Ex 34:15 - Chuj San Sebastian Bible

¹⁵ Yuj cha, may wal junc trato tztac' e b'on yet' eb' 'anma cajn 'a sat lum lum cha. A yic tzlaj ya'noc 'ejm sb'a eb' 'a sdiosal cha, yic tzlaj ya'nc eb' xajmb'al chi 'a 'a, toq'ue tzex yawtj eb' yic tze c'uxn jun tzo'n̈ xajmb'al chi yet' eb', caw man̈ e cha'.

Chuj San Mateo Bible

¹⁵ Man̈ e b'olaj junoc e trato yed' eb' anima ayec' d'a sat lum chi'. Tato tze b'o e trato chi' yed' eb' axo yic tz'och eb' ejmelal d'a sdiosal chi', syac'an silab' eb' d'ay, tzex yavtej eb', tze vaan tas syac' eb' silab'oc chi'.

Ex 34:15 Iomraidhean Croise

1 Cr 5:25

Palta caw 'ix 'och eb' tenmtacl 'a qui Diosalec, atn sDiosal qui mam quichmec yet' eb'. Caw maysch'olnil eb'. 'Ix 'och eb' 'emmquilal 'a jun tzo'n̈ sdiosal eb' chon̈b' ya'jnac Dios lajwc 'el 'a sat eb'.

Esdras 6:9

A wal tas tz'och yopiso 'a junjn c'u, man̈ cab' yac' palta yajx 'a eb' ya'mal 'och sti eb' 'anma 'a Dios 'ayc' 'a Jerusalén, a tzyal tas tzc'an eb': No quelm wacax, no mam calnelu, no quelm calnelu, yic tz'ajx no xajmb'alil, no tz'a smasnil 'a Dios 'ay yic satcha'an̈. Tz'ajx pax trigo, 'atz'am, yal uva yet' aceite. May cab' junc mach tzma'n 'eq'ui,

Esdras 9:12

An̈jtona 'ix aln paxi, to a eb' quisl on̈, to matz tac' ca'n yi' sb'a eb' yet' eb' chuc chon̈b'al cha, an̈jtona eb' cunnal on̈ yet' yisl eb', matz tac' yi'n sb'a eb'. May xon b'a'n̈ tztac' qui colwj 'a eb' on̈ sec wach' tz'el'ch eb'. Toto tzqui yiclj jun tic on̈, caw wach' 'oj quel'ch on̈, ax qui c'uxn smasnil tas wach' tz'el 'a sat lum lum tic, ax cactn can lum yico'oc eb' quin̈tl on̈.

Salmos 106:28

'Ix ya'n 'ejm sb'a eb' 'a Baal-peor, schin eb' no xajmb'al tz'ajx 'a jun tzo'n̈ yechl comn dios may sq'uinal.

Salmos 73:27

A eb' tzyij 'el sb'a 'a a tz'ey Mamin, 'oj cham eb'. A eb' man̈ yiclumoc 'ayach, 'oj a satl eb'.

Ex 22:19

Toto 'ay mach tzmuln yet' no noc', yowlal tzchami.

Ex 22:20

Toto 'ay mach tzyac' xajmb'al 'a tas tzalx 'och diosal, to man̈oc 'ayn an Jehová in tzyac'a, yowlal tzchami.

Ex 23:32

Man̈ e b'o junc e trato yet' eb', man̈ ex 'och 'emmquilal pax 'a sdiosal eb' cha.

Ex 32:8

Yajn̈j wal cha, 'ix yi'n 'el sb'a eb' 'a tas xwala, sb'on eb' jun yechl quelm wacax; xlaj cob' ya'nc 'ejm sb'a eb', xya'n eb' xajmb'al 'a jun yechl cha, xyaln eb' 'ixtic: Ex q'uit israelal, atn wal qui diosalec tic on̈ 'i'nec 'elt 'a Egipto, xchi cob' eb', xchi Dios 'a Moisés cha.

Ex 34:10

'Ix yaln Jehová 'ixtc 'a Moisés: Chaj ab' tas 'oj wala'. A ticnec tzin b'ocn jun in trato tic et' 'a sat smasnil eb' et chon̈b' tic. 'Oj in b'o jun tzo'n̈ tas satjub'tac yilxi, jun tzo'n̈ to mant 'a 'aj tzb'o 'a junc nacion̈ 'a sat lum lum tic. Ax smasnil eb' 'anma ajun et' tic, 'oj yil eb' smasnil tas 'oj in b'o', caw wal satjub'tac yilx tas 'oj in b'o 'a e cal.

Ex 34:12

A yic tzex c'och 'a sat lum lum cha, may junc trato wach' e b'on yet' eb' 'anma chi ta', sec wach' ma'oj ex yixtc eb'.

Jeremías 3:9

Yujto may yel'ch 'ajmulal chi 'a sat eb' israel, yuj cha, 'ix juw 'el lum lum tic yuj eb'. 'Ix ya'n eb' 'emmquilal 'a q'uen q'ue'en, yet' 'a te te'.

Os 4:12

A eb' in chon̈b' tic, a 'a junc te te', ata tzc'anb'j sb'a eb'. A te te chi tz'a'n snab'enoc eb' yalni. Yuj cha, 'ix juw can 'el eb', 'icha wal tzyutj junc 'ix 'ix yactn can yichmil, ax yet' junc xo win winc tzmuln 'ix, 'ixta wal in yutj eb' in yactn cani, ax 'a jun tzo'n̈ comn dios 'aj tzyal sb'a eb'.

Os 9:1

Ex wit israelal, man̈ ex tzaljoc, man̈ ex q'ue b'atnjoc e tzalj 'icha tzyac' eb' chuc chon̈ab', yujto xeyactjcan qui Diosal, 'icha tzyutj eb' 'ix 'ajmul 'ix yactn can yichmil. Caw wal tzex tzalj e ch'oxn e chamc'ojlal 'a Baal, yu'uj wach' tz'aj sat smasnil tas 'awb'il eyuj eyalni.

Lv 17:7

Man̈x 'a wal b'a'n̈ tzeyac' e xajmb'al 'a eb' demonio, atn jun tzo'n̈ 'aj eya'jnac 'ejm e b'a. Yujn̈ej ton jun tzo'n̈ cha, yoch e mul. A jun tic ley tz'ajcn 'a e cal 'a smasnil tiempo, yet' 'a eb' eyin̈tl b'aq'uin̈.

Nm 15:39

sec ax yic 'oj eyilnc 'och yelwnub'l e pichl cha, ax e nan cot smasnil jun tzo'n̈ checnb'il xwalcn 'ayex. Tze b'eylb'ej, sec wach' man̈toc comnxoj tzex yijcan 'at e tu nab'enal, mto e nib'b'en 'a maysch'olnil, yujto a jun tzo'n̈ chi tzex jun 'eli.

Nm 25:1

A yic 'ix can cajn eb' israel 'a lum Sitim, til wal eb' winc israel 'ix muln yet' eb' 'ix moabita.

Nm 25:2

'Ix monchj 'at eb' winc chi yuj eb' 'ix 'a 'aj 'aych sq'uin̈ eb' yuj xajmb'al tzyac' 'a sdiosal, ax eb' winc israel cha, schi eb' no schib'jal no xajmb'al cha, xya'n pax 'ejm sb'a ewin 'a sdiosal eb' 'ix.

A Tas Sc'ulejnac Eb' Schecab' Jesús Hechos 15:20

Cojn cab' tzca'c 'at qui carta 'a eb', tzcalnec 'at 'a eb', to man̈xtzac sc'ux eb' jun tzo'n̈ tas tz'ajx xajmb'al-l 'a jun tzo'n̈ tzalx 'och diosal. Man̈xtzac sb'o eb' 'ajmulal, man̈xtzac schi eb' schic'l no noc', man̈xtzac schi eb' no noc' tzjalx tup yic' yujto 'ayt 'och schic'l no'.

1 Co 10:27

Q'uinloc 'ay junc man̈ creyenteoc tzex 'awtn 'at wac 'a yatut. Toto tze nib'j tzex 'ati, tzta'n̈j tze c'ux tas tzyac' 'ayex. Man̈ e c'anb'c 'a 'a, aj tzcot jun tzo'n̈ chi tzyac' 'ayx cha, sec wach' matz juw 'el e nab'en yu'uj.

1 Co 8:10

'Ayex eyojtac to may smay jun tzo'n̈ tzchix cha. Palta 'ay pax eb' 'a e cal mant 'a ste'nal 'a screyenteal, mant yojcoc eb' jun tzo'n̈ tic. Q'uinloc tzyil eb', to tzex 'em wocn e wa 'a 'aj 'ay jun tzo'n̈ tzyalch eb' 'anma sdiosaloc. Toto 'ixta', 'oj montchjoc 'at snab'en eb' eyu'uj, ax schin pax eb' jun tzo'n̈ tzalx xajmb'al-l cha.

1 Co 8:4

Ax ticnec, 'oj wal yuj jun tzo'n̈ tas tzc'uxxi, yic tox x'ajx xajmb'al-l 'a jun tzo'n̈ tzalx 'och diosal cha. A jun tzo'n̈ tzalx 'och diosal cha, cojquec, may jac yopiso eb' 'a yolyib'n̈q'uinl tic. Yujto cojn jun Dios 'ay, may junc xo.

1 Co 8:7

Palta man̈ smasnilc eb' creyente tznachj 'el jun tzo'n̈ tic yu'uj. 'Ay eb' caw ya'jnac 'och sc'ojl 'a jun tzo'n̈ tzalx 'och diosal cha. Yuj cha, a jun tzo'n̈ tas tz'ajx xajmb'al-l cha, yicn̈ej jun tzo'n̈ tzalx 'och diosal chi snan eb'. A jun snab'en eb' tz'a'n cuenta cha, mant 'a ste'nal. Yuj cha, tzjuw 'el snab'en eb' yic tzchin eb' jun tzo'n̈ xajmb'al cha.

Dt 31:16

'Ix yaln Jehová 'a Moisés 'ixtic: Ach tic jab'xoj wal 'oj a chami, ax jun chon̈b'al eb' 'anma tic, 'oj ya'cn 'at sb'a eb' 'a sdiosal jun tzo'n̈ chuc chon̈b'al 'ayc' 'a sat lum lum 'aj 'oj c'och cajn eb' cha. Yuj cha, ax in yactn can eb', ax sjun 'el eb' in trato 'ix in b'o yet'oc.

Dt 31:18

Palta wal yel 'oj wel ch'umn 'a eb' 'a jun c'u cha, yuj smasnil maysch'olnil tzb'o eb', yet' yuj pax to tzyal sb'a eb' 'a jun tzo'n̈ comn dios.

Dt 32:37

'Oj yal Jehová 'a eb' chon̈b' 'ixtic: ¿'Ajtil 'ay jun tzo'n̈ e diosal, jun tzo'n̈ e colmal tzeya'ch yipc e c'ojl cha,

Dt 32:38

jun tzo'n̈ tzchin 'ejm xepual no 'e xajmb'al, tzyu'n pax eb' 'an̈ tzlaj eyac' 'a 'a? Cot cab' eb' ex scolo', q'uecab' wan eb' ex stan̈woc.

Dt 7:2

A yic 'oj ya'nc 'och Jehová jun tzo'n̈ nacion̈ chi 'a yol e c'ab', c'uxn tze satl eb' smasnil. May junc trato tze b'o yet' eb', man̈ 'o'ch pax e c'ojl 'a eb'.

Dt 7:3

Man̈ eyac' yi' sb'a eyunnal yet' eb' 'ix yisl eb' 'anma 'ay 'a jun lugar cha, mto eyisl tzyij sb'a yet' yunnal eb'.

Josué 23:12

Tzin nib'j tzeyojquej 'el jun tzo'n̈ tic: Toto tzeyij 'el e b'a 'a stz'ey Dios, toto junn̈j tzex 'aj yet' eb' 'anma 'ayt 'ec' 'a e cal tic, tzeyi'n e b'a yet' yisl eb', junn̈j tzex 'aj yet' eb', junn̈j pax tz'aj eb' eyet'oc,

Apoc 2:20

Palta 'ay wal jab' in c'ojloc 'ayex. Yujto tze chaj 'och 'ix Jezabel 'a e cal. A jun 'ix cha, tzcob' yalch sb'a schecb'oc Dios, palta ton̈j tzyixtj paxti 'ix eb' tzin 'a'n servil. Yujto a tz'a'n sc'ojloc eb', sec tzb'o eb' 'ajmulal, tzchin pax eb' jun tzo'n̈ xajmb'al tz'ajx 'a jun tzo'n̈ tzalx 'och diosal.

Jueces 2:17

Palta a eb' israel cha, ma'ix schaj eb' yab' tas xyal eb' tzcoln eb' cha, palta to 'ix 'och tz'a'n eb' yuj jun tzo'n̈ comn dios, atn jun tzo'n̈ 'aj tzyac' 'ejm sb'a eb'. Yajn̈j cha xyi'n 'el sb'a eb' 'a jun b'eyb'al sb'eylb'ejnac eb' smam yichm eb'. A wal eb' smam yichm eb' cha, caw yiclum yutjnac sb'a eb' 'a schecnb'il Jehová, palta ax eb', man̈ 'ixta'oc xyutj sb'a eb'.

Jueces 3:6

Ax yunnal yet' yisl eb' israel cha, 'ix yij sb'a eb' yet' yunnal yet' yisl eb' chuc chon̈b'al cha. 'Ix ya'n pax 'ejm sb'a eb' 'a sdiosal eb' cha.