Dt 31:17 - Chuj San Sebastian Bible

¹⁷ Yuj wal cha, 'oj cot wowl 'a eb', ax wactn can eb' sch'ocoj. Man̈x 'oj in na cot eb', man̈x yalnb'ilc yailal yet' pax b'ilc'ojlal 'oj jawc 'a yib'n̈ eb', masnto 'oj yal eb' 'ixtic: ¿Tas wal yuj tzcab'c syail, yuj am to man̈x 'ayc 'ec' qui Diosalec quet'oc? 'oj schic eb'.

Chuj San Mateo Bible

¹⁷ Yuj chi', ol cot voval d'a eb', ol vactancan eb' sch'ocoj. Man̈xo ol vab' tas ol yal eb'. Man̈xo jantacoc yaelal ol cotcan d'a yib'an̈ eb', masanto ol yal eb' icha tic: ¿Tas val yuj scab' syail? Yuj am to man̈xo ayoc ec' co Diosal d'a co cal, xcham eb'.

Dt 31:17 Iomraidhean Croise

A Ch'an̈ B'ab'el Libro Yic Yab'ixal Eb' Rey 8:57

A ticnec, 'ayc'n̈ej cab' Jehová qui Diosalec quet'oc, 'icha ya'jnac yet' eb' qui mam quichmec. May cab' b'a'n̈ tzon̈ yactjec can qui ch'ocoj.

A Ch'an̈ Schab'il Libro Yic Yab'ixal Eb' Rey 22:13

—'Ixquec, 'at c'anb'jec 'a Jehová wu'uj, yuj eb' chon̈ab', yet' pax yuj smasnil eb' 'aj Judá, tas yel'ch tas tzyal ch'an̈ libro 'ix chax cha. Caw am 'ay cot yowl sc'ojl Jehová 'a quib'n̈ec, yujto ma'ix schaj eb' qui mam quichmec yab' tas tzyal ch'an̈, xchi winac.

1 Cr 28:9

Ach xo tic ach wunnal Salomón, 'ojquej 'el wal qui Diosal, 'ac' servil 'a smasnil a pixan, mun cab' wal tz'el 'a a c'ojol, yujto a Jehová yojc smasnil tas 'ay 'a qui pixan, tznachj 'el pax yu'uj tas 'ay 'a qui nab'en. Toto 'oj al a b'a 'a 'a, 'oj ta'wc 'ayach, palta toto 'oj e'cn 'el a b'a 'a 'a, 'oj ach spatquilc can 'el 'a jun 'ejmn̈ej.

2 Cr 15:2

'Ix 'elt wul scha win Asa, 'ix yaln 'a 'ixtic: 'Ab' tas 'oj wal 'aych mamin Asa, yet' e masnil ex wit chon̈b' 'aj Judá, yet' ex yin̈tl Benjamín. A Jehová 'aych ton wal quet'ec, toto a wal yet' 'ayn̈ec 'ochi. Toto tzcalc qui b'a 'a 'a, 'oj yab' tas tzcalec. Palta toto 'oj cactquec cani, 'oj on̈ yactc can paxi.

2 Cr 21:10

Palta a eb' 'aj Edom, 'ix ya'n̈j ganar eb' yi'n 'el sb'a 'a yaln̈ schecnb'il eb' 'aj Judá. An̈jtona 'a jun tiempoal cha, 'ix yique'ej sb'a chon̈b' Libna, yujto 'ix yactj can yaln sb'a Joram chi 'a Jehová, atn sDiosal yet' eb' smam yicham.

2 Cr 24:20

Xlajw cha, 'ix 'och Yespíritu Dios 'a Zacarías, yunnal Joiada. 'Ix q'ue lin̈n 'a yib'n̈ jun lugar chan̈ yaj cha'an̈. Xyaln 'a eb' chon̈b' 'ixtic: A Dios a tzaln 'ixtic: ¿Tas yuj matz eyiclj in checnb'il an Jehová in? ¿Tas yuj tze say cot yailal 'a eyib'an̈? In eyactj can an Jehová in tic, yuj cha, 'oj ex wactc can pax jun xo, xchi Dios, xchi Zacarías 'a eb'.

Nehemías 9:32

A ticnec ach qui Diosal on̈, caw niwn el'chi, caw 'ay ep, 'ay smay a b'inaxi, matz 'at satc'ojlal a trato o'oj. Yuj a niwquil chamc'ojlal, 'ay cab' yel'ch syailal eb' qui reyl 'a a sat, eb' 'aych qui yajlil on̈, eb' ya'mal 'och qui ti 'aych on̈, eb' a checab', eb' qui mam quichm on̈, yet' smasnil eb' quit chon̈b' on̈, to 'ix yab' eb' syail yictax 'a yol stiempoal eb' sreyl Asiria masnto 'a jun tiempoal tic.

Job 13:24

¿Tas yuj tza c'ub'j 'el a b'a 'ayin? ¿Tas yuj 'icha junc 'ajc'ojol, 'ixta tzin otej?

Job 34:11

A tz'a'n spac yic junjn mach, a tzyala tas tz'el sb'on junjn 'anma'; junjn mach 'oj scha spac smoj schani.

Salmos 104:29

Toto tzej 'el a sat 'a e no', wal xiw chan̈ e no cha; toto tzej 'ec' sq'uinl e no', 'oj cham e no', ax yochx can e no poccal.

Salmos 2:12

'Emn̈ec n̈ojn 'a yojltac Yunnal Dios yet' e xiwc'ojlal. Man̈ eyi' cot yowl sc'ojl 'a eyib'an̈, sec matz ex satl yu'uj, yujto yajn̈j wal cha, tzcot yowal. ¡Caw tzaljc'ojlal yic eb' to a Dios tzya'ch yipc sc'ojol!

Salmos 27:9

Ach in Diosal, man̈ a c'ub'c 'el a b'a 'ayin. Man̈ in a patquilc can 'el yet' yowl a c'ojol, yujto cojxn̈ej ach in Colmal aji. Man̈ in actc can in ch'ocoj, colwjan̈ 'ayin.

Salmos 30:7

Mamin Jehová, yet' wal swach'l a c'ojol in e'n can 'och 'a 'aj may tas tzin 'i'ni. Palta ax yic xe'n 'el a b'a 'a in tz'ey, in somchj 'el yuj xiwc'ojlal.

Salmos 44:10

Ach on̈ ac' 'at 'elc 'a eb' 'ajc'ojl yajch 'ayn̈ on̈. Ax eb' tzchichn 'och 'ayn̈ on̈, tzlaj yelc' eb' tas 'ay 'ayn̈ on̈.

Salmos 89:46

Mamin Jehová, ¿b'a'n̈ wal tzactj owx 'och 'ayin? ¿Tom an̈j 'ijnoc wal 'ay cot yowl 'a c'ojl 'ayn 'icha sn̈ilchj c'ac'?

Salmos 90:11

¿Tom 'ay junc mach 'ojtnac jantc wal yipl yowl a c'ojol? ¿Toc cojc on̈ jantc wal smay a c'a'lc'ojlal cha?

Is 2:6

Mamin Jehová, yel ton wal b'i'an 'actb'il can eb' a chon̈b' tic o'oj, atn eb' yin̈tl can Jacob, yujto til wal tz'aj sniwtj eb' 'ajchum 'a jun chon̈b' tic, atn eb' xlaj cot 'a stojlal 'aj tzq'uel c'u yet' eb' tznan 'el paxti', 'icha tzyutj sb'a eb' filisteo. Tzlaj sb'o eb' strato yet' eb' chuc chon̈b'al.

Is 5:25

Yuj wal jun tzo'n̈ mul cha, ax ya'n cot Jehová yowl sc'ojl 'a yib'n̈ schon̈ab', ax ya'n 'och syailal eb' 'anma cha. A eb' lum niwc witz, c'uxn 'oj 'ib'xoc eb' lum 'a yet'ul, ax eb' 'anma cha, t'octac 'oj 'ajcn eb' scham 'a yol caye. Palta man̈ yujoc cha, 'oj 'ec' yowl sc'ojl Dios, 'ipn ya'n 'och syailal eb'.

Is 63:17

Mamin Jehová, ¿tas yuj tzon̈ ejcan 'el 'a yol a b'e, tza'n pitb'oc 'el qui nab'en yic man̈x 'a qui xiwc'ojlal 'ayach? Ax ticnec jun, ch'oxx wal a chamc'ojlal chi 'ayn̈ an̈ a checb' on̈ tic, atn an̈ yin̈tl on̈ can eb' a chon̈b' to ecn̈ej yaji.

Is 64:7

Toc 'ayt mach xnachj yaln sb'a 'ayach, mto sc'ann a colwal. Yuj am cha, 'ix a c'ub'n 'el a sat 'ayn̈ on̈, on̈ actn can qui ch'ocj on̈, yic tzon̈ satn 'el qui mul chi 'on̈.

Is 8:17

Wach'xam tzc'ub'j 'el sb'a Jehová 'a 'ayn̈ an̈ yin̈tl on̈ Jacob tic, palta an tic, tzwa'ch 'a in c'ojol, to a yipc'ojlal yaj wu'uj.

Jeremías 23:33

'Ix yaln Jehová 'ayn 'ixtic: Ach Jeremías, toto 'ay junc 'anma 'a jun chon̈b' tic, mto junc tzyalch sb'a in checb'oc, mto junc ya'mal 'och sti eb' 'ayin, tzc'anb'n 'aych 'ixtic: ¿Tas wal tzyal schecnb'il Jehová? toto xchi eb'. Ach xo tzal 'ixtc 'a 'a: Ach tic, lajn ach 'icha junc 'ictz 'a Jehová, yuj cha, 'oj ach ya'cn 'ejmi, xa chi 'a 'a.

Jeremías 23:39

Yuj cha, 'oj wa'cn sat in c'ojl 'ayex, yet' 'a jun chon̈b' 'ix wac' 'ayex, yet' 'a eb' e mam eyicham. Caw najt 'aj 'oj 'at ex in julcn 'eli.

Jeremías 33:5

A 'aj 'ix 'el jun tzo'n̈ n̈a cha, caw 'oj b'ut'joc 'el yuj sniwnal eb' 'anma 'oj in mil cham yuj yowl in c'ojl to man̈x yalnb'iloc. Tox 'ix wij 'el in sat 'a jun chon̈b' tic, yujto caw wal niwn smul eb' xya'chi.

Jeremías 36:7

Toq'ue 'oj yal sb'a eb' chon̈b' tic 'a Jehová, ax yactn can eb' smaysch'olnilal. Yujto caw wal niwquil yowl sc'ojl Dios snalb'ej ya'n cot 'a yib'n̈ jun chon̈b' tic, xin chi 'a 'a.

Jeremías 40:2

In yi'n 'el win comandante chi 'a scal eb' presoanm cha, 'ix yaln win 'ixtc 'ayin: A Jehová a Diosal, a 'ix alni to 'oj ya' cot jun niwquil yailal 'a yib'n̈ jun chon̈b' tic.

Jeremías 8:19

Caw wal tz'ab'x yel yaw eb' wit chon̈b' 'a smasnil yol qui nacion̈ tic. ¿Tom man̈x 'ayc 'ec' Jehová 'a Sión? ¿Tom man̈x 'ayc 'ec' qui Reyl ta'? xchi eb'. 'Ix ta'w Jehová 'a eb' 'ixtic: ¿Tas yuj xe tzuntzj cot yowl in c'ojol, yic xeyaln e b'a 'a jun tzo'n̈ yechel, atn jun tzo'n̈ comn dios may jac yel'chi, chuc 'aj cotnac? xchi 'a eb'.

Ez 39:29

Man̈x 'oj wi'l in sat 'a eb', yujto 'oj wa'x in poder 'a yib'n̈ eb' israel jun 'ejm xo. An Jehová in, an tzwala, xchi Dios.

Os 10:4

Cojn spaxtin eb', tzlaj ya'nc eb' strato 'a 'a'j 'esal. Ax smasnil b'eyc'ojlal man̈ tojloc tzyutj eb', lajn eb' 'icha te c'ultc caw c'a tzpac' 'a scal 'awal.

Os 9:12

Toto 'ayt 'aj 'oj cob' q'uib' eb' 'unn chi jun, palta an xo 'oj wi'cc sq'uinl eb' 'a eb'. Man̈x 'a xon junc 'oj wactc cani. 'Oltac wal jun tzo'n̈ eb' 'anma cha, yic 'oj wi'nc 'el in b'a 'a stz'ey eb'.

Miqueas 3:4

'Ay wal jun c'ual, 'oj cob' to eyawtc Jehová, palta man̈x 'oj ta'wc 'ayex. A wal 'a yic jun c'ul cha, 'oj sc'ub'c 'el sb'a 'ayx yuj tas maysch'olnil 'ix e b'o'o, xin chi 'a eb' yajl cha.

Nm 14:42

Man̈ ex 'atoc, yujto a Jehová man̈ 'ayc 'och eyet'oc. A eb' 'ajc'ojl cha, 'oj ex yac' ganar eb'.

Dt 29:20

A Jehová man̈x 'oj yac' niwnc'ojlal, palta tojl xoj ya'n cot yowl sc'ojl 'a yib'n̈ jun 'anma cha. A smasnil yowl sc'ojl Dios alb'il can 'a yojl ch'an̈ un̈ tic, a 'oj jawc 'a yib'an̈, ax satn 'el yin̈tl jun 'anma chi 'a sat lum lum cha.

Dt 30:18

toto 'ixta', wal 'a jun c'u tic, tzwaln can 'ayex, chajtlto 'oj e chamn̈ej. Man̈ najtloc 'oj eyec' cajn 'a sat lum lum 'oj eyi'cn 'ec' 'a yic 'oj e c'axw 'ec' 'a yojl a Jordán.

Dt 30:19

Wal 'a jun c'u tic, tzwa'n can 'och satcha'an̈ yet' lum lum tic testigoal to 'ix wa'cn e si'loc tas tze nib'ej, ¿am q'uinal, mto a chamel? ¿am yaxilal, mto a catab'? Palta a cab' e q'uinl tze si'cn 'eli, sec wach' 'oj eyaj e b'ey yet' eb' eyin̈tl 'a eyojltac b'aq'uin̈.

Dt 31:18

Palta wal yel 'oj wel ch'umn 'a eb' 'a jun c'u cha, yuj smasnil maysch'olnil tzb'o eb', yet' yuj pax to tzyal sb'a eb' 'a jun tzo'n̈ comn dios.

Dt 7:21

Yuj cha, man̈ ex xiw xon 'a eb' 'anma cha, yujto a Jehová qui Diosalec, a 'ayc' 'a e cal, caw niwquil spoder, caw wal 'ay smay.

Jueces 10:6

Palta ax eb' israel, 'ix scha b'oj pax eb' maysch'olnil 'a yojltac Jehová. 'Ix laj yal sb'a eb' 'a jun tzo'n̈ yechl comn dios tzcuch Baal yet' 'a Astarot. Xlaj yalnc sb'a eb' 'a jun tzo'n̈ sdiosal eb' chon̈b' tic: atn Siria, Sidón, Moab, Amón yet' schon̈b' eb' filisteo. 'Ix yactn can eb' yoch 'emmquilal 'a Jehová.

Jueces 6:13

'Ix ta'w win Gedeón cha, xyaln 'ixtic: —'A'n niwnc'ojlal mamin, toto 'aych Jehová quet' on̈, ¿tas yuj tzjaw jun tzo'n̈ tic 'a quib'n̈ on̈? ¿'Ajtil 'ay jun tzo'n̈ milagro yaljnac can eb' qui mam quichm on̈, yic yaln eb' chajtlto a Jehová 'ix 'i'n 'elt eb' 'a Egipto? Palta ax ticnec, on̈ yactj can qui ch'ocj on̈, on̈ ya'n can 'och 'a yol sc'ab' eb' madianita, xchi.