Os 2:8 - Chuj San Sebastian Bible

⁸ Yuj sb'eyb'al eb' wit israelal cha, yuj cha xyaln Jehová 'ixtic: Ma'ix yojquej 'el jun chon̈b' tic, toto an tzwac' strigo, yal yuva, yet' yaceite, an xwac' niwtjoc q'uen plata yet' q'uen oro 'a 'a, ax 'ix 'at comn 'a'nc q'uen 'a Baal.

Chuj San Mateo Bible

⁸ Yuj tas sc'ulej eb' vetisraelal chi', yuj chi' ix yal Jehová icha tic: Maj yojtaquejel eb' tato a in svac' strigo eb', svino eb' yed' sperfume eb' to a in svac' nivanb'oc q'uen plata yed' q'uen oro d'a eb', axo d'a juntzan̈ comon dios ix yac' eb'.

Os 2:8 Iomraidhean Croise

1 Cr 29:16

Mamin Jehová, ach qui Diosal on̈, ec yaj smasnil jun tzo'n̈ ricoal tic. A 'aych tzcot smasnil jun tzo'n̈ 'ix qui yamb'tzej tic, yic tzqui b'on junc n̈a 'a a b'i yuj ach qui'n cha'an̈.

Job 19:8

A Dios a 'ix macn yol in b'e, yuj cha, man̈xtzac stac' in b'eyq'ui, 'icha wal to scal q'uic'q'uinl tzin b'eyc' yu'uj.

Is 1:3

A no wacax yojc no yajal, yet' no b'uru yojc no 'aj tz'ajx wa yuj mach 'ay yico'. Palta ax in chon̈b' Israel, toxn man̈ jac tznachj 'el yu'uj toto wico', 'icha to may xon snab'en, xchi.

Is 46:6

'Ay mach til wal q'uen oro tzyijq'uet 'a yol smucuc, tzyechtan pax q'uen plata 'a yojl junc 'echtab'. Tzlajw cha, tztojn junc win tenm q'ue'en, sec tzb'o win junc sdiosal win cha. A yic tzb'o 'el'chi, tzyamn 'och win ya'n 'ejm sb'a 'a yojltac jun yechl cha, tzleslwi 'och 'a 'a.

Jeremías 7:18

A eb' 'unnab'il tzsayn cot te c'atzitz, ax eb' mamb'il tzecn 'och te c'ac', ax eb' 'ix nunb'il tzb'on 'ixm c'oxox, yic tzya'n eb' ofrendail 'a jun comn dios tzcuch syajlil satcha'an̈. Caw tzuntzj cot eb' yowl in c'ojol, yic tzya'n eb' yal uva 'a jun tzo'n̈ chuc diosal.

Ez 23:41

Xlajw cha, x'em wocn eb' 'ix 'a sti sch'at, wach'x pax yaj sb'o jun te mexa yet' tas tzc'uxxi. A 'a sat mexa cha, ata xyac' 'ejm eb' 'ix jun incienso yet' jun aceite to wic yaji.

Dn 3:1

'Ix ya'n win rey Nabucodonosor 'ajxoc b'o jun yechl comn dios nab'a oro tz'aji, 30 metro ste'il, 'oxe metro spimal. 'Ix yaln winac to ata tzb'o 'a jun pan̈n tzcuch Dura 'a yol yic Babilonia cha.

Dn 5:23

A eco', to 'ix a b'an̈ a b'a 'a sat jun sYajlil satcha'an̈. 'Ix a'n 'ijxoc cot 'a ojltac jun tzo'n̈ svaso 'ayc' 'a yol yatut. Ach xo tic yet' smasnil eb' 'awtb'il cot o'oj, 'ix o'j 'an̈ yet' eb' 'a yojl jun tzo'n̈ vaso cha. 'Ix aln wach' paxti 'a jun tzo'n̈ comn dios nab'a plata, oro, bronce, hierro, te', yet' q'uen q'ue'en, atn jun tzo'n̈ matz tac' xon yilni, matz yab'i, may jac yojtac. Man̈oc 'a Dios 'aj 'ix al wach' paxti', palta ticni a 'a yol sc'ab' 'ayc' a q'uinal, a tzach 'i'n b'eyc'oc.

Os 10:1

A eb' 'aj chon̈b' Israel, lajn wal eb' 'icha jun 'ib'c te snun uva caw wal 'ay sat, palta mun tzsatn sch'ocoj, a yic wach' tz'aj sat tas 'awb'il yuj eb', yet' 'a yic tzniwtj sricoal eb', a pax ta tzniwtj sb'on eb' 'anma jun tzo'n̈ yet'l xajmb'al, tzb'on 'och eb' yelwnub'al.

Os 13:1

A yic xpaxtin eb' yichm wincal chon̈b' Efraín 'a scal eb' israel 'a yic pecti', caw 'ay yel'ch eb' 'a sat jun tzo'n̈ xo eb' yit israelal. Ax ticnec ex yin̈tl Efraín, 'oj e cham yuj e mul xeya'chi, yic x'at eya'nc 'emmquilal 'a jun yechl Baal.

Os 13:2

An̈ja sniwtj eya'n 'och e mul. Tzlaj e b'onc q'uen plata e diosaloc, a tzyal tas tznachj eyu'uj, 'ixta tzeyutj e b'on junc yechl cha. Tzlajw cha, tzeyaln 'a eb' 'anma 'ixtic: 'A'c e xajmb'al 'a 'a, xe chi. Tzlaj e tz'ub'n 'elt sti jun yechl wacx cha.

Os 2:5

A e nun tic, xya'ch sb'a 'ajmulal. 'Ix yixtj 'el sb'a, yuj cha yaln 'ixtic: 'Oj 'at in sayc' eb' nib'b'il wu'uj, atn eb' tz'a'n tas tzin c'uxu, yet' tas tzwuq'uej, eb' tz'a'n in lana, yet' in lino, tzya'n pax eb' waceite yet' yal wuva, xchi.

Os 4:11

Yuj 'ajmulal yet' yuj 'u'l 'an̈, tzsat snab'en eb' 'anma'.

Os 8:4

Tzlaj ya'ch eb' jun tzo'n̈ sreyal yet' syajlil, palta man̈oc in tzin si'ch eb'. Xlaj yi'nc cot eb' q'uen plata yet' q'uen oro, ax yet' q'uen xlaj sb'o eb' jun tzo'n̈ yechl sdiosal, yuj cha, mun a jun tzo'n̈ chi tz'i'n cot 'a yib'n̈ eb'.

Habacuc 1:16

Tzyac' eb' 'emmquilal 'a schim, yet' 'a slucb' cha. Tzya'n eb' xajmb'al, tzn̈usn eb' incienso yuj sch'oxn 'el eb' yemmquilal. Caw wal tzalj eb', yujto wach' swa eb' yuj syamc'ab' cha.

Lc 15:13

Ax yic jaye nant c'u, xchon̈n can 'el win tza'n 'unn chi jantcn̈ej tas xchaj 'a smam cha, 'ix 'at win 'a junx chon̈b' 'a najat. Ax 'ix c'och win 'a jun chon̈b' cha, amancotn xyutj win slajn 'el stumn chi muc'uc, ton̈j slaj win 'a spatc jun tzo'n̈ maysch'olnil 'ix sb'o sc'och ta'.

Ro 1:28

Matz nib'j eb' 'ay yel'ch Dios 'a 'a. Yuj cha, tzyactn can Dios eb', yic tzwach' juw 'el snab'en eb', sec tzwach' b'oj eb' jun tzo'n̈ caw man̈ smojoc.

Dt 8:18

Yowlal tze na coti to a Jehová a tz'a'n eyip, tzya'n e nab'en yic tzex 'och ricoal. 'Ixta wal tzyutj ya'n 'el'choc strato sb'ojnac yet' eb' qui mam quichmec, 'icha wal tas wan yuj ticnec.

Jueces 9:27

'Ix 'elt eb' 'a spatquil chon̈b' chi sayj sat uva, spitz'n 'el eb' yalil te', sb'on eb' te yal uva chi yuc'. Xya'n 'och eb' jun q'uin̈ yet' wa'el. 'Ix 'och pax eb' wac 'a yol yatutal sdiosal eb' cha. Xlaj yu'nc eb' yal uva jawnc sti', axta xyalcn eb' tu paxti 'a yib'n̈ Abimelec.