Ex 38:26 - Chuj San Sebastian Bible

²⁶ Smasnil eb' winc 'ix yac' tz'ib'xoc sb'a, eb' 'ayx junc'l ab'il sq'uinal yet' 'a yojltac, a sb'isl eb', 'ay 603,550 eb' 'a smasnil. Junjn eb' winc cha, 'ix yac' eb' nan̈l swacl gramo q'uen plata, 'ixta 'ix 'aj q'uen yechtax 'a 'echtab' tzc'anx 'a scajnub' Dios.

Chuj San Mateo Bible

²⁶ Masanil eb' vinac ix tz'ib'chaji, eb' 20 ab'ilxo sq'uinal, 603 mil yed' 550 eb' d'a smasanil. Junjun eb' chi' nan̈al siclo plata ix yac' eb', icha yalil q'uen echlab' sc'anchaj d'a scajnub' Dios.

Ex 38:26 Iomraidhean Croise

Ex 12:37

'Ix 'el eb' israel 'a Ramesés, 'ix jaw eb' 'a Sucot. 'Aym waque'oc ciente mil eb' winc smoj yoch soldadoil, matz 'och eb' 'ix yet' eb' 'unn sb'isloc.

Ex 30:12

A yic tze'n chan̈ sb'isl eb' et israelal tic, junjn eb', 'oj yac' eb' jun tzo'n̈ tojlb'al 'ayn an Jehová in yuj sq'uinal, sec ax yic 'oj lajwc sq'ue wan sb'isl eb' cha, may junc yab'il 'oj jawc 'a scal eb' yic tzcham eb' yu'uj.

Ex 30:13

Smasnil eb' tzyac' tz'ib'xoc sb'a, yowlal tzyac' eb' o'e gramo q'uen plata 'ayn an Jehová in yuj stojnb'ilc sq'uinal, spacl 'a yal-l 'a jun 'echtab' tzc'anx 'a in cajnub'.

Ex 38:27

A q'uen plata cha, 'ay 75 quintal q'uen 'a smasnil, atn q'uen 'ix b'o sb'achnub'alc te 'a'nte 'ix 'och 'a scajnub' Dios yet' sb'achnub'al yoyl te cortina. Smasnil q'uen plata cha, 'ix c'anx q'uen 'a jun ciente b'achnub', tzyal 'el'chi, to 75 libra yal-l junjn b'achnub' cha.

Nm 1:2

'Ij q'ue wan sb'isl smasnil eb' winc israel, junjn macn̈ eb' yet' yin̈til, yet' jantc pax sb'isl eb' 'a junjn n̈ail, yic wach' tz'ilxi jantc sb'isl eb', yet' pax sb'i junjn eb'.

Nm 1:3

Tz'el yich sb'isx eb' 'a junc'l ab'il sq'uinal yet' 'a yojltac, atn eb' smoj yoch soldadoil, macquixtac tz'aj eb'. Colwj cab' Aarón et'oc,

Nm 1:46

A x'aj sb'isl eb' winc chi 'a smasnil 'ay 603,550.

Nm 2:32

A 'ix 'aj 'el'ch sb'isl eb' soldado 'a smasnil, 'ay 603,550 eb'.

Nm 26:2

'Ijec chan̈ sb'isl junjn macn̈il eb' winc israel tic, eb' to 'ay sq'uinl 'a junc'l ab'il yet' 'a yojltac, eb' smoj yoch soldadoil, xchi.

Nm 26:51

Ax 'ix 'aj chan̈ sb'isl eb' winc israel 'a smasnil, 'ay 601,730.

Mt 17:24

A yic xc'och eb' 'a Capernaum, a eb' tecm 'el tumn yuj yatut Dios x'at yalnc eb' 'ixtc 'a Pedro: —A jun e cuymal cha, ¿matz yac' am jun tumn tztecx 'el yuj yatut Dios? xchi eb' 'a 'a.