Ez 19:1 - Chuj San Sebastian Bible

¹ Ach 'anma', b'itnej jun b'it yic cusc'ojlal tic 'a yib'n̈ eb' sreyl chon̈b' Israel, tzaln 'ixtic:

Chuj San Mateo Bible

¹ Ach anima, b'itej jun b'it yic cusc'olal yuj eb' sreyal Israel, tzalan icha tic:

Ez 19:1 Iomraidhean Croise

A Ch'an̈ Schab'il Libro Yic Yab'ixal Eb' Rey 23:34

Xlajw cha, 'ix ya'n 'och rey Necao chi win Eliaquim, yunnal Josías reyl sjelc smam. 'Ix sjeln win sb'i, Joacim xyac' win sb'ioc. 'Ix yi'n 'at win Joacaz chi 'a Egipto, axta xchami.

A Ch'an̈ Schab'il Libro Yic Yab'ixal Eb' Rey 24:12

Yajn̈ej 'ix ya'n 'och sb'a Joaquín sreyl Judá yet' snun, yet' eb' yit yajlil, yet' eb' schecb' 'a yol sc'ab' win rey cha. 'Ix ya'n win rey chi yamchjoc eb'. 'Ix uj jun tic 'a yic swajxquil xo ab'il yoch win Nabucodonosor reyl 'a Babilonia.

A Ch'an̈ Schab'il Libro Yic Yab'ixal Eb' Rey 24:6

A yic 'ix cham Joacim, ata 'ix mucx 'a 'aj mucn eb' smam yicham, ax jun yunnal tzcuch Joaquín, a 'ix 'ochcn reyl sjeloc.

2 Cr 35:25

Ax Jeremías 'ix sb'o jun poesía yuj snax cot schamlil Josías, yic tzb'itnaxi. Smasnil eb' winc tzb'itni yet' eb' 'ix 'ix tzb'itni, tzna cot eb' jun b'it yic schamlil rey Josías, yic tzb'itnan eb' jun tzo'n̈ b'it yic cusc'ojlal yuj eb' tzlaj chami. Ax x'aji, x'och jun tic sb'eyb'alc eb' israel. A jun tzo'n̈ tic ata tz'ib'b'il can 'a ch'an̈ libro yic b'it yic cusc'ojlal.

2 Cr 36:10

A 'a yic b'ab'l 'uj 'a yic junx ab'il, 'ix yaln rey Nabucodonosor to tz'ijx 'at Joaquín 'a Babilonia yet' jun tzo'n̈ yamc'ab' to chan̈ stojol yic yatut Jehová. Ax Sedequías yu'tac can smam Joaquín cha, a xya'cn 'och win sreyloc Judá yet' Jerusalén.

2 Cr 36:3

Ax win sreyl Egipto 'ix 'i'n 'el 'a yopiso 'a Jerusalén, ax Eliaquim yu'tac Joacaz 'ix ya'cn 'och win reyl 'a Judá sjeloc. 'Ix sjeln win sb'i Eliaquim cha, xya'n sb'ic Joacim, 'ix yi'n 'at win Joacaz chi yet' 'a Egipto. 'Ix ya'n win rey Necao chi yac' eb' 'aj Judá chi stojlb'al 'a winac, 75 quintal q'uen plata, yet' 'oxe arroba q'uen oro.

2 Cr 36:6

Ax Nabucodonosor sreyl Babilonia a 'ix 'a'n owl yet'oc, 'ix sjaln yet' cadena, xyi'n 'at 'a Babilonia cha.

Jeremías 22:28

Yuj cha, xin c'anb'n an Jeremías in tic 'ixtc yuj Jeconías: ¿Tom lajn xoj Jeconías tic 'icha junc lum jatl xalu, man̈x 'a jac yopiso, 'icha pax junc yamc'ab' to man̈x 'a mach tznib'ni? ¿Tas yuj tzjulx can 'at yet' eb' yunnal 'a junc lum lum to man̈ 'ojcab'ilc yuj eb'?

Jeremías 22:30

A Jehová tzaln 'ixtic: Tz'ib'jec can 'a ch'an̈ libro yic registro, chajtlto lajn 'oj 'ajcn jun winc tic 'icha junc winc may yunnal, 'icha junc winc to man̈ wach'c x'aj 'el'chi. Yujto man̈x 'a junc yin̈tl 'oj 'och yac' reyl 'a sdespacho David, yic tzya'n reyl jun 'ejm xo 'a Judá, xchi Dios.

Jeremías 24:1

A Jeconías sreyl Judá yunnal Joacim, 'ix 'ijx 'at 'icha presoal yuj Nabucodonosor sreyl Babilonia. 'Ix 'ijx 'at pax eb' 'aych yajlil yet'oc, eb' b'om n̈a, yet' pax eb' tenmq'ue'en. Xlajw cha, 'icha waychil 'ix yutj Jehová sch'oxn chab' xuc te sat higo 'ayin, ata 'ay 'a yojltac yatut Jehová cha.

Jeremías 24:8

Ax pax Sedequías sreyl Judá, yet' eb' 'aych yajlil yet'oc, yet' pax smasnil eb' cajn 'a Jerusalén, atn eb' xcanto 'a jun nacion̈ tic, yet' pax eb' xc'och cajn 'a Egipto, a eb' cha, lajn wal yaj eb' 'a in sat 'icha te sat higo c'al xo, matz tac' sloxi.

Jeremías 9:1

¡Comnoc wal lajn yol in sat tic yet' junc a spac'b'a tz'el yoctac, sec sc'ual, yac'wlil woc' yuj smasnil eb' wit chon̈b' xlaj chami!

Jeremías 9:10

'Ix waln an Jeremías in tic 'ixtic: Caw tzin 'oc' yuj eb' lum jolmctac witz, tzin cus yuj eb' lum 'a'lic 'aj wach' swa e cajb'en noc', yujto 'ix tz'a smasnil, man̈x 'a mach tztac' sb'eyc' ta'. Man̈x 'a junc wacx tz'el yaw; an̈jtona e no ch'ic yet' e no calte'al noc', 'ix 'at e no 'elc smasnil, xin chi.

Lm 4:20

A jun qui reyl cob' yipc'ojlal yaj cuj on̈, atn jun sic'b'il 'el yuj Jehová, tox 'ix yamchj win yuj eb' 'ajc'ojol. An̈ tic on̈, xqui na cob'i', to 'oj on̈ scol win 'a jun tzo'n̈ xo nacion̈.

Lm 5:12

'Ix q'ue t'un̈n eb' qui yajlil yuj eb' 'ajc'ojl yajch 'ayn̈ on̈, man̈x 'a xon jac yel'ch eb' 'ichmtac winc 'a sat eb'.

Ez 19:14

A eb' te sc'ab' cha, 'aych can c'ac' 'a eb' te', yuj cha, a yic tzcob' wolnc te', ax jun c'ac' chi tzn̈usn pax te swol chi yet' te sat cha. Man̈x 'a te sc'ab' chi wach' yoch sc'occhoc eb' rey, xa chi, xchi Dios 'ayn an Ezequiel in tic. (A jun b'it tic, yic cusc'ojlal. A yic 'ay cusc'ojlal ata smoj sb'itnaxi.)

Ez 19:2

A 'a jun 'el 'ay jun no nun león x'ajx can 'och 'a scal no mam león. Ax 'a scal no mam león cha, ata sq'uib'tzej no yune'.

Ez 2:10

'Ix xuyn 'at jun ch'an̈ un̈ chi 'a wojltac, tz'ib'b'il jun un̈ chi 'a schapaq'uil, ax tas tz'ib'b'il 'a ch'an̈, atn yab'xil cusc'ojlal, yailal yet' 'el-l 'aw.

Ez 26:17

'Oj sb'o eb' jun sb'it yic chamel, ax yaln eb' 'ixtic: Ach Tiro tas ach 'aj a lajw 'ejmi, ach sat 'ejm 'a et'l 'a sti a mar, caw wal b'inab'il ach, caw jeln eb' 'anma chi smasnil, caw tzxiw jun tzo'n̈ xo eb' chon̈b' cajn 'a sti a mar cha.

Ez 27:2

Ach 'anma', b'itnej jun b'it tic 'ixtc 'a yib'n̈ chon̈b' Tiro.

Ez 27:32

Ax sb'itnan eb' jun b'it yic cusc'ojlal oj 'ixtic: ¿Toc 'ay junc xo chon̈b' 'ix satl 'a snan̈l a mar 'icha 'ix 'aj satl Tiro?

Ez 28:12

Ach 'anma', b'itnej junc b'it yic chaml tic 'a yib'n̈ win sreyl Tiro, to an Jehová in, an tzwal 'ixtic: Ach tic, caw wal jeln ach, caw 'ay a nab'en, caw wach' pax elxi.

Ez 32:16

A jun tic b'it yic chamel, 'oj sb'itnoc eb' 'ix 'ix 'a jun tzo'n̈ xo nacion̈, yic 'oj 'oc' eb' 'ix yuj Egipto, yuj pax eb' 'anma 'oj chamoc. An tzwal jun tzo'n̈ tic, xchi Dios.

Ez 32:18

Ach 'anma', b'itnej jun b'it yic chaml tic, yujto til wal eb' soldado 'aj Egipto 'oj chamoc, yet' eb' soldado yic jun tzo'n̈ nacion̈ 'oj c'och eb' 'a scal eb' yit chamnquil cha: A eb' caw jelan, 'oj telwc 'ejm eb', ax sc'och eb' 'a campusan yet' eb' 'ayx 'ec' chi ta'.

Ez 32:2

Ach 'anma', a ticnec b'itnej jun b'it yic chaml tic 'ixtc 'a yib'n̈ win sreyl Egipto: Ach faraón, lajn ach 'icha junc no quelm león 'ay 'a scal jun tzo'n̈ xo nacion̈; lajn ach pax 'icha junc no niwquil noc' 'ay 'a yojl a mar; tzach b'alb'n 'ec' 'a yojl eb' a b'eymal a', ax oc tzma'n tatb'oc a'.

Am 5:1

Ex wit israelal, 'ab'c wal in paxti yic cusc'ojlal tzwalcn 'el 'a eyib'an̈: