Ez 14:3 - Chuj San Sebastian Bible

³ Ach 'anma', a wal jun tzo'n̈ winc xjaw 'aych tic, caw wal 'aych snab'en eb' 'a jun tzo'n̈ yechl comn dios, a maysch'olnil 'aj 'ix ya'ch eb' snab'en, a eb' cha, nab'a xoj tzwul sc'anb'c sb'a eb' 'ayin.

Chuj San Mateo Bible

³ Ach anima, a juntzan̈ anima tic toxo ix yac'och spensar eb' d'a comon dios, syac'anoch sb'a eb' d'a yol sc'ab' chucal yuj juntzan̈ chi'. ¿Tom olto in tac'voc d'a eb' ayic ol sc'anb'an junoc tas eb' d'ayin?

Ez 14:3 Iomraidhean Croise

A Ch'an̈ Schab'il Libro Yic Yab'ixal Eb' Rey 3:13

Xlajw cha, 'ix yaln Eliseo 'ixtc 'a win sreyl Israel: —¿Tas waln wic et'oc? Ata cab' tzach 'at a c'anb'c 'a eb' schecb' scomn diosal a mam a nun sayjnac, xchi Eliseo cha. —Ma'ay, yujto a Jehová on̈ yamb'tzan an̈ 'oxwn̈ reyn̈ tic on̈, yic tzon̈ ya'n 'och 'a yol sc'ab' eb' moabita, xchi 'a 'a.

Salmos 101:3

May wal b'a'n̈ 'oj wa'ch in nab'en 'a tas maysch'olnil. Matz in nib'j wil eb' tzyij 'el sb'a 'a a tz'ey, may wal junc eb' 'oj wa'ch yopiso 'a in despacho.

Salmos 66:18

Q'uinloc ma'ix in na in b'a yuj in mul, to 'ixta', ma'ix schaj sc'ojl am Cajlil yab'n tas xwala.

Pr 15:29

Caw najt yajl Jehová 'a stz'ey junc maysch'olnil sb'eyb'al, palta toto tojl snab'en, caw chab'il slesl yu'uj.

Pr 15:8

A eb' maysch'olnil sb'eyb'al, matz chaj sc'ojl Jehová xajmb'al eb', ax pax eb' tojl snab'en, caw tzchaj sc'ojl yab'n slesl eb'.

Pr 21:27

A Jehová matz chaj sc'ojl yofrenda eb' maysch'olnil, ocxom wal eb' tzyac' yofrenda yet' stu nab'enal.

Pr 28:9

Toto 'ay junc mach matz nib'j yab' sley Dios, an̈jtona ma'oj yab' pax Dios slesal.

Is 1:15

A yic tzcob' ex leslwi, tzlaj cob' e mojchan̈ e c'ab' 'ayin, palta 'oj in c'ub'c 'el in sat 'ayex. Wach'xam cob' niwn tas tzeyal 'a e lesl cha, ma'oj wab'i', yujto milm ex cham 'anma'.

Is 33:15

A eb' caw yel tzb'ey 'a stojlal, matz nib'j eb' tz'och ricoal yuj schan q'uen c'ultac tumin, matz ya'ch sb'a eb' yaln yic 'a junc milj cham 'anma', atn eb' tzyij 'el sb'a 'a maysch'olnil.

Jeremías 11:11

Yuj cha, an Jehová in, an tzwala, to 'oj wa' cot yailal 'a yib'n̈ eb', man̈x 'oj stac' s'at eb' 'elc 'a 'a. Wach'xam 'oj 'el yaw eb', ax sc'ann eb' in colwal, palta man̈x 'oj in ta'w 'a eb'.

Jeremías 17:9

Toc 'ay junc tas yel xo tz'ixtw paxti 'icha snab'en eb' 'anma', a jun nab'en cha, may xon tz'aj sb'o'i. ¿Mach wal tztac' yojcan 'eli?

Ez 11:21

An Jehová in an tzwala. A eb' tznib'j to tzb'eylb'ej tas yajb'entac, an 'oj wac' syailal eb' yuj jun tzo'n̈ sb'eyb'al cha, xchi Dios 'ayin.

Ez 14:2

Xlajw cha, 'ix yaln Jehová 'ayn 'ixtic:

Ez 14:4

Al 'a eb' to an Jehová in, an tzwal 'ixtc 'a eb': Tzann̈j junc 'a eb' israel to tzyac' 'ejm sb'a 'a jun tzo'n̈ yechl comn dios, a maysch'olnil 'aj 'aych snab'en, tzlajw cha, tzcob' jawc sc'anb'c sb'a 'a junc in checab', an Jehová Yajl in, an tzwala to a yailal 'oj wac' spacc 'a junc 'anma cha, yujto niwn yechl sdiosal cha.

Ez 14:7

Yujto tzann̈j junc mach, junc israel mto junc chuc chon̈b'al cajn 'a scal eb' israel, to tzyij 'el snab'en 'ayin, ax 'a eb' comn dios chi 'aj tzyac' 'ejm sb'a, tzya'n 'och pax snab'en 'a maysch'olnil, toto tzcob' jawc 'a junc in checab' yic tzwul sc'anb'n sb'a 'ayin, an tzwala to a yailal 'oj wac' spacc 'a junc mach cha.

Ez 20:16

Yujto ma'ix syiclj eb' in ley yet' in checnb'il, ma'ix syiclj pax eb' sc'ul 'iljelal to wic yaji, an̈j 'a jun tzo'n̈ yechl comn dios 'aych snab'en eb'.

Ez 20:3

Ach 'anma', al yab' eb' yichm wincal chon̈b' Israel tic, to an Jehová Yajl in, an tzwal 'ixtc 'a eb': ¿Tom cob' tzex jaw wul e c'anb'c e b'a 'ayin? Palta wal yel an Jehová in, an tzwala, ma'oj in ta'w xon 'ayex, xchi Dios, xa chi 'a eb'.

Ez 20:31

A yic tzeya'n e xajmb'al, 'ipn eyixtn 'el e b'a, yujto a eb' eyunnal tzeyac' tz'a xajmb'al-l 'a jun tzo'n̈ yechl comn dios. Ax tz'aji, tzex cob' jawc wul e c'anb'c e b'a 'ayin. Wal yel ma'oj in ta'w xon 'ayex.

Ez 3:20

An̈jtona', toto 'ay junc mach wach' xon sb'eyb'al, ax tz'aji tzjun 'el sb'eyb'al cha, an xo 'oj wa'ch syailal. Toto ach tic, ma'oj ac' sna sb'a yuj smul ax schami, a smasnil tas wach' xcob' sb'o 'a yaln̈tax cha, man̈x 'a yel'chi. Ax schamlil cha, eb'n̈ 'oj can wu'uj.

Ez 33:30

Xyaln pax 'ayn 'ixtic: Ach 'anma', a eb' et chon̈b' tic, a yic tzchan sb'a eb' 'a 'aj 'ay smuroal chon̈ab' yet' 'a stitc n̈a, tzlaj stz'ac eb' yal 'a junjn 'ixtic: Coyec, 'at cab'c spaxti Jehová, xchi cob' eb'.

Ez 36:25

'Oj ex in sacb'tzoc can yuj smasnil tas maysch'olnil 'ix e b'o'o, 'icha tzyac' junc tas tzb'icx 'el yet' a a caw wal yaxt'ujnac yilxi. 'Oj wi'cn 'el e mul 'aych 'ayex, atn yic xeya'n 'ejm e b'a 'a jun tzo'n̈ comn dios.

Ez 44:12

Yujto a 'a yic yalan̈, 'ix yac' servil eb' eyit israelal yic xya'n 'ejm sb'a eb' 'a yechl jun tzo'n̈ comn dios, 'ixta xyutj eb' ex sjucb'tzan 'a maysch'olnil. An Jehová in, an tzwala, to 'oj yab' eb' syal yuj smul cha.

Ez 6:9

Ax eb' ma'oj cham cha, 'oj in sna cot eb' 'a jun tzo'n̈ nacion̈ 'aj 'ayc' cha, 'oj sna cot eb' tas in yutj eb' yic xwab'n syal yuj eb', yujto 'ix yij 'el sb'a eb' 'a in tz'ey, ax 'a jun tzo'n̈ yechl comn dios 'aj xlaj yac' 'ejm sb'a eb'. 'Oj laj yec q'uixwc sb'a eb' yuj smasnil tas yajb'entac xlaj sb'o'.

Ez 7:19

'Oj sjul-l eb' q'uen plata mto q'uen oro 'a yol caye, man̈x 'a yel'ch 'oj yutc eb'. A q'uen plata cha, mto q'uen oro, ma'oj stac' scoln 'el q'uen junc mach 'a yol sc'ab' yowl in c'ojl an Jehová in. Ma'oj 'ec' swejl eb', ma'oj b'ut'joc pax sc'ojl eb' yuj q'ue'en, yujto a q'uen x'a'n 'ejm eb' 'anma chi 'a maysch'olnil.

Os 4:5

Yuj wal cha, ax tic, c'ul wal 'oj e telwi. Ax eb' in checab', a 'a 'ac'wl 'oj telwc eb' eyet'oc. An 'oj in satl chon̈b' Israel, atn jun 'icha e nun yaji.

Sofonías 1:3

'Oj in satl eb' 'anma', no noc', no ch'ic, yet' no chay. 'Oj wac' syailal eb' 'anma maysch'olnil sb'eyb'al, ax wa'n lajwc 'el smasnil 'anma 'a sat lum lu'um.

Zacarías 7:13

'Ix waln 'ixtic: 'Icha wal 'ix yutj sb'a eb', ma'ix schaj eb' yab' 'ayn an Jehová in, yic in paxtin 'a eb', an̈jtona 'ixta 'in pax jun xo, a yic 'ix tew eb' 'ayin, ma'in ta'w 'a eb'.

Lc 20:8

'Ix yaln pax Jesús 'ixtc 'a ewinac: —To 'ixta', ma'oj wal pax 'ayex, mach 'a'jnac wopiso in b'on jun tzo'n̈ tic, xchi.

Ef 5:5

Cojquec xo, to a eb' tzb'on 'ajmulal, yet' eb' tzb'on tzann̈j junc maysch'olnil yet' sniwnal, yet' eb' tznib'n 'och ricoal, may xon yaln eb' yic yoch 'a yol sc'ab' Cristo, yet' 'a yol sc'ab' Dios. Toto tzqui nib'jec 'och ricoal, a 'a sat Dios, wan ca'nec 'och jun chi qui diosaloc.

A Sb'ab'el Carta San Pedro 2:8

Tzyaln pax junx tic 'ixtic: 'Icha junc q'uen 'aj tztench eb' 'anma yoc, tztelw eb' yu'uj, 'ixta 'oj 'aj 'a sat eb', xchi 'a Ch'an̈. Yujto 'ixta Cristo 'a sat eb' matz ya'ch sc'ojl 'a 'a. Ton̈j tzsomchj 'el eb' yu'uj, yujto matz yiclj eb' spaxti'. Yictax pecti', checl xon yaj eb', to 'ixta 'oj yutc sb'a eb'.

Apoc 2:14

Palta 'ayt wal jun tzo'n̈ e paltail tzwila. Yujto 'ayx tzeya'ch e nab'en 'a scuynb'il can win Balaam. A win 'a'jnac sc'ojloc win Balac, yic ya'n win juwc 'el eb' israel. Yuj win Balac cha, schin eb' jun tzo'n̈ xajmb'al tz'ajx 'a jun tzo'n̈ tzalx 'och diosal, sb'on pax eb' 'ajmulal.

A Ch'an̈ B'ab'el Libro Samuel 28:6

Yuj cha, 'ix scanb'n 'a Jehová, palta ma'ix ta'w xon 'a waychil 'a 'a; ma'ix ta'w xon 'a eb' yalmal 'el spaxti', yet' 'a eb' ya'mal och sti eb' 'anma 'a Dios.