A Scarta San Pablo D'a Eb' Aj Colosas 3:16 - Chuj San Sebastian Bible

¹⁶ Tzin nib'j tze wach' 'a'j 'och e nab'en 'a spaxti Cristo. Caw jeln tzlaj eyutc e cuylan e b'a, tzlaj e jucb'tzan e b'a. Tzlaj e b'itnoc jun tzo'n̈ salmo, yet' himno, yet' jun tzo'n̈ xo b'it yic Dios. A yic tzex b'itni, tzeyal wach' paxti 'a Dios 'a smasnil e c'ojol.

Chuj San Mateo Bible

¹⁶ In gana a val slolonel Cristo b'aj tzeyac'n̈ejoch e pensar. Tze c'ayb'an e b'a, tzeyac'lan yip e c'ool junjun ex d'a masanil sjelanil Cajal chi'. Slaj e b'itan juntzan̈ salmo, himno yed' juntzan̈xo b'it yic Dios yuj eyac'an yuj diosal d'ay d'a smasanil e c'ool.

A Scarta San Pablo D'a Eb' Aj Colosas 3:16 Iomraidhean Croise

A Ch'an̈ B'ab'el Libro Yic Yab'ixal Eb' Rey 3:28

'Ix yab'n smasnil chon̈b' Israel, yuj tas 'ix yutj win rey sb'onyaj jun owl cha, yuj cha, caw wal niwn yel'ch win rey 'a sat eb', yujto 'ix 'ajx sjelnal yuj Dios, yic tzb'onyaj junc mach.

1 Cr 25:7

A sb'isl eb' cuywnac 'a b'it yic tzb'itn eb' 'a Jehová, yet' eb' yican eb', 'ay 288 eb' 'a smasnil.

Nehemías 12:46

Yujto a 'a yol stiempoal David yet' Asaf, a eb' tzb'itni 'ay syajlil eb', atn eb' tzb'itnan wach' paxti yet' alj yuj diosal 'a Dios.

Job 23:12

'Ix in yicljn̈ej sley, 'ec'b'al xo wal yel'ch schecnb'il 'ayn 'a yib'n̈ tas tzin c'uxu.

Salmos 119:11

Tzin mol a paxti 'a in nab'en, sec matz 'och in mul 'ayach.

Salmos 119:54

A jun tzo'n̈ a checnb'il tic, a eb' xwa'ch in b'itc 'a tzann̈j 'aj 'ayn 'eq'ui.

Salmos 138:1

Mamin Jehová, wal 'a smasnil in c'ojol tzwaln wach' paxti 'ayach. 'Oj ach in b'itnoc 'a yojltac eb' ángel.

Salmos 28:7

Mamin Jehová ach 'aych 'och wipoc, 'aych 'och wen̈loc 'icha junc q'ue'en; ach wa'ch yipc in c'ojol, caw ach colwjn̈ej wet'oc. Yuj cha, caw wal tzin tzalji, 'oj in b'itnoc a b'i, ax waln yuj diosal 'ayach.

Salmos 32:7

A 'aych tzin col in b'a, ach tzin a tan̈wj 'a yol sc'ab' tas 'ay smay, 'oj 'el waw ach in b'itnan yuj in colnb'il 'ix ac'a.

Salmos 71:23

'Oj in tzalj ach in b'itnani, yujto ach in a colo.

Pr 14:8

A sjelnal eb' jelan, a tz'a'n yojcoc 'el eb' tas tzb'o'o, ax sman̈ nab'enal eb' tu snab'en, a tz'ixtn 'el eb'.

Pr 18:1

Toto man̈ wach'c cajc yet' quit 'anma'il, cojxn wal tas tzqui nib'jec 'ochi, a chi tzqui sayc 'eq'ui, ax wach' nab'en tzcob' 'ajxc 'ayn̈ec, man̈xtzac qui chajec cab'i'.

Cantares 1:1

A jun tzo'n̈ tic, sb'it rey Salomón, man̈x jantcoc swach'l yalxi.

Is 10:2

Matz e b'o yaj eb' meb'a 'anma', matz e chaj eyab' tas tzyal eb' tz'ixtxi. Caw wal tz'ixtx eb' wit chon̈b' tic eyu'uj, tzlaj eyelc'n tas 'ay 'a eb' 'ix 'ix chamnc yichmil yet' 'a eb' meb'a 'unin.

Is 26:1

A 'a yic jun c'ul cha, 'oj b'itnaxc jun b'it tic 'a yol smacb'en Judá 'ixtic: 'Ay wal jun qui chon̈b'ec caw 'ay yip 'aj caw wach' qui colnec qui b'a, caw a Jehová tzon̈ colni, yujto a 'icha muro yaji.

Is 30:29

Palta ax xo pax tic, to 'oj e b'itni, 'icha 'a yic 'aych q'uin̈ yic snanb'il yelt eb' quit israelal 'a libre, caw tzaljc'ojlal eyico', 'aych b'it yet' 'amay yic tzex 'at 'a lum tzaln yic Jehová, atn qui Colmal an̈ israel on̈c tic.

Is 5:1

A ticnec 'oj in b'itnoc jun in wach'c'ojl 'a scal in b'it yet' yawb'en uva. A jun in wach'c'ojl cha, 'ay jun slum caw wal yax sat, ata 'ay yawb'en uva.

Jeremías 15:16

A yic tzaln a paxti 'ayin, caw xin chajn̈ej wab'i', an̈j 'aych in tzaljc'ojlaloc, yujto ec in. Mamin Jehová, ach in Diosal, tztac' 'oj smasnil.

Mt 26:30

Xlajw sb'itnan eb' jun b'it 'a Dios, x'elt eb', 'ix 'at eb' 'a tzaln Olivo.

Lc 2:51

Xlajw cha, xpax yet' eb' 'a Nazaret. Yiclumn̈ej xyutj sb'a 'a eb', 'icha xon sley. Ax snun cha, smol jun tzo'n̈ chi 'a snab'en, caw tznab'tan̈ej.

Jn 15:7

Toto junn̈j tzex 'ajcn wet'oc, toto 'aychn̈ej e nab'en 'a in paxti', c'anc tas tze nib'ej, 'oj 'ajxoc 'ayex.

Ro 10:17

An̈ec tic, 'ix cab' jun wach' 'ab'x 'ix alx 'ayn̈ec. Yuj cha, tzca'c 'och 'a qui c'ojol. A jun 'ab'x 'ix cab'c tic, atn yab'xil Cristo.

Ro 15:14

Ex wu'tac, ex wanab', wojc xoni, to caw wach' e nab'en, caw jeln ex 'a yic Dios. Wojc paxi, to caw tztac' laj eya'lanc e nab'en ta'.

1 Co 14:15

Yuj cha, ¿tasm tzqui b'o tze na'a? Man̈ cojnoc tzon̈ leslwiec yet' qui pixan. Yowlal tzon̈ leslwiec pax yet' qui nab'en, sec tznachj 'el cujec. An̈jtona', a yic tzon̈ b'itnec, man̈ cojnoc tzon̈ b'itnec yet' qui pixan. Yowlal tzon̈ b'itnec pax yet' qui nab'en, sec tznachj 'el cujec.

1 Co 14:26

Yuj cha, ex wu'tac, ex wanab', 'oj wal't 'ayex, tas tzeyutj e b'a ta', a yic tzeyamn e b'a. Comnoc 'ayx tzex b'itni, 'ayx tzeyac' junc cuynb'il, 'ayx tzeyal-l junc tas tz'ajx yuj Dios 'ayex, 'ayx tzex paxtin 'a junc chuc ti'al, 'ayx pax tzeyal-l tas tzyal 'el'ch jun chuc til cha. Comnoc tzlaj 'och e te'nal yuj smasnil tas tze b'o cha.

Ef 1:17

A sDiosal Cajlil Jesucristo, atn qui Mamc caw niwn yel'chi. Tzin c'an 'a 'a, sec 'oj yac' sjelnal 'ayx yuj Yespíritu, sec 'oj wach' nachjc 'el eyu'uj, tas 'ac'b'il cojcoquec 'eli. 'Ixta to b'i'an, ax e wach' 'ojcan 'el qui Mam Dios.

Ef 5:17

Man̈ eya'ch e b'a man̈ nab'enal, cuyc e b'a sec tznachj 'el eyu'uj, tas wal tznib'j Dios tzqui b'o'ec.

Ef 5:19

A yic tzlaj eyamnc e b'a, tze b'itnej jun tzo'n̈ salmo, yet' himno, yet' jun tzo'n̈ xo b'it yic Dios. A yic tzex laj b'itni, tzeyal wach' paxti 'a Cajlil 'a smasnil e c'ojol.

Ef 5:26

yic on̈ yi'nec 'och yico'oc. A yic on̈ 'emc 'a yol a', 'ix 'ijx 'el qui mulc yuj spaxti'.

A Scarta San Pablo D'a Eb' Aj Colosas 1:28

Atn Cristo tzcal-l yab'xil on̈. Tzcham wal caln yab'xil 'a junjn eb' 'aj tzon̈ 'ec' on̈. Tzon̈ cuywj pax on̈, sec tzwach' jelnb'i junjn eb' 'a yic Dios. Yujto tzqui nib'j on̈, to caw tzte'nb'i snab'en junjn mach 'a yol sc'ab' Cristo.

A Scarta San Pablo D'a Eb' Aj Colosas 1:9

Yuj cha, yictax cab'n eyab'xil on̈, ma'ix cactj can xon qui leslwi eyuj on̈. To tzqui c'an 'a Dios eyuj on̈, sec a tz'a'n e jelnal yuj Yespíritu, tzya'n nachjc 'el smasnil yic Dios eyu'uj, sec wach' 'oj eyojcoc 'el si'mb'il, tas tznib'j 'ayex.

A Scarta San Pablo D'a Eb' Aj Colosas 4:6

Wach'n̈j tzeyutj e paxtini, tze ch'oxn e wach'c'ojlal 'a eb'. Toto 'ixta', 'oj nachjc 'el eyu'uj, tas 'oj eyutc e pacn tas tzc'anb'j junjn eb' 'ayex.

1 Ts 1:8

Eyu'uj, 'ix pucb't yab'xil Cajlil 'a junjn lugar. C'uxn xlaj yab' eb' 'a Macedonia yet' pax eb' 'aj Acaya, chajtlto caw tzeya'ch Dios 'a e c'ojol. Man̈ cojnoc eb' x'ab'ni. 'Ix laj yab' pax eb' 'a junjn lugar. Yuj cha, man̈x yowlalc an̈ tzcal-l eyab'xil 'a scal eb' 'anma 'on̈.

1 Ts 4:18

Yuj cha, junjn ex, tzlaj eya'lac e nab'enoc yet' jun tzon̈ cuynb'il tic.

2 Ts 3:15

Palta matz tac' eyoch 'ajc'ojlal 'a eb'. Tzeyac' wal snab'enoc eb', yujto eyit creyenteal eb'.

1 Ti 6:17

Ax eb' creyente rico yuj tastc 'ay 'a yolyib'n̈q'uinl tic, tzal jun tzo'n̈ checnb'il tic 'a eb'. Tzcham wal aln 'a eb', to matz tac' sb'an̈n sb'a eb'. Matz tac' ya'n 'och eb' sricoal yipc sc'ojol, yujto may jac syal tz'aj slajw pax 'eq'ui. Tzaln pax 'a eb', to cojxn Dios pitzan, a tzya'ch eb' yipc sc'ojol. Yujto a tz'a'n smasnil tas 'ayon̈, sec tzon̈ tzalj yet' jun tzo'n̈ cha.

2 Ti 3:15

Yictax a cot'ch 'a yune'al, cuywnacch 'a Ch'an̈ Un̈ yic Dios. A Ch'an̈ tz'a'n jelnb'oc qui nab'en, sec tzon̈ colchji, yic tzca'n 'och qui c'ojl 'a Cristo Jesús.

Tito 3:6

Yuj qui Colmal Jesucristo, 'ix ya'n cot Dios Yespíritu 'ayn̈ 'a smasnil sc'ojol,

Santiago 1:5

Toto 'ayn̈ 'ayt palta qui jelnal, qui c'anc 'a Dios. 'Oj yac'a', yujto yelc'ojlal tzyac' 'ayn̈ec qui masnil, toto tzqui c'anc 'a 'a. Matz cot yowl 'ayn̈ec.

Santiago 3:17

Palta ax jun jelnal tzcot 'a satcha'an̈, man̈ 'ichcta tz'aji. Toto 'aych jun jelnal tic 'ayn̈ec, may qui paltailec 'a sat Dios, junc'ojlal xoj tzcutjec qui b'a. 'Emmquilal tzcutjec qui b'a. Yiclum on̈cn̈ej 'a junc tas. Caw tz'o'ch qui c'ojlec 'a eb' quit 'anma'il, 'ela tzlaj cutquec qui b'a 'a eb'. Man̈ qui chab'c'ojloquec eb' quit 'anma'il, man̈ chab'satoc tzcutjec pax qui b'a 'a eb'.

Santiago 5:13

Toto 'ayx wan eyab'n syal ticnec, leslwan̈ec. Toto 'ayx 'ay pax e tzaljc'ojlal, b'itnan̈c 'a Dios.

1 Jn 2:14

Ax xo 'ichm creyente ex, tzin tz'ib'j 'at 'ayex, yujto eyojc xo pax jun 'ayc' xoni, yictax mantzac b'o yolyib'n̈q'uinl tic. Ax xo te'n exx 'a e creyenteal, xeya'ch spaxti Dios 'a e c'ojl wet'oc. 'Ix can pax win diablo 'a yaln̈ eyu'uj. Yuj cha, tzin tz'ib'n pax 'at 'ayex.

1 Jn 2:24

Yuj cha, a jun cuynb'il xcab'ec, yictax on̈ 'ochc yico'oc Dios, yowlal an̈j tzca'c 'och 'a qui c'ojl 'a smasnil tiempo. Toto 'ixta tzcutjec ca'n 'och 'a qui c'ojol, to 'ixta', junn̈j cajc yet' qui Mam Dios, junn̈j cajc pax yet' Yunnal.

1 Jn 2:27

A Jesucristo 'a'jnac Yespíritu 'ayn̈ junjn on̈ec. Yuj cha, man̈ yowlalc chuct junc 'anma tzon̈ cuynec, yujto a Yespíritu tzon̈ cuynec 'a smasnil tas. A jun tzo'n̈ cuynb'il tzyac' 'ayn̈ec, caw yel, may junc 'es 'aych 'a scal. Yuj cha, yowlal junn̈j tzon̈ 'ajc yet' Cristo, yujto 'ixta yaj yaln Yespíritu 'ayn̈ec.

2 Jn 1:2

'Ay qui chamc'ojlal 'ayx on̈, yujto a jun cuynb'il caw yel tic, 'aych 'a qui c'ojlec 'a jun 'ejmn̈ej.

Apoc 14:3

'Ay eb' tzb'itnan jun 'ac' b'it 'a yojltac sdespacho Dios, yet' 'a yojltac eb' querubín schan̈wn̈il, yet' pax 'a yojltac eb' 24 'ichmtac winac. May junc mach tztac' sc'ay jun b'it chi yu'uj. Cojxn eb' 144 mil colchjnac 'el 'a scal eb' 'anma 'a yolyib'n̈q'uinal, cojxn eb' tztac' sb'itnani.

Apoc 15:3

'Ix sb'itnan eb' sb'it Moisés, atn jun schecb' Dios. 'Ix sb'itnan pax eb' sb'it jun tzcuch Calnelu. Xchi jun b'it chi 'ixtic: Mamin, ach qui Diosal, smasnil tas tztac' o'oj. Caw niwn yel'ch jantcn̈ej tas xa b'o'o, xcaw sat qui c'ojl quiln on̈. Caw yel, tojln̈ej a b'eyb'al, sReyl ach junjn nacion̈.

Apoc 19:10

Xlajwn̈ej cha, in 'em cumn 'a yojltac jun ángel cha, xwaln in b'a 'a 'a, palta xyaln 'ixtc 'ayin: —Man̈ a b'o 'ixtic. Yujto an tic schecb' in pax Dios et'oc, yet' pax eb' o'tac te'n tzyutj ya'n testigoal sb'a yuj Jesús. A 'a Dios tzal a b'a. A eb' tz'ajx paxtinc yuj Dios, atn eb' tzaln 'el yab'xil Jesús, xchi.

Apoc 5:9

Ax eb' 'ichm winc cha, 'ix sb'itnan eb' jun 'ac' b'it 'ixtic: Ach tic, a moj xa chaj jun ch'an̈ un̈ tic, yic tza n̈i'chtan seyoal. Yujto ach milb'ilch chamoc, a mann 'och eb' 'anma yico'oc Dios yet' a chiq'uil. Niwn eb' 'a junjn 'in̈tal, 'a junjn ti'al, 'a junjn chon̈b'al, yet' 'a junjn nacion̈al.