Jueces 7:13 - Chuj San Sebastian Bible

¹³ Ax yic xc'och Gedeón 'a sti smantiado eb' 'ajc'ojl cha, 'ix yab'n yaln jun win soldado chi swaych 'a junx win yitb'eym cha, xyaln win 'ixtic: —'Ix in waychej wal scot setsnoc jun 'ixm pan cebada 'a pa'n q'ue cha, ax wal 'a stojlal qui camplamento tic xjawi. 'Ix stenn 'och sb'a 'a jun mantiado tic, sma'n ch'iychjoc, 'ix 'em lan̈njoc yu'uj, xchi winac.

Chuj San Mateo Bible

¹³ Ayic ix c'och vin̈aj Gedeón chi' b'aj ayec' eb' van stan̈van scampamento eb' chi', ix yab'an vin̈ yalan svayich jun vin̈ soldado d'a junxo vin̈ icha tic. —Ix in vayichej to ay jun ixim pan cebada ix cot b'alb'on d'a sat vitz tic. Ix emul ixim d'a yol co campamento tic, ix och poc'naj ixim d'a jun mantiado, ix em lan̈naj yuj ixim, xchi vin̈.

Jueces 7:13 Iomraidhean Croise

1 Co 1:27

Yujto a eb' may snab'en 'a sat eb' 'anma 'a yolyib'n̈q'uinl tic, a eb' tzsi' chan̈ Dios, sec wach' ax eb' jelan, 'oj q'uixwc can 'el eb'. Yet' eb' may yel'ch 'a sat eb' 'anma', a eb' tzsi' cha'an̈, sec wach' ax eb' caw 'ay cob' yel'chi, 'oj q'uixwc can pax 'el eb'.

Jueces 3:15

masnto xtew eb' 'a Jehová. 'Ixta to b'i'an, xya'n 'och junx colwjum 'a scal eb', atn Aod win surito smunlji, yunnal Guera, yin̈tl can Benjamín. 'Ay jun c'ual, 'ix checx 'at Aod yuj eb' yit chon̈ab' yic tz'at ya'nc jun stojlb'al 'a win Eglón cha.

Jueces 3:31

A 'a spatquilx Aod cha, 'ix 'och junx win colwjum atn win Samgar yunnal Anat. A win xmiln waque ciente eb' filisteo. A jun te pechlab' wacax, a te sc'ana yic smiln win eb', yuj cha, xcolx pax eb' israel yuj winac.

Jueces 4:21

Palta a win Sísara cha, caw wal xc'unb' win sb'eyi, yuj cha, caw xcham win swayi. Xlajw cha, ax 'ix Jael cha, 'ix yi'n cot 'ix jun te 'istaca tzyamn 'ejm mantiado yet' jun martillo. Caw c'ojnc'ojnil xc'och 'ix 'a stz'ey winac. Xlajw cha, sma'n 'ejm 'ix te 'istaca chi 'a sjolm winac, 'a stojlal 'aj 'ay sacl yol sjolm winac, masnto xc'axw 'ejm te 'a yol lu'um. 'Ixta x'aj win Sísara chi xcham yuj 'ix.

Jueces 4:9

Xyaln 'ix 'a win 'ixtic: 'Oj in 'at et'oc, palta man̈oc ach 'oj a b'inax 'a yic 'oj 'ajxoc ganar jun owl cha, yujto a 'a yol sc'ab' jun 'ix 'ix 'oj ya'ch Jehová win Sísara cha, xchi 'ix. Xlajw cha, x'at 'ix Débora chi yet' win Barac 'a Cedes.

Jueces 6:15

—'A'n niwnc'ojlal jun 'ejm xo mamin. ¿Tas 'oj wutc in coln 'el eb' wit chon̈b' tic? Yujto an tic, caw wal meb'a in yet' eb' win̈tl 'a scal eb' yin̈tl Manasés. Slajb' 'unn xoj pax waj 'a scal eb' wu'tac, xchi Gedeón.

Jueces 7:12

A eb' madianita cha, eb' amalecita yet' jun tzo'n̈ xo eb' cajn 'a stojlal 'aj tzq'uel c'u, 'ix puc eb' 'a lum pan̈n 'a'lic chi 'icha no c'ulub'. Til wal scameyo eb', man̈x b'ischjb'enoc e no 'icha yarenail sti a mar.

Jueces 7:14

'Ix ta'w win yitb'eym win chi 'a 'ixtic: —A jun pan cha, tzyal 'el'chi atn win Gedeón win israel yunnal Joás, a win yet' eb' soldado. A Dios 'oj ca'nec am 'a yol sc'ab' win yet' qui camplamentoec tic, xchi.

Jueces 8:10

Ax win Zeba yet' Zalmuna, ata 'ayc' eb' 'a lum Carcor yet' olajn̈e mil soldado eb'. Cojxn eb' chi xcan scham 'a owal, yujto 'ayx 120 mil eb' tox xchami.