Jeremías 13:19 - Chuj San Sebastian Bible

¹⁹ A jun tzo'n̈ chon̈b' 'a Neguev, tox 'ix 'och oyn eb' 'ajc'ojl 'a eb', man̈x 'a mach 'oj stac' sjacn 'och sb'a ta'. Smasnil eb' 'aj Judá, 'oj 'ijxc 'at eb' 'icha presoal.

Chuj San Mateo Bible

¹⁹ A juntzan̈ chon̈ab' d'a Neguev ol macchaj yuj eb' soldado, ol oymaj eb' d'a spatictac, man̈xa mach ol yal yochi. Masanil eb' aj Judá, ol ic'chajcanb'at eb' d'a najat.

Jeremías 13:19 Iomraidhean Croise

1 Cr 9:1

'Ixtn tic 'ajnc stz'ib'x can smasnil eb' israel 'a ch'an̈ slibroal yic yab'xil eb' sreyl chon̈b' Israel. Palta a pax eb' 'anma 'ay 'a Judá, 'ix 'ijx 'at eb' 'icha presoal 'a Babilonia, yuj smaysch'olnilal eb'.

Job 12:14

A junc tas to a Dios tzsatn 'eli, may junc mach tztac' sb'on pax cha'an̈; ax junc mach tzmacx 'och wan yu'uj, may pax junc mach tztac' scoln 'eli.

Jeremías 17:26

'Oj cot eb' 'anma cajn 'a jun tzo'n̈ chon̈b' 'ay 'a yol yic Judá, atn eb' 'ay 'a spatquil 'el chon̈b' Jerusalén tic, yet' eb' cajn 'a lum slum Benjamín, eb' 'ay 'a lum pan̈n 'a'lic, eb' 'ay 'a lum jolmctac witz, yet' eb' 'ay 'a lum Négueb. 'Oj yi' cot eb' no noc' tz'ajx tz'a xajmb'alil, yet' jun tzo'n̈ xo xajmb'al, 'oj yi' cot eb' 'ixm trigo tz'ajx ofrendail, incienso, yet' ofrenda yuj yalx yuj diosal 'ayin.

Jeremías 20:4

Yujto xyal Jehová 'ixtic: 'Oj wa'ch wal xiwc'ojlal 'a eb'an̈, yet' 'a smasnil eb' 'a wach'c'ojol. Q'ueln ach wal 'ochi, ax yem eb' a wach'c'ojl chi yuj yespada eb' 'ajc'ojl yajch 'ayach. Ax 'aj Judá ex tic, 'oj ex wa'cn 'och 'a yol sc'ab' win sreyl Babilonia. A win 'oj eyi'n 'at 'a Babilonia cha, mto 'oj ex smiln winac.

Jeremías 24:1

A Jeconías sreyl Judá yunnal Joacim, 'ix 'ijx 'at 'icha presoal yuj Nabucodonosor sreyl Babilonia. 'Ix 'ijx 'at pax eb' 'aych yajlil yet'oc, eb' b'om n̈a, yet' pax eb' tenmq'ue'en. Xlajw cha, 'icha waychil 'ix yutj Jehová sch'oxn chab' xuc te sat higo 'ayin, ata 'ay 'a yojltac yatut Jehová cha.

Jeremías 28:4

An Jehová in, an tzwala, to 'oj wi'x meltzjoc Jeconías yunnal Joacim sreyl Judá, yet' smasnil eb' 'anma 'ijxnac 'at 'icha presoal 'a Babilonia cha. Yowlal 'oj wi'x can 'el yopiso win sreyl Babilonia 'a eyib'an̈, xchi Dios, xchi Hananías.

Jeremías 32:44

A yic 'oj smannc eb', ax sb'on can eb' yun̈al, 'oj ya'cn 'och eb' seyo, yet' pax sfirma eb' testigo 'a 'a. 'Ixta wal 'oj ujc 'a yol yic lum slum Benjamín, yet' pax 'a jun tzo'n̈ aldea 'ay 'a spatquil 'el Jerusalén, yet' pax 'a jun tzo'n̈ xo chon̈b' 'ay 'a yol yic Judá 'a lum jolmctac witz, yet' 'a lum niwc pan̈n 'a'lic, yet' 'a yol yic Négueb. An Jehová in, an tzwala, to 'oj wi'x q'ue'ch eb' in chon̈b' tic jun 'ejm xo, xchi Dios.

Jeremías 33:13

An Jehová in, an tzwala: A 'a eb' lum chon̈b' 'ay 'a lum jolmctac witz, 'a eb' lum pan̈n 'a'lic, 'a lum Négueb, 'a lum yic Benjamín, yet' 'a jun tzo'n̈ aldea 'a spatquil 'el Jerusalén, yet' 'a jun tzo'n̈ xo chon̈b' 'a yol yic Judá, 'oj 'ilxoc eb' 'ilm calnelu jun 'ejm xo ta', 'oj 'ab'xoc sb'isn eb' no scalnelu cha, xchi Dios.

Jeremías 39:9

Ax 'a slajub', a Nabuzaradán scomandanteil eb' stan̈mal win sreyl Babilonia, a 'ix 'i'n 'at smasnil eb' 'anma 'aj chon̈b' chi 'icha presoal, atn eb' xcant can 'a yol chon̈b' cha, yet' pax eb' xya'ch sb'a yet' eb' 'aj Babilonia.

Jeremías 52:28

A sb'isl eb' 'anma yijnac 'at win Nabucodonosor, atn eb' tic: A yic yucl ab'il xo yoch win reyal, 'ay 3,023 sb'isl eb' 'anma 'aj Judá yijnac 'at winac;

Jeremías 52:30

ax 'a yic 23 ab'il xo yoch win reyal, 'ix yi'n 'at Nabuzaradán junx 745 eb' 'aj Judá. Yuj cha, a sb'isl smasnil eb' 'anma 'ix 'ijx 'at cha, 'ix q'ue'ch 'a 4,600.

Lm 1:3

A eb' 'aj Judá, caw wal ya tzyab' eb' yujto ya munljel 'aj 'aych eb', 'ix 'ijx 'at eb' 'icha presoal. A ticnec, 'ayx 'ec' eb' 'a scal jun tzo'n̈ xo nacion̈, toxn matz 'ilj xon eb' jac smunlji. 'Ayx 'ec' eb' 'a scal yailal, 'ix yamchj eb' yuj eb' tzpechn b'eyc'oc.

Zacarías 7:7

A tas tzwal 'ayx ticnec, atn jun tzo'n̈ in checnb'il wa'jnac yal-l eb' in checb' 'a yic pecti', yic 'ayc' Jerusalén 'a junc'ojlal, yic niwn 'anma 'ayc' 'a 'a, niwn pax chon̈b' oyn 'och 'a 'a, yet' 'a yol smacb'en Neguev, yet' pax 'a lum niwc pan̈an, 'ayn̈j 'anma cajn ta', xchi Dios, xa chi 'a eb', xchi 'ayin.

Dt 28:15

Palta toto ma'oj eyiclc smasnil schecnb'il yet' sley Jehová qui Diosalec, atn jun tzo'n̈ wan waln 'ayx tic, to 'ixta', 'oj jawc wal jun tzo'n̈ scatb' 'a eyib'an̈:

Dt 28:52

'Oj 'och oyn eb' 'ajc'ojl chi 'a spatc 'el e chon̈ab'. 'Oj yac' eb' owl eyet'oc, masnto 'oj lan̈chjoc 'ejm smuroal e chon̈b' chi yuj eb', yet' jun tzo'n̈ yet'l eb' soldado 'aych yipc e c'ojol. 'Oj yoy eb' smasnil chon̈b' 'ay 'a sat lum lum 'oj yac' Jehová qui Diosalec 'ayex.

Josué 18:5

A jun tzo'n̈ winc cha, uc macn̈ 'oj yutc eb' spojn lum lum cha, mun tzcancn Judá yet' slum 'a stojlal sur, ax eb' yin̈tl José, mun tzcan eb' 'a lum 'ay 'a stojlal snorteal yic Judá.