Tito 2:13 - Chuj San Sebastian Bible

¹³ Qui tan̈wc sjaw jun c'u yic tzaljc'ojlal, yic 'oj jawc qui Diosal caw niwn yel'chi, atn qui Colmal Jesucristo.

Chuj San Mateo Bible

¹³ Co tan̈vejec sjavi jun c'ual tzalajc'olal yic ol ja co Diosal te nivan yelc'ochi, aton co Columal Jesucristo.

Tito 2:13 Iomraidhean Croise

Is 25:9

A 'a yic jun c'ul cha, 'oj calc 'ixtic: Atn wal Jehová qui Diosalec tic, a ca'jnaquec 'och yipc qui c'ojol, yuj cha, on̈ scolnec. Ca'c wal tzaljoc qui c'ojol, yujto a 'on̈ colnec, 'oj qui chioc.

Mt 16:27

Yujto an 'Ochnc in 'Anmal tic, a yet' spoder in Mam 'oj in jaw yet' eb' wángel. Ax wa'n spac 'a junjn 'anma', a tzyala tastc 'ix sb'o eb'.

Mt 25:31

An 'Ochnc in 'Anmal tic, 'oj in jaw yet' eb' wángel smasnil, caw niwn in poder, ax wem wocn 'a in despacho. Atta 'oj checljoc 'eli, to caw niwn wel'chi.

Mt 26:64

—An ton 'icha tzal tic. Tzwal pax 'ayex, to an 'Ochnc in 'Anmal tic, 'oj in eyila', wocn in 'ejm 'a swach' c'ab' Dios, atn jun niwn spoder, 'oj eyil pax weml 'a scal 'asn 'a satcha'an̈, xchi.

Mr 14:62

'Ix yaln Jesús 'ixtic: —An ton tic 'Ochnc in 'Anma'il, 'oj in eyila', wocn in 'ejm 'a swach' c'ab' Dios, atn jun niwn spoder. 'Oj eyil pax weml 'a scal 'asn 'a satcha'an̈, xchi.

Mr 8:38

A wal eb' 'anma 'a jun tiempoal tic, man̈oc 'a Dios tzya'ch eb' snab'en, caw maysch'olnil eb'. A eb' tzq'uixw wuj 'a sat eb' yit 'anma'il, tzq'uixw pax yuj in paxti', an̈jtona an 'Ochnc in 'Anmal tic, 'oj in q'uixw pax yuj eb' yic 'oj in jaw yet' spoder in Mam, yet' eb' ángel yic xo yaji, xchi.

A Tas Sc'ulejnac Eb' Schecab' Jesús Hechos 24:15

Caw tzwa'ch Dios yipc in c'ojol, to 'oj pitzwc pax eb' chamnc smasnil, jantcn̈ej eb' wach' sb'eyb'al, yet' pax eb' tu sb'eyb'al, 'ixta tzna pax ewin tic.

Ro 15:13

A Dios, a yipc'ojlal yaj cujec. Tzin nib'ej a tzwach' 'a'n e tzaljc'ojlal, yet' e junc'ojlal, yujto tzeya'ch e c'ojl 'a 'a. Toto 'ixta', a 'oj e wach' 'a'c 'och yipc e c'ojol, yujto a Yespíritu tz'a'n spoder 'ayex.

Ro 5:5

Palta ma'oj 'el qui q'uixwelec, yic tzca'nec 'och Dios yipc qui c'ojol, yujto tz'acn tzyutj ya'n 'och schamc'ojlal 'ayn̈ec yuj Yespíritu xyac' 'ayn̈ec.

Ro 8:18

An tic tzin na'a, a jun tzo'n̈ yailal wan cab'nec syal ticnec, caw matz tza'wni 'a jun swach'l Dios 'oj sch'ox 'ayn̈ec 'a jun tiempoal cha.

1 Co 1:7

A ticnec, wan e tan̈wni jun c'u yic 'oj jawc pax Cajlil Jesucristo. Ax Dios, tz'acn tzyac' smasnil yic 'ayex.

2 Co 4:4

A eb' cha, matz ya'ch xon eb' 'a sc'ojol. Yuj cha, a win sdiosal yolyib'n̈q'uinl tic, a win tzwach' 'a'n juwc 'el snab'en eb'. 'Icha to a win tz'a'n juwc 'el yol sat eb', sec matz tac' yiln eb' jun sacq'uinl tzcot 'a yab'xil Cristo. A Cristo caw niwn yel'chi, caw lajn yet' Dios.

2 Co 4:6

A Dios yaljnac can 'ixtic: A 'a scal q'uic'q'uinl tic, pitzw cab' sacq'uinal, xchi. Caw a 'a'jnac cot sacq'uinlal 'a qui pixnec, sec yuj jun sacq'uinlal tic, tzcojcanec 'eli, chajtlto caw niwn swach'l Dios. A 'a Jesús, ata tzcheclj 'el swach'l Dios cha.

A Scarta San Pablo D'a Eb' Aj Colosas 1:23

Palta yowlal tzeya'ch 'a e c'ojl 'a smasnil tiempo. Caw te'n tzeyutj e nab'en, 'icha junc te caw 'ay sch'an̈l yib'. A jun wach' 'ab'x yic colnb'il eyab'jnac xo, man̈ eyactc can eya'n 'och yipc e c'ojol. A jun wach' 'ab'x tic, wan yalx 'el 'a smasnil yolyib'n̈q'uinl tic. An xo Pablo in tic, wan waln 'el pax jun xo.

A Scarta San Pablo D'a Eb' Aj Colosas 1:27

'Elnc 'a sc'ojol, to tzyac' cojcoquec 'eli. A jun tic, yel xo wal niwn yel'ch 'ayx ax man̈ ex israeloc. Atn jun tic x'ajx cojcoquec 'eli, to a Cristo cajn 'och 'a e pixn junjn ex quet' on̈. Yuj Cristo, tzca'nec 'och 'a qui c'ojol, to 'oj tz'acwc qui wach'l 'icha swach'l Dios.

A Scarta San Pablo D'a Eb' Aj Colosas 1:5

'Ixta tzeyutj e b'a, yujto wan e tan̈wni jun eyic molb'il 'a satcha'an̈. Atxo 'a yic eyab'n jun wach' 'ab'x caw yel, eyamn 'och eya'n 'och jun chi yipc e c'ojol.

A Scarta San Pablo D'a Eb' Aj Colosas 3:4

Yujto a Cristo, qui q'uinlec yaji. At 'a yic 'oj jawc paxi, ax qui jawc pax yet'oc. 'Ixta to b'i'an, ax stz'acw qui wach'lec 'icha swach'il.

2 Ts 2:16

A Cajlil Jesucristo yet' qui Mam Dios, caw 'ay schamc'ojlal 'ayn̈ec. Yuj wal swach'c'ojlal, tzya'n sniwnal qui c'ojlec 'a smasnil tiempo. Tzya'n pax ca'c 'och swach'l chi yipc qui c'ojol.

2 Ts 2:8

At wal ta 'oj checljoc can 'el jun win syajlil maysch'olnil cha. Palta a Cajlilec, 'oj yutz'c cham yet' yic'. A yic 'oj jawc Cajlilec 'a scal stzictznial, ax satcn 'ejm win yu'uj.

1 Ti 1:1

An Pablo in tic, schecb' in Jesucristo, yujto 'ixta yaj yaln can Dios qui Colmal, yet' Cajlil Jesucristo, atn tzca'c 'och yipc qui c'ojol.

2 Ti 1:2

Ach Timoteo, tic tzwa't jun in carta tic 'ayach. Caw tzach in chamc'ojlej, 'icha to wunnal ach. Ya' cab' qui Mam Dios yet' Cajlil Jesucristo swach'c'ojlal yet' sjunc'ojlal 'ayach. 'O'ch cab' sc'ojl 'aych ta'.

2 Ti 4:1

A yic 'oj jawc pax Cajlil Jesucristo 'a scha'ejmal, ax swach' 'och reyal, ax sb'eyc'ojlan smasnil 'anma chamnc xo, yet' eb' pitznto. Yuj cha, a 'a sat Dios yet' 'a sat Cajlil Jesucristo, tzcham wal waln 'at 'ayach.

2 Ti 4:8

Al ticnec, 'ay jun spac wic molb'il xo, yujto tojl tzwutj in b'eyb'al. A Cajlil, caw tojl snab'en, a 'oj b'eyc'ojlanc smasnil 'anma'. A 'a yic jun c'u cha, 'oj in cha spac wic 'a 'a. Man̈ cojnoc in 'oj in cha spac wico'. Jantcn̈ej eb' caw tznib'j jawc Cajlil 'a scha'ejmal, 'oj scha eb' yic jun xo.

Tito 1:2

'Ixta tzwutj in b'a, sec tzya'ch eb' 'anma yipc sc'ojol, to 'oj qui cha qui q'uinl 'a jun 'ejmn̈ej. A Dios, may 'aj tzyac' 'es jun 'ejmoc. A yic mantzac sb'o yolyib'n̈q'uinl tic, ya'jnac can sti', to 'oj yac' qui q'uinal.

Tito 1:4

Ach Tito, tic tzwa't jun in carta tic 'ayach. Yel 'icha wunnal ach, yujto wu'uj, tza'n 'och a c'ojl 'a Cristo wet'oc. Ya' cab' qui Mam Dios yet' Cajlil Jesucristo qui Colmal, swach'c'ojlal yet' sjunc'ojlal 'ayach. ['O'ch cab' sc'ojl 'aych ta'].

Tito 3:4

Palta a Dios qui Colmal, 'ix yac' swach'c'ojlal yet' schamc'ojlal 'a smasnil 'anma'.

A Ch'an̈ Carta D'a Eb' Hebreo 9:28

An̈jtona Cristo, jun 'ejm wal milxnac xajmb'alil, sec wach' caw niwn on̈ec tz'el qui mul yu'uj. A yic 'oj jawc 'a scha'ejmal, man̈x yujoc yi'n 'el qui mulec ax sjawi. Palta yuj on̈ scoln an̈ec wan qui tan̈wni sjapxi.

A Sb'ab'el Carta San Pedro 1:3

Calc wach' paxti 'a Dios, atn 'a Smam Cajlil Jesucristo, yujto caw x'o'ch sc'ojl 'ayn̈ec. On̈ ya'nec 'aljoc pax 'a scha'ejmal, yujn̈ej to pitzwnac pax Jesucristo 'a scal eb' chamnac. Yuj cha, caw tzca'c 'och yipc qui c'ojol, to a 'oj 'a'nc qui q'uinlec.

A Sb'ab'el Carta San Pedro 1:7

'Iltec q'uen oro, yowlal tz'ajx prowal q'uen yet' c'ac', sec chequel toto wach', mto ma'ay. An̈jtona', an̈ec tic yowlal tzon̈ 'ajxec prowal, sec chequel toto yel tzca'c 'och Dios 'a qui c'ojol, mto ma'ay. Toto tzca'c techjoc jun tzo'n̈ prowal cha, yel xo niwn quel'chec 'a yib'n̈ q'uen oro cha, yujto a q'uen cha, 'e'lb'a yec' q'ue'en. Toto tzca'c techjoc, ax 'a yic 'oj jawc Jesucristo, 'oj on̈ yalc wach'il, ax ya'n qui wach'l 'icha yico'. Caw niwn quel'chec ta'.

A Schab'il Carta San Pedro 1:1

An tic Simón Pedro in, ya'mal in servil Jesucristo. Schecb' in paxi. Tic tzin tz'ib'j 'at jun in carta tic 'ayx tzeya'ch e c'ojl 'a Dios quet' on̈. Caw niwn swach'l eyic quet' on̈, yujto 'aych qui c'ojlec 'a 'a. 'Ixta tzon̈ 'ajec, yujto a qui Diosalec, atn qui Colmal Jesucristo, caw tojl snab'en.

A Schab'il Carta San Pedro 3:18

Yowlal tze wach' 'ojquej 'el Cajlilec, atn Jesucristo qui Colmalec. An̈jtona', caw tze wach' chaj swach'c'ojlal 'a junjn c'u. Niwn cab' yel'ch Cajlilec ticnec, yet' 'a smasnil tiempo. Ya' cab'i'.

1 Jn 4:14

An̈ tic on̈, caw quiljnac Yunnal Dios on̈. Yuj cha, tzca'n testigoal qui b'a on̈, chajtlto a qui Mam Dios, a 'a'jnac cot Yunnal chi wul scolnc 'el eb' 'anma 'a yolyib'n̈q'uinl tic.

San Judas 1:21

Caw tzeyil wal e b'a, sec ma'oj eyel 'a schamc'ojlal Dios. Qui tan̈wquec sjaw jun c'u, yic 'oj wach' 'o'ch sc'ojl Cajlil Jesucristo 'ayn̈ec, ax ya'n qui q'uinlec 'a jun 'ejmn̈ej.

Apoc 1:7

'Iltec, jab'xoj 'oj jawc Cristo 'a scal 'asun. Smasnil 'anma', 'oj yil eb' sjawi, an̈jtona eb' tecjnac chamoc, 'oj yil pax eb' sjawi. Ax eb' 'anma 'a junjn chon̈b' 'a yolyib'n̈q'uinl tic, a yic 'oj yilnc eb', caw 'oj 'oc' eb'. Wal yel, 'ixta wal 'oj 'ajoc.