Am 4:13 - Chuj San Sebastian Bible

¹³ 'In an b'ojnac eb' lum niwc witz, yet' pax 'ic'. Tzwac' yojcoc 'el eb' 'anma cha tas nab'il wu'uj. An tzin jelmtej 'och sacq'uinl 'a q'uic'q'uinlal, tzin 'ec' pax 'a caw schan̈il yib'n̈ lum lum tic. Jehová Dios tztac' yuj smasnil, 'ixta yalx in b'i, xchi Dios.

Chuj San Mateo Bible

¹³ A in Jehová in, ix in b'o nivac vitz yed' ic', svac'an yojtaquejel eb' anima tas nab'il vuuj. A in svac' meltzajoch saquilq'uinal d'a q'uic'alq'uinalil, chaan̈ tzin b'eyec' d'a yib'an̈ lum luum. A in b'i, aton Jehová Dios, Yajal in d'a Smasanil, xchi Jehová chi'.

Am 4:13 Iomraidhean Croise

Job 9:7

A tztac' yaln 'a c'u, to matz q'uel 'a junc c'u cha, a tztac' yaln pax 'a jun tzo'n̈ c'anal sec matz yac' eb' sacq'uinlal.

Salmos 135:7

Tzyij cot 'asn 'a 'aj tzlajw c'och lum lum tic, tzyij cot letz'lo'om yic tzya'n n̈ab', tzjacn 'elt 'ic' 'a 'aj 'ay yet'ul.

Salmos 139:2

Ojc wali tas tz'el in b'oni, ojc paxi tas wanto in nani.

Salmos 147:18

A tz'a'n 'ulb'xoc q'uen chew cha, tzya'n cot 'ic' sec tzb'ey a a cha.

Salmos 65:6

Yuj a poder caw tzatz 'ix otj can lum niwc witz 'a yet'ul.

Ex 10:22

'Ix yi'n chan̈ Moisés sc'ab' 'a satcha'an̈. Yuj cha, 'ix jaw jun niwquil q'uic'q'uinl 'a yol yic Egipto smasnil.

Ex 14:20

Caw q'uic'q'uinl 'ix 'aj 'a yojltac eb' 'aj Egipto cha, ax pax 'a yojltac eb' israel, caw wal sacq'uinal. Yuj cha, ma'ix yamchj eb' israel yuj eb' 'aj Egipto 'a jun 'ac'wl cha.

Is 40:12

¿Tom 'ay junc ex tox xe yechtej a mar 'a yol e c'ab', mto tox xe yechtej satchan̈ yet' yune e c'ab'? ¿Tom 'ay junc ex tox xe yechtej smasnil spoccal lum lum tic 'a yol junc 'echtab', mto tox xe yechtej jantc yal-l smasnil eb' lum witz yet' eb' lum tzalctac?

Is 45:7

An in b'ojnac sacq'uinal yet' q'uic'q'uinal, an tzwac' junc'ojlal, tzwa'n pax yailal. An Jehová in, an tzin b'o smasnil jun tzo'n̈ tic.

Is 47:4

A qui colmal an̈ israel on̈ tic, atn jun Dios To Cojxni, Jehová tztac' yuj smasnil, 'ixta yalx sb'i. A tzaln pax 'ixtc 'a chon̈b' Babilonia:

Is 48:2

Tzeyala to cob' 'aj chon̈b' ex 'a in chon̈ab', tzin eya'n 'och cob' yipc e c'ojl eyalni. An e Diosal in tic, Jehová in b'i, tztac' wuj smasnil.

Is 5:30

A 'a jun c'ul cha, a jun nacion̈ cha, 'oj 'el yaw sjaw 'a spatiquil 'el qui chon̈b'ec tic, lajn wal 'oj c'an̈ 'icha a mar. A mach 'oj 'at q'ueln 'a jun chon̈b' cha, 'oj yil jun yailal cha, 'icha to 'oj 'och q'uic'q'uinl 'a yib'an̈, ax stup sacq'uinal, caw q'uic'q'uinl 'oj 'ajcn smasnil.

Jeremías 10:13

A yic tzchecwji, caw tz'ib'x smasnil a a 'ay 'a satcha'an̈. A 'aj tzlajw c'och sti lum lum tic, caw tzq'ue wan 'asn yuj 'a cha'an̈. Caw tz'ec' raya 'a scal niwc yaxn̈ab' yu'uj, tzjacn pax 'elt 'ic' 'a 'aj molb'il yu'uj.

Jeremías 10:16

Caw wal chuc yel qui Diosalec an̈ yin̈tl on̈c Jacob tic. A qui Diosalec b'ojnac smasnil tas. A si'jnac can 'el chon̈b' Israel tic yico'oc. A Jehová tztac' yuj smasnil, 'ixtnta wal yalx sb'i.

Jeremías 13:16

A tze na'a, to 'oj jawc sacq'uinal, palta to 'oj wach' q'uic'b'oc si'mb'il yu'uj. Yuj cha, meltzjan̈c 'a Jehová qui Diosalec, tzeyaln q'uet e mul, ya' sb'a mantzac ex telw 'a lum tzalctac yuj q'uic'q'uinl 'oj ya' coti.

Jeremías 46:18

An ton rey in, 'aynn̈ej 'eq'ui. Tzin cuch Jehová tztac' wuj smasnil, tzwac' in ti', to 'icha lum witz Tabor caw yel xo chan̈ yajb't 'a yib'n̈ jun tzo'n̈ xo eb' lum witz, 'icha pax lum witz Carmelo, yel xo chan̈ yajb't 'a yib'n̈ a mar, 'ixta wal yip jun 'ajc'ojl tzjaw 'ayex.

Jeremías 51:16

A tzalni, yuj cha, tzn̈il-li sc'an̈ c'u yic tzcot n̈ab'. A tz'i'n chan̈ 'asn 'a 'aj tzlajw c'och lum lum tic. A tz'a'n 'ec' copljoc raya 'a scal niwc yaxn̈ab', a tzjacn pax 'elt 'ic' 'a 'aj molb'il yu'uj.

Jeremías 51:19

Caw wal chuc yel sDiosal Jacob, a xb'on smasnil tas. A si'jnac 'el Israel yic tz'och schon̈b'oc. A Jehová tztac' yuj smasnil, 'ixtnta ton sb'i.

Dn 2:28

Palta 'ay jun Dios 'aj satcha'an̈, a tztac' ya'n cojcoc 'el jun tzo'n̈ tas caw c'ultac yaj cha. A tz'a'n ojcoc 'el ach mamin rey tas jun tzo'n̈ 'oj ujc b'aq'uin̈. 'Oj wal 'ayach tas 'ix el 'a a wayich yic wayn̈c ach cha:

Dn 2:30

A 'ix ch'oxn pax jun a waych tic 'ayin, man̈ yujoc to yel xo jeln in 'a yib'n̈ smasnil 'anma', ma'ay. Palta yuj wa'n ojcoc 'eli tas tzyal 'el'ch a waych cha, sec tznachj 'el o'oj tas nab'il oj 'a a nab'en.

Os 12:6

Ex israel, meltzjan̈c 'a qui Diosal. Yiclum tzeyutj e b'a 'a 'a, tojlb'tzejc e b'eyb'al. 'Aychn̈ej cab' Dios yipc e c'ojol.

Jl 2:2

A 'a jun c'u cha, caw q'uic'q'uinl 'oj 'ajoc. 'Oj 'och q'ui'l 'asun, yuj cha, 'oj 'och wewen. A wal no c'ulub', lajn wal no 'icha eb' soldado caw niwn sb'isul. Caw b'essi sb'ey e no 'icha wal sb'ey b'essoc wewen, masnto tzmacchj 'el lum jolmctac witz yu'uj. Mant 'a 'aj ujnc jun tic jun 'ejmoc 'a yic yaln̈taxi, man̈x 'a pax b'a'n̈ 'oj 'ujc jun 'ejm xo.

Am 3:13

A Jehová Dios tztac' yuj smasnil, a tzaln 'ixtic: 'Ab'c ax tic, tzlajw cha, tzeyaln 'el 'a eb' yin̈tl Jacob:

Am 5:27

Yujto xe b'eylb'ej sb'eyb'al eb' cha, yuj cha, 'oj ex wa'cn 'at 'icha presoal 'a spatquil 'at Damasco. 'Ixta wal tzwutj waln an Jehová in b'i tic, tztac' wuj smasnil, xchi Dios.

Am 5:8

Meltzjan̈c 'a Jehová, atn jun b'ojnac jun tzo'n̈ c'anal tzcuch mo'otz, yet' pax jun tzo'n̈ tzcuch ucwan̈. A tz'a'n 'och q'uic'q'uinl 'a sacq'uinlal, a tz'a'n 'och pax sacq'uinl 'a q'uic'q'uinlal. A tz'i'n cot a a 'a a mar, tzlajw cha, tzsecn 'ejm a 'a sat lum lum tic. A tz'a'n lajwc 'el eb' soldado caw wal cob' 'ay yip, tzlajw can 'ejm scuartel eb'. Jehová ton wal sb'i.

Am 6:8

A Jehová tztac' yuj smasnil, sloc sb'i yic xya'n sti', 'ix yaln 'ixtic: Caw wal tzin yaj sb'an̈quintacl eb' yin̈tl Jacob tic, matz chaj in c'ojl jun tzo'n̈ sniwc despacho eb'. Yuj cha, 'oj wa'ch jun chon̈b' tic 'a yol sc'ab' eb' 'ajc'ojol, yet' smasnil tas 'ay 'a 'a, xchi Dios.

Am 8:9

An Jehová in, an tzwal 'ixtc yuj jun c'u 'oj jawc cha: Caw wal chimc'ual, ax wa'n 'och q'uic'q'uinal, yic wach' yem yoc c'u, ax wa'n q'uic'b'oc 'el yolyib'n̈q'uinl tic.

Am 9:6

A Jehová xb'on satcha'an̈, a x'a'n 'ec' jen̈n 'a yib'n̈ lum lum tic. A tz'awtn cot eb' a cotc a 'a a mar, tzya'n 'ejm secnjoc a 'a yib'n̈ lum lum tic. Jehová ton wal sb'i.

Miqueas 1:3

'Oj 'eltoc Jehová 'a yol yet'l 'aj cajn 'eq'ui, ax sb'ey cot 'a sjolm eb' lum witz.

Habacuc 3:19

Mamin Jehová Wajlil, ach tzac' wip. Tzac' yip woc sec tztac' in b'ey 'icha no c'ultquil chej, tzin e'n q'ue 'a cha'an̈, 'a 'aj wach' in colchji. B'itnaxc cab' jun b'it tic yuj win tzjucb'tzan b'it, yet' jun tzo'n̈ yamc'ab ch'an̈ 'aych 'a 'a.

Zacarías 12:1

A Jehová a b'ojnac satcha'an̈, sb'on 'ejm yipnub'al yich lum lum tic, a tz'a'n sq'uinl eb' 'anma', a tzaln 'ixtc yuj chon̈b' Israel:

Mt 9:4

Ax Jesús yojc tas wan snan ewinac, yuj cha, xyaln 'a ewin 'ixtic: —¿Tas yuj wan e nan jun tzo'n̈ maysch'olnil tic?

Jn 2:25

Man̈ yowlalc tzat alx 'a 'a, tas snab'en junc mach. Toxn yojtac tas 'ay 'a qui nab'en junjn on̈.

Jn 3:8

A 'ic', tz'atn̈j 'a 'aj tz'ati. Tzcab'c sc'an̈i, palta man̈ cojcoquec 'aj tzcoti, yet' 'aj tzc'ochi. 'Icha jun 'ic' cha, 'ixta pax eb' tz'alj yuj Yespíritu Dios, xchi Jesús 'a winac.

Dt 32:13

'Oj eyijx 'at yuj 'a lum jolmctac witz, 'oj laj e c'ux tas 'ay 'a sat lum lum cha, 'oj laj eyuc' yal chab' tz'elt 'a sat q'uen q'ue'en, yet' aceite tz'elt 'a te olivo tzlaj pac' 'a sat q'ue'en.

Dt 33:29

Caw wach' quic ex wit israelal, ¿mach wal junc tztac' slajb'tzan sb'a quet'ec? A Jehová a tzon̈ colnec. A tzon̈ tan̈wniec, tzcolwj pax quet'ec. Quespada 'ay smay yaji, yuj cha, tzca'n ganar eb' 'ajc'ojl yajch 'ayn̈ec, ax qui te'n can 'ejm sb'an̈quinal eb', xchi Moisés 'a eb'.