Ex 36:8 - Chuj San Sebastian Bible

⁸ A 'a scal eb' munljum cha, ata 'ay pax eb' caw 'ay sjelnal sb'on scajnub' Dios. Sb'o eb' lajn̈e te nip cortina 'a te lino ch'umb'il, sc'ann eb' te q'uic'mucnac ch'al, te púrpura yet' te chac. A yet' jun tzo'n̈ ch'al chi 'ix stz'isch eb' yechl eb' querubín 'a te cortina cha.

Chuj San Mateo Bible

⁸ A d'a scal eb' munlajvum chi', ata' ay eb' jelan spensar sb'oanq'ue scajnub' Dios. Lajun̈e' jen̈an c'apac lino b'ayb'il sch'alil ix sb'o eb'. D'a an̈ ch'al q'uic'mutz'inac, an̈ ch'al yaxmaquinac yed' pax an̈ chac ch'al ix sb'o'och yechel querubín eb' d'a junjun jen̈an lino chi'.

Ex 36:8 Iomraidhean Croise

A Ch'an̈ B'ab'el Libro Yic Yab'ixal Eb' Rey 6:23

Xya'n b'o chab' yechl querubín 'a yojl jun Lugar to cojn Dios 'ay yic cha. A yet' te olivo 'ix b'o'i, nan̈l yol metro 'ix 'aj stel junjn eb',

1 Cr 15:1

'Ix ya'n David b'o jun tzo'n̈ xo yatut 'a jun lugar tzcuch Schon̈b' David. Xlajw cha, 'ix ya'n b'o pax 'aj wach' tzcan te scaxail strato Dios, ata sb'o 'a yojl jun mantiado 'ix b'o cha'an̈.

2 Cr 1:3

'Ix 'at Salomón yet' smasnil eb' syam sb'a chi 'a sjolm lum witz Gabaón, yujto ata 'aycn scajnub' Dios 'aj tzqui chaj qui b'a yet'oc, atn jun sb'ojnac can Moisés, win schecb' Jehová 'a cusltac lu'um.

2 Cr 3:10

A 'a yojl jun Lugar to cojn Dios 'ay yic cha, ata 'ix yac' 'ajxoc b'o chab' yechl querubín 'a te te'. 'Ix 'och pax oro 'a jun tzo'n̈ cha.

Ex 25:18

Tza'n b'o yechl chawn̈ querubín nab'a oro tz'aji, tztenx b'o yet' martillo, sec tz'och 'a yib'n̈ sti schicn smac te caxa cha.

Ex 25:22

A 'a yib'n̈ smac te caxa cha, ata 'oj in ch'ox in b'a 'ayach, 'a snan̈l yechl chawn̈ querubín 'aych 'a yib'n̈ sti smac te scaxail trato, ata 'oj wac' ojcoc 'el smasnil in checnb'il 'a eyib'n̈ ax israel ex tic, xchi Dios.

Ex 31:6

Ax 'a scal eb' yin̈tl can Dan, ata xin sic' 'elt pax win Aholiab yunnal Ahisamac, a 'oj colwjoc yet'oc. Smasnil eb' 'ay xon sjelnal, 'ix in wach' 'a'j sjelnal eb', sec a eb' 'oj b'onc jun tzo'n̈ xwal 'aych tic:

Ex 31:7

Mantiado 'aj tzin chaj in b'a eyet'oc yet' smasnil syamc'ab'il, te scaxail in trato yet' smacl yib'an̈, te mexa yet' syamc'ab'il, jun yet'l cantil nab'a oro yet' syamc'ab'il, yet'l xajmb'al yic incienso; yet'l xajmb'al 'aj tz'a smasnil no xajmb'al yet' smasnil syamc'ab'il, q'uen palagan yet' sb'achnub'al yalan̈, te pichl caw wach' tz'aj sjalxi, atn te 'oj ya'ch Aarón yet' eb' yunnal, yic 'aych eb' 'a yopiso ya'n 'och sti eb' 'anma 'ayin.

Ex 35:10

Smasnil eb' winc 'ay sjelnal sb'on junc tas wach' yilxi, cot cab' eb', ax sb'on eb' tas 'ix yal Jehová to tzb'o'i:

Ex 36:9

A junjn lich'n̈ te cortina cha, nan̈l yoxlajn̈il metro x'aj snajtil yoc te', chab' metro x'aj slewnal sat, lajnn̈ej 'ix 'aj eb' te sb'o smasnil.

Ex 39:3

'Ix tenx chojc jaypachn̈ q'uen oro, cotc xoj x'aj't q'uen 'a scal te ch'al x'och yelwnub'loc te q'uic'mucnac ch'al, te púrpura, te chac yet' te lino.