Is 2:2 - Chuj San Sebastian Bible

² A 'a jun slajb' c'ul cha, a lum switzl Sión 'aj 'ay yatut Jehová, 'oj q'ue wan lum 'a cha'an̈, 'oj 'ec' stel lum 'a jun tzo'n̈ lum niwc witz 'a stz'ey cha. Ax smasnil eb' 'anma 'a junjn nacion̈, 'oj c'och b'uln eb' 'a 'a.

Chuj San Mateo Bible

² A d'a slajvub' c'ual, a lum tzalan b'aj ay stemplo Jehová, ol chaan̈b'ocq'ue luum, ol ec' lum d'a yib'an̈ juntzan̈xo vitz ay d'a stz'eytac chi'. Masanil eb' anima d'a junjun chon̈ab', ol javoc eb' d'a luum.

Is 2:2 Iomraidhean Croise

Gn 49:1

'Ix yawtn cot Jacob smasnil eb' yunnal, xyaln 'a eb' 'ixtic: Nitzc cot e b'a 'a in tz'ey ex wunnal, 'oj wala', tas 'oj 'ec' 'a eyib'n̈ b'aq'uin̈:

Job 19:25

Wojtac to a jun mach tzin colni, pitzan, ax 'a slajb' c'ual, 'oj jawc in wul yi' chan̈ 'a sat lum tic.

Salmos 102:23

A yic spacl to yaj in q'uinal, 'ix e'n can 'el wip, xa'n can c'ochnb'oc in q'uinl tic.

Salmos 2:8

C'an 'ayin, ax wa'n jun tzo'n̈ niwc nacion̈ 'ayach, ax eca'an smasnil yolyib'n̈q'uinal, masnto 'aj tzlajw c'ochi.

Salmos 22:27

Mamin Jehová, smasnil jun tzo'n̈ niwc nacion̈, yet' yin̈tl junjn macn̈ 'anma 'a 'aj tzlajw c'och lum lum tic, 'oj a nax cot yuj eb'. 'Oj jawc eb' 'a ojltac, ax yem cumn eb' 'ayach,

Salmos 22:28

yujto Rey ach. Ach tzac' yajlil 'a yib'n̈ smasnil nacion̈ 'a yolyib'n̈q'uinl tic.

Salmos 48:2

Caw wal wach' yilx lum tzaln Sión, yujto caw chan̈ yaj chan̈ lu'um. A 'a stojlal norte, ata 'ay lum schon̈b' jun Rey caw wal niwn yel'chi.

Salmos 68:17

A Dios smiyon̈al xo sb'isl scaruaje yic owal; ata xcot 'a yol scaruaje 'a Sinaí, 'ix jaw 'a scajnub'.

Salmos 72:8

Ya' cab' win yajlil 'a yib'n̈ smasnil lum lum tzc'och 'a sti a mar Mediterráneo masnto 'a sti a Chac Mar; yet' 'a sti a Éufrates, masnto 'aj tzlajw c'och lum lu'um.

Salmos 86:9

Mamin, ach xa b'o smasnil eb' nacion̈, 'oj jawc eb' 'anma chi wul yac' 'ejm sb'a 'ayach, yic tzyi'n chan̈ eb' a b'i.

Salmos 87:1

A yipnub' yich schon̈b' Dios, ata te'n 'ejm 'a yib'n̈ eb' lum tzaln 'aj tz'och 'emmquilal.

Salmos 87:2

Yel xo wal tzchamc'ojlej Jehová chon̈b' Sión 'a yib'n̈ jun tzo'n̈ xo schon̈b' eb' yin̈tl Jacob.

Is 11:10

A 'a jun tiempoal cha, 'oj sch'oxl sb'a jun yin̈tl Isaí cha. Til wal 'anma 'oj cot 'a jun tzo'n̈ xo nacion̈, ax sayn 'ec' eb' 'aj 'ayc' cha, caw niwn yel'ch 'a sat eb'.

Is 25:6

A Jehová tztac' yuj smasnil, a 'a tzaln Sión ata 'oj sb'o jun niwn wa'el. 'Oj yac' wa smasnil eb' nacion̈ ta', a jun schib'l wal cha, caw wal wach', ax ya'n yuc' eb' yal uva jawnac sti', atn jun yal uva to caw wach' yaj sb'o'i.

Is 27:13

A 'a jun c'ul cha, 'oj 'utz'xoc jun trompeta to 'oj 'ab'xoc sjaj 'a najat, a eb' satnc can 'at 'a Asiria, yet' eb' 'ijxnac can 'at 'a Egipto, 'oj jawc eb' wul yac' 'ejm sb'a 'a Jehová, atn 'a lum tzaln to yic 'emmquilal yaj 'a Jerusalén.

Is 30:29

Palta ax xo pax tic, to 'oj e b'itni, 'icha 'a yic 'aych q'uin̈ yic snanb'il yelt eb' quit israelal 'a libre, caw tzaljc'ojlal eyico', 'aych b'it yet' 'amay yic tzex 'at 'a lum tzaln yic Jehová, atn qui Colmal an̈ israel on̈c tic.

Is 49:6

'Ix yaln 'ixtc 'ayin: In checb' ach, palta man̈ yujocn̈ej a tojlb'tzan pax eb' yin̈tl Jacob 'a 'icha xon yaji, yic tze'n pax meltzjoc jaywn̈ xo eb' cann̈cto can 'a Israel, palta yuj pax ach wa'n 'och sacq'uinlal 'a jun tzo'n̈ xo nacion̈, masnto 'a 'aj tzlajw c'och yolyib'n̈q'uinal, tze'n pax 'at colnb'il ta', xchi 'ayin, xchi jun schecb' Dios cha.

Is 56:5

toto 'ixta', 'oj wac' in wach'c'ojlal 'a eb'. 'Ay jun tas niwn yel'ch 'oj wac' 'a eb', 'ec'b'al yel'ch 'a yib'n̈ to 'ay yunnal eb', mto 'ay yisl eb'; a jun cha, may b'a'n̈ 'oj 'och wan sb'inax eb' 'a yol watut yu'uj, yet' 'a scal eb' in chon̈ab'. A jun sb'i eb' cha, may b'a'n̈ 'oj sat 'ejm yalxi, 'oj alxn̈ej 'a smasnil tiempo.

Is 56:7

toto 'ixta', 'oj wi' cot eb' 'a jun tzaln to wicn̈ej yaji, ax wa'n stzaljc'ojlal eb' 'a yol watut 'aj tz'och lesl 'ayin. 'Oj in cha sn̈us eb' xajmb'al yet' yofrenda 'a yib'n̈ yet'l xajmb'al to wic yaji, yujto 'oj alxoc yuj watut, to yatutal lesl yaj yuj smasnil chon̈ab'.

Is 60:3

A jun tzo'n̈ nacion̈ cha, 'oj jawc eb' 'ayx yuj jun sacq'uinl cha, ax eb' rey, 'oj jawc eb' 'ayx yuj in tzictznil 'oj checljoc chan̈ 'a e cal.

Is 65:11

Palta man̈ 'ichcta tzex 'aj ax tzeyij 'el e b'a 'ayn an Jehová in, atn ex tzeyac' sat e c'ojl 'a lum tzaln 'aj tz'och 'emmquilal, ex tzeyac' tas tzc'uxxi, yet' yal uva xajmb'al-l 'a jun tzo'n̈ comn dios, atn Gad yet' Meni, jun tzo'n̈ tznan 'el tas tzjaw 'a eyib'n̈ eyalni.

Is 66:20

An Jehová in, an tzwala. A eb' 'anma 'a jun tzo'n̈ nacion̈ cha, 'oj yi' paxt eb' nan̈loc eb' eyit chon̈b' chi 'ayc' 'a scal eb' cha. 'Ay eb' 'oj 'ijxoc cot 'a yib'n̈ chej, 'ay eb' 'a yol caruaje, 'ay eb' 'a yib'n̈ b'achte', 'ay eb' 'a yib'n̈ no mula, yet' pax 'a yib'n̈ no cameyo. 'Icha wal tz'aj yijx cot junc ofrenda 'ayin, 'ixta 'oj 'aj yijx paxt eb' 'a Jerusalén 'a 'aj 'ay lum tzaln 'aj tz'och 'emmquilal 'ayin. Lajn 'oj 'aj yijx cot eb' 'icha tz'aj yi'n cot eb' israel ofrenda tz'em 'a yol jun tzo'n̈ 'ac' waso 'ay 'a watut.

Is 66:23

A yic tzpac' 'uj 'a junjn 'ujal, yet' 'a yic sc'ul 'iljelal 'a yol junjn seman, 'oj jawc smasnil 'anma 'a wojltac, ax yem cumn eb' 'ayin.

Jeremías 16:19

Xwaln 'ixtc 'a Dios: Mamin Jehová, caw ach 'aych 'och wipoc, in tan̈mal 'aji. Ach tzin a colo, yic 'ayn 'och 'a in yailal. 'Oj jawc jun tzo'n̈ nacion̈ cajn 'a 'aj tzlajw c'och sti lum lum tic, ax wul yaln eb' 'aych 'ixtic: Cojn jun tzo'n̈ comn dios may jac yopiso, may jac tztac' yu'uj, a chi schajnac eb' qui mam quichm smacloc.

Jeremías 23:20

Ma'oj 'och wan yowl in c'ojl cha, masnto 'oj 'el'choc 'icha tas tzin nib'ej. At 'a slajb' c'ual, atta 'oj nachjoc 'el jun tzo'n̈ tic eyu'uj.

Jeremías 26:18

A 'a yol stiempoal Ezequías sreyl Judá, a Miqueas 'aj Moreset, 'ix paxtin 'el 'a sb'i Jehová 'a smasnil eb' chon̈b' 'a Judá, 'ix yaln 'ixtic: A Jehová, tztac' yuj smasnil, a tzaln 'ixtic: A chon̈b' Sión tic, 'oj cancn lum yico'oc munljel. A Jerusalén jun b'uln̈ 'oj 'aj slan̈chj can 'ejmi, ax jun tzaln 'aj b'ob'il watut, waymtac xoj 'oj 'ajcni, xchi Dios, xchi Miqueas cha.

Jeremías 3:17

A 'a yic jun tiempoal cha, a Jerusalén 'oj 'ajxoc can sb'ic in despachooc an Jehová in tic. 'Oj syam sb'a smasnil nacion̈ 'a 'a, ax ya'n eb' 'emmquilal 'ayin. Man̈x 'oj yac' eb' 'ijxoc 'at sb'a yuj stu nab'enal.

Jeremías 30:24

Ma'oj 'och wan yowl sc'ojl cha, masnto 'oj 'el'choc smasnil tas nab'il yu'uj. At 'a yic slajb' xo, ax snachj 'el jun tzo'n̈ tic eyu'uj.

Jeremías 31:12

'Oj jawc eb', ax sb'itnan eb' b'it 'a tzaljc'ojlal 'a tzaln Sión, ax ya'n tzaljoc eb' sc'ojl yet' tas wach' 'oj wac' 'a 'a, atn 'ixm trigo, yal uva, aceite, no calnelu, yet' pax no wacax. Lajn 'oj 'ajcn eb' 'icha jun tzo'n̈ 'awb'ente caw 'aychn̈ej yalil, man̈x 'oj 'el yip eb' jun 'ejm xo.

Jeremías 48:47

Palta an Jehová in, an tzwala, to ax 'a slajub', 'oj wi'x q'ue'ch chon̈b' Moab jun 'ejm xo, xchi Dios. Atn jun tzo'n̈ yailal tic 'ix yalcn Jehová 'a yib'n̈ chon̈b' Moab.

Jeremías 49:39

Ax 'a slajub', 'oj wi'xq'ue'ch chon̈b' Elam tic jun 'ejm xo, xchi Dios.

Jeremías 51:44

'Ix yaln Dios 'ixtic: 'Oj wa'ch wal yailal 'a yib'n̈ Bel, atn sdiosal Babilonia. 'Oj wac' xejc q'uet tas b'uc'b'il 'ejm yu'uj, man̈x 'oj wul 'ilxoc yuj jun tzo'n̈ xo nacion̈. 'Oj lan̈chjoc 'ejm smuroal Babilonia cha.

Ez 38:16

'Oj cob' ac' owl yet'oc, caw 'oj och oyn 'a in chon̈ab', 'icha tzyac' 'asn tz'och oyn 'a lum jolmctac witz. A 'a jun tiempoal cha, 'oj ach wi' cot 'a sat in lum cha, sec 'oj yil jun tzo'n̈ xo nacion̈ tas 'oj ach wutc ach in satn 'eli, ax yojcan 'el eb' to cojn in ton Dios in.

Dn 10:14

Yuj cha, ticnec in jaw 'ayach yic tzwul walnoc ab'i', tas 'oj 'ec' 'a yib'n̈ a chon̈b' chi 'a yic slajb' c'ual. Yujto a tas xel 'a jun a waych cha, atn tas 'oj ujc yic b'aq'uin̈, a chi xch'oxx ela', xchi 'ayin.

Dn 2:28

Palta 'ay jun Dios 'aj satcha'an̈, a tztac' ya'n cojcoc 'el jun tzo'n̈ tas caw c'ultac yaj cha. A tz'a'n ojcoc 'el ach mamin rey tas jun tzo'n̈ 'oj ujc b'aq'uin̈. 'Oj wal 'ayach tas 'ix el 'a a wayich yic wayn̈c ach cha:

Dn 2:35

Wal 'a yajn̈ej, 'ix poj smasnil q'uen hierro, lum mucb'il lu'um, q'uen bronce, q'uen plata, yet' q'uen oro cha. Nab'a pococ x'ajcn 'icha tzyac' stzapil 'ixm trigo 'a yic cuaresmail, ax 'ic' x'utz'n can 'ati, man̈x 'a jac sc'ajl 'ix can yu'uj. Ax q'uen q'uen 'ix ma'n poj jun yechl 'anma cha, 'ix ya'ch sb'a q'uen niwquil witzal. C'uxn 'ix macchj 'el sat lum lum tic yuj q'ue'en.

Dn 2:45

Atn wal chi tzyal 'el'ch q'uen q'uen 'ix el scot 'a sat witz cha, to man̈ 'anmac 'ix ecn cot q'ue'en. A q'uen 'ix 'a'n 'och poccal q'uen hierro, q'uen bronce, lum mucb'il lu'um, q'uen plata yet' q'uen oro. A jun Dios caw niwn yel'chi, a 'ix ch'oxn 'aych mamin rey, yuj tas 'oj ujc b'aq'uin̈. A jun a waych cha, 'oj 'el'choc tas tzyala, 'icha wal tzwutj waln 'aych tic, 'ixta wal tzyal 'el'chi, xchi Daniel 'a win rey cha.

Os 3:5

'Oj lajwc cha, ax 'a yic slajb' tiempoal, 'oj yalx sb'a eb' wit israelal 'a Jehová qui Diosal jun 'ejm xo, ax schan pax sc'ojl eb' yoch junc yin̈tl David sreyloc. 'Ixta 'oj yutc yi'n 'ejm sb'a eb' 'a Jehová, ax schan eb' swach'c'ojlal.

Zacarías 14:10

Smasnil jun c'aj lum lum cha, pan̈n 'oj 'ajcni, tzchaj 'at 'a Geba masnto 'a Rimón, 'a stojlal sur yic Jerusalén. Ax Jerusalén cha, caw chan̈ 'oj 'ajcn chan̈ 'icha junc tzalan. A 'aj 'oj 'aj cajn eb' 'anma 'a 'a, 'oj schaj 'at 'a jun puerta yic Benjamín, masnto 'a jun puerta yic yisquinyoal 'a 'aj 'ay jun b'ab'l puerta 'a yic pecti'. 'Oj 'atn̈j 'a jun torre yic Hananel, masnto tzc'och 'a 'aj tzpitz'x 'el yal yuva win rey.

Zacarías 14:9

A 'a yic jun c'ul cha, cojxn̈ej Jehová 'oj yac' Yajlil 'a yib'n̈ smasnil yolyib'n̈q'uinal, cojxn̈ej ton Dios. A Dios, Jehová sb'i, cojxn̈ej 'oj b'inaxoc.

Zacarías 8:22

Man̈x yalnb'ilc jun tzo'n̈ xo chuc chon̈b'al to caw wal 'ay yip 'oj jawc 'a Jerusalén, yic tzwul ya'nc eb' 'emmquilal 'a 'ayn an Jehová in tic, yuj sc'ann pax eb' in yaxilal 'a yib'an̈.

Zacarías 8:3

'Oj in meltzj pax 'a Jerusalén, yic tzin 'aj cajn 'a jun 'ejm xo. 'Ixta to b'i'an, a Jerusalén cha, 'oj scuch Chon̈b' Yiclum. Ax jun tzaln wic an Jehová in, tztac' wuj smasnil, 'oj scuch Tzaln Cojxn̈ej in 'ay wico'.

Malaquías 3:12

'Oj yal smasnil nacion̈ eyu'uj, chajtlto caw wach' eyico', yujto yel xo caw wach' 'oj 'aj 'el'ch jun e nacion̈ tic, xchi Dios.

Nm 24:14

Caw wal wach' toto tzin pax 'a in chon̈ab', palta yic mantzac in paxi, yowlal tzwalcn ab'i' tas 'oj 'aj a chon̈b' tic yuj jun chon̈b'al eb' 'anma chi b'aq'uin̈, xchi.

A Tas Sc'ulejnac Eb' Schecab' Jesús Hechos 2:17

A yic 'oj jawc jun slajb' tiempoal, 'oj wa'ch Wespíritu 'a smasnil 'anma'. Ax eb' 'unnab'il yet' eb' 'islab'il 'oj alnc 'el in paxti'. A eb' quelmtac, 'oj in ch'ox jun tzo'n̈ tas 'a eb' 'a 'icha waychil. Ax eb' 'ichmtac 'anma', 'oj in paxtin 'a eb' 'a swayich.

2 Ti 3:1

Yowlal tzojquej 'eli, a 'a yic mantzac jaw jun slajb' c'ual, 'oj jawc jun tiempoal caw 'ay smay.

A Ch'an̈ Carta D'a Eb' Hebreo 1:2

Ax 'a jun slajb' tiempoal tic, atn wal Yunnal sc'anlb'ej yic yaln 'ayn̈ec. A yet' Yunnal tic sb'ojnac yolyib'n̈q'uinal, yet' smasnil tas 'ay 'a 'a. Ax 'a Yunnal tic, ata ya'jnac smasnil tas yico'oc.

A Schab'il Carta San Pedro 3:3

A junx tic 'oj walb't tic, caw wal tzin nib'j tzeyojquej 'eli. A 'a jun slajb' tiempoal, 'ay eb' 'oj pitzwc cha'an̈. 'Oj comn b'uchwjc eb'. Cojxn jun tzo'n̈ maysch'olnil tznib'j 'och eb' 'aj 'oj ya'ch snab'en.

Apoc 11:15

'Ix yutz'n jun yucl ángel pax strompeta. Xlajw cha, x'och jun tzo'n̈ paxti 'a satcha'an̈. Caw 'ip 'ix yal 'ixtic: A eb' yajl yaj 'a yolyib'n̈q'uinal, wal ticnec tzcan yopiso eb' yico'oc Dios Cajlil, tzcan pax yico'oc Cristo. A 'oj 'a'nc Yajlil 'a jun 'ejmn̈ej, xchi eb'.

Apoc 20:4

Ax xwilni, 'ay jun tzo'n̈ despacho. Ata wocn 'ejm jun tzo'n̈ eb' 'ac'b'il yopiso sb'eyc'ojlwi. 'Ix wiln pax spixn jun tzo'n̈ eb' tzuc'b'il 'el sjolom, yujto ya'jnac testigoal sb'a eb' yuj Jesús, yaln pax 'el eb' spaxti Dios. A eb' cha, ma'ix yal sb'a eb' 'a jun noc' sb'i, yet' 'a jun yechel. Ma'ix schaj 'och eb' senyail 'a snan̈l sat mto 'a sc'ab'. Ax xwilni, pitzn eb'. 'Aych eb' yajlil jun mil ab'il yet' Cristo.