Jeremías 14:18 - Chuj San Sebastian Bible

¹⁸ A yic tzin 'el wil lum lum 'aj tz'och munljel 'a b'esan, ax tzwilni, to 'ay sniwnal eb' 'anma t'occtac yaj ta yuj owal. Ax yic tzin 'och paxt 'a yol chon̈ab', ax tzwilni wan laj scham eb' 'anma yuj wejel. Ax eb' tzyalch sb'a schecb'oc Dios, yet' eb' ya'mal 'och sti eb' 'anma', tox 'ix 'ijx 'at eb' 'a chuc chon̈b'al, jun to mant yojcoc eb', xa chi 'a eb', xchi Dios 'ayin.

Chuj San Mateo Bible

¹⁸ Ayic tzin ec' d'a cal munlajel svilani, ay snivanil anima teltumb'a yajcan yuj oval. Axo yic tzin ochxita d'a yol chon̈ab' tic, svilani to van scham anima yuj vejel. Axo eb' syaloch sb'a schecab'oc Dios yed' eb' sacerdote, toxo ix ic'chajb'at eb' d'a ch'oc chon̈ab'il man̈ yojtacoc, xa chi, xchi Jehová d'ayin.

Jeremías 14:18 Iomraidhean Croise

Is 22:2

Toxn̈ej tzex we'lji yel eyaw. A eb' 'anma chamnc 'a e cal, man̈ yujoc q'uen espada 'ix cham eb', man̈oc pax owal, palta xcham eb' yuj wejel yet' yuj yab'il.

Is 28:7

An̈jtona', 'ay jun tzo'n̈ xo eb' 'anma tztectn 'ec' yuj te 'an̈ cha, tzlaj sicb' 'el eb' yuj yowl te'; atn eb' ya'mal 'och sti eb' 'anma', yet' eb' tzyalch sb'a schecb'oc Dios. A yic 'u'm 'an̈ eb' cha, caw wal tzsomchj snab'en eb', yuj cha man̈xtzac tznachj 'el yuj eb' tas tzyal Dios, man̈ wach'c tzyutj eb' sb'on yaj eb' 'anma'.

Jeremías 2:8

A eb' ya'mal 'och e ti 'ayin, man̈x 'ic jaw eb' 'a wojltac. Ax eb' e cuywmal, man̈x 'ic in yojquej 'el eb'. A eb' yajl yaj 'a e chon̈ab', 'ix meltzj 'och eb' 'ajc'ojlal 'ayin, ax eb' in checb' cob'i', a 'a sb'i Baal, ata xpaxtin 'el eb'. 'Ix 'och tza'n eb' yuj jun tzo'n̈ comn dios to may jac yopiso, xchi Dios.

Jeremías 23:21

Man̈oc in xin checb't jun tzo'n̈ checb' cha, may pax jac tas xwal 'a eb'. Wach'xam caw ji'lti cob' yec' eb' yal-l 'a in b'i.

Jeremías 5:31

Cojn 'es tzyal-l eb' tzcob' yalch sb'a in checb'oc. Ax eb' ya'mal 'och sti eb' 'anma 'ayin, tzyac' eb' yajlil 'icha tas tznib'ej. Ax jun in chon̈b' tic, wach' tzyab' 'ixta'. Palta ¿tas wal 'oj yutc sb'a eb', yic 'oj jawc jun slajb' tiempoal? xchi Dios.

Jeremías 6:13

Smasnil eb' niwc yel'chi, yet' eb' may yel'chi, cojxn̈ej tas tzyac' ganar eb' 'a maysch'olnil, axn̈ej chi tzna eb'. An̈jtona eb' in checab', yet' eb' ya'mal 'och sti eb' 'anma 'ayin, cojxn̈ej 'elc'l tzb'o eb' smasnil.

Jeremías 6:25

¡Man̈x ex 'at munljoc, man̈x ex 'ec' b'eyc'oc 'a yoltc b'e! ¡Yujto a eb' 'ajc'ojl yajch 'ayn̈ec, 'ayx 'ec' eb' yet' syamc'ab' yic owal. 'Ayxn̈ej xiwc'ojlal 'a smasnil lugar! xchi eb' 'anma cha.

Jeremías 8:10

Yuj wal cha, 'oj wa'cn 'och yistl eb' 'a yol sc'ab' jun tzo'n̈ocx winac, yet' pax slum eb', chucx mach 'oj 'ica'anoc. Smasnil eb' niwc yel'chi, yet' eb' may yel'chi, axn̈ej tas tzyac' ganar eb' 'a spatc maysch'olnil, a chi tzna eb'. 'Ixta pax eb' tzyalch sb'a in checb'oc, yet' eb' tz'a'n 'och e ti 'ayin, cojxn̈ej 'elc'l tzb'o eb'.

Lm 1:20

Mamin Jehová, 'ilt on̈ cot yet' qui yailal tic on̈, a wal tzcutj cab'n on̈, 'ijn wal tzn̈i'chj sn̈i qui c'ojl cab'n syail. Caw wal tzcab' syal yet' qui pixn on̈, yic tzqui nan cot qui mul xlaj 'ochi. A 'a spatc 'el chon̈ab', til wal eb' tzcham yuj owal, 'ixta 'a yol 'oxt chon̈b' tic, til pax mach tzchami.

Lm 2:19

Jab' cab' scal tzex q'ue wa'an, q'ue cab' eyaw 'a 'ac'wal, yuj e c'ann scolwal Cajlilec. 'A smasnil e c'ojol, tzex 'oc' 'a yojltac, b'achc 'at e c'ab' 'a 'a, yic tze c'an sniwnc'ojlal 'a yib'n̈ eb' eyunnal wan scham 'a yoltc caye yuj wejel, xchi winac.

Lm 4:9

Yel xo wach' yic eb' 'anma chamnc yuj owal, 'a yib'n̈ pax eb' tzcham yuj wejel, yujto c'ojnc'ojnil scham eb', yujto man̈x 'a tas wach' sc'uxn eb'.

Ez 7:15

A 'a sti 'el chon̈ab', owl 'ay ta', ax 'a yol chon̈ab', ata 'ay yab'il yet' wejel. A eb' 'anma 'aycn 'el 'a sti 'el chon̈ab', 'oj cham eb' yuj owal, ax eb' 'aycn 'a yol chon̈ab', a wejel yet' yab'il 'oj milnc eb'.

Am 4:6

An Jehová in, an tzwala, to an xwac' eyab' syal wejl 'a smasnil yol e chon̈b' tic, palta man̈ yujoc cha, ex meltzj cot paxt 'ayin.

Miqueas 3:11

A eb' juez yaj 'a yol chon̈ab', man̈ wach'c tzyutj eb' sb'onyaj junc 'anma', tzchaj eb' q'uen c'ultac tumin. An̈jtona eb' tz'a'n 'och qui ti 'a Dios, yujn̈ej schan eb' tumin, yuj cha, tzcuywj eb'. 'Ixta pax eb' tzyalch sb'a schecb'oc Dios, yujn̈ej schan eb' tumin, yuj cha, tzyaln eb' tas tz'aj 'el'ch junc mach. Tzyaln pax eb' to 'aych Dios yet' eb', yuj cha, tzyaln eb' 'ixtic: A Jehová 'aych quet'ec, yuj cha, may yailal 'oj 'ec' 'a quib'n̈ec, xchi cob' eb'.

Dt 28:36

A Jehová 'oj eyi'n 'at yet' e reyl sic'b'il 'och eyu'uj, 'a junc nacion̈ to man̈ eyojcoc, man̈ yojcoc pax eb' qui mam quichmec. Ata 'oj eyac' servil jun tzo'n̈ comn dios, b'ob'il 'a te te', mto 'a q'uen q'ue'en.

Dt 28:64

A Jehová 'oj e pechn can 'at 'a jun tzo'n̈ xo nacion̈, 'oj e sactzic can 'at 'a jun tzo'n̈ chon̈b' 'ay 'a smasnil yolyib'n̈q'uinl tic. Ata 'oj eyal e b'a 'a jun tzo'n̈ comn dios tzb'o yet' te te', yet' q'uen q'ue'en, jun tzo'n̈ to man̈ eyojcoc, man̈ yojcoc pax eb' qui mam quichmec.

A Schab'il Carta San Pedro 2:3

A eb' 'a'm 'es cha, cojxn wal tumn tznib'j 'och eb'. Yuj cha, jeln 'oj yutc eb' yaln jun tzo'n̈ 'es 'ayex, yujto tznib'j eb' tzyac' ganar stumn 'a e patquil. Palta pectix b'eyc'ojlb'ilx eb' yuj Dios. Yuj cha, yowlal 'oj satcn 'el eb' 'a jun 'ejmn̈ej. Toxn ma'oj stac' scoln 'elt sb'a eb' 'a jun yailal cha.