Mr 13:8 - Chuj San Sebastian Bible

⁸ Yujto 'ay jun tzo'n̈ niwc chon̈b' 'oj yac' owl yet' yit niwc chon̈b'al, ax ya'n owl sb'a eb' yajl yet' eb' yit yajlil. Til wal 'aj 'oj 'ec' quixcab'. 'Oj jawc niwc wejl 'a yib'n̈ eb' 'anma'. A jun tzo'n̈ yailal cha, ton̈j tzb'ab'lj cani, 'ayt wal jun tzo'n̈ xo yel xo tu 'oj jawoc.

Chuj San Mateo Bible

⁸ Yujto ay juntzan̈ nivac chon̈ab' ol yac' oval yed' juntzan̈xo nivac chon̈ab'. Ol laj yac'an oval eb' yajal yed' eb' yetyajalil. Jantac b'aj ol ec' nivac quixcab'. Ol javoc nivac vejel d'a yib'an̈ eb' anima. A juntzan̈ chi', b'ab'el yaelal. Ayto juntzan̈xo ol javoc.

Mr 13:8 Iomraidhean Croise

2 Cr 15:6

'Ay 'anma tzyac' lajwc junc xo yit 'anma'il, 'ay pax jun tzo'n̈ chon̈b' tzyac' lajwc yit chon̈b'al, yujto a Dios tz'a'n somchjc 'el snab'en eb' yuj junjn macn̈ yailal.

Salmos 48:6

'Ix 'och eb' 'a xiwc'ojlal, xlaj somchjc chan̈ eb'. 'Icha tz'aj junc 'ix yab'n syail yic tz'alj yune', 'ixta x'aj eb' yab'n syail.

Is 19:2

Yuj cha, xyaln Jehová 'ixtic: 'Oj wac' spoj sb'a eb' 'aj Egipto cha, ax laj ya'n junjn eb' owal: A eb' swach'c'ojl sb'a, 'oj yac' eb' owal; ax eb' chon̈ab', 'oj yac' eb' owl yet' yit chon̈b'al, ax ya'n eb' yajl owl yet' eb' yit yajlil.

Is 37:3

'Ix yaln eb', to a win rey Ezequías 'ix aln 'ixtic: A ticnec 'ayn̈ 'och 'a cusc'ojlal, 'a yailal, 'a q'uixwc'ojlal. 'Icha junc 'ix 'ix tz'alj yune', caw tz'elcn yip, 'ixta caj ticnec.

Jeremías 13:21

'Ix yaln Jehová 'ixtic: ¿Tas 'oj eyal ticnec ex 'aj Jerusalén, yic 'oj 'och jun tzo'n̈ 'anma yac' yajlil 'a eyib'an̈, atn jun tzo'n̈ eb' xe sayq'ui, yic tz'och eb' e wach'c'ojloc? 'Oj ya'ch wal eb' yailal 'a eyib'n̈ si'mb'il, 'icha yab'n junc 'ix 'ix syail yic tz'alj yune'.

Jeremías 22:23

A ticnec, caw tzaljc'ojlal eyajc' 'a eyatut cotnc stel 'a Líbano, nab'a c'ute 'aych 'a 'a. Palta a wal yic 'oj jawc yailal 'a eyib'an̈, caw 'oj 'el eyaw eyab'n syail, 'icha yab'n junc 'ix 'ix syail yic tz'alj yune 'ix, xchi Dios.

Jeremías 25:32

A Jehová tztac' yuj smasnil, a tzaln 'ixtic: Caw stzol-l 'oj 'aj syamchj jun tzo'n̈ nacion̈ yuj yailal 'oj jawc cha. Wan syamn sb'a jun yailal chi 'a 'aj tzlajw c'och lum lu'um, xchi.

Jeremías 4:31

A eb' 'aj Sión tz'el yaw cha. Caw tzwab' yel yaw eb' 'icha wal yel yaw junc 'ix 'ix 'a yic tz'alj junc sb'ab'l 'une'. Caw tzc'acw eb', tzlaj sjilnc 'at eb' sc'ab', tzyaln eb' 'ixtic: ¡'Ay, 'oltacn̈ec wali! ¡Caw 'oj on̈ smilc cham eb' milm cham 'anma'! xchi eb'.

Jeremías 49:24

A eb' 'aj Damasco, caw man̈x 'a yip eb', wan snan eb' to 'oj 'at eb' 'eloc. Cojxn̈ej xiwc'ojlal, b'ilc'ojlal, yet' yailal 'ay 'a scal eb', 'icha junc 'ix 'ix wan yalj yune'.

Jeremías 50:43

A wal yic 'oj yab'nc sreyl Babilonia yab'xil jun tic, caw 'oj sicb'oc 'el sc'ab' yuj xiwc'ojlal, caw 'oj 'och 'a somc'ojlal yet' 'a yailal, 'icha wal junc 'ix 'ix wan yalj yune'.

Jeremías 6:24

A eb' 'anma 'a Jerusalén, tzyal eb' 'ixtic: Tox 'ix cab' jun 'ab'x cha, caw wal tz'el quip yuj xiwc'ojlal, on̈ 'och 'a cusc'ojlal cab'n syail, 'icha wal yab'n junc 'ix 'ix syail 'a yic tz'alj yune'.

Hageo 2:22

'Oj wac' lajwc 'ejm yip smasnil jun tzo'n̈ nacion̈ 'ay 'a yolyib'n̈q'uinl tic, ax in juln 'ejm can yopiso eb' 'a sat lu'um. 'Oj wac' pil'chjoc smasnil caruaje yic owal, yet' jantcn̈ej eb' 'aych 'a yojol. 'Oj cham no chej yet' eb' soldado 'ay q'ue 'a yib'n̈ no', junjn eb' mun 'oj stzu' cham sb'a eb' yet' eb' ajun yet'oc.

Zacarías 14:13

A 'a yic jun c'ul cha, caw wal 'oj yac' Jehová niwtjoc xiwc'ojlal 'a scal eb' 'anma', junjn mach 'oj syamlac cot sb'a yet' mach ajun yet'oc, ax laj smiln cham sb'a eb'.

Mt 24:8

A jun tzo'n̈ yailal cha, ton̈j tzb'ab'lj cani, 'ayt wal jun tzo'n̈ xo yel xo tu 'oj jawoc.

Mr 13:7

'Oj eyab' yoch jun tzo'n̈ niwc owal. Ax eyab'n speclal jun tzo'n̈ xo 'ijn 'oj 'ochoc. Man̈ ex xiwoc, yujto yowlal 'ixta 'oj 'ajoc. Palta mantoc slajb' cha.

Mr 13:9

Palta ax tic, caw lista tzeyutj e b'a, yujto 'oj eyajx 'och 'a yol sc'ab' eb' yajal. 'Oj e ma'x 'a yol capiya. 'Oj ex yi't eb' 'a yojltac ewin yajal, yet' 'a yojltac ewin rey, yujto 'aych e nab'en 'ayin. 'Ixta 'oj eyaji, sec 'oj stac' eyaln 'el wab'xil 'a ewinac.

A Tas Sc'ulejnac Eb' Schecab' Jesús Hechos 11:28

'Ay jun yitb'eym eb' Agabo sb'i. 'ix q'ue wan lin̈n 'a scal eb' creyente. 'Ix 'ajx yal yuj Yespíritu Dios 'ixtic: —'Ay jun niwn wejl 'oj jawc 'a yib'n̈ smasnil yolyib'n̈q'uinl tic, xchi. Ax yic 'aych win Claudio yajlil, 'ix jaw jun niwn wejl cha.

1 Ts 5:3

A 'a yic jun tiempoal cha, 'oj cob' yal eb' 'anma 'ixtic: An̈ec tic, caw wach' cajec, toc 'ay tas tzqui na'ec, 'oj schic cob' eb'. Palta yajn̈j wal cha, ax satx can 'ejm eb'. 'Icha tz'aj sjaw syailal junc 'ix tz'alj yune', 'ixta 'oj 'aj sjaw syailal eb' cha. Wal yel, may junc eb' 'oj colchjoc can 'el 'a jun syailal cha.

Apoc 6:4

'Ayc' junx chej caw chac, a jun 'ay q'ue 'a yib'an̈, 'ix chan spoder yi'n 'at owl 'a smasnil yolyib'n̈q'uinal, yic tzya'n smil cham sb'a eb' 'anma'. 'Ay jun espada x'ajx 'a 'a, caw niwquil.