Jeremías 4:31 - Chuj San Sebastian Bible

³¹ A eb' 'aj Sión tz'el yaw cha. Caw tzwab' yel yaw eb' 'icha wal yel yaw junc 'ix 'ix 'a yic tz'alj junc sb'ab'l 'une'. Caw tzc'acw eb', tzlaj sjilnc 'at eb' sc'ab', tzyaln eb' 'ixtic: ¡'Ay, 'oltacn̈ec wali! ¡Caw 'oj on̈ smilc cham eb' milm cham 'anma'! xchi eb'.

Chuj San Mateo Bible

³¹ A eb' aj Sion tz'el yav chi'. Svab' val yel yav eb' icha yel yav junoc ix ix b'ab'elto tz'alji yune'. Sc'acvi eb', syac'anel lian sc'ab' eb', syalan eb': Ay, ob'iltac on̈. Ol on̈ miljoccham yuj eb' milum anima, xchi eb'.

Jeremías 4:31 Iomraidhean Croise

Gn 27:46

Xlajw cha, xyaln 'ix Rebeca 'a Isaac 'ixtic: —Caw wal tzcus in c'ojl yuj eb' 'ix hitita, eb' 'ix yistzil ni Esaú tic. Yuj cha, toto tzyij sb'a ni Jacob yet' junc eb' 'ix hitita cajn 'a Canaán tic, yel xo am wach' tzin chami, xchi 'ix.

Job 10:1

Man̈xtzac in nib'j to pitzn in. 'Oj in checltoc 'el in yailal, ax in paxtin yet' in c'a'lc'ojlal.

Salmos 120:5

An xo tic, caw 'oltaquin, ton̈j 'e'lb'a wec' jaye'oc c'u 'a lum Mésec, in can 'a scal eb' cajn 'ec' 'a lum Cedar.

Is 1:15

A yic tzcob' ex leslwi, tzlaj cob' e mojchan̈ e c'ab' 'ayin, palta 'oj in c'ub'c 'el in sat 'ayex. Wach'xam cob' niwn tas tzeyal 'a e lesl cha, ma'oj wab'i', yujto milm ex cham 'anma'.

Is 13:8

Ton̈j 'oj sat sc'ojl eb'. A xiwlal, cusc'ojlal yet' yailal, a chi 'oj yic' yip 'a scal eb'. Caw 'oj yab' eb' syal jun tzo'n̈ chi 'icha tzyac' eb' 'ix 'ix tz'alj yune'. Toxn̈ej 'oj laj yil-lac 'och sb'a eb', ax schacb' chan̈ sat eb' soldado chi yuj q'uixwc'ojlal.

Is 21:3

Caw tzyab' in niwnal syail, caw 'ayn 'och 'a in yailal, 'icha wal junc 'ix 'ix tzyab' syal yalj yune'. Tzin 'och 'a somc'ojlal yuj tas tzlaj wab'i, tzin xiw pax chan̈ yuj tas tzwila.

Is 26:17

'Icha wal junc 'ix 'ix wan sc'och stiempoal yalj yune', wan stac sc'ojl 'ix yab'n syail, 'ixta 'on̈ 'aj 'a ojltac on̈.

Is 42:14

A Jehová a tzaln 'ixtic: Caw najtl sictac in 'aji, may tas tzwala, in 'och wa'an; palta ax ticnec, 'oj 'el waw 'icha junc 'ix 'ix wan yalj yune', caw tzc'acwi, toxn̈ej tzsi'si'ni.

Is 6:5

Yuj cha, xwaln 'ixtic: 'Oltacn wali, tecn 'oj in chami, yujto xwilch jun Rey yet' in sat, atn Jehová tzta'n̈j yuj smasnil. An xo tic, nab'a 'anma 'in, tu tas tzlaj 'elt 'a in ti', cajn in 'ec' pax 'a scal eb' 'anma tu spaxtin tic, xin chi.

Jeremías 10:19

'Ix waln an Jeremías in tic 'ixtic: ¡'Oltacn wali! Wan in lajw 'ejmi, man̈xtzac 'an̈tx tas lajwnac 'ayin. 'Ix in nani, to wic yaj jun yailal tic, yuj cha, 'oj wac' techjoc.

Jeremías 13:21

'Ix yaln Jehová 'ixtic: ¿Tas 'oj eyal ticnec ex 'aj Jerusalén, yic 'oj 'och jun tzo'n̈ 'anma yac' yajlil 'a eyib'an̈, atn jun tzo'n̈ eb' xe sayq'ui, yic tz'och eb' e wach'c'ojloc? 'Oj ya'ch wal eb' yailal 'a eyib'n̈ si'mb'il, 'icha yab'n junc 'ix 'ix syail yic tz'alj yune'.

Jeremías 14:18

A yic tzin 'el wil lum lum 'aj tz'och munljel 'a b'esan, ax tzwilni, to 'ay sniwnal eb' 'anma t'occtac yaj ta yuj owal. Ax yic tzin 'och paxt 'a yol chon̈ab', ax tzwilni wan laj scham eb' 'anma yuj wejel. Ax eb' tzyalch sb'a schecb'oc Dios, yet' eb' ya'mal 'och sti eb' 'anma', tox 'ix 'ijx 'at eb' 'a chuc chon̈b'al, jun to mant yojcoc eb', xa chi 'a eb', xchi Dios 'ayin.

Jeremías 15:18

¿Tas yuj may b'a'n̈ tz'och wan in yailal 'icha wal junc lajwel may xon tz'aj yan̈txi? ¿Tom 'oj in extc 'icha junc yet'l a 'elmal a tztup cha'an̈? xin chi 'a Dios.

Jeremías 18:21

A ticnec, cham cab' yunnal eb' yuj wejel, cham cab' eb' yuj owal. Cancn cab' yistzil eb' 'a man̈x 'a yichmil, man̈x 'a cab' yune eb'. Cham cab' yichmil eb' 'ix yuj yab'il, ax yune eb' to quelmtac, cham cab' eb' 'a scal owal.

Jeremías 22:23

A ticnec, caw tzaljc'ojlal eyajc' 'a eyatut cotnc stel 'a Líbano, nab'a c'ute 'aych 'a 'a. Palta a wal yic 'oj jawc yailal 'a eyib'an̈, caw 'oj 'el eyaw eyab'n syail, 'icha yab'n junc 'ix 'ix syail yic tz'alj yune 'ix, xchi Dios.

Jeremías 30:6

¿Tom 'ay 'aj tz'alj 'unn 'a eb' winac? ¿Tas yuj toxn̈ej la'n 'och sc'ab' eb' winc chi 'a sc'ojol, 'icha to 'oj 'aljoc 'el junc 'unn 'a eb'? ¿Tas yuj caw tzsacb' 'el sat eb' xiw smasnil?

Jeremías 45:2

Ach Baruc, caw wal cob' tzal 'ixtic: Caw 'oltac in, cojn wal somc'ojlal yet' yailal tzyac' Jehová wila'. Caw wal tzin c'unb' c'och woq'ui, man̈x 'a 'iljelal tzwab'i, xa chi.

Jeremías 48:41

A wal jun tzo'n̈ chon̈b' wach' cob' yajch smuroal, caw 'oj 'ejmc yuj eb' 'ajc'ojol. A wal 'a yic jun c'ul cha, a eb' soldado Moab, toxn̈ej 'oj xiwcn chan̈ eb' 'icha junc 'ix 'ix wan yalj yune'.

Jeremías 49:22

A eb' 'ajc'ojl cha, caw yajn̈ej ax sc'och eb' yac' owl 'a chon̈b' Bosra, 'icha sc'och jen̈n̈oc junc no c'uc'um. A wal 'a jun c'u cha, a eb' soldado 'aj Edom, caw 'oj 'ib'xoc eb' yuj xiwlal 'icha junc 'ix 'ix wan yalj yune', xchi Dios.

Jeremías 49:24

A eb' 'aj Damasco, caw man̈x 'a yip eb', wan snan eb' to 'oj 'at eb' 'eloc. Cojxn̈ej xiwc'ojlal, b'ilc'ojlal, yet' yailal 'ay 'a scal eb', 'icha junc 'ix 'ix wan yalj yune'.

Jeremías 50:43

A wal yic 'oj yab'nc sreyl Babilonia yab'xil jun tic, caw 'oj sicb'oc 'el sc'ab' yuj xiwc'ojlal, caw 'oj 'och 'a somc'ojlal yet' 'a yailal, 'icha wal junc 'ix 'ix wan yalj yune'.

Jeremías 6:2

Tic wal tzsatl chon̈b' Sión, jun man̈x jantcoc cob' swach'l yilxi.

Lm 1:17

An̈ 'aj Sión on̈c tic, 'ix cob' b'a'cht qui c'ab' yic tzcalnec qui b'a 'a junc mach, palta may xon junc mach x'a'n sniwnal qui c'ojlec. A Jehová 'ix aln 'a eb' cajn 'a qui tz'eyec, yic tzya'n eb' owl quet'ec. Caw wal spatquilj can 'el eb' chon̈b' Jerusalén tic, xchi winac.

Lm 1:20

Mamin Jehová, 'ilt on̈ cot yet' qui yailal tic on̈, a wal tzcutj cab'n on̈, 'ijn wal tzn̈i'chj sn̈i qui c'ojl cab'n syail. Caw wal tzcab' syal yet' qui pixn on̈, yic tzqui nan cot qui mul xlaj 'ochi. A 'a spatc 'el chon̈ab', til wal eb' tzcham yuj owal, 'ixta 'a yol 'oxt chon̈b' tic, til pax mach tzchami.

Lm 2:21

A eb' 'unin yet' eb' 'ichmtac 'anma', t'occtac yaj eb' schamcn 'a yol caye. Ax eb' quelmtac winac yet' eb' 'ix cob'stac 'ix, 'ix laj tzu'x cham eb' yet' q'uen espada. A yic sc'ul 'ay cot wal yowl a c'ojl cha, 'ix a mil cham eb' 'anma tic, ma'ix 'o'ch 'a c'ojl 'a eb'.

Os 13:13

Ex 'aj Israel, xc'och sc'ul e nan e b'a, palta may xon jac e nab'en. Lajn ex 'icha junc 'unn matz uj stoljb'tzan sb'a 'a yol sc'ojl snun, yuj cha, matz tac' xon yalji.

Miqueas 4:10

Ex 'aj chon̈b' Sión, 'el cab' eyaw yuj yailal, yujto 'icha cab' yab'n junc 'ix 'ix syail yic tz'alj yune', 'ixta cab' eyab'n syail. 'Oj eyel 'a yol e chon̈b' tic, axta 'oj e c'och cajn 'a caltcte', masnto 'oj e c'och 'a Babilonia. Ax Jehová, a 'oj e coln 'el 'a yol sc'ab' eb' 'ajc'ojl yajch 'ayex.

Miqueas 4:9

A ticnec ex 'aj Jerusalén, ¿tas yuj tz'el eyaw 'icha 'ix 'ix tzyab' syal yalj yune'? ¿tom yujto may e reyal? ¿mto yujto may eb' 'a'm nab'en 'a e cal?

Miqueas 7:1

Yuj cha, xwaln 'ixtic: ¡'Oltacn wali! lajn in xoj 'icha eb' tz'ec' sayj sat uva yet' sat higo 'a yic man̈x stiempoaloc. Palta man̈x 'a sat te xcani, man̈x 'a te sb'ab'l sat caw nib'b'il sloxi.

Mt 21:5

Tzeyal 'ixtc 'a eb' 'aj chon̈b' Sión: 'Iltec wal sjaw e Reyl 'ayex. Caw 'emmquil sjawi. 'Ay q'ue 'a yib'n̈ jun no quelm b'uru, yune jun no 'axna, xe chi, xchi 'a Ch'an̈ U'un̈.

1 Co 9:16

An tic, wach'xam tz'ec' wal-l wach' 'ab'x yic colnb'il, man̈ yujoc cha, tztac' in b'an̈n in b'a. Yujto yowlal tz'ec' wal-li. Caw wal 'oltac in, toto matz 'ec' wal-l jun wach' 'ab'x tic.

1 Ts 5:3

A 'a yic jun tiempoal cha, 'oj cob' yal eb' 'anma 'ixtic: An̈ec tic, caw wach' cajec, toc 'ay tas tzqui na'ec, 'oj schic cob' eb'. Palta yajn̈j wal cha, ax satx can 'ejm eb'. 'Icha tz'aj sjaw syailal junc 'ix tz'alj yune', 'ixta 'oj 'aj sjaw syailal eb' cha. Wal yel, may junc eb' 'oj colchjoc can 'el 'a jun syailal cha.