Ex 31:15 - Chuj San Sebastian Bible

¹⁵ A 'a waque c'u tztac' tzex munlji, palta ax 'a yucl c'u tzex 'ilji, yujto an Jehová in, wic yaj jun c'u cha. Tzann̈j mach tzmunlj 'a sc'ul 'iljelal cha, tojln̈ej cab' schami.

Chuj San Mateo Bible

¹⁵ Vaquen̈ej c'ual tzex munlaji, axo d'a yuquil c'ual, sc'ual ic'oj ip, vicn̈ej yaji. Yaln̈ej mach smunlaj d'a jun c'u chi', tojoln̈ej schami.

Ex 31:15 Iomraidhean Croise

Lv 23:3

Waque c'u tzex munlji, ax 'a yucl c'ual, ata tzeyam e b'a yic tzex 'och 'emmquilal 'ayin. Yaln̈ej 'ajtil 'ayx 'eq'ui, may xon junc mach tzmunlji, yujto sc'ul 'iljelal yic tzin eyi'n cha'an̈.

Ex 16:23

'Ix yaln Moisés 'ixtc 'a eb': —A jun cha, a Jehová 'ix alni, yujto q'uic'an sc'ul 'iljelal, a jun sc'ul 'iljelal cha, sc'ul yic tz'ijx chan̈ sb'i Jehová. A tas tze c'ux q'uic'an, tz'an̈c can ticnec, mto tzeya'cn xejc tas yic e q'ui'n cha, tze moln cani, sec wach' toxn̈ej 'oj e c'ux q'uic'an, xchi 'a eb'.

Ex 34:21

Waque c'u tzex munlji, ax 'a yucl c'u tzex 'ilji, wach'xam to stiempoal 'awnub', mto stiempoal jach'oj, yowlal tzex 'ilji.

Lc 23:56

Xlajw cha, xpax eb' 'a yatut. X'at sb'onc eb' jun tzo'n̈ yal su'q'ui sjab', yet' jun tzo'n̈ wach' tzsucx 'och 'a sniwnal Jesús cha. Ax yic xc'och yorail sc'ul 'iljelal, 'ix 'ilj eb' 'icha tzyal jun checnb'il cha.

Lc 13:14

Ax win yajl yaj 'a jun n̈a cha, xcot yowl winac, yujto a 'a sc'ul 'iljelal xb'ox sc'ojl 'ix yuj Jesús. Yuj cha, xyaln win 'ixtc 'a eb' 'anma chi 'ayc' ta': —Waquen̈ej c'u smoj tzon̈ munljec 'a yol seman. A 'a waque c'u cha, tzann̈j c'ul 'aj tzex jaw wul eyac' b'oxc e c'ojol, palta man̈ smojc tz'ajx b'oxc e c'ojl 'a sc'ul 'iljelal tic, xchi win 'a eb'.

Ex 35:2

Waque c'u tzex munlji, ax 'a yucl c'ual tzex 'ilji, yujto a jun c'u cha, yicn̈ej Jehová yaji, atn ta wach' eyi'n chan̈ sb'i. Tzann̈j mach tzmunlj 'a jun c'u cha, tojln̈ej schami.

Ex 31:17

Jun 'ejmn̈ej tzcan jun ch'oxnb'il tic 'a in cal eyet' ax israel ex tic, xchi Dios. Yujto waquen̈ej c'u 'ix munlj Jehová yic sb'on satcha'an̈ yet' lum lum tic, ax 'a yucl c'u, 'ix 'ilji.

A Ch'an̈ Carta D'a Eb' Hebreo 4:9

Yuj cha, 'ay wal jun 'iljelal tzyac' Dios 'ayn̈ec an̈ yic on̈c xo.

Ez 46:1

An Jehová Yajl in, an tzwala: A jun puerta 'ay 'a sti 'amc' 'a yojl 'ochi, jun 'ay 'a stojlal 'aj tzq'uel c'u, macnn̈ej 'a yic 'ay munljel 'a waque c'ual, at 'a yic sc'ul 'iljelal yet' 'a yic tzpac' 'uj, atta tzjacwi.

Lv 23:32

A jun c'u cha, sc'ul 'iljelal tz'ajcn 'ayex, sc'ul pax yic tzex 'och 'a c'ajb'c'ojlal. Tz'el yich 'a yemc'ual, 'a b'aln̈e yoch jun 'uj cha, masnto 'a yemc'ul 'a junx c'u, xchi Dios.

Ex 31:14

A jun c'u cha, niwn cab' yel'ch 'a e sat. A mach matz yiclni jun sc'ul 'iljelal cha, tojln̈ej schami. An̈jtona', toto 'ay mach tzmunlj 'a jun c'u cha, 'ajx cab' 'och 'a yol sc'ab' chamel.

Ex 16:26

Cojn waque c'u tztac' e moln tas tze c'uxu, ax 'a yucl c'ual, man̈x 'a tas tzjawi, yujto sc'ul 'iljelal, xchi Moisés.

Ex 23:12

Waquen̈ej c'u tzex munlji, ax 'a yucl c'ual tzex 'ilji, sec tz'ilj pax no e wacx tzmunlji, e b'uru, eb' e moso, yet' eb' chuc chon̈b'al cajn 'ec' eyet'oc.

Ex 31:16

E masnil, yowlal tzeyiclj sc'ul 'iljelal, yujto a jun tic, sch'oxnb'il in trato eyet' 'a jun 'ejmn̈ej.

Ex 35:3

Tzann̈j 'ajtil cajn ex 'eq'ui, caw wal matz tac' xon eya'n 'och e c'ac' 'a jun c'u cha, yujto sc'ul 'iljelal, xchi Moisés.

Lv 16:29

A jun tic ley tz'ajcn 'a e cal 'a smasnil tiempo. A 'a yic lajn̈e yoch yucl 'uj, ata tzex 'och 'a c'ajb'c'ojlal ax israel ex tic, yet' eb' chuc chon̈b'al cajn 'a e cal. May junc mach tzmunlj 'a jun c'u cha,

Dt 5:12

Niwn cab' yel'ch sc'ul 'iljelal 'a e sat. A 'a jun c'u cha, ata smoj eyi'n chan̈ in b'i an Jehová in, 'icha wal yaj waln can 'ayex.