Esdras 5:16 - Chuj San Sebastian Bible

¹⁶ Xlajwn̈ej sc'och Sesbasar 'a Jerusalén, xya'n 'ejm yipnub'al yich yatut Dios. Yictax cha, x'el yich sb'o'i, palta mantzac lajw sb'o ticnec.

Chuj San Mateo Bible

¹⁶ Ayic ix c'och vin̈aj Sesbasar d'a Jerusalén chi', ix yac'anem yich stemplo Dios chi' vin̈. Atax ta' ix chael yich sb'ochajxi, palta manto b'oel-laj ticnaic.

Esdras 5:16 Iomraidhean Croise

Esdras 3:10

A yic 'ix ya'n 'ejm eb' albanil yich yatut Jehová, 'ix q'ue wan lin̈n eb' ya'mal 'och sti eb' 'anma 'a Dios, xya'n 'och eb' spichl yic yopiso cha, xyutz'n eb' strompeta. Ax eb' levita yin̈tl Asaf, syucn eb' jun tzo'n̈ q'uen címbalo, yic wan yaln eb' swach' paxti 'a Jehová, 'icha yaj yaln can David win ya'jnac reyl 'a chon̈b' Israel 'a pecti'.

Esdras 3:8

A yic schab'l xo 'uj schan 'och schab'l ab'il sjapx eb' israel, 'ix 'el yich sb'ox yatut Dios jun 'ejm xo 'a Jerusalén. Eb' xb'oni, atn Zorobabel win yunnal Zalatiel, Jesúa win yunnal Josadac, yet' eb' ya'mal 'och sti eb' 'anma 'a Dios yet jun tzo'n̈ xo eb' levita, yet' smasnil eb' paxncta 'a Babilonia. 'Ix ya'ch eb' jun munljel chi 'a yol sc'ab' jun tzo'n̈ eb' levita to 'ec'b'al 'a junc'l ab'il sq'uinal.

Esdras 5:14

An̈jtona', yijnac 'at ab' win Nabucodonosor chi jun tzo'n̈ yamc'ab', to nab'a oro, nab'a plata, yijnac 'elt 'a yatut Dios 'a Jerusalén, 'ix 'at ya'nc 'och 'a yol yatut sdiosal 'a Babilonia. Ax ab' win rey Ciro x'a'n pax meltzjoc jun tzo'n̈ chi 'a Sesbasar, atn win 'ix 'ajx 'och gobernadoral.

Esdras 5:15

'Ix yaln ab' Ciro chi 'a Sesbasar, to tzyij 'at jun tzo'n̈ yamc'ab' chi 'a yatut Dios 'a Jerusalén. An̈j 'ijnoc 'a yet'l 'aj pojnc 'ejmi, ata tzb'ox chan̈ sjel yatut Dios cha, xchi ab' win Ciro cha.

Esdras 5:2

Xlajw cha, a Zorobabel yunnal Salatiel, yet' Jesúa yunnal Josadac, 'ix 'ochx eb' 'a munljel, sb'on pax chan̈ eb' yatut Dios 'a Jerusalén, 'ix colwj eb' schecb' Dios chi yet' eb'.

Esdras 6:15

A yatut Dios cha, 'ix lajw sb'o 'a yoxl xo c'u yoch 'uj Adar, yic swacl xo ab'il yoch Darío reyl 'a Persia.

Hageo 2:18

A 'a yic 24 yoch sb'aln̈il 'uj yic jun ab'il tic, a 'a jun c'u tic xe ya'x can 'ejm yipnub'al yich watut.

Zacarías 4:10

A jun tzo'n̈ eb' may yel'ch 'a sat yic 'ix 'el yich jun munljel cha, ax yic 'oj yilnc eb' to wan ya'n 'och Zorobabel plomo yic tztojlb'tzan 'och q'uen slajb' q'uen tz'och 'a watut cha, caw 'oj tzaljoc chan̈ eb', xchi Dios. Xlajw cha, 'ix yaln pax jun ángel chi 'ixtic: A uque cantil cha, a tzch'oxni 'icha to 'ay uque yol sat Jehová, yujto c'uxn tzyil smasnil yolyib'n̈q'uinal, xchi.

Zacarías 4:9

A Zorobabel a 'ix 'a'n 'ejm yipnub'al yich jun watut tic, a pax 'oj lajnc 'el'chi. 'Ixta to b'i'an, ax snachj 'el yuj eb' in chon̈ab', chajtlto an Jehová in, tztac' wuj smasnil, an ach in chec coti.

Jn 2:20

Yuj cha, xyaln pax ewin 'aj Judea chi 'ixtc 'a 'a: —A jun yatut Dios tic, 46 ab'il ya'jnac eb' yet'oc sb'o yuj eb'. Ach xo tic, ¿tom 'oj b'o oj 'a 'oxe c'u cha? xchi ewin 'a 'a.