Ex 29:7 - Chuj San Sebastian Bible

⁷ Tze'n cot jun perjuma tzc'anxi yic 'ay junc mach tz'ochcn wico'oc, tza secnq'ue 'a sjolm Aarón, sec tz'ochcn yopiso ya'malc 'och sti eb' 'anma 'ayin.

Chuj San Mateo Bible

⁷ Slajvi chi' tzic'ancot aceite sc'anchaji ayic sic'chajel junoc mach tz'ochcan vicoc. Tzac'anq'ue d'a sjolom vin̈aj Aarón chi' yic tz'ochcan vin̈ sacerdoteal.

Ex 29:7 Iomraidhean Croise

Salmos 133:2

A jun tic lajn wal 'icha sja'l jun perjuma q'uenc 'a sjolm Aarón, win ya'mal 'och qui ti 'a Dios. A yic stob'x q'ue jun perjuma chi 'a sjolom, sb'ey 'emt 'a xil sti', masnto x'eml 'a sjaj te sjucn pichl winac.

Salmos 89:20

'Ix 'ilchj jun in checb' wu'uj, atn David. A perjuma tzc'anlb'axi yic 'ay junc tas tz'och wico'oc, a xwac' 'ajxoc q'ue 'a sjolom yic xin ch'oxn 'eli to xq'uecn c'och reyal.

Ex 28:41

'Ixta wal 'oj otc a pichn o'tac Aarón yet' eb' yunnal. Tzlajw cha, tza secn can q'ue perjuma 'a sjolm eb'. 'Ixta tz'aj schan can eb' yopiso yic tzya'n 'och eb' sti eb' 'anma 'ayin.

Ex 40:13

Tzlajw yachn eb', tzya'n 'och Aarón te spichl yic yopiso caw wach', tza tzicn can 'och perjuma 'a 'a, sec 'ixta tz'aj yochcn ya'malc 'och sti eb' 'anma 'ayin.

Is 61:1

A Yespíritu Jehová Cajlil, a 'ix ya'ch 'ayin, yujto sic'b'iln 'el yu'uj. Checb'iln cot yu'uj, yic tzwul walnc 'el wach' 'ab'x 'a eb' meb'a', tzlaj wa'nc can b'oxc sc'ojl eb' ya yaji, tzwaln 'el yab'xil colnb'il 'a eb' 'icha preso yaji.

Lv 10:7

Man̈ ex 'el pax 'a yol Mantiado tic, sec wach' matz ex chami, yujto ax tic, sic'b'ilx 'eli, 'ac'b'il q'ue perjuma yic Jehová 'a e jolom, xchi Moisés 'a eb'. 'Icha wal xyutj yaln cha, 'ixta xyutj sb'a eb'.

Lv 21:10

A win sat ya'mal 'och sti eb' 'anma', 'ay yopiso win ya'n 'och te pichl ya'ilb'il yaj sb'o'i, yujto 'ac'b'ilq'ue perjuma 'a sjolom yic si'x can 'ochi. Yuj cha, matz tac' scomn 'em tzicn xil sjolom, mto tziljat spichul yic tzch'oxn 'el junc scusc'ojlal.

Lv 21:12

An Jehová in, an tzwala. Matz tac' yel 'a yol in cajnub' yuj schamlil eb' cha, matz tac' to man̈x 'a yel'ch tzyutj can in cajnub', yujto 'ac'b'ilq'ue perjuma 'a sjolom yic si'x can 'och wico'oc.

Lv 7:35

A 'a no xajmb'al tz'ajx tz'a 'a yojltac Jehová cha, ata tz'elt yic Aarón yet' eb' yunnal, yictax sc'ul yic si'x can 'och eb' ya'malc 'och sti eb' 'anma chi 'a Dios.

Zacarías 4:14

'Ix yaln 'ayn 'ixtic: Atn chab' tic tzch'oxn cot chawn̈ eb' sic'b'il 'el yuj Yespíritu Jehová yic tzya'n servil eb' Dios, atn Yajl yaj 'a smasnil yolyib'n̈q'uinal, xchi jun ángel cha.

Nm 35:25

Ax eb' chon̈b' cha, a eb' tzcoln win tz'och smul chi 'a yol sc'ab' win yican junc tzcham cha. Yowlal tzya'x meltzjoc eb' jun 'ay smul chi 'a jun chon̈b' 'aj tzcol sb'a cha, tzcann̈j ta', masnto tzcham win sat ya'mal 'och sti eb' 'anma sic'b'il can 'och 'a yopiso.

Jn 3:34

Yujto a jun cha, a Dios checjnac coti. Yuj cha, a spaxti Dios tzyala. A jun cha, tz'acn ya'jnac Dios Yespíritu 'a 'a.

1 Jn 2:27

A Jesucristo 'a'jnac Yespíritu 'ayn̈ junjn on̈ec. Yuj cha, man̈ yowlalc chuct junc 'anma tzon̈ cuynec, yujto a Yespíritu tzon̈ cuynec 'a smasnil tas. A jun tzo'n̈ cuynb'il tzyac' 'ayn̈ec, caw yel, may junc 'es 'aych 'a scal. Yuj cha, yowlal junn̈j tzon̈ 'ajc yet' Cristo, yujto 'ixta yaj yaln Yespíritu 'ayn̈ec.