1 JUAN 2:1 - Chatino Tataltepec

¹ Ñi'ya̱ nti' na' ña'a̱a̱ ji'i̱ sñi' na', jua'a̱ nti' na' ña'a̱a̱ ji'i̱ cu'ma̱, cha' tyaca'a tsa ma̱ 'na; bi' cha' nscua na' quityi re cha' ca̱a̱ ca slo cu'ma̱, cha' ná nti' na' cha' sta ycui' Ndyosi qui'ya ji'i̱ ma̱. Pana si ntsu'u cha' sta Ni qui'ya ji'na lo'o cua ngusñi na cha' ji'i̱ Jesucristo, la cui' Jesucristo laca nu cua nchcube' yu cña loo na. Sca ñati̱ nu lubii tsa laca nu Jesucristo bi'.

1 JUAN 2:1 Iomraidhean Croise

SAN LUCAS 10:22

Li' nchcui' yu lo'o ngu' nu ndyaa cuentya ji'i̱ yu bi': ―Cua nda Sti na' lcaa na jna'. Ná tucui jlo ti' cha' laca na' Sñi' ycui' Ni; sca ti ycui' Sti na', bi' nu jlo ti'. Ná tucui jlo ti' tilaca laca ycui' Sti na'; sca ti na', jlo ti' na' tilaca laca Ni. Lo'o jua'a̱ ca jlo ti' xi xa' la ñati̱ nu nti' na' cha' culu'u na' ji'i̱ ngu' tilaca laca ycui' Sti na', ca cuayá' ti' ngu' bi' li'.

SAN JUAN 10:15

Ñi'ya̱ nslo Sti na' jna', jua'a̱ nslo na' ji'i̱ Sti na'; ñi'ya̱ ntsu'u cha' ji'i̱ Sti na' lo'o na', jua'a̱ ntsu'u cha' jna' lo'o ñati̱ jna'. Ycui' ca na' tyaja'a̱ na' caja̱a̱ cha' ná tye cresiya ji'i̱ ñati̱ 'na ―nacui̱ Jesús ji'i̱ ngu'―.

SAN JUAN 13:33

Sñi' na' ―nacui̱ Jesús ji'i̱ ngu' bi' li'―, tya xi ca tsa̱ tya tyi'i̱ na' nde chalyuu lo'o ma̱. Ñi'ya̱ nu ni na' ji'i̱ ngu' judío tya tsubi', la cui' ti cha' ta na' lo'o ma̱ juani: Tsaana ma̱ jna', pana ná caja chacuayá' tsaa ma̱ ca su tsa'a̱ ―nacui̱ yu―.

SAN JUAN 14:16

Lo'o tya'a na', li' chcui' na' lo'o ycui' Ndyosi Sti na' cha' ta Ni chaca nu xtyucua ji'i̱ ma̱; bi' laca Xtyi'i ycui' Ndyosi nu laca su̱u̱ lcaa cha' liñi. Tyanu nu bi' lo'o ma̱ ña'a̱ cuayá' nu tye chalyuu ―nacui̱―.

SAN JUAN 14:6

―Na' laca̱ nu nclyu'u̱ tyucui̱i̱ ―nacui̱ Jesús li'―, na' nclyu'u̱ lcaa cha' nu liñi ca; na' nda̱ chalyuu tso'o ji'i̱ ngu', chalyuu nu ná nga'a̱ cha' tye. Ná taca ji'i̱ ngu' tyalaa ngu' ca slo ycui' Ndyosi si ná lo'o na' ―nacui̱ Jesús―.

SAN JUAN 21:5

Li' ngusi'ya lo'o Jesús ji'i̱ ngu': ―¿Ha ngujui xi na cacu ma̱, La? ―Ná sca na ngujui ji'i̱ ya tsiya' ti ―nacui̱ ngu' ji'i̱ yu li'.

SAN JUAN 5:14

Ca ngusi̱i̱ la xa' ndyacua tya'a Jesús lo'o nu ngua quicha bi' lo'o ndya'a̱ yu ne' laa. Li' nacui̱ Jesús ji'i̱: ―Cua ndyaca tso'o nu'u̱ juani ―nacui̱ yu―, bi' cha' xtyanu nu'u̱ tyucui̱i̱ cuxi cua hi̱ cha' nga'aa tyacua xa' quicha tlyu la hi̱.

SAN JUAN 5:36

Pana xti ti cha' 'na nchcui' Juan lo'o ma̱; cua quiña'a̱ la cha' caca ña'a̱ ma̱ juani cuentya jna', nu lo'o ña'a̱ ma̱ cña tonu nu nda Sti na' 'na cha' cua'ni na'. Tya cua'ni na' cña bi' ña'a̱ cuayá' tye bi'. Xqui'ya cña bi' caca cuayá' ti' ma̱ cha' ycui' Sti na' ngulo cña jna' cha' ca̱a̱ na' nde chalyuu re ―nacui̱ Jesús―.

SAN JUAN 6:27

Tso'o la ―nacui̱ Jesús li'―, si cua'ni cña ti' ma̱ cha' caja sca cha' nu talo ji'i̱ ma̱; chañi cha' tyaala' ti' ma̱ li', si caja chalyuu nu ná nga'a̱ cha' tye ji'i̱ ma̱. Nu na cacu na ni, xtyi'i ti talo na bi', yala ti quiñu'u̱ na bi'. Pana na' nu lijya̱a̱ cha' caca na' ñati̱, ta na' sca cha' tso'o ji'i̱ ma̱ nu cua'ni cha' tyaala' ti' ma̱, lo'o ná tye tsiya' ti cha' bi' ji'i̱ ma̱ ―nacui̱―. Na cua nda ycui' Ndyosi Sti na' chacuayá' jna' cha' ta na' cha' tso'o bi' ji'i̱ ma̱.

SAN JUAN 8:11

―Ná tucui ndu̱ nu ngusta qui'ya 'na, cusu' ―nacui̱ nu cuna'a̱ bi'. ―Tso'o lacua ―nacui̱ Jesús ji'i̱―. Jua'a̱ na', ná ntsu'u qui'ya nu sta na' jinu'u̱. Tyaa clya nu'u̱ juani ―nacui̱―, nga'aa cua'ni la nu'u̱ cha' cuxi.

LOS HECHOS 7:52

Cua nguxcube' jyo'o cusu' ji'na ji'i̱ lcaa jyo'o cusu' nu ngua tu'ba ji'i̱ ycui' Ndyosi cha' nchcui' Ni lo'o ñati̱ cua sa'ni. Cua ndyujuii ngu' bi' ji'i̱ jyo'o cusu' nu nguscua cha' ji'i̱ ycui' Ndyosi ndi'ya̱: “Tyalaa sca ñati̱ nde chalyuu re; xcui' lubii tsa cresiya ji'i̱ yu bi' caca”, nacui̱ jyo'o cusu' bi'. Lo'o jua'a̱ tsubi' ti cua ndyalaa la cui' ñati̱ nu nchcui' quityi cha' ji'i̱. Chiya'a̱ tsa ngua'ni ma̱ nu lo'o ndyujuii ma̱ ji'i̱ yu.

ROMANOS 5:10

Tya'a cusu̱u̱ ycui' Ndyosi ngua na; pana juani ngua stu'ba cha' ji'na lo'o Ni, nu lo'o ngujuii Sñi' ycui' Ni lo crusi. Bi' cha' juani ngua ti̱ cha' ji'na lo'o ycui' Ndyosi, lo'o jua'a̱ cua'ni lyaá Ni ji'na xqui'ya cha' cua ndyu'ú nu Jesús bi' chaca quiya'.

ROMANOS 6:15

Ná tso'o ñacui̱ na cha' juani nga'aa ntsu'u cha' taquiya' na ji'i̱ cha' cusu' bi', cha' ndaquiya' na ji'i̱ cha' nu nchcui' ycui' Ndyosi nu xcui' cha' xlya'be ti ndu'ni lo'o na. Ná tso'o laca si tya cua'ni la na cha' cuxi li', cha' nga'aa ntsu'u chacuayá' ji'na cha' cua'ni na jua'a̱.

ROMANOS 8:34

Ná ntsu'u nu caca xcube' ji'na li', cha' xqui'ya na cua ngujuii Jesús, xqui'ya na cua ndyu'ú yu chaca quiya'. Lo'o juani ntucua Cristo la'a tsu' cui̱ ca su ntucua ycui' Ndyosi, ndijña yu cha' clyu ti' ji'i̱ ycui' Ndyosi Sti yu cuentya ji'na.

1 CORINTIOS 15:34

Nga'a̱ cha' xtyanu ma̱ ji'i̱ cha' cuxi nu ndyu'ni ma̱, xana culacua tso'o ti' ma̱ li'; tso'o ti cua'ni ma̱ lo'o tya'a ma̱. Nti' na' cha' ntsu'u xi cu'ma̱ nu bilya ca cuayá' tso'o ti' ma̱ cha' ji'i̱ ycui' Ndyosi, bi' cha' nchcui' na' lo'o ma̱ jua'a̱ cha' caca tyuju'u ti' ma̱.

2 CORINTIOS 5:21

Masi ná ntsu'u qui'ya ji'i̱ Cristo tsiya' ti, pana ycui' Ndyosi ngua'ni cha' ndyanu qui'ya nu ntsu'u ji'na hichu̱' Cristo. Si cua ngua stu'ba cha' ji'na lo'o Cristo, li' caca lubii cresiya ji'na ñi'ya̱ nu nti' ycui' Ndyosi cha' caca na.

GÁLATAS 4:19

Chaca quiya' ti'í tsa ntsu'u tyiquee na' ña'a̱ na' ji'i̱ ma̱, cha' ñi'ya̱ laca sñi' na', jua'a̱ laca ma̱; ña'a̱ na' ji'i̱ ma̱ ñi'ya̱ si laca na' sca nu cuna'a̱ nu ti'í tsa nchcube' ji'i̱ cha' cua cala ti sñi'. Talo cha' ti'í bi' 'na ña'a̱ cuayá' nu tyu'u xcui' cha' ji'i̱ Cristo tyiquee ma̱.

EFESIOS 2:18

Lo'o juani ná ndu'ni cha' masi ngu' judío laca ya, masi xa' ñati̱ laca ma̱, sca ti lo ñati̱ laca na lo'o lcaa tya'a na xqui'ya Cristo, sca ti Xtyi'i ycui' Ndyosi ndu'ni cha' tyuloo na ji'i̱ Ni;

EFESIOS 4:26

Lo'o ntsu'u quiya' ñasi̱' ma̱ xi, cui'ya ma̱ cuentya cha' ná tyanu qui'ya ji'i̱ ma̱ li'; ná tso'o si caca ñasi̱' ti' ma̱ tyucui tsa̱, tsa tyeje tacui ti cha' cua'ni ma̱ ji'i̱.

1 TIMOTEO 2:5

Sca ti ycui' Ndyosi ntsu'u tsiya' ti, lo'o jua'a̱ ntsu'u sca ti ñati̱ nu ndi'i̱ slo ycui' Ni nu nchcui' lo'o Ni cuentya ji'i̱ ñati̱ chalyuu; la cui' Jesucristo laca nu ñati̱ bi'.

1 TIMOTEO 3:14

Yala ti ca̱a̱ na' slo nu'u̱, nti' na'. Jua'a̱ nta̱', pana ná jlo ti' na' ni jacua' caca 'na, si ntsu'u nu tacu̱' tyucui̱i̱ jna'; bi' cha' juani nscua na' quityi re cha' caca cuayá' la ti' nu'u̱ ñi'ya̱ nga'a̱ cha' cua'ni ñati̱ ji'i̱ Jesucristo lo'o tya'a ngu', ñi'ya̱ nu ntsu'u cha' cua'ni ngu' lo'o ndyu'u ti'i̱ ngu' tsa tlyu ti. Ndu'ni tlyu na ji'i̱ ycui' Ndyosi nu lu'ú ca, lcaa taju na lo'o tya'a na, lo'o jua'a̱ nclu'u lcaa ngu' tya'a na cha' liñi ji'i̱ ycui' nu Xu'na na ji'i̱ xa' ñati̱. Ná tye cha' liñi bi' tsiya' ti nde chalyuu xqui'ya lcaa taju ngu' tya'a na li'.

HEBREOS 9:24

Bi' cha' nga'aa ndyaa Cristo nde ne' laa nu ngüiñá ñati̱ nde chalyuu ti, masi ntucua bi' cuentya ji'i̱ ycui' Ndyosi; na cua ndyaa liñi Ni ca slo ycui' Ndyosi ca nde cua̱. Ca bi' ntucua Ni juani, cha' chcui' lo'o ycui' Ndyosi cuentya ji'na.

SANTIAGO 1:27

Si tyucui tyiquee na tsiya' ti ndu'ni na cha' tacati cuentya ji'i̱ Ni, si si'i na tucua cha' ntsu'u tyiquee na, ndi'ya̱ nti' ycui' Ndyosi Sti na cha' cua'ni na li': nga'a̱ cha' xtyucua na ji'i̱ nu sube ti'i, jua'a̱ nga'a̱ cha' xtyucua na ji'i̱ nu cuna'a̱ nu ndyanu ti'i ti, nu lo'o nchcube' tsa ngu' ndi'i̱ ngu' chalyuu; pana ná tso'o tyatí̱ yu'u na lo'o cha' cuxi nu ntsu'u nde chalyuu.

SANTIAGO 3:9

Tucua lo cha' nchcui' na, cha' ndyu'ni tlyu na ji'i̱ ycui' nu Xu'na na, la cui' Ndyosi Sti na; lo'o jua'a̱ nsta na qui'ya ji'i̱ tya'a ñati̱ na, masi ngüiñá ycui' Ndyosi ji'i̱ lcaa ñati̱ chalyuu na cha' laca na ñi'ya̱ ña'a̱ ycui' Ni.

1 PEDRO 2:22

Ná ntsu'u ni sca qui'ya ji'i̱ nu Cristo bi', ni sca cha' cuiñi ná nchcui' yu;

1 PEDRO 3:18

Ycui' Cristo ngujuii xqui'ya qui'ya nu ntsu'u ji'na, masi lubii tsiya' ti cresiya ji'i̱ yu; nchcube' yu cuentya ji'na, cha' cuxi tsa tyiquee na. Lo'o juani taca tyalaa na slo ycui' Ndyosi xqui'ya nu Cristo bi'. Sca ti quiya' ngua cha' ti'í bi' ji'i̱ Cristo, ndye cña ji'i̱ yu nde loyuu chalyuu li'. Ndyujuii ngu' ji'i̱ nu ñati̱ nu naa Jesucristo bi', pana ngua'ni Xtyi'i ycui' Ndyosi cha' ndyu'ú yu chaca quiya'.

1 JUAN 3:18

Cu'ma̱ sñi' na', nu lo'o ntsu'u tsa tyiquee na ña'a̱ na ji'i̱ ycui' Ndyosi lo'o ji'i̱ tya'a ñati̱ na, si'i sca cui̱i̱ ti laca nu chcui' na lo'o ngu', si'i sca cha' nu nda ti na lo'o ngu' caca bi'; tyucui tyiquee na nga'a̱ cha' xtyucua na ji'i̱ nu ngu' tya'a na bi'.

1 JUAN 3:5

Cua jlo ti' ma̱ cha' cua ya̱a̱ Jesucristo chalyuu cha' cuityi̱ Ni qui'ya nu ntsu'u ji'i̱ ñati̱; pana ycui' Cristo ni, ná ntsu'u qui'ya ji'i̱ yu tsiya' ti.

1 JUAN 3:7

Cu'ma̱ sñi' na', ná nti' na' cha' cñilo'o xa' ñati̱ ji'i̱ ma̱. Xcui' tso'o ti ngua'ni Jesucristo nde chalyuu; bi' cha' lacua, lcaa ñati̱ nu ntsu'u cha' ji'i̱ lo'o Jesucristo, cua nscua cha' xcui' cha' tso'o ti cua'ni ngu' bi' laja lo'o tyi'i̱ ngu' chalyuu.

1 JUAN 4:4

Cu'ma̱ sñi' na', cua ntsu'u cha' ji'i̱ ma̱ lo'o ycui' Ndyosi, jua'a̱ cua ngua nguula la ti' tyiquee ma̱ xqui'ya Xtyi'i ycui' Ndyosi nu ndyanu ne' cresiya ji'i̱ ma̱ li'; bi' cha' nchca ji'i̱ ma̱ tyiji̱loo ma̱ ji'i̱ ngu' cuiñi nu cua ntsu'u cha' ji'i̱ lo'o ycui' nu xña'a̱. La cui' nu xña'a̱ laca nu nclyo cña ji'i̱ ñati̱ cuxi nde chalyuu.

1 JUAN 5:17

Chañi cha' sta ycui' Ndyosi qui'ya ji'i̱ lcaa na lo'o tya'a na xqui'ya cha' cuxi nu ndyu'ni na. Pana ntsu'u sca lo qui'ya nu ná taca cui'ya Ni cha' clyu ti' ji'i̱ tsiya' ti.

1 JUAN 5:21

Cu'ma̱ sñi' na', tii ti ti' ma̱ tyi'i̱ ma̱ chalyuu, cha' ná tyatí̱ yu'u ma̱ lo'o xa' jo'ó. Jua'a̱ laca cha' bi' lacua.

3 JUAN 1:4

Sca ti cha' nclyacua ti' na' cuentya ji'i̱ cu'ma̱, si chañi cha' ndaquiya' ma̱ ji'i̱ cha' liñi nu cua nda Jesús lo'o na, cha' cuañi' la cu'ma̱ cuentya jna'; tso'o tsa ntsu'u tyiquee na' lo'o ndyuna na' cha' jua'a̱ ndu'ni ma̱.