1 JUAN 2:16 - Chatino Tataltepec

¹⁶ Lcaa cha' cuxi nu ndaca'a ji'i̱ ñati̱ cha' ná xñi tso'o ngu' cha' ji'i̱ ycui' Ndyosi, si'i ca su ntucua ycui' Ndyosi Sti na ndyu'u cha' bi'. Lcaa cha' cuxi nu ndiya ti' ñati̱ ji'i̱, cha' tyaala' xi tyiquee ngu'; jua'a̱ lcaa cha' cuxi nu nti' ngu' cua'ni ngu' lo'o ña'a̱ ngu' ji'i̱; jua'a̱ lcaa na nu nti' ngu' cha' caja ji'i̱ ngu', cha' jua'a̱ cua'ni tyixi ti ngu' lo'o tya'a ngu', nde chalyuu ti ndyu'u lcaa cha' cuxi bi'.

1 JUAN 2:16 Iomraidhean Croise

SAN MATEO 4:8

Lo'o ndye nchcui' ngu', xa' ndyaa lo'o nu xu'na cuiñaja ji'i̱ Jesús nde sca lo xlya ca'ya nu cua̱ tsa. Li' ngulu'u nu xña'a̱ bi' lcaa nasiyu̱ tyucui ña'a̱ chalyuu ji'i̱ Jesús, cha' tso'o tsa ña'a̱ chalyuu bi'.

SAN MATEO 5:28

Pana, quiña'a̱ la cha' chcui' na' lo'o ma̱ juani: si ña'a̱ sca nu qui'yu ji'i̱ sca nu cuna'a̱, lo'o li' culacua ti' yu cha' cua'ni suba' yu lo'o, stu'ba ntsu'u cha' bi' lo'o yu ñi'ya̱ si cua laca ngua'ni suba' yu lo'o nu cuna'a̱ bi', masi tyiquee ti yu ntsu'u cha' cuxi bi'.

SAN LUCAS 4:5

Li' ndyaa lo'o nu xña'a̱ bi' ji'i̱ yu ca lo xlya ca'ya cua̱. Sca hora ti ngulu'u nu xña'a̱ bi' tyucui ña'a̱ chalyuu ji'i̱ Jesús.

ROMANOS 13:14

Ta ma̱ chacuayá' cha' caca loo ycui' Jesucristo nu Xu'na na ji'i̱ tyucui ña'a̱ ma̱; nga'aa taquiya' na ji'i̱ lcaa lo cha' cuxi, cha' nu tiji̱' tsa ti' na ji'i̱ xqui'ya cha' laca na ñati̱ ti.

1 CORINTIOS 10:6

Lo'o jua'a̱ na, taca tyi'u ti' na ñi'ya̱ nu ngua'ni jyo'o cusu' bi' nu ngua sa'ni. Ná tso'o si xcui' na tyu'u tyiquee na ji'i̱ cha' cuxi, cha' la cui' jua'a̱ ngua'ni ngu' bi' tya li'.

GÁLATAS 5:17

Nu cha' cuxi nu ndiya ti' na ni, nxu̱u̱ tya'a cha' bi' lo'o cha' nu nda Xtyi'i ycui' Ndyosi cha' tyanu ne' cresiya ji'na. Lo'o jua'a̱ Xtyi'i ycui' Ndyosi ni, bi' laca nu nxu̱u̱ tya'a lo'o cha' cuxi nu ndiya ti' na cha' cua'ni na, cha' laca na ñati̱ chalyuu. Ná stu'ba cha' bi' tsiya' ti; bi' cha' nga'aa caca cua'ni ma̱ cua ña'a̱ ca cha' cuxi nu ndiya ti' ma̱, nu ngua'ni ma̱ cua tsubi' la.

GÁLATAS 5:24

Cua ngujuii Cristo lo crusi cha' cati̱ qui'ya nu ntsu'u ji'na; bi' cha' cua ngua'ni tye na ji'i̱ lcaa cha' cuxi nu ntsu'u ne' cresiya ji'na tya tsubi' la, lcaa na nu ndacui ti' na ji'i̱ nquicha', ngua'ni tye na ji'i̱ xqui'ya cha' ntsu'u cha' ji'na lo'o ycui' Cristo. Lo'o jua'a̱ lcaa cha' nu tiji̱' ti' na ji'i̱, cua nguxtyanu na ji'i̱ cha' cuxi bi' juani.

EFESIOS 2:3

Ca ta'a na ni, chañi cha' ñi'ya̱ nu ndaquiya' ngu' bi' ji'i̱ nu cuxi, jua'a̱ ngua'ni na tya tsubi' la; ngua'ni na cua ña'a̱ ca cha' cuxi nu ndijña ti' cresiya ji'na. Na laca nu ngua ti' ycui' ca na cha' cua'ni na, ngua'ni na ji'i̱ li'; cua ña'a̱ ca cha' cuxi nu ngua'ya hique ti na, ngua'ni na cha' bi'. Bi' cha' ndyanu cha' xcube' ycui' Ndyosi ji'na, cha' ñasi̱' tsa Ni xqui'ya cha' cuxi nu ngua'ni na lo'o Ni; stu'ba ti xcube' Ni ji'na lo'o cua ña'a̱ ca ñati̱ chalyuu li'.

TITO 2:12

jua'a̱ cua ngulu'u Ni ji'na ñi'ya̱ taca tyi'i̱ tso'o ti na nde chalyuu. Nti' Ni cha' cua'a na ji'i̱ ycui' ca na, cha' tso'o ti cua'ni na lo'o tya'a ñati̱ na. Taca cua'ni tlyu na ji'i̱ ycui' Ndyosi nu lo'o cua ngulochu̱' na ji'i̱ lcaa cha' cuxi nu ná ndiya ti' Ni ji'i̱, nu lo'o nga'aa ndu'ni na lcaa cha' suba' nu ndiya ti' ñati̱ chalyuu ti.

TITO 3:3

Cua sa'ni la ná nda na cuentya tsiya' ti ñi'ya̱ ntsu'u cha' ji'i̱ ycui' Ndyosi; ná ndaquiya' na ji'i̱ Ni li', cha' cua ngüiñilo'o nu xña'a̱ ji'na cha' cua'ni na lcaa cha' cuxi nu ndijña cresiya ji'na cha' cua'ni na. Ngua chaa ti' na lo'o ndyu'ni na cha' cuxi bi' li', masi ngua'ni lya' ti' na ji'i̱ ñati̱, masi ngua liye' ti' na ña'a̱ na ji'i̱ ngu', masi ngua ti'í ti' na ña'a̱ na ji'i̱ tya'a na; lo'o jua'a̱ ngu' tya'a na, ngua ti'í ti' ngu' ña'a̱ ngu' ji'na.

SANTIAGO 3:15

Si'i nde su ntucua ycui' Ndyosi ndyu'u cha' cuxi nu nchcui' ma̱, sca cha' cuxi nu ntsu'u chalyuu laca bi'; sca cha' nu cua nda ycui' nu xña'a̱ laca cha' nu nchcui' ma̱ bi'.

SANTIAGO 4:16

Pana si'i jua'a̱ nchcui' ma̱ juani, cha' tyixi tsa ndyu'ni ma̱ lo'o tya'a ñati̱ ma̱; lye tsa nchcui' tyucuaa ti' ma̱ lo'o ngu' tya'a ma̱. Lcaa quiya' lo'o nchcui' ma̱ jua'a̱, cha' cuxi laca bi'.

1 PEDRO 1:14

Taquiya' tso'o ma̱ ji'i̱ cha' nu nchcui' ycui' Ndyosi cha' caca ma̱ sñi' Ni nu tso'o tsa ndu'ni; nga'aa cua'ni ma̱ cua ña'a̱ ca cha' cuxi nu ndiya ti' ma̱ ñi'ya̱ nu ngua'ni ma̱ tya sa'ni la, nu lo'o bilya ca cuayá' ti' ma̱ cha' tso'o ji'i̱ ycui' Ndyosi.

1 PEDRO 2:11

Cu'ma̱ ngu' tya'a tso'o na, cua nscua cha' tyi'i̱ na ca slo ycui' Ni tyempo ca nde loo la, bi' cha' nga'a̱ cha' tyi'i̱ na chalyuu juani ñi'ya̱ si laca na ngu' tyijyu' nu ná ntsu'u tyi ngu'. Lye tsa chcui' na' lo'o ma̱ juani cha' nga'aa cua'ni ma̱ cua ña'a̱ ca cha' cuxi nu ndijña tyiquee ma̱ cha' cua'ni ma̱; nga'aa taquiya' ma̱ ji'i̱ cha' cuxi bi', cha' jua'a̱ nga'aa caca ji'i̱ nu cha' cuxi bi' cua'ni ñu'u̱ ji'i̱ ma̱.

2 PEDRO 2:10

Lo'o ñati̱ nu xcui' cha' suba' ndu'ni ni, lye la xcube' Ni ji'i̱ ngu' bi', cha' ná ndaquiya' ngu' bi' tsiya' ti ji'i̱ ngu' nu laca loo ji'i̱ ngu'; ná ndube ti' ngu' bi' tsiya' ti, cha' tyixi tsa tyiquee ngu'. Ná ntsi̱i̱ ngu' bi', masi chcui' ca'a̱ ngu' ji'i̱ ngu' xca̱ ji'i̱ ycui' Ndyosi.

2 PEDRO 2:18

Jlo tsa ti' nu ngu' cuiñi bi' ñi'ya̱ chcui' ngu' sca cha' tso'o, pana tucua lo cha' ntsu'u tyiquee ngu' bi'; na cñilo'o ngu' bi' ji'i̱ ngu' nu ngusñi ca ti cha' tso'o ji'i̱ Jesucristo, cha' lo'o ngu' cua'ni suba' ngu' chaca quiya' nti' nu ngu' cuiñi bi'. Ñi'ya̱ ngua'ni ngu' cha' cuxi tya tsubi' la, nu lo'o bilya cuna ngu' cha' tso'o ji'i̱ ycui' Ndyosi, jua'a̱ nti' ngu' cuiñi bi' cha' cua'ni ngu' chaca quiya'.