Jueces 6:11 - Chuj San Sebastian Bible

¹¹ 'Ay jun c'ual 'ay jun yángel Jehová 'ix 'emli, axta x'em wocn 'a yich jun te mach' 'ay 'a Ofra. A jun lum cha, yic win Joás yin̈tl Abiezer. 'Ay pax jun yunnal win tzcuch Gedeón. A Gedeón cha, wan schayw trigo 'a c'ultaquil, sec matz yilsb'a eb' madianita 'a 'a. A 'aj tzte'x 'el yal uva, ata tzchayw trigo cha.

Chuj San Mateo Bible

¹¹ D'a jun tiempoal chi' ix emul Yángel Jehová, ix em c'ojan d'a yich jun te' mach' d'a Ofra, d'a yol yic vin̈aj Joás yin̈tilal Abiezer. Ay jun vin̈ yuninal vin̈aj Joás chi' scuchan Gedeón. A vin̈aj Gedeón chi', van stec'anel ixim strigo vin̈ d'a yol jun b'aj stec'chajel yal te' uva, yic sc'ub'ejel ixim vin̈ d'a eb' madianita chi'.

Jueces 6:11 Iomraidhean Croise

Gn 16:7

Palta ax jun yángel Jehová schaj sb'a yet' 'ix Agar 'a cusltac lu'um, 'a sla'nil sti jun a a', 'a 'aj tz'atcn sb'el Shur.

Gn 48:16

A jun ángel in coln 'a tas 'ay smay, yal cab' wach' paxti 'a yib'n̈ ewin quelm 'unn tic. To yujn̈ej ewinac, ax sb'inax cot in b'i b'aq'uin̈, yet' sb'i in mam 'ichm Abraham, yet' pax sb'i in mam Isaac. Niwn cab' 'oj 'aj sb'isl yunnal eb'. 'Oj yac' eb' niwtjoc 'anma 'a sat lum lu'um, xchi winac.

A Ch'an̈ B'ab'el Libro Yic Yab'ixal Eb' Rey 19:19

'Ix meltzj Elías 'a jun lugar cha, ax x'aji, 'ix c'och 'a 'aj wan st'ocw lum Eliseo. 'Ay lajchwan̈ mojn no wacx tzt'ocw lum 'a 'a, a 'a no slajub', ata tza'n 'och Eliseo. Yajn̈ej 'ix 'ec' Elías 'a sat, 'ix spotn 'at jun spotl 'a yib'n̈ Eliseo cha.

Is 63:9

Locn xyab' syal yet' eb', caw a xcoln 'el eb'. Yuj schamc'ojlal yet' swach'l snab'en, yuj cha, scoln 'el eb', 'ix squetzn chan̈ eb'. Niwn tiempo 'ix 'ijx b'ey eb' yu'uj.

Nm 26:30

Ax eb' yunnal Galaad tzb'inax 'a yin̈til: Jezer, Helec, Asriel, Siquem, Semida yet' Hefer.

A Ch'an̈ Carta D'a Eb' Hebreo 11:32

Til to wal tas tzin nib'j tzwalb't 'ayex. Palta man̈x 'a tiempo tzwal yab'xil Gedeón, Barac, Sansón, Jefté, David, Samuel, yet' jun tzo'n̈ xo eb' schecb' Dios.

Josué 17:2

Ax jun tzo'n̈ xo eb' yin̈tl Manasés, ton̈j 'ix yac' eb' suerte yuj slu'um. 'Ixta xyutj eb' yi'n can slum cha, a tzyal jayc'aj eb' 'a smacl cha, atn eb' yin̈tl Abiezer, Helec, Asriel, Siquem, Hefer yet' Semida. A eb' tic yunnal Manasés eb', yixchicn José eb'.

Jueces 13:3

Palta ax jun yángel Jehová a 'ix sch'ox sb'a 'a 'ix. 'Ix yaln 'a 'ix 'ixtic: Ach tic, may xon junc one 'ix el satoc, ax ticnec jun, 'oj a cuchcnchan̈ jun a winc 'unin.

Jueces 13:6

Xlajw cha, x'at 'ix 'at yal 'a win yichmil cha, xyaln 'ix 'ixtic: 'Ay wal jun win schecb' Dios xjaw 'a 'aj 'ayn 'ec' cha. Caw wal sat in c'ojl yu'uj. Lajn wal yilx 'och 'icha junc eb' yángel Dios. Ma'ix in c'anb'j 'a 'a, 'ajtil xcoti, man̈oc 'ix aln pax sb'i 'ayin.

Jueces 5:23

Ax jun yángel Jehová xaln 'ixtic: Jaw cab' scatb' Jehová 'a yib'n̈ chon̈b' Meroz, yet' 'a yib'n̈ smasnil eb' 'anma cajn 'a 'a, yujto ma'ix 'och eb' yet' Jehová yic xya'n owal, 'icha xyac' jun tzo'n̈ xo eb' soldado ma'ix xiwi, xchi.

Jueces 6:12

'Ix sch'oxn sb'a jun yángel Jehová chi 'a winac, 'ix yaln 'a 'ixtic: —Ach winc jeln a'n owal, a Jehová 'aych et'oc, man̈ 'ach xiwoc, xchi.

Jueces 8:2

'Ix ta'w 'a eb' 'ixtic: —¿Tom tze na'a to niwn yel'ch tas xqui b'o 'a yib'n̈ eyic on̈? A tas xe b'o 'a slajb' xo tic, yelxo niwn yel'ch 'a yib'n̈ tas xqui b'o 'a b'ab'l on̈.

Jueces 9:5

'Ix c'och eb' 'a 'aj 'ay yatut smam chi 'a Ofra, axta sma' cham eb' yu'tac cha, atn eb' 70 'aycn 'a yatut win Gedeón cha. A 'a yib'n̈ jun q'uen q'ue'en, ata sma' cham win eb'. Cojxn wal jun win 'ix stac' sc'ub'n 'el sb'a, atn win slajb' 'unn tzcuch Jotam.