Esdras 10:8 - Chuj San Sebastian Bible

⁸ 'Ix smol aln eb' yajl chi yet' eb' 'ichmtac winac, to a mach matz c'och 'a yoxl c'u 'a jun yamnil cha, tz'ijx 'ec' tastc 'ay 'a eb', tz'ijx pax 'el eb' 'a scal eb' tot jawnc cha.

Chuj San Mateo Bible

⁸ Ix smol alan eb' vin̈ yajal yed' eb' vin̈ ichamtac vinac to d'a schab'jial sc'och eb' anima chi', ix yalan eb' vin̈ icha tic: Tato ay eb' max javi d'a sc'ual chi', tz'ic'jiec' masanil tastac ay d'a eb', spechjiel eb' d'a scal eb' yetchon̈ab' chi', xchi eb' vin̈.

Esdras 10:8 Iomraidhean Croise

Esdras 10:7

Xlajw cha, xya'n 'awtxoc cot smasnil eb' 'aj Judá yet' eb' 'aj Jerusalén, yic tzyamn sb'a eb' 'a Jerusalén cha, atn smasnil eb' xit'nc 'a 'icha presoal.

Esdras 10:9

Yuj cha, smasnil eb' winc yic Judá yet' eb' yic Benjamín, 'ix syam sb'a eb' 'a Jerusalén 'a yoxl c'u cha, atn 'a junc'l yoch sb'aln̈il 'uj. 'Ix 'em wocn eb' smasnil 'a yamq'uil yatut Dios, caw wal tzxiw eb' yuj jun paxti cha, tz'ib'x pax eb' yuj n̈ab' tz'ejmi.

Esdras 7:26

Tzann̈j mach matz yiclni sley a Diosal cha, yet' in ley an reyn tic, b'eyc'ojlaxc cab' muc'uc: tom tz'ajx chamoc, mto tz'ijx 'el 'a yol chon̈ab', mto tz'ijx 'ec' tas 'ay 'a a, mto tz'atcn 'a preso, xchi win rey 'a scarta cha.

Nehemías 13:28

A junc eb' yunnal Joiadá, yixchicn Eliasib, sat ya'mal 'och sti eb' 'anma 'a Dios, n̈ilab'il yaj 'a Sanbalat, atn win horonita, a jun win n̈ilab'il cha, xin pechl 'a in tz'ey.

Nehemías 13:3

Yuj cha, a yic xyab'n eb' quit chon̈b' tas tzyal ch'an̈ ley cha, 'ix spojn 'el eb' smasnil eb' 'anma chuc chon̈b'al cajn 'a scal eb'.

Lv 27:28

A mach tz'a'n junc tas wico'oc 'a jun 'ejmn̈ej an Jehová in, yaln̈ej tas 'ay 'a 'a, toxn̈ej 'anma', mto noc', mto lum tz'ajx yico'oc yuj smam snun, a jun tzo'n̈ chi tz'ajx wico'oc an Jehová in, matz tac' schon̈xi, matz tac' smann can pax 'ec' mach tz'a'n cha.

Mt 18:17

Palta toto an̈ja matz chaj yab' 'a eb', yel xo wach' tzeyal 'a iglesia. Toto an̈ja matz chaj yab' pax 'a eb', cann̈j cab' 'ixta'. 'Icha junc comn 'anma man̈ 'ojtnacoc Dios, mto junc tecm 'el tumin, 'ixta cab' tz'ajcn 'a e sat.

Jn 16:2

Yujto 'oj ex spech 'elt eb' quit israelal 'a yol scapiya. 'Ay wal jun tiempoal 'oj jawoc, yaln̈ej mach 'oj e milni, ax snan eb', to a Dios wan ya'n servil eb'.

Jn 9:22

'Ixta xyutj eb' yalni, yujto caw xiw eb' yaln yuj ewin yajl 'a scal eb' 'aj Judea cha. Yujto tox 'ix yal ewin yajl chi 'ixtic: Toto 'ay eb' 'oj alnoc, chajtlto a Jesús atn Cristo, 'oj qui pechc 'el eb' 'a yol qui capiya tic, xchi ewin yajl cha.

Jn 9:34

—'In ach tic, toxn 'ajmul ach yic alji. ¿Tom tza nib'j tzon̈ cob' a cuy on̈? xchi ewinac. Xlajw xoj cha, spechn 'elt ewin 'a scal.

Josué 6:19

Cojn q'uen oro, q'uen plata, q'uen bronce yet' q'uen hierro, cojn tzeyij 'at yico'oc Jehová, tze moln can 'aj 'ay yet'ul, xchi 'a eb'.

Jueces 21:5

'Ix sc'anb'n 'ec' eb' 'ixtic: —¿Mach junc 'a qui calc tic ma'ix xit' quet'ec 'a qui yamnil 'a yojltac Jehová 'a Mizpa? xchi eb'. Yujto ya'jnac eb' sti', toto 'ay junc mach matz 'at 'a jun yamnil 'a yojltac Jehová 'a Mizpa cha, tojln̈ej schami.

A Ch'an̈ B'ab'el Libro Samuel 11:7

'Ix yi'n cot chawn̈ no mam wacax, scotc tzu'n 'at no', 'ix ya'n no 'a jun tzo'n̈ eb' schecab', yic tz'ec' sch'oxnc eb' 'ilxoc no 'a smasnil yol smacb'en eb' yit israelal. Tzlaj 'ec' yalnc eb' checb' chi 'ixtic: 'Ixtc wal 'oj 'aj swacx mach ma'oj 'och tza'n yuj Saúl, yet' pax Samuel, yic 'oj 'at eb' 'a owal, xchi eb'. 'Ix jaw jun niwquil xiwlal 'a yib'n̈ eb' 'anma chi smasnil yuj Jehová. Junxn̈ej xyutj sb'a eb' smasnil, 'ix wul ya'nc 'och sb'a eb' yet' eb'.