Jn 2:10 - Chuj San Sebastian Bible

¹⁰ 'Ix yaln win 'a win 'ixtic: —A sley eb' 'anma', a jun yal uva wach', a tzyac' eb' 'u'xoc b'ab'el. Ax 'a slajub', a jun yal uva tzyal wal yu'xi, a tzyac' eb'. Palta ach tic, xa mol jun yal uva wach'. Ax ticnec wanto a'n 'elt 'u'xoc, xchi win tz'a'n cuenta cha.

Chuj San Mateo Bible

¹⁰ Ix yalan vin̈ d'a vin̈: —A smodo eb' anima, a vino vach', a syac' b'ab'laj uc'nax eb'. Axo yic nivanxo ix laj yuq'uej eb' avtab'il chi', tz'ac'jipax jun vino ayxo val syala'. Palta a ach tic, ix a sic'b'at jun vino vach'. Ato ticnaic van ac'anelta uc'naxoc, xchi vin̈ d'a vin̈.

Jn 2:10 Iomraidhean Croise

Gn 43:34

A tas tzc'ux José 'a sat smexa a x'ajx 'a eb', a pax Benjamín, o'ejm to 'ec'b'al yic win x'ajx 'a yib'n̈ yic ewin yu'tac cha. 'Ixta xyutj José swa'i, xyu'n tas yet' eb' yu'tac 'a tzaljc'ojlal.

Salmos 104:15

atn yal uva tz'a'n tzaljoc qui c'ojl on̈, ax aceite tz'a'n pacb'oc qui sat yet' 'ixm 'ixm tzqui waj on̈.

Cantares 5:1

Ach cob's 'ix to tzach 'och wistloc, tox xin 'och 'a scal te wawb'en te'. Wan in molb'tzan te 'in mirra yet' jun tzo'n̈ xo te su'q'ui sjab', wan pax in le'n no yal chab' tz'elt 'a sc'ate', wan pax wu'n yal in uva yet' in lech, xchi winac. Ex qui wach'c'ojol, wan̈ec, 'u'jec tas tzeyuq'uej, xchi eb'.

Mt 24:49

Yuj cha, tzyamn 'och eb' sma'n eb' yit mosoal. Ton̈j tz'ec' eb' wac yet' eb' 'u'm 'an̈, tz'u'w 'an̈ pax eb' yet' eb'.

Lc 12:45

Palta q'uinloc tzna jun moso cha, to mant 'oj jawc spatron̈ cha. Yuj cha, tzyamn 'och sma'n eb' yit mosoal, yet' eb' yit munljumal cha. Ton̈j tzya'ch snab'en swa'i, tz'och pax 'u'm 'an̈il.

Lc 16:25

Palta xyaln cot Abraham chi 'ixtc 'a winac: Ach 'un, na coti chajtlto caw wach' ach 'ec' 'a yolyib'n̈q'uinal, ax Lázaro tic, caw may jac swach'l x'ec' yil ta'. Al ticnec, to wan yajx sniwnal sc'ojl 'a tic, ach xo, wan ab'n syal ticnec.

A Tas Sc'ulejnac Eb' Schecab' Jesús Hechos 2:15

¿Tom tze na'a to tzon̈ 'u'w 'an̈ on̈? Palta ma'ay. 'In tzeyila, to q'ue c'ulto ticnec.

1 Co 11:21

Yujto a yic wan sc'och yorail jun cena cha, ton̈j tze comn yamj 'och e wan eyic junjn ex muc'uc. Yuj cha, 'ayx matz e chaj eyico', tz'och e wejel. 'Ayx pax caw tzex 'och 'u'm 'an̈il yu'uj.

Ef 5:18

Man̈ ex 'och 'u'm 'an̈il, yujto a te 'an̈, tzwach' juw 'el qui nab'enec yuj te'. Yel xo wach' a Yespíritu Dios 'aych yajlilal 'ayn̈ec, man̈oc te 'an̈ cha.

1 Ts 5:7

A eb' 'anma cha, 'icha to waync eb'. 'Icha to 'u'm 'an̈ eb', yujto yic 'ac'wl yaj eb', q'uic'q'uinl to yaj spixn eb'.

Apoc 17:2

A eb' niwc yajl 'a yolyib'n̈q'uinal, c'uxn sb'o eb' 'ajmulal yet' 'ix. Ax eb' 'anma 'a yolyib'n̈q'uinal, 'ix juw 'el eb' yu'uj. 'Icha to x'och eb' 'u'm 'an̈il yuj jun 'icha yal uva jawnc sti', a xyac' 'ix 'a eb', atn yajmulal 'ix, xchi 'ayin.

Apoc 17:6

Ax xwilni, caw 'u'm 'an̈ 'ix yuj schic'l eb' yic xo Dios, atn eb' milb'il chamoc, yujto xyac' eb' testigoal sb'a yuj Jesús. Xcaw sat in c'ojl wiln jun cha.