Apoc 2:13 - Chuj San Sebastian Bible

¹³ [Wojtac, jantcn̈ej tas tze b'o'o.] Wojtac, to 'ayx 'ec' 'a jun chon̈b' 'aj tzyac' Satanás yajlil, palta an̈ja yiclum ex 'ayin. A Antipas, caw yel ya'jnac testigoal sb'a wu'uj. 'Ix milx cham 'a e cal, 'a 'aj 'ayc' Satanás cha, palta an̈ja ma'ix eyactj can eya'n 'och e c'ojl 'ayin.

Chuj San Mateo Bible

¹³ Vojtac b'ajtil ayex eq'ui. Ay ex ec' d'a jun chon̈ab' b'aj syac' yajalil vin̈ Satanás, palta an̈eja' tzin e c'anab'ajej. A vin̈aj Antipas, yac'nac val testigoal sb'a vin̈ vuuj. Milb'ilcham vin̈ d'a e cal b'aj ayec' vin̈ Satanás chi', palta an̈eja' tec'an ix eyutej e b'a d'ayin.

Apoc 2:13 Iomraidhean Croise

Mt 10:23

A yic tzya'n eb' stul 'ayx 'a junc chon̈b' 'aj 'ayx 'eq'ui, tzex 'at 'elc 'a junc xo chon̈ab'. Wal yel tzwal 'ayex, a yic mantzac ex lajw 'ec' 'a smasnil jun tzo'n̈ schon̈b' eb' quit israelal, ax in japx an 'Ochnc in 'Anmal tic.

Mt 24:9

Ax tic, 'oj eyajx 'och 'a yol sc'ab' eb' yajal, sec 'oj eyab' syal yuj eb', 'oj laj ex smil cham eb'. Smasnil 'anma 'oj laj chichnc 'och 'ayx wu'uj.

Mt 4:10

Xlajw cha, xyaln pax Jesús 'ixtc 'a winac: —Ach Satanás, 'ij 'el a b'a 'a in tz'ey, yujto tzyal 'ixtc 'a Ch'an̈ U'un̈: Cojn 'a Cajlil qui Diosalec tzeyal e b'a, cojn 'a tzeyac' servil, xchi 'a Ch'an̈, xchi Jesús 'a winac.

Lc 21:17

Ax eb' 'anma smasnil, 'oj chichnc 'och eb' 'ayex, yujto 'aych e nab'en 'ayin.

A Tas Sc'ulejnac Eb' Schecab' Jesús Hechos 22:20

Ax win Esteban, win aljnac 'el ab'xil, yic sjulq'uenan eb', locn in ta', an moljnac spichl eb', yic sjuln cham eb' winac, xin chi 'a Cajlilec.

A Tas Sc'ulejnac Eb' Schecab' Jesús Hechos 9:14

A ticnec 'ix jaw win 'a tic. 'Ix 'ajx yopiso yuj eb' sat ya'mal 'och qui ti 'aych on̈, yic tzyamn win jantcn̈ej eb' tzyal sb'a 'ayach, xchi.

1 Ts 5:21

Jantcn̈ej jun tzo'n̈ cuynb'il tzalx 'ayex, cham wal e nani, toto yel, mto ma'ay. A wal 'a jun tzo'n̈ yel, ata tzeya'ch e nab'en.

1 Ti 5:8

Toto 'ay eb' creyente matz colwj 'a smam snun, 'a smam yu'tac, yet' 'a eb' 'ay 'a yol yatut, may jac yel'ch scuynb'il Cristo 'a eb'. 'Ec'b'al xo stul eb' 'a yib'n̈ eb' man̈ creyenteoc xoni.

2 Ti 1:13

A jun tzo'n̈ cuynb'il wa'jnac 'ayach, caw yel, atn scuynb'il Dios. Yuj cha, caw tza b'eylb'ej jun tzo'n̈ cuynb'il cha. A ticnec, junxn̈ej caj yet' Cristo Jesús. Yuj cha, caw tza'ch 'a a c'ojol. 'Ay cab' pax a chamc'ojlal 'a 'a.

2 Ti 2:12

Toto tzca' techjoc syal yet'oc, 'oj coch yajlil yet'oc. Toto 'ayn̈ tzcala, to man̈ on̈ yico'oc, ax yaln paxi, to man̈ on̈ yico'oc jun xo.

A Ch'an̈ Carta D'a Eb' Hebreo 10:23

Caw te'n tzcutjec ca'n 'och yipc qui c'ojl jun 'aj tzcalc qui b'a. Man̈ chab'c'ojlalc tzcutjec qui b'a. Yujto a Dios, caw 'oj yac' 'el'choc jun 'aj ya'jnac sti 'ayn̈ec.

A Ch'an̈ Carta D'a Eb' Hebreo 3:6

Palta ax Cristo, yiclum yutjnac sb'a, yujto Yunnal Dios. A 'aych Yajlil 'a yib'n̈ eb' yunnal xo Dios yet'oc. Toto te'n tzcutjec qui b'a ca'n 'och qui c'ojl 'a 'a, toto tzon̈ tzalji, tzca'nec 'och yipc qui c'ojol, [masnto 'a slajb' qui q'uinal,] to 'ixta', yunnaln̈ec xo Dios tzyal cha.

Santiago 2:7

A eb' cha, ton̈j tzb'uchwj eb' 'a Cristo, jun niwn yel'chi, atn jun 'ayn̈ec yico'.

Apoc 1:5

Ax Jesucristo, atn testigo caw yel, ya' cab' swach'c'ojlal 'ayex. A b'ab'l pitzwnac pax 'a scal eb' chamnac. A Yajl yaj 'a yib'n̈ eb' rey 'a yolyib'n̈q'uinl tic. Caw 'ay schamc'ojlal 'ayn̈ec. 'Ix yi'n 'el qui mulc yet' schiq'uil.

Apoc 11:3

'Oj wa'ch yopiso chawn̈ mach tz'a'n testigoal sb'a wu'uj, 1,260 c'u 'oj 'ec' yal-l eb' in paxti'. 'Oj ya'ch eb' jun pichl n̈achtac sat, sec chequel to cusc'ojlal yaj eb', yic tz'ec' eb', xchi.

Apoc 12:11

A eb' cha, xyac' ganar eb' ya'n techjoc, yujto chamnc jun tzcuch Calnelu yuj eb', 'elnc can schiq'uil. 'Ix yac' ganar eb', yujto te'n xyutj eb' ya'n testigoal sb'a yu'uj. Ma'ix xiw eb' schami, caw xyaln̈j sc'ojl eb' ya'n cham sb'a yu'uj.

Apoc 13:2

A jun noc' sb'i xwil cha, lajn yilx 'icha no tigre. A yoc, lajn 'icha yoc no oso. Ax sti', lajn 'icha sti no león. Ax win dragón cha, 'ix yac' win spoder 'a 'a. 'Ix ya'n 'och win yajlil sjeloc. Til wal yopiso win xyac' 'a 'a.

Apoc 14:12

An̈ec yel yic on̈c xo Dios, an̈ec yiclum on̈c 'a tas tzyal schecnb'il, ca'c 'och qui c'ojl 'a Jesús. Yuj cha, yowlal caw te'n tzcutjec qui b'a cab'n syail.

Apoc 17:14

Caw 'oj yac' eb' owl yet' jun tzcuch Calnelu, palta a 'oj 'a'nc ganar 'a yib'n̈ eb'. Yujto a jun tzcuch Calnelu cha, Yajl yaj 'a eb' yajal, sReyl pax eb' rey. Ax eb' 'ayc' yet'oc, 'awtb'il chan̈ eb' yuj Dios, sic'b'il 'el eb' yu'uj, atn eb' yiclum 'a 'a, xchi jun ángel chi 'ayin.

Apoc 17:6

Ax xwilni, caw 'u'm 'an̈ 'ix yuj schic'l eb' yic xo Dios, atn eb' milb'il chamoc, yujto xyac' eb' testigoal sb'a yuj Jesús. Xcaw sat in c'ojl wiln jun cha.

Apoc 2:2

Wojtac, jantcn̈ej tas tze b'o'o. Wojtac, caw yelc'ojlal tzex munlji, caw niwn tzeyutj e c'ojol. Ax eb' maysch'olnil, caw matz e chaj 'och eb' 'a e cal. Wojc paxi, xlaj eya'lj prowal eb' tzcob' yalch sb'a in checb'oc. 'Ix 'ilchj 'el eb' eyu'uj, chajtlto yes eb'.

Apoc 3:11

Jab'xoj 'oj in c'ochxi. Yuj cha, an̈ja wach' tzeyutj e b'eyb'al 'icha ex xoni, sec may mach 'oj stac' yi'nc 'ec' spac eyico'.

Apoc 3:3

Yuj cha, nac cot jun tzo'n̈ cuynb'il 'aj eya'jnac 'och e c'ojl 'a yic yalan̈. Nac e b'a, 'a'c pax 'och e nab'en jun 'ejm xo 'a 'a. Toto matz e b'o e b'eyb'al, 'oj in c'och 'ayex. 'Icha sc'och junc 'elc'um, may mach 'ojtnac, janc' tzc'ochi, 'ixta 'oj in c'och 'ayex.