A Ch'an̈ Schab'l Libro Samuel 6:16 - Chuj San Sebastian Bible

¹⁶ A yic xjaw te scaxail strato Jehová chi 'a yol schon̈b' David, c'uxn wal q'ueln 'elt 'ix Mical 'ix yisl win Saúl 'a swentnual yatut, ax xyilni to a win rey David, caw wal tzb'atj chan̈ yuj tzaljc'ojlal 'a yojltac Jehová; yuj cha, schab'c'ojlan 'el 'ix win 'a spixan.

Chuj San Mateo Bible

¹⁶ Ayic ix javi te' scaxail trato chi' d'a schon̈ab' vin̈aj David chi', d'an̈anelta ix Mical yisilcan vin̈aj Saúl d'a sventena. Ix yilan ix to a vin̈aj David chi' sq'ue chennaj vin̈ d'a yichan̈ Jehová, yuj chi' ix chab'axq'ue sc'ol ix d'a vin̈.

A Ch'an̈ Schab'l Libro Samuel 6:16 Iomraidhean Croise

A Ch'an̈ Schab'l Libro Samuel 3:14

Xlajw cha, schecn 'at pax David chi schecb' 'a Is-boset, 'ix yaln 'at 'ixtic: —'A' cot 'ix Mical 'ix wistzil, 'ix wijnac in b'a yet'oc, yujto wa'jnac jun ciente sjolm swincal eb' filisteo stojloc 'ix 'a a mam, xchi.

A Ch'an̈ Schab'l Libro Samuel 5:7

A 'a yic jun tiempoal cha, ata xyal David 'a eb' soldado 'ixtic: E masnil ax 'oj eyoch a owal, b'eyn̈ec 'och 'a yojl 'aj tzb'ey a a tz'o'ch 'a yol chon̈ab'. Tzlajw cha, tze miln cham eb' cob' tzyalch sb'a to matz uj yilni, yet' smasnil eb' tz'em sb'eyi. A jun tzo'n̈ eb' cha, caw wal tzin yajl eb', xchi. Yuj cha, yalx can jun paxti 'ixtic: A eb' matz 'uj yilni, yet' eb' tz'em sb'eyi, matz tac' yoch eb' 'a yol sdespacho win rey, xchi. Ax x'aji, x'ejm jun niwquil cuartel 'a Sión chi yuj David, yuj cha, scuchn can Schon̈b' David.

A Ch'an̈ Schab'l Libro Samuel 6:15

'Ixta sb'o David yet' smasnil eb' yit israelal. Caw wal niwquil tzaljc'ojlal x'ochi, yic xyi'n cot eb' te scaxail strato Jehová chi 'a Jerusalén, caw wal tzya'l eb' yaw, tzyutz'n pax eb' strompeta yuj tzaljc'ojlal.

A Ch'an̈ Schab'l Libro Samuel 6:20

An̈jtona pax David, 'ix meltzj can pax 'a yatut, yic tzyaln wach' paxti 'a yib'n̈ eb' 'ayc' 'a yol yatut cha. Ax yic xc'ochi, x'elt 'ix Mical chi wul scha', xyaln 'ix 'a win 'ixtic: —A ticnec ach sreyl chon̈b' Israel, am a nani to wach' xotj a b'a xa ch'oxn 'el wal a b'a 'a sat eb' 'ix schecb' ewin a checab', caw q'uixweltac xotj a b'a 'icha junc comn 'anma', xchi 'ix 'a winac.

1 Cr 15:29

Palta ax yic 'ix jaw te caxa chi 'a Schon̈b' David, ax 'ix Mical yistzil David cha, atn 'ix yisl Saúl, 'ix 'elt t'an̈n 'ix 'a sventnual yatut. 'Ix yiln 'ix to a rey David, caw wal tzb'atj chan̈ yuj tzaljc'ojlal. Caw tu xyutj sb'a xyil 'ix, yuj cha, schab'c'ojlan 'ix.

Salmos 123:3

Comnoc wal tz'o'ch a c'ojl 'ayn̈ on̈, yujto matz techj sti eb' 'anma tic cuj on̈.

Salmos 69:7

O'oj, 'ix techj wab'n syal jun tzo'n̈ b'uchwal paxti', macn xoj in sat tzin 'ec' yuj q'uixwc'ojlal.

Is 53:3

B'uchb'il, patcab'il 'el yuj yit 'anma'il. 'Ix 'ajx 'och yailal 'a yib'an̈, 'ix techj yu'uj yujto c'aync xon yab'n syail. 'Icha wal junc mach to man̈x smojc yilx 'ochi, 'ixta x'aji. Xqui patquiljec can 'eli, may yel'ch 'ayn̈ec.

A Tas Sc'ulejnac Eb' Schecab' Jesús Hechos 2:13

Palta 'ay jun tzo'n̈ xo eb', ton̈j 'ix b'uchwj eb'. 'Ix cob' yalnc eb' 'ixtic: —A jun tzo'n̈ eb' tic, 'u'm 'an̈ eb', xchi eb'.

1 Co 2:14

A eb' man̈ 'ayc 'och Yespíritu Dios 'a 'a, matz ya'ch eb' sc'ojl 'a jun tzo'n̈ cuynb'il yic Espíritu, yujto may yel'ch 'a sat eb'. Matz tac' scomn nachj 'el jun tzo'n̈ tic yuj eb', yujto cojxn Yespíritu Dios tz'a'n nachjc 'eli.

A Ch'an̈ B'ab'el Libro Samuel 18:17

Xlajw cha, xyaln cob' Saúl 'a David 'ixtic: —Tzwac' 'ix in b'ab'l 'isl tzcuch Merab estziloc, 'in caw wal jeln ach a'n owal, caw tzach sc'anlb'ej Jehová yic tzya'n owl cu'uj, xchi. Yujto sna Saúl, to wach' man̈oc tz'och smul smiln cham David, yel xo wach' to a eb' filisteo tzmiln chamoc.

A Ch'an̈ B'ab'el Libro Samuel 18:20

Palta ax junx 'ix yisl win Saúl cha, tzcuch 'ix Mical, caw tzchamc'ojlax David yuj 'ix. Ax yic 'ix alx 'a Saúl yuj jun cha, caw wal stzalj yab'ni.