Ro 2:5 - Chuj San Sebastian Bible

⁵ Palta 'ayx pit ex, matz e na e b'a. Yuj cha, wan eya'n niwtjoc yowl sc'ojl Dios 'a eyib'an̈. Ax 'a yic 'oj jawc jun c'u yic yailal, ax yajx can 'och 'a eyib'n̈ ta'. At wal 'a jun c'ul cha, 'oj checljoc 'el sb'eyc'ojlal Dios caw yel.

Chuj San Mateo Bible

⁵ Palta a exxo tic, te pit ex. Max e na val jab'oc e b'a. Yuj chi', ton̈ej tze molb'ej yoval sc'ool Dios d'a eyib'an̈. Axo ol ja sc'ual yaelal chi', ol cot d'a eyib'an̈. Ato d'a jun c'ual chi' ol checlajelta yujto ol sch'olb'itej Dios d'a stojolal.

Ro 2:5 Iomraidhean Croise

2 Cr 30:8

Yuj cha, man̈ eyac' pitb'oc 'el e nab'en 'icha yutjnac sb'a eb' qui mam quichmec cha. 'A'c 'och e b'a 'a yol sc'ab' Jehová, jawn̈ec 'a yatut, atn jun sic'b'il 'el yuj 'a smasnil tiempo, tzeya'n servil Jehová qui Diosalec quet' on̈, ax yoch wan yowx 'ayex.

2 Cr 36:13

An̈jtona', 'ix yac' tenmtacl sb'a 'a Nabucodonosor, atn jun 'aj 'ix yac' sti 'a sat Dios, to junxn̈ej tzyutj snab'en yet'oc. Jun 'eln̈ej 'ix yac' pitb'oc 'el snab'en, man̈xtoc 'ix yal sc'ojl xmeltzj 'a Jehová sDiosal chon̈b' Israel.

Job 21:30

A yic tzcot yowl sc'ojl Dios, yajn̈ej tzya'n cot yailal, ax eb' maysch'olnil sb'eyb'al, toc 'ay tz'i'n eb'.

Salmos 110:5

A Cajlil 'ayc' 'a a wach' c'ab'; a yic 'oj cot yowl sc'ojl 'a yib'n̈ eb' rey, 'oj satl eb' smasnil yu'uj.

Salmos 95:8

to 'ixta', man̈ eyac' pitb'oc e b'a, 'icha ya'jnac eb' e mam eyichm 'a Meriba, 'icha pax yutjnac sb'a eb' 'a Masah yic 'ayc' 'eb' 'a lum cusltac lu'um.

Ex 14:17

Ax wa'n pax pitb'oc 'el snab'en eb' 'aj Egipto cha, ax cob' yochx tza'n eb' eyuj snani, atn wal ta 'oj in ch'oxn in poder 'a win rey, 'a eb' soldado, 'a smasnil jun tzo'n̈ caruaje, 'a smasnil no chej yet' pax 'a smasnil eb' 'anma ajun yet' winac.

Ex 32:34

Ax ticnec 'an, 'ixic, 'ij 'at eb' chon̈b' tic 'a jun lugar 'aj xwal 'ayach. A jun wángel 'oj b'ab'ljoc eyu'uj, a 'oj e jucb'tzani. Palta 'ay jun c'ual, 'oj wac' syailal eb' 'anma tic yuj smul 'ix 'och 'ayin, xchi Dios.

Ex 8:15

Cojn wal yic 'ix yiln win rey chajtlto man̈x 'a jun yailal cha, 'ix ya'n win pitb'oc pax 'el snab'en jun 'ejm xo, 'icha wal xyutj Jehová yalni. Ma'ix schaj win yab' tas xyal Moisés yet' Aarón.

Pr 1:18

palta ax jun tzo'n̈ 'anma 'ixta tz'el sb'on cha, mun a eb' tzyalej sb'a, mun a eb' tzmil cham pax sb'a.

Pr 11:4

A wal yic 'oj jawc jun c'u yic 'oj 'och b'eyc'ojlal 'ayn̈ec, caw wal man̈x 'a yel'ch qui ricoalec cha, cojxn qui tojl b'eyb'alec, a 'oj qui colnec 'el 'a yol sc'ab' chamel.

Pr 28:14

Caw tzaljc'ojlal yic junc mach to 'ay yel'ch Jehová 'a sat, ax toto pit tzyutj snab'en, 'oj cotcn yailal 'a yib'an̈.

Pr 29:1

A mach pit tzyutj sb'a, wach'xam niwn 'ejm tz'ajx cuenta, a jun cha, caw ji'lti 'oj 'aj slajw 'eli, man̈x 'oj stac' scoln sb'a.

Ec 12:14

A Dios, 'oj sc'anb'c 'ayn̈ec yuj smasnil tas xlaj qui b'o'ec, toto wach', mto man̈ wach'oc, wach'xam c'ultacl xqui b'o'ec.

Is 48:4

Yujto wojtac to caw wal pit ex, matz eyij 'ejm e b'a, matz ex q'uixw pax jab'oc.

Jeremías 40:3

A ticnec, 'ix 'el'ch tas yaljnac Jehová. 'Ix ya' cot jun tzo'n̈ tic 'a eyib'an̈, yujto ma'ix eyiclj tas 'ix yala.

Ez 11:19

'Oj wac' jun e nab'en caw wach', caw 'a'to, ax wi'n can 'el jun e nab'en to caw wal tzatz 'icha q'uen q'ue'en,

Ez 3:7

Palta a eb' et israelal cha, ma'oj snib'c eb' yab' tas 'oj ala', yujto matz nib'j xon eb' yab' tas tzwala. A smasnil eb' et chon̈b' cha, caw wal pit eb', caw tzatz pax snab'en eb'.

Dn 5:20

Palta caw spitj sb'a yet' sb'an̈quinal, yuj cha, x'ijx 'ec' yopiso 'a sreyal, yet' sb'inab'ilal.

Os 13:12

Caw checl yaj e mul ex 'aj Efraín. 'Ix stz'ib'x can e maysch'olnilal.

Am 3:10

A Jehová a tzaln 'ixtic: Caw man̈ yojcoc eb' sb'on jac tas tojol. A 'a yol yatut eb', ata molb'il tas ton̈j tzyij 'ec' eb' 'a eb' 'anma', xchi.

Ro 1:18

Cojtac a Dios tz'a'n cot yowl sc'ojl 'a satcha'an̈, tzjaw 'a yib'n̈ jantcn̈ej eb' 'anma matz ya'ch snab'en 'a 'a, atn eb' maysch'olnil sb'eyb'al. A eb' cha, maysch'olnil eb'. Yuj cha, matz chaj eb' alxc 'el jun cuynb'il caw yel.

Ro 11:25

Ex wu'tac, ex wanab', a jun tzo'n̈ tzwalb't 'ayx tic, may wal mach 'ojtnac 'a yic pecti'. Palta ticnec tzin nib'j tzeyojquej 'eli, sec ma'oj e b'an̈ e b'a yuj e jelnal. A eb' wit israelal cha, niwn eb' pitb'nac 'eli. 'Oj cann̈j eb' 'ixta', masnto 'oj tz'acwc 'och nan̈l eb' man̈ israeloc.

Ro 9:22

An̈jtona', 'ixta pax Dios yet' eb' 'anma'. 'Ay eb' smoj schan yowl sc'ojol, smoj 'oj 'atcn eb' 'a yailal 'a jun 'ejmn̈ej. A Dios, wach'xam tznib'j tzch'ox yowl sc'ojl 'a eb', sec 'oj checljoc 'el spoder, palta caw niwn tzyutj sc'ojol, tzyac' techjoc smul eb' cha.

2 Co 5:10

Yujto yowlal 'oj qui c'ochc 'a yojltac sdespacho Cristo, sec junjn on̈ec, 'oj qui chac spac tastc tzqui b'o'o, yic 'ayn̈ect 'ec' 'a jun qui niwnalec tic. A tzyala, toto wach' tzqui b'o'o, mto maysch'olnil.

Dt 2:30

Palta ax win rey Sihón cha, ma'ix yal sc'ojl win on̈ 'e'tec 'a sat slum cha, yujto a Jehová qui Diosalec, a x'a'n sna winac, to matz on̈ schajec 'e'ta, sec wach' tzcan win 'a yol qui c'ab'ec, 'icha ton wal wan yuj tic.

Dt 32:34

Tzyaln Jehová: Smasnil jun tzo'n̈ smaysch'olnilal eb' 'ajc'ojl cha, nann̈ej wu'uj, ton̈j molb'il wuj 'icha tas 'ay 'a yol junc c'un̈a.

2 Ts 1:5

'Ixta tz'aj scheclj 'eli, to caw tojl tzyutj Dios on̈ sb'eyc'ojlanec. Yujto tzyal eyu'uj, to smoj 'oj e c'och 'a yol sc'ab'. Yujn̈ej Dios, wan eyab'n syal ta'.

A Ch'an̈ Carta D'a Eb' Hebreo 3:13

Ya' sb'a 'ayt jab'x tiempo, caw tzlaj e jucb'tzoc e b'a 'a junjn c'u, sec wach' may ex tzex 'ixtx yuj maysch'olnil, may ex tzex pitb' 'el yu'uj.

A Ch'an̈ Carta D'a Eb' Hebreo 3:15

Yujto 'ixtc yaj stz'ib'x can 'a Ch'an̈ U'un̈: A ticnec toto tzeyab' tas tzwala, to 'ixta', man̈ eyac' pitb'oc e b'a 'icha ya'jnac eb' e mam eyicham yic tenmtac yutjnac sb'a eb', xchi 'a Ch'an̈.

A Ch'an̈ Carta D'a Eb' Hebreo 4:7

Yuj cha, 'ay junx tiempoal ch'oxb'il yuj Dios, atn jun tiempoal tic. Yujto pecti yaljnac Dios yuj jun 'iljelal cha, ya'n pax yal David 'icha xwala, 'aj tzyal 'ixtic: A ticnec toto tzeyab' tas tzwala, to 'ixta', man̈ eyac' pitb'oc e b'a, xchi.

Santiago 5:3

'Ixta pax e tumin, wach'xam oro, mto plata, caw c'uxmtacx 'a jun 'ejmn̈ej, man̈x 'a jac yopiso. Ax jun sc'uxmtacl cha, a 'oj ch'oxnc 'el e mul. 'Icha stz'a junc tas yuj c'ac', 'ixta 'oj 'aj e niwnal yu'uj. Jab'xoj sjaw jun slajb' tiempoal, palta in cojxn e ricoal 'aj tzeya'ch e nab'en e molb'tzani.

Josué 11:20

A Jehová x'a'n pitb'oc 'el snab'en eb' 'ajc'ojl cha, sec tzte'wtzej sb'a eb' ya'n owl yet' eb' israel, yic tzsatl eb' smasnil yuj eb' israel cha. May junc eb' 'aj x'o'ch sc'ojl eb', 'icha wal yaj yaln can Jehová 'a Moisés.

A Schab'il Carta San Pedro 2:9

An̈jtona', 'ixta pax ticnec. Yojc Dios, tas tzyutj scoln eb' 'aych snab'en 'a 'a, yic tz'ajx prowal eb'. Yojc paxi, tas tzyutj ya'n can 'at eb' man̈ tojloc snab'en 'a yailal. Ata tzcan eb', masnto 'oj jawc jun c'ual, yic 'oj wach' b'eyc'ojlaxc eb'.

A Schab'il Carta San Pedro 3:7

A satcha'an̈ yet' sat lum tic, an̈ja 'ayc' ticnec. Palta yaljnac can Dios, to yowlal 'oj cann̈j 'ixtic, masnto 'oj 'ajxc 'emt c'ac' 'a 'a. Atta 'oj jawc jun c'u yic b'eyc'ojlal. Ax eb' may yel'ch Dios 'a sat, 'oj satcn 'el eb' 'a jun 'ejmn̈ej ta'.

San Judas 1:6

An̈jtona', tze nan cot tas yaj jun tzo'n̈ eb' ángel, atn eb' yijnac 'el sb'a 'a yopiso, yactn can eb' yet'ul. Jalxnac can 'och q'uen cadena 'a eb' 'a jun 'ejmn̈ej. A ticnec, preso yaj eb' 'a q'uic'q'uinl yuj Dios. 'Ixta yajcn eb', masnto 'oj jawc jun c'u caw niwn yel'chi, atta 'oj b'eyc'ojlaxc eb'.

Apoc 2:21

Niwn xwutj in c'ojl 'a 'ix, toq'ue tzna sb'a 'ix yuj yajmulal, palta toxn matz na sb'a 'ix jab'oc.

Apoc 6:17

'Ixta x'aj eb', yujto xjaw jun c'u caw niwn yel'chi, yic tzya'n cot Dios yowl sc'ojl 'a yib'n̈ eb'. ¿Tom 'ay junc mach 'oj techjoc yuj 'a jun c'u cha?

A Ch'an̈ B'ab'el Libro Samuel 6:6

Man̈ tzatzc tzeyutj e nab'en, 'icha yutjnac sb'a eb' 'aj Egipto yet' win faraón. 'Ix stzatzb' 'el snab'en eb' masnto 'ix yac' Dios syailal eb', 'ixta to b'i'an 'ix ya'n 'elt win eb' israel cha.