Esdras 2:1 - Chuj San Sebastian Bible

^1-2 Atn sb'isl eb' 'aj Judá 'ijxnac 'at 'icha presoal 'a Babilonia yuj rey Nabucodonosor. A yic 'ix lajw stiempoal yajc' eb' 'a jun lugar cha, 'ix meltzj eb' 'a Jerusalén, yet' 'a jun tzo'n̈ xo lugar 'a yol yic Judá. Junjn eb', xlaj c'ochx can eb' 'a 'aj 'aycn schon̈ab'. Ax eb' xjucb'tzan eb': Atn Zorobabel, Jesúa, Nehemías, Seraías, Reelaías, Mardoqueo, Bilsán, Mispar, Bigvai, Rehum yet' Baana.

Chuj San Mateo Bible

^1-2 Aton slistail eb' aj Judá ic'b'ilb'at yuj vin̈aj Nabucodonosor sreyal Babilonia, eb' ix jax d'a Jerusalén yed' d'a juntzan̈xo lugar d'a yol yic Judá. Junjun eb' ix c'ochxican d'a schon̈ab'. Axo eb' vin̈ cuchb'um d'a eb', aton eb' vin̈ tic: Vin̈aj Zorobabel, vin̈aj Jesúa, vin̈aj Nehemías, vin̈aj Seraías, vin̈aj Reelaías, vin̈aj Mardoqueo, vin̈aj Bilsán, vin̈aj Mizpar, vin̈aj Bigvai, vin̈aj Rehum yed' vin̈aj Baana.

Esdras 2:1 Iomraidhean Croise

A Ch'an̈ Schab'il Libro Yic Yab'ixal Eb' Rey 25:11

Xlajw cha, xyi'n 'at win Nabuzaradán eb' 'anma xcan to 'a yol chon̈b' cha, yet' eb' xya'ch sb'a yet' win sreyl Babilonia, yet' pax jun b'uln̈ xo eb' chon̈ab', 'ix 'ijx 'at eb' 'icha presoal yu'uj.

1 Cr 9:1

'Ixtn tic 'ajnc stz'ib'x can smasnil eb' israel 'a ch'an̈ slibroal yic yab'xil eb' sreyl chon̈b' Israel. Palta a pax eb' 'anma 'ay 'a Judá, 'ix 'ijx 'at eb' 'icha presoal 'a Babilonia, yuj smaysch'olnilal eb'.

1 Cr 9:2

A eb' israel b'ab'l meltzjnac cot pax 'a slu'um yet' 'a schon̈ab', atn eb' ya'mal 'och sti eb' 'anma', eb' ya'mal servil yatut Dios, yet' jun c'aj xo eb' levita.

Esdras 1:11

A sb'isl jun tzo'n̈ yamc'ab' oro yet' plata 'ay 5,400 'a smasnil. Smasnil jun tzo'n̈ tic, 'ix yij pax meltzjoc Sesbasar yic 'ix 'elt 'a Babilonia yet' eb' ajun yet'oc, 'ix c'ochx eb' 'a Jerusalén.

Esdras 2:70

A eb' ya'mal 'och sti eb' 'anma 'a Dios yet' eb' levita, yet' pax eb' chon̈ab', 'ix can cajn eb' 'a Jerusalén, yet' eb' tzb'itni, eb' tan̈m puerta, yet' pax eb' tz'a'n cuenta yatut Dios. Ax smasnil eb' yit israelal eb', 'ix japx can cajn junjn eb' 'a 'aj 'aycn schon̈ab'.

Esdras 6:2

palta a 'a yol despacho 'a chon̈b' Ecbatana, 'a yol yic Media, ata 'ix 'ilchj jun ch'an̈ libro 'aj tz'ib'b'il can tastc nab'il cani, 'aj tzyal 'ixtic:

Esdras 8:35

Ax qui masnil on̈ paxt 'a Babilonia cha, xcac' qui xajmb'al to tz'a smasnil 'a qui Diosalec: lajchwan̈ no quelm wacx xcac' cuj qui masnil an̈ israel on̈ tic, 96 no mam calnelu, 77 no quelm calnelu. 'Ix ca'n pax lajchwan̈ no mam chiwo xajmb'alil yic tz'ajx lajwc qui mul. Smasnil jun tzo'n̈ cha, 'ix cac' tz'a 'a yojltac Jehová.

Nehemías 12:1

'Ay jun tzo'n̈ eb' ya'mal 'och sti eb' 'anma 'a Dios, yet' eb' levita 'ix meltzj paxt yet' Zorobabel win yunnal Salatiel, yet' pax Josué. Atn sb'i eb' tic: Seraías, Jeremías, Esdras, Amarías, Maluc, Hatús, Secanías, Rehum, Meremot, Iddo, Ginetón, Abías, Mijamín, Maadías, Bilga, Semaías, Joiarib, Jedaías, Salú, Amoc, Hilcías yet' Jedaías. Atn jun tzo'n̈ eb' tic yajl yaj 'a scal eb' yit ya'mal-l 'och sti eb' 'anma 'a Dios, yet' 'a eb' yican eb' 'a yol stiempoal Josué.

Ester 1:1

'Ix uj jun tic yic 'aych win Asuero reyl 'a yol smacb'en Persia. 'Ay 127 niwc chon̈b' 'a yol smacb'en, tz'el yich 'a India masnto tzc'och 'a Etiopía.

Ester 1:11

yic tz'at yi'nc cot ewin 'ix reina Vasti 'a yojltac win rey. Tznib'j win to tzjaw 'ix yet' scorona to caw tzwetzwni, yic tzch'oxn pax 'el 'ix swach'l yilx 'a sat smasnil eb' 'anma', yet' 'a sat smasnil eb' niwc yajal, yujto caw wal wach' yilx 'ix.

Ester 1:3

A yic stz'acw yoxl ab'il yoch win Asuero chi reyal, 'ix ya'n 'och win jun niwn wa'el, yet' jun niwquil q'uin̈ yet' smasnil ewin niwc yajal, ewin 'ay yopiso yet' winac, eb' syajlil eb' soldado 'aj Persia, yet' eb' 'aj Media; eb' gobernador, yet' pax eb' yajl yaj 'a junjn niwc chon̈b' cha.

Ester 1:8

'Ix yaln win 'a eb' yajl yaj 'a eb' tz'aw servil cha, to may junc mach tz'ajx pural yu'n yal uva; junjn eb' 'awtb'il cha, mun tzyu'j eb' tas tznib'j yuc'.

Ester 8:9

Wal 'a yajn̈ej 'ix 'awtx cot smasnil eb' yajtz'ib' win rey. A 'a yic 23 yoch yoxl 'uj atn 'a jun 'uj tzcuch Siván. Smasnil tas xyal Mardoqueo, 'ix tz'ib'x 'at 'a smasnil eb' israel, 'a eb' gobernador, 'a eb' capitan̈, yet' pax 'a smasnil eb' yajl 'a 127 niwc chon̈b' macb'il yuj win rey cha, tz'atn̈j 'a India masnto 'a Etiopía. 'Ix tz'ib'x 'at 'a sti', yet' 'a sletra junjn chon̈ab'. An̈jtona 'ix tz'ib'x 'at 'a sti eb' israel cha.

Is 48:20

A Jehová a tzaln 'ixtic: 'Eln̈ect 'a Babilonia, 'eln̈ect 'a scal eb' caldeo cha. Alc 'el yab'xil jun tic yet' 'aw yic tzaljc'ojlal, 'a'c 'ojcaxc 'eli, masnto 'a 'aj tzlajw c'och lum lu'um. Alc 'ixtic: A Jehová a 'on̈ 'a'nec 'el 'a libre an̈ yin̈tl on̈c Jacob tic, atn jun schecab', xe chi.

Jeremías 50:19

'Oj wi'x meltzjoc eb' israel 'a slum jun 'ejm xo. 'Oj sc'ux eb' smasnil tas wach' tzc'uxxi, atn tas tzpac' 'a lum Carmelo, yet' 'a Basán. 'Oj sc'ux eb' jantc tas tznib'ej, atn tas tzpac' 'a lum jolmctac witz 'a yol yic Efraín, yet' 'a Galaad.

Lm 1:3

A eb' 'aj Judá, caw wal ya tzyab' eb' yujto ya munljel 'aj 'aych eb', 'ix 'ijx 'at eb' 'icha presoal. A ticnec, 'ayx 'ec' eb' 'a scal jun tzo'n̈ xo nacion̈, toxn matz 'ilj xon eb' jac smunlji. 'Ayx 'ec' eb' 'a scal yailal, 'ix yamchj eb' yuj eb' tzpechn b'eyc'oc.

Lm 1:5

A eb' 'ajc'ojl yajch 'a 'a, 'ix 'ajx ganar yuj eb', a eb' 'ajc'ojl cha, caw wal tzq'ue'ch eb'. A Jehová a 'ix 'a'n 'och syailal jun chon̈b' tic, yujto caw niwn maysch'olnil 'ix sb'o'o. A eb' 'anma cajn 'a 'a, tox 'ix 'ijx 'at eb' 'icha presoal yuj eb' 'ajc'ojl cha.

Lm 4:22

Ex 'aj chon̈b' Sión, 'ix 'el'ch smasnil yailal 'ix 'ajx 'och 'a eyib'an̈. Ma'oj eyajx 'at 'icha presoal 'a jun 'ejmn̈ej yuj Jehová. Ax xo ex 'aj Edom, yuj e maysch'olnilal ax ya'n cot Jehová yailal 'a eyib'an̈, 'ixta wal 'oj 'aj scheclj 'eli, to 'ay pax e mul, xchi winac.

Sofonías 2:7

A eb' 'oj can to 'a eb' yin̈tl Judá, 'oj yic' eb' smacl lum ta'. Ata 'oj stan̈wc wa eb' scalnelu, ax 'a 'ac'wal, a 'a eb' te n̈a 'ay 'a Ascalón, ata 'oj way eb', yujto a Jehová sDiosal eb', a 'oj tan̈wnoc eb', ax yi'n pax q'ue'ch eb'.

A Tas Sc'ulejnac Eb' Schecab' Jesús Hechos 23:34

Xlajw yiln win gobernador ch'an̈ carta cha, 'ix sc'anb'n win 'a Pablo, 'aja lugaril 'aj 'ay. 'Ix yab'n winac, to 'aj Cilicia.