Dt 26:14 - Chuj San Sebastian Bible

¹⁴ May jac tas xin c'ux 'a jun tzo'n̈ tic yic 'ayn 'och 'a cusc'ojlal yuj chamel, yet' 'a yic man̈ wach'c waj in sacb'tzan in b'a. May pax tas xwaltj 'a eb' chamnac. Ach Jehová in Diosal, xin yiclj smasnil tas 'ix ala.

Chuj San Mateo Bible

¹⁴ Malaj val jab'oc juntzan̈ chi' ix in va d'a sc'ual ayic ayin och d'a cusc'olal yuj chamel yed' d'a sc'ual man̈ vach'oc vaj icha yalan ley. Maj valtejoch d'a eb' chamnac. Ix in c'anab'ajej masanil tas ix ala'.

Dt 26:14 Iomraidhean Croise

Salmos 106:28

'Ix ya'n 'ejm sb'a eb' 'a Baal-peor, schin eb' no xajmb'al tz'ajx 'a jun tzo'n̈ yechl comn dios may sq'uinal.

Salmos 18:22

'Ayc'n̈ej smasnil a checnb'il 'a in nab'en, may xon 'aj 'ix wij 'el in nab'en 'a a ley.

Jeremías 16:7

Man̈x 'a mach 'oj b'onc tas tzc'uxx yuj junc chaml cha, man̈x 'a mach 'oj 'a'nc sniwnal sc'ojl eb' yican jun tzcham cha, wach'xam to a win mamb'il mto a 'ix nunb'il tzchami.

Ez 24:17

Tza c'ultac 'ab'j syail, palta man̈ a ch'oxl a cusc'ojlal chi 'icha tzyac' eb' 'anma yuj mach tzcham 'a 'a. Man̈ e'l sc'oxl a jolom, man̈ e'l a xan̈ab', man̈ a mac a sat yic tza ch'oxn 'el a cusc'ojlal, man̈ a c'ux jun tzo'n̈ tas tzc'uxx yuj cusc'ojlal, xchi 'ayin.

Os 9:4

Man̈x 'oj stac' eya'n yal uva ofrendail yuj eyi'n chan̈ Jehová, ma'oj scha pax e xajmb'al ta'. A tas 'oj e c'uxu', lajn 'icha tas tzc'uxx 'a yic 'ay junc chamel, yuj cha, a eb' 'oj c'uxnoc, man̈ wach'c 'oj 'ajcn eb' yu'uj. 'Oj b'ut'joc eb' yu'uj, palta ma'oj stac' yi'n 'at eb' jac 'a yatut Jehová.

Lv 21:1

'Ix yaln Jehová 'a Moisés 'ixtic: Al jun tzo'n̈ tic 'a eb' ya'mal 'och sti eb' 'anma', atn eb' yin̈tl can Aarón, tzal 'a eb', to matz yixtj 'el sb'a eb' 'a sat ley, yic tzc'och eb' 'a stz'ey junc chamnc 'anma 'a yol schon̈ab'.

Lv 21:11

An̈jtona', matz tac' pax yixtn 'el sb'a yuj yoch 'a 'aj 'ayc' junc chamnc 'anma', wach'xam a smam mto snun.

Lv 7:20

A junc 'anma man̈ wach'c yaji tzchin pax schib'jal no xajmb'al yic junc'ojlal tz'ajx 'ayn an Jehová in, a jun 'anma cha, yowlal tz'ijx 'el 'a scal yit chon̈ab'.

Malaquías 2:13

Ax tic, 'ay wal junx tas tze b'o'o: Caw wal tzlojx 'el yet'l xajmb'al yuj yal e sat eyoq'ui, tzex 'oc' wal si'mb'il yujto man̈xtzac schaj Jehová eyofrenda 'a tzaljc'ojlal.

Dt 13:5

Ax jun tzyalch sb'a schecb'oc Dios, mto waychnum cha, yowlal tzmilx chamoc, yujto a tz'a'n e c'ojloc yic tzeyi'n 'el e nab'en 'a Jehová qui Diosalec, atn jun on̈ 'i'nec 'elt 'a Egipto 'a 'aj 'ayn̈ec 'och mosoal. A jun 'anma cha, tzmilx chamoc, sec tzsatl jun maysch'olnil chi 'a e cal, yujto tznib'j tzex yij 'el 'a sb'eyb'al Jehová 'ix yalcn 'ayex.

Dt 15:5

toto wach' 'oj eyutc eyiclni, mto e b'eylb'an jun tzo'n̈ schecnb'il Jehová wan waln can 'ayx tic.

Dt 16:11

Tze nan jun q'uin̈ chi 'a yojltac Jehová Dios, 'a jun lugar 'oj si'l yico'oc cha. Tze mol naj jun q'uin̈ chi yet' eb' eyunnal, eb' eyisil, ewin e moso, eb' 'ix eya'mal servil, eb' levita, eb' chuc chon̈b'al, eb' meb'a 'unn chamnc xo smam, yet' eb' 'ix 'ix chamnc yichmil cajn 'a yol e chon̈b' cha.

Dt 26:13

tzeyaln junjn ex 'a yojltac Jehová Dios 'ixtic: Tox xin pojcn 'el 'a watut 'a tas ec yaj 'a smasnil tas xwij chan̈ 'a sat lum lu'um. Tox xin pojcn pax 'el yic eb' yin̈tl Leví, yic eb' chuc chon̈b'al 'ayc' 'a qui cal on̈, yic eb' meb'a 'unn chamnc smam, yet' yic eb' 'ix 'ix chamnc yichmil. Xin yiclj smasnil tas aljnac 'ayin, may junc a checnb'il tz'at satc'ojlal wu'uj, yic matz in yiclej.

Dt 26:15

'Ilt on̈ 'emt 'a satchan̈ 'aj 'aych 'ec' 'a et'l to ecn̈ej yaji. Tza'n cot a yaxilal 'a quib'n̈ an̈ israel on̈ tic on̈, yet' 'a yib'n̈ lum lum xac' 'ayn̈ tic on̈, lum caw yax sat, 'icha wal otjnac aln can 'a eb' qui mam quichm on̈, xe chi 'a 'a.