Jeremías 11:13 - Chuj San Sebastian Bible

¹³ A wal eb' 'aj Judá cha, caw niwn sdiosal eb'. Lajn wal sb'isl 'icha sb'isl jun tzo'n̈ schon̈b' eb'. An̈jtona pax eb' 'aj Jerusalén, caw niwn jun tzo'n̈ yet'l xajmb'al eb' sb'o cha'an̈, 'icha xo sb'isl scayeal yol chon̈ab', 'ixta x'aj sb'isl 'aj tzyac' tz'a eb' incienso 'a Baal, atn jun comn dios yajb'entac.

Jeremías 11:13 Iomraidhean Croise

A Ch'an̈ Schab'il Libro Yic Yab'ixal Eb' Rey 23:13

'Ix ya'n pax win rey chi juwc jun tzo'n̈ macsej 'ay 'a jolmctac witz 'a stojlal 'aj tzq'uel c'u 'a Jerusalén, 'a spac'b'il lum tzaln olivo tzcan 'a qui wach' c'ab'. A jun tzo'n̈ cha, b'ob'il can yuj Salomón sreyl chon̈b' Israel, yic tz'och eb' 'emmquilal 'a jun tzo'n̈ comn dios caw yajb'entac: Atn Astarté sdiosal eb' 'aj Sidón, yet' Milcom sdiosal eb' amonita.

2 Cr 28:25

An̈jtona', 'ix sb'on pax jun tzo'n̈ macsej 'a smasnil chon̈b' 'a yol yic Judá, yic tzya'n tz'a incienso 'a jun tzo'n̈ comn dios. 'Ixtnta xyutj stzuntzn cot yowl sc'ojl Jehová sDiosal yet' eb' smam yicham.

Is 2:8

Palta caw wal tzniwtj jun tzo'n̈ yechl comn dios 'a yol schon̈b' eb'. A eb' 'anma tic, tzlaj yac' 'ejm sb'a eb' 'a jun tzo'n̈ yechl tzlaj sb'o cha.

Jeremías 11:17

An Jehová in, tztac' wuj smasnil, an in pitzjnac chon̈b' Israel, yet' chon̈b' Judá. Palta tox 'ix wala to 'oj jawc yailal 'a yib'n̈ eb', yuj jun tzo'n̈ maysch'olnil tzb'o eb'. 'Ix stzuntzj cot eb' wowal, yujto xyac' eb' tz'a incienso 'a Baal, xchi Dios.

Jeremías 17:1

'Ix yaln pax Jehová 'ixtic: A wal e maysch'olnilal ex 'aj Judá, caw wal may tz'aj sat 'a e nab'en, yet' 'a sch'ac jun tzo'n̈ yet'l e xajmb'al, caw may tz'aj sat e mul cha. Tzcancn yechl 'a 'ayx 'icha junc letra tz'ajx can 'och 'a junc q'uen q'uen yuj junc q'uen cincel mto yuj junc q'uen diamante.

Jeremías 18:15

Palta an tic, in 'atcn satc'ojlal yuj eb' in chon̈b' tic, ax 'a jun tzo'n̈ comn dios, ata tzyac' tz'a eb' incienso. 'Icha to 'ix sat eb' 'a jun b'e to 'ayc' xon 'a yic pecti', ax 'a jun tzo'n̈ c'ultac b'e tz'at eb'.

Jeremías 19:4

Yujto in eyactjcani, xeya'n can 'och jun lum tic slumoc jun tzo'n̈ chuc diosal. 'Ix eya'n tz'a incienso 'a jun tzo'n̈ comn dios cha, jun tzo'n̈ to man̈ eyojcoc, an̈jtona eb' e mam eyicham, yet' pax eb' e reyal, man̈ yojcoc pax eb'. Caw niwn eb' 'anma may smul xe mil chamoc.

Jeremías 19:5

An̈jtona', xe b'on pax jun tzo'n̈ yet'l xajmb'al 'a 'aj tzeyac' tz'a eb' eyunnal xajmb'al-l 'a comn dios Baal, tze b'on wal tas to man̈oc in 'ix wac' e b'o', may xon pax tas tz'ec' 'a in nab'en to 'ixta tzeyutj e b'a.

Jeremías 2:28

Ex 'aj Judá, ¿'ajtil 'ay jun tzo'n̈ e diosal e b'ojnac? ¡'Icha wal sb'isl e chon̈ab', 'ixta wal sb'isl eb' e diosal chi e b'ojnac! ¡Jaw cab' eb' quilnoc, ax quilni, toto 'oj stac' ex scoln eb', yic 'oj c'och stiempoal sjaw yailal 'a eyib'an̈!

Jeremías 3:24

A yic quelm on̈t 'unn on̈, a 'emmquilal tz'och 'a jun tzo'n̈ yechl to q'uixweltac yilx cha, a 'ix 'a'n sat 'ejm jun tzo'n̈ tas ya'jnac ganar eb' qui mam quichm on̈, atn no calnelu, no wacax, eb' 'unnab'il, yet' eb' 'islab'il.

Jeremías 3:25

'Oj quic' 'ejm qui b'a yuj qui q'uixwc'ojlal on̈, yujto an̈ tic yet' eb' qui mam quichm on̈, caw wal x'och qui mul 'aych Jehová qui Diosal on̈. Yictax quelm on̈t 'unn on̈, masnto ticnec, caw wal ma'ix qui yiclj tas 'ix al 'ayn̈ on̈, xchi eb'.

Jeremías 32:35

An̈jtona 'ix sb'o chan̈ eb' yet'l xajmb'al yic Baal 'a span̈nil lum yic Ben-hinom. Ata tzyac' tz'a eb' yunnal yet' yisl xajmb'al-l 'a Moloc. 'Ixta wal x'aj yoch smul eb' 'aj Judá, yic sb'on eb' jun tzo'n̈ tas to man̈oc in xwala, a tas tzb'o eb' cha, may tas x'ec' xon jac 'a in nab'en.

Jeremías 44:21

—¿Am wal e nan ax tic, to man̈ yojcoc Jehová, mto x'at satc'ojlal yu'uj, yic xeya'n incienso xajmb'al-l 'a jun tzo'n̈ chuc diosal 'a yoltc scayeal Jerusalén, 'icha wal yutjnac sb'a eb' qui mam quichmec cha, eb' qui reylec, eb' yajl yaj 'a qui calec, yet' smasnil 'anma 'a yol yic Judá?

Jeremías 44:5

Palta ax tic, caw wal ma'ix eyiclej, ma'ex 'och wan e b'on maysch'olnilal. A eyico', to xwach' niwtj eya'n incienso xajmb'al-l 'a jun tzo'n̈ tzalx 'och diosal cha.

Jeremías 48:35

An Jehová in, an tzwala: A 'a Moab, 'oj in satl 'emmquilal, atn xajmb'al tz'at yac' eb' 'a lum won̈ctac 'a 'aj 'ay jun tzo'n̈ smacsej eb', yet' incienso tzyac' tz'a eb' 'a sdiosal.

Jeremías 7:9

Tzex 'elc'wi, tzex milw cham 'anma', tze b'on 'ajmulal, tzeya'n cob' e ti 'a tas man̈ yeloc, tzeya'n tz'a incienso 'a jun comn dios tzcuch Baal, tzeya'n 'emmquilal 'a jun tzo'n̈ xo comn dios to may 'aj 'ix colwj 'ayex.

Ez 16:24

'Ix laj sb'o jun tzo'n̈ mantiado 'aj tz'och 'emmquilal 'a jun tzo'n̈ comn dios 'a jolmctac tzalan, 'ix ya'n 'och sb'a 'ajmulal.

Os 10:1

A eb' 'aj chon̈b' Israel, lajn wal eb' 'icha jun 'ib'c te snun uva caw wal 'ay sat, palta mun tzsatn sch'ocoj, a yic wach' tz'aj sat tas 'awb'il yuj eb', yet' 'a yic tzniwtj sricoal eb', a pax ta tzniwtj sb'on eb' 'anma jun tzo'n̈ yet'l xajmb'al, tzb'on 'och eb' yelwnub'al.

Os 12:11

A 'a lum Galaad, ata 'ay sdiosal eb' chuc chon̈b'al, palta man̈x 'a jac yel'ch 'oj 'ajcni. A 'a lum Guilgal, ata tzlaj yac' eb' no wacx xajmb'alil; palta a yet'l xajmb'al eb' cha, lajn 'oj 'ajcn 'icha q'uen q'uen jun b'uln̈ yaj si'x syam sb'a 'a 'aj tz'awx lum lu'um, xchi Dios.

Os 9:10

Tzyaln Jehová 'ixtic: A wal yic xin chan in b'a yet' eb' 'aj Israel, caw wal in tzalji, 'icha eb' tz'ilchj te uva yuj 'a lum cusltac lu'um. A eb' e mam eyicham, 'icha wal junc sat te higo tzb'ab'l 'el-li, 'ixta eb' 'a in sat. Palta ax yic xc'och eb' 'a Baal-peor, 'ix ya'n 'ejm sb'a eb' 'a Baal, yuj cha, caw yajb'entac xyutj sb'a eb' 'icha jun comn dios schamc'ojlej eb' cha.