Ex 30:23 - Chuj San Sebastian Bible

²³ A 'a scal te 'awb'ente', 'ay jun tzo'n̈ te wach' sjab', molb'tzej lajchwe'oc libra stzatjil te mirra, waque'oc libra te canela yet' pax waque'oc libra te cálamo,

Chuj San Mateo Bible

²³ Sic'chajocab'el juntzan̈oc avb'en te' man̈xo jantacoc svach'il sjab': Lajchaveoc libra stzatajil te' mirra te vach', vaqueoc libra canela, vaqueoc libra te' cálamo yelxo val vach',

Ex 30:23 Iomraidhean Croise

A Ch'an̈ B'ab'el Libro Yic Yab'ixal Eb' Rey 1:39

Ax Sadoc 'ix yij cot aceite 'a scajnub' Dios, 'ix ya'n q'ue 'a sjolm Salomón, 'ixtnta 'ix yutj eb' ya'n 'och reyal. Xlajw cha, 'ix yutz'n eb' no sch'ac calnelu, caw wal tz'el yaw smasnil chon̈ab': ¡Viva win rey Salomón! xchi eb'.

1 Cr 9:29

Ax jun tzo'n̈ xo eb', 'aych 'a yib'n̈ eb' yiln jun tzo'n̈ xo yamc'ab' to yic yatut Dios yaji: atn 'ixm harina, yal uva, aceite, incienso yet' perjuma.

1 Cr 9:30

'Ay pax eb' ya'mal 'och sti eb' 'anma 'a Dios, a eb' tzb'on perjuma cha.

Salmos 45:8

Smasnil a pichul, caw tz'ec' sjab' yet' sperjumail te mirra, te áloe, yet' yic te canela. A son 'aych sch'an̈il a tz'a'n tzaljc'ojlal 'aych 'a atut 'aj tzac' yajlil, jun to nab'a marfil 'aych yelwnub'loc.

Ex 30:22

'Ix yaln pax Jehová 'a Moisés 'ixtic:

Ex 30:24

yet' lajchwec libra te acacia. Tz'echtax jun tzo'n̈ chi yet' jun echtab' tzc'anx 'a in cajnub'. Nan̈l schan̈l litro pax yaceiteal te olivo.

Ex 31:11

Ax sb'on eb' jun perjuma to wicn̈ej tz'ajcni, tzb'on pax eb' jun incienso caw su'q'ui sjab' tz'och 'a yojl in cajnub'. Wach' tzyutj eb' sb'on 'icha wal tzwutj waln tic, xchi Dios.

Ex 35:28

Xlaj yi'noc cot eb' perjuma yet' aceite yic te olivo tzc'anx 'a cantil, yet' perjuma tzc'anlb'ax 'a yic 'ay junc tas tz'ochcn yico'oc Dios, yet' pax incienso caw su'q'ui sjab'.

Ex 37:29

Xya'n pax Bezaleel b'o jun perjuma yicn̈ej Jehová yaji, yet' pax jun incienso caw wal wach' sjab', caw wach' x'aj sb'o 'icha tzyutj junc mach sb'on perjuma cha.

Pr 7:17

Tox xwa'ch perjuma 'a 'a, caw su'q'ui yec' sjab'. A te mirra, te áloe yet' te canela a xwa'ch 'a 'a.

Cantares 1:13

Ach quelm to chamc'ojlb'il wu'uj, lajn ach wal 'icha jun tzec'oc te mirra to su'q'ui sjab' 'ayc' 'a snan̈l wim.

Cantares 1:3

Caw wach' yec' a jab' yuj perjuma 'aych 'ayach, ax a b'inaxi, lajn wal 'icha sjab' perjuma cha. Yuj cha, caw wal nib'b'ilch yuj eb' 'ix 'ix.

Cantares 4:14

'icha te nardo, te azafrán, te canela, te te su'q'ui sjab', te snun incienso, te mirra, te áloe, yet' smasnil te c'ultc su'q'ui sjab'.

Is 43:24

Ma'ix e man te te su'q'ui sjab' yic tzeya'n te ofrendail 'ayin, ma'ix eyac' tzaljoc in c'ojl yet' xepual no noc' tzeyac' xajmb'alil. A eyico', to cojn mul tze b'o'o, caw tzin tzactzj c'och eyu'uj, tze tzuntzj cot wowl yuj jun tzo'n̈ maysch'olnil tzlaj e b'o cha.

Jeremías 6:20

Ex in chon̈ab', ¿tas to yuj tzeyij cot incienso yic chon̈b' Sabá 'ayin, yet' jun tzo'n̈ xo te c'ultc caw su'q'ui sjab' tzcot 'a jun tzo'n̈ nacion̈ 'ay 'a caw najat? A jun tzo'n̈ e xajmb'al tzeyac' tz'a'oc, caw man̈xtzac schaj in c'ojol, yet' jun tzo'n̈ xo xajmb'al tzeyac'a, xin chi, xchi Dios.

Ez 27:19

An̈jtona eb' 'aj Dan yet' eb' 'aj Javán 'a yol yic Uzal, tzwulc' eb' manwjoc 'ayach. A tas tzya'cn eb' stojloc tas tzman cha, atn q'uen hierro wach' yaj sb'o'i, te yalil mirra yet' te canela.

Ez 27:22

Tzwulc' pax eb' 'aj Sabá yet' eb' 'aj Raama chon̈wjoc 'ayach. Tzmanwj pax eb', ax tas tzya'cn eb' stojloc tas tzman cha, atn jun tzo'n̈ perjuma caw wach', eb' q'uen q'uen wach' yilxi, yet' pax q'uen oro.

Nm 4:16

A Eleazar yunnal Aarón ya'mal 'och sti eb' 'anma 'ayin, a tz'iln aceite tzc'anx 'a cantil, incienso caw wal wach' sjab', ofrenda 'a 'ixm trigo to yowlal tz'ajx 'ayin, yet' perjuma tzc'anlb'ax 'a yic tzsi'x 'och junc 'anma wico'oc, mto junc xo tas. A tztan̈wni in cajnub' yet' smasnil syamc'ab'il, xchi Dios.

A Ch'an̈ B'ab'el Libro Samuel 10:1

Xlajw cha, xyi'n cot Samuel jun yet'l aceite, 'ix secn q'ue aceite chi 'a sjolm Saúl, 'ix stz'ub'n 'elt sti', xyaln 'a 'ixtic: A Jehová a tzach 'a'n 'och syajlilc qui chon̈ab'.