Lm 5:16 - Chuj San Sebastian Bible

¹⁶ Man̈xtzac on̈ b'inax 'icha 'a yic yalan̈, caw 'oltac tzon̈ 'aj on̈, yujto 'ix 'och qui mul on̈.

Chuj San Mateo Bible

¹⁶ Maxtzac on̈ b'inaj icha d'a peca'. Te ob'iltac on̈, yujto ix och co mul.

Lm 5:16 Iomraidhean Croise

Job 19:9

'Ix yij 'ec' in ricoal, xya'n sat 'ejm in b'inab'ilal.

Salmos 89:39

'Ix a ju a trato yet' win a checab', xa juln 'ejm can scorona 'a sat lu'um.

Pr 14:34

A junc nacion̈ 'aj tzb'eylb'ax tojlal, caw 'oj 'ijxoc cha'an̈; palta ax junc nacion̈ 'aj tzb'eylb'ax maysch'olnil, caw 'oj q'uixw can 'eli.

Pr 27:24

yujto a ricoal yet' 'opiso, lemb'il man̈ najtloc tzyac'a, ax slajw paxi.

Is 3:8

Man̈x 'a swach'l yilx Jerusalén, ax Judá 'oj sat 'ejmi, yujto a tas tzyal eb' 'anma', yet' tas tz'el sb'on eb', a chi tz'och 'ajc'ojlal 'a Jehová. Atn jun tzo'n̈ chi tzuntzn cot yowal.

Jeremías 13:18

'Ix yaln Jehová 'ixtc 'ayin: Al 'a win rey yet' 'a 'ix snun winac, to an tzwal 'ixtic: 'Emn̈ect 'a e despacho. Tzlajw cha, ax 'a sat lum tzex 'em wocan, yujto a jun e corona man̈x jantcoc swach'l yilxi, caw 'oj 'ijxoc 'el 'a e jolom.

Jeremías 2:17

Atn wal jun tzo'n̈ tic x'ec' 'a eyib'an̈, yujto in eyactj can an Jehová e Diosal in tic, yic ex wi'n b'ey 'a yol b'e.

Jeremías 2:19

An Jehová in, tztac' wuj smasnil, an tzwala: Mun wal a e mul 'oj 'a'nc jawc yailal 'a eyib'an̈. Mun wal a e tenmtaquil, a 'oj 'a'nc 'och 'a eyib'an̈. Nachj cab' 'el eyu'uj, chajtlto caw wal man̈ wach'oc, yujto in eyactj can an Jehová e Diosal in tic. Tzwa'ch yailal 'a eyib'an̈, yujto may wel'ch xon jac 'a e sat.

Jeremías 32:23

Palta a yic x'och eb' scaj jun lum tic, yic 'ix schan eb' smacl lu'um, caw man̈x 'ic schaj eb' yab' tas 'ix ala, man̈x 'ic syiclj eb' a checnb'il, ma'ix sb'o eb' tas 'ix ac' sb'o'. Yuj cha, 'ix a'n cot jun niwquil yailal tic 'a quib'n̈ on̈.

Jeremías 4:18

Yuj e b'eyb'al yet' yuj tas xe b'o'o, yuj cha, tzjaw jun tzo'n̈ tic 'a eyib'an̈. Yuj wal e maysch'olnilal, yuj cha, caw tu ex 'aj 'el'chi, caw tzeyab' syal yu'uj, xchi Dios.

Lm 1:1

Cusltac xoj yilx x'ajcn chon̈b' Jerusalén, atn jun niwquil chon̈b' 'aj til wal 'anma 'a pecti'. Lajn xoj yilx x'ajcn 'icha junc 'ix 'ix chamnc yichmil. A 'a pecti cha, 'icha to yajl yaj 'a scal jun tzo'n̈ xo nacion̈, ax ticnec, 'ix 'ajx pural yoch 'a munljel.

Lm 1:18

A Jehová sb'o wal 'icha tas smoj sb'oni, yujto caw wal tenmtac xcutjec qui b'a 'a schecnb'il. E masnil ex chon̈ab', 'ab'c wal tas 'oj cal on̈, 'iltec wal nab'n yilx qui yailal on̈. A eb' qui quelmtac on̈, yet' eb' 'ix qui cob'stac on̈, tox 'ix 'ijx 'at eb' 'icha presoal.

Lm 1:20

Mamin Jehová, 'ilt on̈ cot yet' qui yailal tic on̈, a wal tzcutj cab'n on̈, 'ijn wal tzn̈i'chj sn̈i qui c'ojl cab'n syail. Caw wal tzcab' syal yet' qui pixn on̈, yic tzqui nan cot qui mul xlaj 'ochi. A 'a spatc 'el chon̈ab', til wal eb' tzcham yuj owal, 'ixta 'a yol 'oxt chon̈b' tic, til pax mach tzchami.

Lm 1:8

A eb' 'anma 'a chon̈b' Jerusalén, caw wal x'och smul eb', yuj cha, 'ix chacx 'el eb'. A eb' niwn yel'ch jun chon̈b' chi 'a sat 'a pecti', ax ticnec, caw tzyaj eb', yujto xyac' sq'uixwloc 'a sat eb'. Yuj cha, caw wal tz'oc' eb' 'aj Jerusalén, man̈xtzac sch'ox eb' sat yuj q'uixwelal.

Lm 2:1

Caw wal niwn yowl sc'ojl Cajlilec 'a yib'n̈ Sión, caw wal wach' yilx cob' jun chon̈b' cha, palta caw 'ix q'uic'b' 'eli. A swach'l yilx chon̈b' Israel, may junc xo lajn swach'l yilx yet'oc, ax Cajlilec 'ix 'a'n lajwc swach'l yilx cha. Man̈x 'ic sna cot yuj yowl sc'ojl cha, toto 'icha sb'achnub' yoc yaji.

Lm 4:13

'Ixta 'ix uji, yuj wal smul eb' schecb' Dios yet' yuj smul eb' ya'mal 'och sti eb' 'anma 'a Dios, yujto til wal 'anma may smul 'ix smil eb' 'a yol chon̈ab'.

Ez 21:26

An tzwal 'ixtic: 'Oj 'ijxoc 'ec' te sc'oxl sjolm win sat ya'mal 'och sti eb' 'anma', ax yijx 'ec' a corona, 'oj 'ijxoc q'ue'ch eb' 'emmquilal yeq'ui, ax yijx 'ejm can eb' niwc winac, yowlal 'ixta 'oj 'ajoc.

Miqueas 6:13

Yuj wal cha, 'oj wa'ch eyailal. 'Oj ex in satcn 'el yuj e mul.

Apoc 2:10

Man̈ ex xiw yuj jun tzo'n̈ yailal 'oj jawc 'a eyib'an̈. 'Ayx 'oj eyajx 'och 'a preso yuj win diablo. 'Ixta 'oj ex yutc win ex ya'n prowal. Lajn̈e c'u 'oj eyab' syail. Palta yiclumn̈ej tzeyutj e b'a, masnto 'oj e chami. Toto 'ixta 'oj eyutc e b'a, 'oj wac' spac 'ayex, atn e q'uinl 'a jun 'ejmn̈ej.

Apoc 3:11

Jab'xoj 'oj in c'ochxi. Yuj cha, an̈ja wach' tzeyutj e b'eyb'al 'icha ex xoni, sec may mach 'oj stac' yi'nc 'ec' spac eyico'.

A Ch'an̈ B'ab'el Libro Samuel 7:6

Ax yic 'ix syamn sb'a eb' 'a Mizpa cha, 'ix yi'n q'uet eb' a a', xlaj secnc 'ejm eb' 'a yojltac Jehová. 'Ix ya'n 'och sb'a eb' 'a c'ajb'c'ojlal 'a jun c'u cha. Xyaln eb' 'ixtic: 'Ix 'och wal qui mul 'a Jehová, xchi eb'. Ax Samuel, 'ix jucb'tzan eb' yit chon̈b' 'a Mizpa.