jesucristo; lo'o jua'a̱ chaca laca cha' nu cua nchcui' Ni laja lo'o ngujuii Jesucristo lo crusi, ndyalú tañi yu li'. Sca ti cha' nchcui' Ni ca ta'a sna quiya' bi'.

APOCALIPSIS 19:13

Ndi'ya̱ nchcui' ngu' ji'i̱ Ni: “La cui' nde laca cha' nu cua nda Ni lo'o ñati̱”. Tyucui ña'a̱ lo ste' Ni ndu'u tañi.