Lm 1:20 - Chuj San Sebastian Bible

²⁰ Mamin Jehová, 'ilt on̈ cot yet' qui yailal tic on̈, a wal tzcutj cab'n on̈, 'ijn wal tzn̈i'chj sn̈i qui c'ojl cab'n syail. Caw wal tzcab' syal yet' qui pixn on̈, yic tzqui nan cot qui mul xlaj 'ochi. A 'a spatc 'el chon̈ab', til wal eb' tzcham yuj owal, 'ixta 'a yol 'oxt chon̈b' tic, til pax mach tzchami.

Chuj San Mateo Bible

²⁰ Mamin Jehová, ina val tas caji. Max techajlaj co yaelal tic cuj scab'i. Pitz'itz'i yoch d'a co c'ol scab'i ayic sco naancot co pitalil. A d'a spatiquel co chon̈ab' tic smiljicham eb' cuninal d'a q'uen espada, axo d'a yol chon̈ab', ay pax chamel.

Lm 1:20 Iomraidhean Croise

Job 30:27

Caw wal tz'ib'x in pixn yuj xiwc'ojlal, toc 'ayt jac 'iljel yu'uj; caw wal tan̈b'iln yuj yailal.

Job 33:27

Ax yaln 'a sat eb' 'anma 'ixtic: 'Ix 'och in mul, 'ay tas man̈ tojloc xlaj in b'o', palta ma'ix ya'ch Dios in yailal 'icha wal smoj in chani;

Salmos 22:14

'Icha wal tz'aj a a stob'i, 'ixta tzin 'aji. Caw 'ix 'el wip. 'Ix yactn sb'a in b'aquil, ax in pixan 'ix 'ulb'x can 'at 'a yol in c'ojl 'icha no chab'ic'.

Salmos 38:8

Caw choc' yaj in niwnal, man̈x 'a pax wip; tzin c'acw wab'n syail.

Pr 28:13

A mach tzc'ub'j 'el smul, caw man̈ wach'c 'oj 'aj 'el'chi; ax toto tzyal q'uet smul cha, tzlajw cha, tzyactn sb'oni, toto 'ixta', 'oj 'ajxoc niwnc'ojlal.

Is 16:11

Yuj cha, caw wal tzcus in c'ojl yuj tas 'oj 'aj slajw 'el eb' 'aj Moab yet' eb' 'aj Kir-hareset.

Is 38:14

'Icha wal yel yaw no pechul tz'ec' no 'a satcha'an̈, 'ixta yel waw wab'n syail, tzin c'acw 'icha sc'acw no parama. Caw wal tzc'unb' yol in sat in q'ue q'ueln 'a satcha'an̈. Mamin Jehová, caw wal tzin 'ixtx tzwab'i, ta'wan̈ 'ayin.

Jeremías 14:18

A yic tzin 'el wil lum lum 'aj tz'och munljel 'a b'esan, ax tzwilni, to 'ay sniwnal eb' 'anma t'occtac yaj ta yuj owal. Ax yic tzin 'och paxt 'a yol chon̈ab', ax tzwilni wan laj scham eb' 'anma yuj wejel. Ax eb' tzyalch sb'a schecb'oc Dios, yet' eb' ya'mal 'och sti eb' 'anma', tox 'ix 'ijx 'at eb' 'a chuc chon̈b'al, jun to mant yojcoc eb', xa chi 'a eb', xchi Dios 'ayin.

Jeremías 14:20

Mamin Jehová, caw tzqui na cot qui maysch'olnilal on̈, yet' pax stenmtacl eb' qui mam quichm on̈. Caw x'och qui mul 'aych on̈.

Jeremías 2:35

Wach'xam 'ixta tze b'o'o, palta tzeyal 'ixtic: An̈ tic, caw wach' on̈, may qui mul, man̈ 'ayc cot yowl sc'ojl Dios 'a quib'an̈, xe chi. An xo an Jehová in tic, 'oj wa' cot yailal 'a eyib'an̈, yujto matz eyojquej 'el e mul.

Jeremías 3:13

'Ojquejec 'eli chajtlto x'och e mul, caw ex 'och tenmtacl 'a 'ayn an Jehová e Diosal in tic. An tzwala to 'ix 'och e mul e b'on 'ajmulal yet' jun tzo'n̈ comn dios 'a yich eb' te te caw pim xi'il. Caw ma'ix eyiclj in checnb'il, xchi Dios, xa chi 'a eb', xchi 'ayin.

Jeremías 31:20

An Jehová in, an tzwala to a eb' 'aj Efraín tic, 'icha to wunnal yaj eb', caw xajn eb' wu'uj, yel xo chamc'ojlb'il eb' wu'uj. Wach'xam tzwac' cuenta eb', palta matz wactj in nani, caw ya tzwab' yuj eb', yujto caw niwn tz'o'ch in c'ojl 'a eb'.

Jeremías 4:19

Caw wal tzin cumcn 'ec' wab'n syail. Caw tz'ib'x in pixn yuj tas tzlaj uji. Man̈xtzac stac' sictac tzin 'aji. Tox 'ix wab' yoc' q'uen trompeta, yet' jun 'aw yic owal.

Jeremías 48:36

'Icha wal yoc' te 'amay tz'utz'x yuj cusc'ojlal, 'ixta wal woc' yuj eb' 'aj Moab, atn yuj eb' 'anma 'ay 'a Kir-hares, yujto a wal sricoal eb' smolb'tzej, caw sat 'ejmi.

Lm 1:11

A smasnil eb' cajn 'a jun chon̈b' tic, caw wal ji'jmtac yoc' eb' yic tzlaj cob' sayn 'ec' eb' jac tas tzc'uxu. A smasnil sricoal eb', a 'ix yac' eb' sjelc tas tzc'an sc'ux cha, sec matz cham eb' yuj wejel, xchi winac. Mamin Jehová, 'ochn̈ wal q'ueln 'ayn̈ on̈, 'ilt wal tzon̈ 'aj qui lajw 'ejm on̈. Mamin Jehová, 'o'ch cab' a c'ojl eln 'och qui yailal on̈.

Lm 1:18

A Jehová sb'o wal 'icha tas smoj sb'oni, yujto caw wal tenmtac xcutjec qui b'a 'a schecnb'il. E masnil ex chon̈ab', 'ab'c wal tas 'oj cal on̈, 'iltec wal nab'n yilx qui yailal on̈. A eb' qui quelmtac on̈, yet' eb' 'ix qui cob'stac on̈, tox 'ix 'ijx 'at eb' 'icha presoal.

Lm 1:8

A eb' 'anma 'a chon̈b' Jerusalén, caw wal x'och smul eb', yuj cha, 'ix chacx 'el eb'. A eb' niwn yel'ch jun chon̈b' chi 'a sat 'a pecti', ax ticnec, caw tzyaj eb', yujto xyac' sq'uixwloc 'a sat eb'. Yuj cha, caw wal tz'oc' eb' 'aj Jerusalén, man̈xtzac sch'ox eb' sat yuj q'uixwelal.

Lm 1:9

A smul eb' 'anma cha, caw wal checl yaji; palta may tas tzna eb' toto 'ay tas wan sjaw 'a yib'n̈ eb'. Caw wal satjub'tac x'aj slajw 'el schon̈b' eb'; may xon mach x'a'n sniwnal sc'ojl eb'. Yuj cha, tzyaln eb' 'ixtic: Mamin Jehová, 'ilt on̈ cot yet' wal qui yailal on̈, a eb' 'ajc'ojl yajch 'ayn̈ on̈, caw wal xyac' eb' sgana on̈ satn 'el on̈, xchi eb'.

Lm 2:11

Caw wal tzmal yol in sat woq'ui, ax sn̈i in c'ojol, caw wal 'ijn tzn̈i'chj tzwab'i; caw man̈x 'a wip tzwab'i yic tzwiln 'och tas tz'aj slajw 'el eb' wit chon̈ab'. 'Intax eb' nene 'unn tzat chuwi, t'occtac tz'aj eb' schamcn 'a yol caye yuj wejel.

Lm 5:16

Man̈xtzac on̈ b'inax 'icha 'a yic yalan̈, caw 'oltac tzon̈ 'aj on̈, yujto 'ix 'och qui mul on̈.

Ez 7:15

A 'a sti 'el chon̈ab', owl 'ay ta', ax 'a yol chon̈ab', ata 'ay yab'il yet' wejel. A eb' 'anma 'aycn 'el 'a sti 'el chon̈ab', 'oj cham eb' yuj owal, ax eb' 'aycn 'a yol chon̈ab', a wejel yet' yab'il 'oj milnc eb'.

Dn 9:5

Caw x'och qui mul on̈ yet' qui tenmtacl 'ayach. Cojxn̈ej maysch'olnil xqui b'o on̈, man̈x ach nanoc cuj on̈. 'Ix qui patquiln can 'el a checnb'il on̈ yet' pax a ley.

Os 11:8

¿Tas wal 'oj wutc ex wactn can ex 'aj Efraín, atn ex yin̈tl can Israel? ¿Tom 'oj ex in satl 'icha wutjnac chon̈b' Admá, mto 'icha wutjnac chon̈b' Seboím? Caw ya tzwab' eyu'uj, caw tzcusch pax in c'ojl ex wiln 'ochi.

Habacuc 3:16

A yic xwab'n smasnil tas 'oj jawc 'a quib'n̈ chi 'on̈, caw in xiw cha'an̈. 'Ix 'ib'x chan̈ in ti'. Smasnil in niwnal, caw man̈x 'a yip, tzanxn̈ej 'aj in telwi. Wach'xam 'ixta 'oj 'ajoc, palta caw junc'ojlaln̈ej waj in tan̈wni jun c'ual yic 'oj jawc yailal oj 'a yib'n̈ eb' tz'a'n owl quet' on̈.

Dt 32:25

A 'a yol caye, 'oj laj can t'ocn yunnal eb' scham yuj q'uen espada. Caw xiwc'ojlaln̈ej ya'jc eb' 'a yol yatut. 'Oj cham ewin quelmtac winac, yet' eb' 'ix cob'stac 'ix, eb' 'ichmtac 'anma', yet' pax eb' 'unn tzat chuwi.