Dt 18:10 - Chuj San Sebastian Bible

¹⁰ May cab' junc mach 'a e cal tzyac' tz'a junc yunnal mto yisil xajmb'alil. May cab' junc mach tzcuy sb'a snan 'el paxti', tzyaln yuj tas tot 'oj jawoc, mto tzyal tas tzyal 'el'ch junc lab', mto tzcuy 'ajchumal, mto wayjlil,

Chuj San Mateo Bible

¹⁰ Malajocab' junoc ex tze n̈ustz'a eyuninal silab'il. Malajocab' junoc ex tzeyac' chum, ma tze naanel tastac ol ujoc, ma ajb'aalil,

Dt 18:10 Iomraidhean Croise

Gn 44:5

jun svaso 'aj tzyu'j yal uva, tzc'anlb'an pax 'a yic tznan 'el junc paxti'? Caw wal tu tas tze b'o ax tic, xa chi 'a eb', xchi José cha.

A Ch'an̈ Schab'il Libro Yic Yab'ixal Eb' Rey 16:3

Palta an̈j sb'eyb'al eb' sreyl chon̈b' Israel 'ix sb'eylb'ej, 'ix sn̈ustz'a yunnal xajmb'alil. Lajn 'ix yutj sb'a 'icha stu sb'eyb'alil jun tzo'n̈ xo nacion̈ to pechb'il 'el yuj Jehová 'a 'aj c'ochnc eb' israel.

A Ch'an̈ Schab'il Libro Yic Yab'ixal Eb' Rey 17:15

'Ix spatquilj can 'el eb' sley, yet' strato 'ix sb'o yet' eb' smam yichm eb', yet' schecnb'il y'ajnac 'a eb'. 'Ochnc pax tza'n eb' 'a spatquil jun tzo'n̈ comn dios to may jac yel'chi. A yuj jun tzo'n̈ cha, man̈x 'a jac yel'ch eb', cojxn stu b'eyb'al jun tzo'n̈ nacion̈ 'ay 'a stz'ey eb', a 'ix sb'eylb'ej eb', atn jun tzo'n̈ 'ay yowlal sb'eylb'an eb' yuj Jehová.

A Ch'an̈ Schab'il Libro Yic Yab'ixal Eb' Rey 17:17

An̈jtona', 'ix ya'n eb' tz'a yunnal yet' yisl xajmb'al-l 'a jun tzo'n̈ comn dios cha, scuyn sb'a eb' snan 'el junc paxti', yet' 'ajchumal, 'ix swach' 'a'j 'at sb'a eb' 'a scal maysch'olnil 'a sat Jehová. 'Ixtnta 'ix yutj eb' stzuntzn cot yowl sc'ojl Dios 'a yib'an̈.

A Ch'an̈ Schab'il Libro Yic Yab'ixal Eb' Rey 21:6

Xya'n win tz'a yunnal xajmb'alil, scuyn sb'a win 'a jun tzo'n̈ xo b'eyb'al tic; atn wayjlil, 'ajchumal, tzc'umn win spixn eb' chamnac. Yel xo caw tu 'ix 'el sb'on 'a sat Jehová, caw 'ix tzuntzj cot yowl sc'ojl Dios chi 'a yib'an̈.

A Ch'an̈ Schab'il Libro Yic Yab'ixal Eb' Rey 23:24

An̈jtona', c'uxn 'ix yac' Josías satl smasnil eb' 'ajchum, eb' tzc'umn spixn eb' chamnac, eb' comn dios 'ay 'a yoltc n̈a, yet' pax smasnil jun tzo'n̈ to yajb'il yuj Jehová 'ay 'a Judá yet' 'a Jerusalén. 'Ixta xyutj yiclni jun tzo'n̈ ley tz'ib'b'il can 'a ch'an̈ libro 'ix 'ilchj yuj Hilcías ya'mal 'och sti eb' 'anma 'a Dios 'a yatut Jehová.

1 Cr 10:13

'Ixta 'ix 'aj scham Saúl yuj smaysch'olnilal. 'Ix 'och smul yujto ma'ix syiclj schecnb'il Jehová. An̈jtona', a pax 'a jun 'ix 'ix tzc'umn spixn eb' chamnc 'anma', ata xit' sc'anb'c snab'en, man̈oc 'a Jehová sc'anb'ej. Yuj cha, 'ix smiln chamoc, ax 'a David yunnal Isaí, ata 'ix 'ajx can jun yopiso Saúl cha.

2 Cr 28:3

'Ix ya'n tz'a incienso 'a lum pan̈n 'a'lic yic Ben-hinom. Ata xyac' tz'a yunnal xajmb'alil, 'icha stu b'eyb'alil jun tzo'n̈ nacion̈ satjnac 'el Jehová 'a yic mantzac tzc'och eb' israel 'a lu'um.

2 Cr 33:6

'Ix ya'n pax tz'a yunnal xajmb'al-l 'a lum pan̈n 'a'lic yic Ben-hinom, scuyn sb'a 'a jun tzo'n̈ xo b'eyb'al tic: atn wayjlil, 'ajchumal, b'almil, yet' c'umj spixn eb' chamnac. Caw wal maysch'olnil tas 'ix sb'o 'a sat Jehová, 'ix tzuntzj cot yowl sc'ojl Dios 'a yib'an̈.

Ex 22:17

Toto matz yal sc'ojl smam 'ix tzyij sb'a 'ix yet' winac, palta yowlal tzyac' win jun tumn 'a smam snun 'ix, 'icha xon sb'eyb'al eb' 'anma', yic tz'och yichmil junc 'ix cob'es.

Ex 22:18

Smasnil eb' 'ix b'alum, yowlal tzcham eb' 'ix.

Is 47:13

Til wal eb' 'a'm nab'en smolb'tzej sb'a et'oc, caw ach tzactzj c'och yet' eb'. Jaw cab' eb' tzchumn yet' c'anal chi ticnec, eb' tzalni to a yic tzyiln eb' jun tzo'n̈ c'anal, tznachj 'el junc tas yuj eb'. Tztac' sb'isn eb' 'uj yalni, tzyaln eb' tas 'oj jawc 'a eb'n̈ b'aq'uin̈, jaw cab' eb' wul ach scolo'.

Jeremías 27:10

Palta a tas tzyal eb' cha, 'esn̈j smasnil. A tas 'oj eyic' 'a 'a, to 'oj eyijx 'at 'a junc xo chuc nacion̈al. An 'oj ex in pechcn 'ati, ata 'oj e chami.

Jeremías 27:9

Yuj wal cha, man̈ e cha eyab' tas tzyal jun tzo'n̈ eb' tzaln 'ayex to matz eya'ch e b'a 'a yaln̈ schecnb'il win Nabucodonosor sreyl Babilonia. A eb' tzaln jun tzo'n̈ cha, atn eb' tztac' snan 'el paxti yalni, eb' tztac' yaln tas tzyal 'el'ch junc wayich, eb' wayjel, eb' tzalni tas 'oj ujc b'aq'uin̈.

Jeremías 32:35

An̈jtona 'ix sb'o chan̈ eb' yet'l xajmb'al yic Baal 'a span̈nil lum yic Ben-hinom. Ata tzyac' tz'a eb' yunnal yet' yisl xajmb'al-l 'a Moloc. 'Ixta wal x'aj yoch smul eb' 'aj Judá, yic sb'on eb' jun tzo'n̈ tas to man̈oc in xwala, a tas tzb'o eb' cha, may tas x'ec' xon jac 'a in nab'en.

Jeremías 7:31

Ax 'a lum span̈nil lum Ben-hinom, ata sb'o eb' jun yet'l xajmb'al yic Tofet yic tzya'n tz'a eb' yunnal yet' yisl ta'. Palta man̈oc in xwac' sb'o eb', may 'aj 'ix 'ec' 'a in nab'en jab'oc.

Lv 19:26

Man̈ e chi no chib'j matz 'el schiq'uil. Man̈ e cuy e b'a e nan 'el paxti', mto 'ajchumal.

Lv 19:31

Man̈ e c'anb'c e b'a 'a eb' tzyal jelnal sb'a, mto 'a eb' 'ajchum, sec wach' matz ex juw 'el yuj eb'.

Lv 20:6

Toto 'ay mach tz'at sc'anb'c sb'a 'a eb' 'ajchum mto 'a eb' tzyal to tzc'umj spixn eb' chamnc 'anma', tzyiclni tas tzyal eb', an xo 'oj wac' yowlal 'a 'a, ax in satn 'el 'a scal yit chon̈ab'.

Miqueas 5:12

'Oj in satl smasnil eb' b'alm 'a e cal. Man̈x 'a junc eb' 'ajchum 'oj wactc cani.

Malaquías 3:5

An Jehová tztac' wuj smasnil, an tzwal 'ixtic: 'Oj in jaw 'a e cal wul ex in b'eyc'ojloc. An wal 'oj wac' testigoal in b'a yuj jun tzo'n̈ eb' tic: atn eb' 'ajchum, eb' tzb'on 'ajmulal, eb' tz'a'n 'es, eb' man̈ tz'acnoc tzyutj stojn smajan, eb' tz'ixtn eb' 'ix chamnc yichmil yet' eb' meb'a 'unn chamnc smam, eb' matz b'onyaj eb' chuc chon̈b'al, yet' pax smasnil eb' may jac wel'ch 'a sat.

A Tas Sc'ulejnac Eb' Schecab' Jesús Hechos 19:19

'Ay pax nan̈l eb' creyente ya'ljnac wayjlil. 'Ix yi'n cot eb' jun tzo'n̈ yun̈al 'aj tzcuy eb' jun wayjlil cha. 'Ix sn̈usn tz'a eb' 'a sat eb' smasnil. 'Ix sb'isn 'el eb', jantc stojl jun tzo'n̈ ch'an̈ un̈ cha. 'Aym junc 50,000 dracma 'ix 'el'chi.

A Tas Sc'ulejnac Eb' Schecab' Jesús Hechos 8:9

Palta ata 'ay jun winc Simón sb'i. Caw tz'ixtx paxti eb' 'anma yuj winac, yujto tzyalch sb'a win wayjlil 'a scal eb'.

Gl 5:20

Tzyaln sb'a eb' 'a jun tzo'n̈ tzlaj yalch sdiosaloc. Tzya'lj eb' laj cob' sb'alnoc junc xo mach. Tz'och eb' 'ajc'ojlal 'a jun jun, 'a'm owl eb'. Tzchichn 'och eb' 'a junc xo mach yuj tastc 'ay 'a 'a. C'un scot yowl eb'. Tznib'j eb' axn̈ej 'ay yel'chi. Tznib'j eb' tzlaj spojl sb'a, chucchc tz'aj junjn c'aj eb'.

Dt 12:31

Man̈ 'ichaoc tzyutj sb'a eb' cha, man̈ 'ixta'oc tzeyutj e b'a 'a Jehová, yujto a jun tzo'n̈ cha, yajb'il 'el eb' yuj Jehová Dios. A jun tzo'n̈ yajb'il 'el yuj cha, atn sb'eylb'ej eb' 'anma cha, yic tzyi'n 'ejm sb'a eb' 'a sdiosal. 'Ay wal eb' yel may snab'en, xyac' eb' tz'a yunnal yet' yisl xajmb'al-l 'a sdiosal cha.

A Ch'an̈ B'ab'el Libro Samuel 15:23

A tenmtaquil, lajn smul-l yet' eb' tztac' snan 'el junc paxti'; ax pital, lajn wal smul-l 'icha eb' tz'em n̈ojn 'a junc yechel. Yujto xa patquilj can 'el tas xyal Jehová, yuj cha, ach spatquilncan 'eli, ach yi'n 'el 'a reyal, xchi Samuel.

A Ch'an̈ B'ab'el Libro Samuel 28:3

A yic scham Samuel, smasnil eb' israel 'o'n̈c eb' yu'uj, smucn eb' 'a schon̈ab' atn 'a Ramá. Ax Saúl yajn̈ej spechn 'el eb' cob' jeln snan 'el junc paxti', yet' eb' tzcob' yal to tzc'umj spixn eb' chamnc 'anma 'a scal chon̈b' Israel.

A Ch'an̈ B'ab'el Libro Samuel 28:7

Yuj cha, 'ix yaln Saúl 'a eb' schecb' 'ixtic: —Sayc junc 'ix 'ix to tzc'umn spixn eb' chamnac, sec wach' a 'a tzin 'at in c'anb'c in nab'en, xchi winac. 'Ix ta'w eb' schecb' 'a 'a, xyaln eb' 'ixtic: —'Ay jun 'ix tztac' yuj 'a Endor, xchi eb'.

A Ch'an̈ B'ab'el Libro Samuel 28:8

'Ix sjeln 'el Saúl spichl yic sreyal, sec matz nachj 'el yuj eb' 'anma', mach winac. 'Ix 'at chawn̈ xo winc yet'oc, yic tz'at yilnc jun 'ix chi 'a 'ac'wal. Xc'och eb' 'a 'ix, 'ix yaln win 'ixtic: —Tzin tew 'ayach, tzin nib'j tzawtj spixn jun mach 'oj wal tic, xchi.

A Ch'an̈ B'ab'el Libro Samuel 28:9

—Ach tic ojtac tas 'ix 'aj eb' jeln snan 'el junc paxti', yet' eb' tzc'umn spixn eb' chamnac, to 'ix pechx 'el eb' 'a yol qui chon̈b'ec yuj Saúl. ¿Tas yuj tza say tas tzin 'aj wajx ganar yic tzin milx chamoc? xchi jun 'ix cha.