A Schab'il Carta San Pedro 3:7 - Chuj San Sebastian Bible

⁷ A satcha'an̈ yet' sat lum tic, an̈ja 'ayc' ticnec. Palta yaljnac can Dios, to yowlal 'oj cann̈j 'ixtic, masnto 'oj 'ajxc 'emt c'ac' 'a 'a. Atta 'oj jawc jun c'u yic b'eyc'ojlal. Ax eb' may yel'ch Dios 'a sat, 'oj satcn 'el eb' 'a jun 'ejmn̈ej ta'.

Chuj San Mateo Bible

⁷ A satchaan̈ yed' sat luum tic, an̈eja' ayec' ticnaic. Palta yalnaccan Dios to yovalil ol cann̈ej icha tic masanto ol ac'joquemta c'ac' d'a yib'an̈. Ato ta' ol ja jun c'ual ayic ol ul ch'olb'itaj yaj eb' anima. Axo eb' malaj tz'och Dios d'ay, ol ac'joccanoch yaelal d'a yib'an̈ eb' d'a juneln̈ej.

A Schab'il Carta San Pedro 3:7 Iomraidhean Croise

Salmos 102:26

Smasnil jun tzo'n̈ tic, 'oj lajwc 'eq'ui, palta ach xo tic, 'aychn̈ej 'eq'ui. Smasnil jun tzo'n̈ tic, 'oj 'ichmaxc eb' 'icha te pichul. Ach 'oj a satli. 'Icha tzyac' junc mach tzjul-l junc spichul, 'ixta wal 'oj otoc.

Salmos 50:3

'Oj jawc qui Diosalec, palta man̈toc sictac 'oj 'aj sjawi. 'Ay jun c'ac' b'ab'l sjaw yu'uj, a jun chi tzsatn 'el smasnil tas. Oyn 'och pax jun niwquil 'ic' 'a 'a.

Is 51:6

Q'uen̈ec q'ueln 'a satcha'an̈, tzex 'emx q'ueln 'a sat lum tic: A satcha'an̈, 'oj sat 'ejm 'icha tzyac' te tab'. Ax lum lum tic, 'oj 'ichmaxc lum 'icha tzyac' junc pichul. 'Ichan̈ej tz'aj scham no 'us, 'ixta 'oj 'aj scham eb' 'anma cajn 'a sat lu'um. Palta ax colnb'il tzwac'a, 'ayc'n̈ej 'a jun 'ejmn̈ej, a 'in tojlal may slajub'.

Is 66:15

Yujto a 'a scal c'ac' 'aychi ax sjawi, a scaruaje 'aj 'aychi, lajn wal sb'ey 'icha chacxuxm'ic'. 'Oj jawc wul yi'l yowl sc'ojl 'a eb' 'ajc'ojl cha. Lajn wal yowl sc'ojl chi 'icha sq'ue wan snich c'ac'.

Dn 7:9

'Ix in yamn̈ej 'och wilni, 'ix 'ajx 'ejm jun tzo'n̈ despacho, ax Dios, atn jun 'ayc' 'a jun 'ejmn̈ej, x'em wocn 'a yib'n̈ jun yico'. Caw sac yilx spichl 'icha yilx q'uen sacb'acum. Ax xil sjolom, caw sac yilx 'icha sac lana. A sdespacho cha, 'ay setetal, 'icha to tzn̈ilchj sc'aq'uil.

Sofonías 3:8

Yuj cha, tan̈wjec sjaw jun c'ual yic 'oj in jaw wul in ch'oxl spaltail eb' maysch'olnil sb'eyb'al. An Jehová in, an tzwala: Tox 'ix in na'a, to 'oj wec syam sb'a smasnil nacion̈ yet' smacb'en, ax wa'n cot yowl in c'ojl 'a yib'n̈ eb'. Smasnil yolyib'n̈q'uinal, c'uxn 'oj lajwc yuj sc'a'l yowl in c'ojol.

Malaquías 4:1

A Jehová tztac' yuj smasnil, a tzaln 'ixtic: Wan sjaw jun c'u yic 'oj wa'nc yowl in c'ojol, yic 'oj wa'nc satxoc 'el smasnil eb' b'uchwjum, yet' eb' tzb'on maysch'olnil, man̈x 'a junc eb' 'oj canoc. 'Icha wal tz'aj stz'a 'ejm te 'ac 'a yol junc jorna, 'ixta wal 'oj 'aj eb'.

Mt 10:15

Wal yel tzwal 'ayex, a yic 'oj jawc jun c'u yic sb'eyc'ojlal Dios, yel xo wal niwn syailal eb' 'oj 'ajxc 'a yib'n̈ eb' 'aj Sodoma yet' eb' 'aj Gomorra.

Mt 11:22

Yuj cha, tzwal 'ayex, at 'a yic 'oj jawc jun c'u yic sb'eyc'ojlal Dios, yel xo wal niwn yailal 'oj 'ajxc 'ayx 'a yib'n̈ eb' 'aj Tiro yet' eb' 'aj Sidón.

Mt 11:24

Yuj cha, tzwal 'ayex, at 'a yic 'oj jawc jun c'u yic b'eyc'ojlal cha, yel xo wal niwn yailal 'oj 'ajxc 'ayx 'a yib'n̈ eb' 'aj Sodoma cha, xchi Jesús.

Mt 12:36

Yuj cha, tzwal 'ayex, at yic 'oj jawc jun c'u yic b'eyc'ojlal, jantcn̈ej jun tzo'n̈ paxti may yopiso tzlaj eyala', c'uxn 'oj e b'eyc'ojlax yu'uj.

Mt 24:35

'Oj lajwc 'ec' satcha'an̈ yet' yolyib'n̈q'uinl tic, ax in paxti', may b'a'n̈ 'oj lajwc 'eq'ui.

Mt 25:41

'Oj lajwc cha, ax waln 'a eb' 'ayc' 'a in surito: 'Eln̈ec ax tic 'a in tz'ey, yujto 'ay yowl sc'ojl Dios 'a eyib'an̈. 'Ixquec 'a jun c'ac' may b'a'n̈ tztupi, 'a jun lugar sb'ojnac Dios yico'oc win diablo, yet' eb' yángel winac.

Mr 6:11

Toto 'ay 'aj matz ex schaj eb' 'anma cha, toto matz nib'j eb' tzyab'i, tzex 'el 'a jun lugar cha. Tze ma'cn 'el spoccal eyoc, yic tze ch'oxn 'eli, to man̈x 'a eyaln eyic 'a eb'. [Wal yel tzwal 'ayex, a yic 'oj jawc jun c'ul yic sb'eyc'ojlal Dios, yel xo wal niwn yailal 'oj 'ajxc 'a eb' matz ex chan chi 'a yib'n̈ eb' 'aj Sodoma yet' eb' 'aj Gomorra,] xchi Jesús 'a eb'.

Jn 12:48

A eb' may wel'ch 'a sat, eb' matz yiclni in paxti', toxn 'ayc' xon jun 'oj 'a'nc 'och syailal eb', atn in paxti tzwalcn tic. Yuj in paxti tic, 'oj 'ajxc 'och syailal eb' 'a slajb' c'ual.

Ro 2:5

Palta 'ayx pit ex, matz e na e b'a. Yuj cha, wan eya'n niwtjoc yowl sc'ojl Dios 'a eyib'an̈. Ax 'a yic 'oj jawc jun c'u yic yailal, ax yajx can 'och 'a eyib'n̈ ta'. At wal 'a jun c'ul cha, 'oj checljoc 'el sb'eyc'ojlal Dios caw yel.

1 Co 3:13

Palta a qui munljel junjn on̈ec, caw 'oj checljoc 'eli, a yic 'oj jawc jun c'u yic b'eyc'ojlal. 'Icha junc c'ac' tzjawi, 'ixta 'oj 'aj sjaw jun b'eyc'ojlal cha. Ax yajx prowal qui munljel junjn on̈ec, toto wach', mto ma'ay.

A Scarta San Pablo D'a Eb' Aj Filipos 1:28

Caw man̈ ex xiw 'a eb' tzchichn 'och 'ayn̈ec. 'Ixta 'oj eyutc e ch'oxn 'eli, to 'oj satcn 'el eb' 'a jun 'ejmn̈ej. An̈jtona', 'ixta 'oj 'aj scheclj 'eli, to 'ayx qui colnb'ilec, yujto 'ixta 'oj yutc Dios sch'oxni.

2 Ts 2:3

Caw man̈ e cha 'ixtxoc paxti e b'a. Yujto a 'a yic mantzac jaw Cajlilec, 'ay jun tiempoal, til wal mach 'oj sutmj pax 'och 'ajc'ojlal 'a Dios. Atta 'oj checljoc 'el jun win syajlil maysch'olnil. A win cha, yowlal 'oj 'ajxc can 'at 'a yailal.

1 Ti 6:9

Palta 'ay eb' creyente cojn ricoal tznib'ej. Yuj cha, c'un yajx juwc 'el eb' yuj maysch'olnil. 'Icha to tzcan eb' 'a junc ch'an̈ ya'al, yujto til wal jun tzo'n̈ tas may yopiso tznib'j 'och eb'. Caw 'ay smay tzjuw 'el eb' yu'uj. Yuj jun tzo'n̈ tznib'j 'och eb' cha, tzwach' caw juw 'el snab'en eb' 'a jun 'ejmn̈ej. Yuj cha, 'ichn̈jta 'oj satx can 'ejm eb'.

A Ch'an̈ Carta D'a Eb' Hebreo 12:29

yujto a qui Diosalec, lajn 'icha junc c'ac', caw tzlajw stz'a smasnil tas yu'uj.

A Schab'il Carta San Pedro 2:9

An̈jtona', 'ixta pax ticnec. Yojc Dios, tas tzyutj scoln eb' 'aych snab'en 'a 'a, yic tz'ajx prowal eb'. Yojc paxi, tas tzyutj ya'n can 'at eb' man̈ tojloc snab'en 'a yailal. Ata tzcan eb', masnto 'oj jawc jun c'ual, yic 'oj wach' b'eyc'ojlaxc eb'.

A Schab'il Carta San Pedro 3:10

Palta 'icha sjaw junc 'elc'm 'a 'ac'wal, 'ixta 'oj 'aj sjaw sc'ul sjaw Cajlilec. A 'a jun c'u cha, ata 'oj lajwc 'ec' satcha'an̈. Caw 'oj c'an̈ sn̈i'chji. Ax jun tzo'n̈ tas 'ay 'a sat lum tic, c'uxn 'oj 'ulb'xoc yuj jun niwquil c'ac'. C'uxn 'oj tz'a sat lum tic, yet' jantcn̈ej tas 'ay 'a 'a.

A Schab'il Carta San Pedro 3:12

Qui tan̈wquec sjaw jun c'u yic Dios. Ca'c wal 'ip qui munlj 'a 'a, sec toq'ue 'oj jawc muc'uc. A 'a jun c'u cha, 'oj lajwc satchan̈ yuj c'ac'. Ax jantcn̈ej tas 'ay 'a sat lum tic, c'uxn 'oj 'ulb'xoc yuj c'ac' cha.

1 Jn 4:17

'Ixta tz'aj swach' tz'acw qui chamc'ojlalec, sec wach' ax yic 'oj jawc jun c'u yic b'eyc'ojlal, ma'oj qui xiwc 'a sat Dios. Yujto 'icha sb'eyb'al Cristo, 'ixta tzcutjec qui b'eyb'al 'a yolyib'n̈q'uinl tic.

San Judas 1:7

An̈jtona', tze nan cot tas 'ajnc eb' 'aj Sodoma yet' eb' 'aj Gomorra, yet' eb' 'a jun tzo'n̈ xo chon̈b' 'a sla'nil. 'Icha yutjnac sb'a eb' ángel cha, 'ixta yutjnac pax sb'a eb'. Caw ya'jnac 'at sb'a eb' 'a scal 'ajmulal. An̈jtona sb'ojnac eb' jun tzo'n̈ xo 'ajmulal yet' yit wincal. A eb' cha, ch'oxnb'il yaj eb' 'a smasnil 'anma ticnec, yujto wan yab'n eb' syal 'a scal c'ac' 'a jun 'ejmn̈ej.

Apoc 17:11

Ax jun noc' sb'i 'ayc' 'a pecti', palta man̈x 'ayc 'ec' ticnec, atn jun swajxquil yajl cha. Yitb'eym sb'a yet' eb' ucwn̈ cha. 'Oj lajwc cha, ax s'atcn 'a chaml 'a jun 'ejmn̈ej.

Apoc 17:8

A jun noc' sb'i 'ix el tic, 'ayc' 'a pecti', palta man̈x 'ayc 'ec' ticnec. Palta 'oj q'ue paxt 'a jun xab' olan, yic mantzac 'at 'a chaml 'a jun 'ejmn̈ej. Ax eb' 'anma man̈ tz'ib'b'ilc sb'i 'a jun libro yic q'uinal, yictax mantzac b'o yolyib'n̈q'uinal, caw 'oj sat sc'ojl eb' yiln jun noc' sb'i chi 'ayc' 'a pecti cha. Yujto wach'xam man̈x 'ayc 'ec' ticnec, palta 'oj jawc pax 'a scha'ejmal.

Apoc 20:11

Xlajw cha, xwiln jun wocn 'ejm 'a jun niwquil despacho caw sac. Ax 'a yojltac, ata 'ix satl yolyib'n̈q'uinal, yet' satcha'an̈. Man̈x 'a 'aj 'ix 'ilchj jac sc'ajil.

Apoc 21:1

Xlajw cha, xwiln jun 'ac' satcha'an̈, yet' jun 'ac' yolyib'n̈q'uinal. Yujto a jun b'ab'l satcha'an̈, yet' jun b'ab'l yolyib'n̈q'uinal, satnc 'eli. An̈jtona a mar, man̈x 'a a'.