Apoc 6:8 - Chuj San Sebastian Bible

⁸ Ax xwilni, 'ayc' junx chej caw c'an. A jun 'ay q'ue 'a yib'an̈, atn Chamel. Ax jun lugar 'aj 'ay spixn eb' chamnac, 'icha to a tza'n 'och yu'uj. A jun cha, 'ix 'ajx spoder 'a yib'n̈ eb' 'anma 'a yolyib'n̈q'uinal. Chan̈c'aj 'oj 'el eb'. Palta 'ay junc'aj eb' 'oj milxc chamoc. 'Oj cham eb' yuj owal, mto yuj wejel, mto yuj yab'il, mto yuj jun tzo'n̈ no chiwjum noc' 'ay smay.

Chuj San Mateo Bible

⁸ Axo ix vilani ayec' junxo noc' c'anc'an chej. A jun ayq'ue d'a yib'an̈ noc', Chamel sb'i. Axo jun lugar b'aj ayec' spixan eb' chamnac, tzac'anoch yuuj. A jun Chamel sb'i chi', ix ac'ji spoder smilancham junjun anima d'a scal chan̈tacvan̈ eb' anima d'a yolyib'an̈q'uinal tic. Ay eb' ol miljoccham d'a oval, ay eb' ol cham yuj vejel, ay eb' ol cham yuj yab'il, ay eb' ol cham yuj juntzan̈ noc' chium noc'.

Apoc 6:8 Iomraidhean Croise

Pr 5:5

Toto jun tzach 'ec' yet' 'ix, 'oj ach yi't 'ix 'a chamel; a jun sb'e 'ix cha, tojl sc'och 'a chaml cha.

Is 25:8

'Oj satl Jehová chaml 'a jun 'ejmn̈ej, ax sucn 'el yal sat smasnil eb' 'anma'. 'Oj satl pax sq'uixwel eb' schon̈b' 'a smasnil yolyib'n̈q'uinl tic, yujto 'ixta yaj yaln cani.

Jeremías 14:12

Wach'xam tz'och eb' 'a c'ajb'c'ojlal, palta ma'oj in ta'w 'a eb'. Wach'xam caw niwn xajmb'al tzyac' tz'a eb', wach'xam pax caw niwn sat 'awb'en tzyij cot eb' ofrendail 'ayin, palta ma'oj in tzalj yet' eb'. 'Oj wac' satl eb' yuj owal, yuj wejel, yuj yab'il, xchi 'ayin.

Jeremías 16:16

Palta a yic mantzac uj jun cha, 'oj wi' cot eb' 'ajc'ojl 'a eb' israel yic tzwul yamchjoc 'at eb' yuj eb'. 'Icha tzyutj eb' yamn chay syamn no chay yet' schim, mto 'icha tzyac' eb' ma'm noc' tz'ec' 'a lum tzalctac, tz'ec' saync eb' no 'a yoltc n̈aq'ue'en, yet' 'a sjatlil eb' q'uen q'ue'en, 'ixta 'oj wutc eb'.

Jeremías 16:4

'Oj cham eb' yuj tzann̈j yab'ilal, may mach 'oj 'oc' yuj eb', man̈x 'a mach 'oj mucnc eb'. T'ocquixtac 'oj 'ajcn sniwnal eb' 'a sat lum 'icha tzyac' stza no noc'. A owal yet' wejel, a 'oj milnc eb'. 'Oj chixc sniwnal eb' yuj no 'usej, yet' yuj no calte'al noc', xchi 'ayin.

Jeremías 24:10

'Oj wa' cot owal, wejel, yet' yab'il 'a scal eb'. Man̈x 'a junc eb' 'oj can 'a sat lum lum 'ix wac' 'a eb', yet' 'a eb' smam yichm eb', xchi Dios.

Jeremías 29:17

An Jehová in, tztac' wuj smasnil, an tzwala: 'Oj wa't owal, wejel, yet' yab'il 'a scal eb'. 'Oj wac' yajxoc eb' 'icha jun tzo'n̈ te higo c'alxo, caw juwnac xo, man̈xtzac stac' sloxi.

Jeremías 43:11

A yic 'oj jawoc, 'oj satl jun nacion̈ Egipto tic yu'uj. A mach to a yab'il xon 'oj milnoc, atn yab'il chi 'oj milnoc, a mach to 'oj 'ijxoc 'at xon 'icha presoal, 'oj 'ijxoc 'at 'icha presoal, a mach to a 'a owl xon 'aj 'oj chamoc, atn 'a owl chi 'oj chamoc.

Ez 29:5

'Oj in julcn 'at 'a lum cusltac lum yet' e no chay tzq'uet 'a yol a cha, man̈x 'a mach 'oj si'n cha'an̈, may mach 'oj mucnoc. 'Oj wac' schib'joc no calte'al noc' yet' e no 'usej.

Ez 5:12

A junc'aj 'anma 'ayx tic, 'oj cham eb' yuj yab'il yet' yuj wejl 'a yol chon̈ab'. Ax junc'aj xo eb', 'oj tzu'xoc cham eb' yuj eb' 'ajc'ojl yajch 'ayx 'a sti 'el chon̈ab'. Ax eb' yoxc'ajil, 'oj in pechcn 'at eb' 'a scal jun tzo'n̈ xo nacion̈. Ax wi'n q'uet wespada 'a yol yet'ul, ax woch tza'n yuj eb'.

Os 13:14

¿Tom 'oj ex in colcn 'el 'a yol sc'ab' yet'l chamel? Ma'ay. An 'oj ex wac' xiw 'a chaml cha, ax e satx 'el yu'uj. Man̈x 'oj 'o'ch pax in c'ojl 'ayx ex 'aj Efraín.

Habacuc 2:5

A eb' 'anma tz'u'w 'an̈, caw wal tzb'an̈ sb'a eb' yuj te 'an̈ cha. Matz 'och wan eb' sayn 'ec' tas tznib'ej. Lajn wal eb' 'icha lum jul 'aj tzmucx eb' 'anma tzchami, may tz'aj sb'ut'j lum jul chi yuj eb' tzcham cha. 'Ixta pax eb' caldeo tzlaj macnc 'ec' eb' lum nacion̈ yico'oc.

Zacarías 6:3

Jun yoxil, sac e no chej to'jnac, ax jun schan̈il, tz'ib'quintac e no chej chi to'jnac.

Mt 11:23

An̈jtona', 'ixta 'ex 'aj Capernaum. Tzcob' e na', to smoj 'oj e c'och 'a satcha'an̈. Palta ton̈j 'oj eyemcn 'a scal eb' chamnac. Octom a 'a Sodoma b'ob'il jun tzo'n̈ milagro 'icha xb'o 'a e cal. To 'ixta', snajnac sb'a eb', ax jun schon̈b' eb' cha, an̈ja 'ayc' ticnec.

Mt 24:7

'Ay jun tzo'n̈ niwc chon̈b' 'oj yac' owl sb'a yet' yit niwc chon̈b'al; ax ya'n owl sb'a eb' yajl yet' eb' yit yajlil. Til wal 'aj 'oj yamchjc eb' 'anma yuj yab'il, 'oj jawc pax wejl 'a yib'n̈ eb'. Til wal 'aj 'oj 'ec' pax quixcab'.

1 Co 15:55

Ach chamel, ¿'aj 'ay a ganar ticnec? ¿'Aj 'ay a poder tzac' milwjoc ticnec? xchi 'a Ch'an̈.

Apoc 1:18

Pitzn in. Wach'xam in chami, palta pitzn in 'a jun 'ejmn̈ej ticnec. An tic, yajl waj 'a yib'n̈ chamel, yajl pax waj 'a jun lugar 'aj 'ay spixn eb' chamnac.

Apoc 12:4

Ax yet' sn̈e, 'ix sloc cot jun tzo'n̈ c'anal 'a satcha'an̈. Jab'xoj man̈ spacloc x'aj syamchj jun tzo'n̈ c'anal chi yu'uj, sjuln 'ejm 'a yolyib'n̈q'uinal. Xlajw cha, xc'och 'a yojltac jun 'ix 'ayx tz'i'n cha, yujto tznib'j schi jun 'unn wan yalj cha.

Apoc 9:15

Yuj cha, x'at sjiync 'el chan̈wn̈ ángel cha. Xlajw cha, x'at eb' milj cham 'anma'. Jab'xoj man̈ spacloc eb' 'anma 'a yolyib'n̈q'uinl 'ix cham yuj eb'. Caw checl xo yaj yorail, sc'ual, yujal yet' yab'lilal 'aj tzmilwj eb' cha.

Apoc 9:18

Ax eb' 'anma 'a yolyib'n̈q'uinal, jab'xoj man̈ spacloc eb' xcham yuj 'oxe yailal chi x'elt 'a sti e no cha, atn c'ac', tab', yet' azufre.