Dt 24:19 - Chuj San Sebastian Bible

¹⁹ A yic tzex polw trigo, yic tze si'n syam sb'a 'ixim, toto tzcan jun yuchc 'ixm 'a scal yoc eyu'uj, man̈ ex meltzjoc 'a e patc e sayx 'ixim. Can cab' 'ixim, sec a eb' chuc chon̈b'al 'ayc' 'a e cal, mto eb' meb'a 'unn chamnc smam, mto eb' 'ix 'ix chamnc yichmil, a eb' 'oj 'ec' si'nc 'ixim, sec 'oj yac' Jehová qui Diosalec syaxil 'a yib'n̈ smasnil tas tze b'o'o.

Chuj San Mateo Bible

¹⁹ Tato ayic van e jochan ixim e trigo, sat e c'ool scan junoc manoja ixim d'a e patic, man̈xo ex meltzaj eyic'cot ixim. Canocab' ixim ta', yic a eb' ch'oc chon̈ab'il ayec' d'a e cal yed' eb' man̈xa smam, ma eb' ix ix chamnac yetb'eyum, a eb' ol ec' sic'an ixim, yic vach' ol yac' svach'c'olal Jehová co Diosal d'a eyib'an̈ yed' masanil tas tze c'ulej.

Dt 24:19 Iomraidhean Croise

Job 42:12

'Ix ya'n pax Dios niwtjoc tas 'ay 'a Job, 'ec'b'al 'ix yutj ya'n pax 'icha xon tas 'ay 'a win 'a yic yalan̈. Yujto 'ix q'uexc'och sb'isl scalnelu win 'a chan̈lajn̈e mil, waque mil scameyo, jun mil mojn̈ smam swacax, jun mil no 'axna.

Salmos 112:9

Tzyac' eb' siylab' 'a eb' meb'a', ax swach' nab'enal eb' cha, 'oj naxoc cot 'a smasnil tiempo. Til wal 'aj 'oj b'inaxc eb' yuj swach'l cha.

Pr 14:21

Tz'och qui mulec toto tzqui patquiljec can 'el eb' quit 'anma'il, palta caw wach' quiquec, toto tz'o'ch qui c'ojlec 'a eb' meb'a'.

Pr 19:17

A mach 'ela 'a eb' meb'a', 'icha to a 'a Jehová wan ya'n junc chi majnil, ax Jehová, a 'oj 'a'noc spac jun swach' nab'enal cha.

Is 32:8

Ax pax eb' 'ela ya'n junc tas, a yela'il eb' chi nan yu'uj, yuj yela'il eb' cha, ax yi'n eb' yip.

Lv 23:22

A yic tzc'och stiempoal e poln e cebada mto e trigo, man̈ e pol 'ixm 'ayc' 'a stitac, man̈ e sic' pax 'ixm schon tzlaj can eyu'uj. A jun tzo'n̈ cha, tzeya'cn yico'oc eb' meb'a', yet' eb' chuc chon̈b'al 'ayc' 'a e cal. An Jehová e Diosal in, an tzwala, xchi Dios.

Lc 6:35

Palta ax xo tic, chamc'ojlejc eb' 'ajc'ojl yajch 'ayex. Wach'n̈j cab' tzeyutj e b'a. A yic tzeya'n junc tas majnil, man̈ e na', toto 'oj e chaxi. Toto 'ixta tzeyutj e b'a, caw niwn spac 'oj e cha'. Ax scheclj 'eli, to yunnal ex xo Dios, atn jun yel xo niwn yel'chi. 'In tzch'ox swach'c'ojlal pax 'a eb' maysch'olnil.

Lc 6:38

'A'cn̈ej tas 'a eb' eyit 'anma'il, toto 'ixta', 'oj ya'n̈j pax Dios tas 'ayx jun xo. 'Icha junc tas tz'acn tz'aj yechtaxi, tzquilx 'ejmi, tzicb'tan̈xi, masnto tzq'ue ch'ucn sti', 'ixta 'oj yutc Dios ya'n tastc 'ayex. Yujto 'icha tzeyutj e b'a 'a eb' eyit 'anma'il, 'ixta 'oj ex yutc Dios jun xo.

Dt 14:29

Sec a yic 'oj c'och eb' levita 'ayex, eb' may xon slum 'oj scha eyet'oc, mto eb' chuc chon̈b'al cajn 'a e cal, mto eb' meb'a 'unn chamnc smam, yet' eb' 'ix 'ix chamnc yichmil, atn jun tzo'n̈ e diesmo chi 'oj sc'ux eb', sec b'ut'n sc'ojl eb' eyet'oc. 'Ixta 'oj yutc Jehová qui Diosalec ya'n yaxilal 'a eyib'n̈ yet' tas tze b'o cha, xchi Moisés.

Dt 15:10

Yowlal tzex colwj 'a junc meb'a', man̈ teb'iloc tzeyac' tas tznib'ej. Toto 'ixta tzeyutej, ax Jehová qui Diosalec, 'oj yac' yaxilal 'a yib'n̈ smasnil tas tze b'o'o.

Dt 24:18

Man̈ eyac' sat 'a e c'ojol, yujto an̈ec tic, on̈ 'e'c mosoal 'a Egipto, ax Jehová Dios a on̈ 'i'nec 'elta, yuj cha, tzwaln can 'ayex, to tzeyiclj smasnil jun tzo'n̈ tic.

Dt 26:13

tzeyaln junjn ex 'a yojltac Jehová Dios 'ixtic: Tox xin pojcn 'el 'a watut 'a tas ec yaj 'a smasnil tas xwij chan̈ 'a sat lum lu'um. Tox xin pojcn pax 'el yic eb' yin̈tl Leví, yic eb' chuc chon̈b'al 'ayc' 'a qui cal on̈, yic eb' meb'a 'unn chamnc smam, yet' yic eb' 'ix 'ix chamnc yichmil. Xin yiclj smasnil tas aljnac 'ayin, may junc a checnb'il tz'at satc'ojlal wu'uj, yic matz in yiclej.

Rt 2:16

Tztac' pax tzeyactj can junjnoc 'ixm syuchn̈al xo yaj spolx cha, sec wach' tzsic' 'ix yico'oc. ¡May junc mach tztac' yowx 'a 'ix! xchi winac.

Rt 2:2

Ax 'ix Rut cha, 'ix yal 'ix 'a 'ix Noemí 'ixtic: —Tzin tew 'ayach, to tzac' in permiso tzin 'at 'a 'aj wan yoch polj cebada, toq'ue 'ay junc polm cebada tzchaj sc'ojl in si'n chac sjolm quic 'a spatctaquil, xchi 'ix. —'Ixc 'an, xchi 'ix Noemí cha.