1 Ts 1:5 - Chuj San Sebastian Bible

⁵ A yic 'ec' calnc 'el wach' 'ab'x yic colnb'il 'ayx on̈, man̈toc ton̈j 'e'nc on̈ paxtinc on̈. Yujto a Yespíritu Dios 'ochnc quet' on̈. Caw cojc si'mb'il on̈, to caw yel jun 'ab'x tic. Eyojtac, chajtl 'ec' cutjnac qui b'eyb'al 'a e cal on̈, sec caw wach' eyico'.

Chuj San Mateo Bible

⁵ Ayic quec'nac calel vach' ab'ix yic colnab'il d'ayex, man̈ ton̈ejoc comon lolonnac on̈. Yujto a Yespíritu Dios ochnac qued'oc. Cojtac val sic'lab'il to te yel jun ab'ix tic. Eyojtac paxi chajtil cutejnac co b'eyb'al d'a e cal yuj e vach'il.

1 Ts 1:5 Iomraidhean Croise

Mr 16:20

Xlajw chi b'i'an, 'ix 'at eb' yal-l spaxti Dios 'a junjn lugar. 'Ix 'och Cajlil yet' eb'. 'Ix sch'ox jun tzo'n̈ milagro yet' eb', sec chequel to yel jun spaxti chi tz'ec' yal eb' cha. Ya' cab'i'.]

Lc 1:1

Tic tzin tz'ib'j 'at jun ch'an̈ un̈ tic 'a 'aych Teófilo. 'Ay jun tzo'n̈ tas b'onc 'a qui cal on̈. A eb' tzaln 'el spaxti Dios ticnec, c'uxn yiljnac eb' jun tzo'n̈ cha, yictax syamn 'och yel yich. Xlajw cha, on̈ scuyn eb' 'a on̈. Niwn eb' xya'ch 'a sc'ojl stz'ib'n can yab'xil jun tzo'n̈ cha, 'icha wal 'ajnc sb'o'i.

A Tas Sc'ulejnac Eb' Schecab' Jesús Hechos 11:21

Ax Cajlilec, caw x'och yet' eb' creyente cha. Yuj cha, til wal 'anma 'ix sjel sb'eyb'al, 'ix ya'n 'och eb' sc'ojl 'a Cajlilec.

A Tas Sc'ulejnac Eb' Schecab' Jesús Hechos 16:14

Ata 'ay jun 'ix Lidia sb'i, 'aj chon̈b' Tiatira. A 'ix tzchon̈n jun tzo'n̈ q'ui'mucnac nip. Caw 'aych snab'en 'ix 'a Dios. Yic wan yab'xni 'ix, ax Cajlilec, a 'ix 'a'n nachjc 'el yuj 'ix, yuj cha, caw xya'ch 'ix snab'en 'a tas 'ix yal Pablo cha.

A Tas Sc'ulejnac Eb' Schecab' Jesús Hechos 2:33

An̈jtona', 'ix 'ijx 'at 'a satchan̈ yuj spoder Dios. A qui Mam Dios 'ix yac' Yespíritu 'a 'a, 'icha yutjnac ya'n can sti'. Ax Jesús 'ix 'a'n cot jun xeyil tic, xeyab' tic.

Ro 1:16

An tic, matz in q'uixw yuj jun wach' 'ab'x tic, yujto 'aych spoder Dios yet'oc, yic wach' tzcolchj 'el jantcn̈ej eb' tzya'ch sc'ojl 'a 'a. A wal eb' wit israelal, yel xo wal 'ay yaln eb' yic 'a jun colnb'il tic, yet' pax eb' man̈ israeloc, 'ay pax yaln eb' yic 'a 'a.

Ro 15:13

A Dios, a yipc'ojlal yaj cujec. Tzin nib'ej a tzwach' 'a'n e tzaljc'ojlal, yet' e junc'ojlal, yujto tzeya'ch e c'ojl 'a 'a. Toto 'ixta', a 'oj e wach' 'a'c 'och yipc e c'ojol, yujto a Yespíritu tz'a'n spoder 'ayex.

Ro 2:16

At 'a yic 'oj jawc jun c'ual, 'oj sb'eyc'ojloc Dios smasnil 'anma', yuj tastc c'ultac yaj yuj eb'. A Jesucristo 'oj b'eyc'ojlanc eb' yu'uj, 'icha tzyal jun wach' 'ab'x yic colnb'il tzwal-l tic.

1 Co 1:24

Palta an̈ec xo tic, on̈ yawtjec 'och Dios yico'oc. Yuj cha, wach'xam israel on̈ec, wach'xam man̈ on̈ israeloc, cojquec, a Dios 'aych spoder 'a Cristo, 'aych pax sjelnal 'a 'a.

1 Co 10:33

An xo tic, jantcn̈ej tas tzin b'o'o, tzwa'lj wa'n stzaljc'ojlal smasnil 'anma'. Man̈toc mun wic tzin sayq'ui, yic tzin chan swach'il. Palta tzin say yic jun tzo'n̈ xo 'anma', sec wach' toq'ue 'oj colchjoc 'el eb'.

1 Co 3:16

¿Tom man̈ eyojcoc, to yatut Yespíritu Dios eyaji, a Yespíritu chi cajn 'ec' 'a e cal?

1 Co 3:6

An tic, yic wec' 'a e cal, 'icha to 'ec' wawjnac can jun tzo'n̈ 'in̈t ta'. Ax Apolos, 'icha to a 'ec' 'a'jnac 'och yalil. Palta atn Dios ex q'uib'tzani.

1 Co 4:20

Yujto man̈ yujocn̈ej junc tas tzcala, tzcheclj 'eli, to 'ayn̈ec xo 'och 'a yol sc'ab' Dios. Palta toto 'aych spoder Dios quet'ec, to 'ixta', yel 'ayn̈ec xo 'och 'a yol sc'ab'.

1 Co 9:14

An̈jtona', 'ixta pax eb' tz'ec' alnc 'el wach' 'ab'x yic colnb'il. Yujto yaljnac can Cajlilec, to yowlal tzchaj eb' sgasto 'a spatquil 'aj tzmunlj cha.

2 Co 3:6

A 'a'jnac copiso ya'malc servil on̈, tzcaln 'el yab'xil jun yac' trato on̈. A jun strato tic, man̈ yujoc qui yiclni junc tas tz'ib'b'il cani, tz'el'chi. Palta yujn̈ej Yespíritu tz'el'chi. A jun ley tz'ib'b'il cani, yopiso ya'n 'och chaml 'a quib'n̈ec. Palta ax Yespíritu Dios, yopiso ya'n qui q'uinlec 'a jun 'ejmn̈ej.

Gl 2:2

In 'atx ta', yujto sch'oxjnac Dios 'ayin, to yowlal tzin 'ati. A yic in c'och ta', a eb' checl xon yaji, syam sb'a eb' ta sch'ocj wet'oc. Ata waljnac 'a eb', tas wal yaj jun wach' 'ab'x tzwal-l 'a scal eb' man̈ israeloc. 'Ixta wutjnac in b'a, yujto in nib'jnac, man̈ nab'an̈ejc wixtjnac in b'a in munlji.

Gl 5:5

An̈ec xo, yuj Yespíritu Dios, tzca'c 'och yipc qui c'ojol, chajtlto 'oj on̈ yalc Dios wach'il. Atn jun tic wan qui tan̈wniec ticnec, yujto tzca'c 'och qui c'ojl 'a 'a.

Ef 2:10

A Dios on̈ b'onec 'a scha'ejmal yuj Cristo Jesús, sec caw wach' tzcutjec qui b'eyb'al 'a 'a. Yictax pecti', snajnac cani, chajtl 'oj cutquec qui b'eyb'al.

Ef 3:20

A ticnec, calc wach' paxti 'a Dios, yujto a tz'a'n spoder 'ayn̈ec. Tzann̈j tas tzqui c'anc 'a 'a, wach'xam junc ton̈j nant tzqui na'a, tzta'n̈j yu'uj, yujto yel xo wal 'ay spoder sb'on smasnil tas.

A Scarta San Pablo D'a Eb' Aj Filipos 2:13

Yujto a Dios 'aych quet'ec. A tz'a'n qui nib'quec qui b'oc wach'il. A tz'a'n pax quip qui b'onec 'icha tas tznib'ej.

A Scarta San Pablo D'a Eb' Aj Filipos 4:9

Caw tze b'eylb'ej jun tzo'n̈ cuynb'il, yet' jun tzo'n̈ xo tas xeyab' 'ayin. Jantcn̈ej tas eyab'jnac 'ayin, yet' tas eyiljnac, a chi tze b'eylb'ej. Toto 'ixta tzeyutj e b'a, ax Dios 'oj 'och eyet'oc. Atn Dios tz'a'n qui junc'ojlalec.

A Scarta San Pablo D'a Eb' Aj Colosas 2:2

Tzin nib'ej, caw tz'ajx ste'nal e nab'en yet' eb', junxn̈ej tzlaj eyutc e chamc'ojlan e b'a e masnil. Tzin nib'j tzex jelnb'i 'a yic Dios, sec 'oj e wach' te'nb'i. Toto 'ixta', 'oj wach' nachjc 'el eyu'uj, tas yaj jun man̈ 'ojcab'ilc 'a yic pecti', atn Cristo. Ax ticnec, a Dios tz'a'n cojcoquec 'eli.

1 Ts 2:13

A yic caln 'el spaxti Dios 'a e cal on̈, yajn̈ej eya'n 'och 'a e c'ojol, chajtlto yel yic Dios, man̈ yico'oc 'anma'. Yuj cha, caw tzca'n̈j yuj diosal 'a Dios eyuj on̈. A spaxti tic, caw yel yico'. Caw 'ay yopiso sb'on qui nab'en an̈ creyente on̈c tic.

2 Ts 2:14

Yuj jun wach' 'ab'x yic colnb'il 'ec' caljnac 'ayx on̈, a Dios ex 'awtn 'och yico'oc, sec wach' 'oj tz'acwc e wach'l 'icha swach'l Cajlil Jesucristo.

2 Ti 2:10

'Ay jun tzo'n̈ xo eb' sic'b'ilx xon 'el yuj Dios. Tzin nib'j 'oj scha eb' swach'l quet'oc. Yuj wal cha, tzwa'n techjoc jantcn̈ej syal tzjaw 'a wib'an̈, sec 'oj scha pax eb' scolnb'il caw niwn yel'chi. Atn jun tz'ajx 'ayn̈ 'a jun 'ejmn̈ej, yujto junxn̈ej caj yet' Cristo Jesús.

2 Ti 2:8

Caw tza na cot Jesucristo, atn jun yin̈tl David pitzwnac pax 'a scal eb' chamnac. 'Ixta tzyal jun wach' 'ab'x yic colnb'il tzwal-li.

A Ch'an̈ Carta D'a Eb' Hebreo 10:22

Yuj cha, 'a smasnil qui c'ojol, tzqui nitznec 'och qui b'a 'a stz'ey Dios. Caw ca'c 'och wal qui c'ojl 'a si'mb'il. Yujto sacb'tzab'ilx qui pixnec yu'uj, sec man̈x 'a maysch'olnil 'aych 'a qui nab'enec. Ax qui niwnalec, b'icb'ilx yuj jun a a caw ya'ax.

A Ch'an̈ Carta D'a Eb' Hebreo 6:11

Palta tzqui nib'j on̈, junjn ex, yelc'ojlal 'ixta tzeyutj e b'a 'a smasnil tiempo, sec wach' tz'acn 'oj e cha jun spac eyic wan e tan̈wni.

A Sb'ab'el Carta San Pedro 1:12

Palta x'ajx nachjc 'el yuj eb', to a jun tzo'n̈ yaljnac can eb' cha, man̈ yico'oc eb', palta to quiquec. Al ticnec, 'ix wach' alx 'el 'ayex, tas yaj qui colnb'ilec tic. A eb' tzaln 'el wach' 'ab'x yic colnb'il, a eb' 'ix aln 'ayex. A Yespíritu Dios checb'il cot 'a satcha'an̈, a x'och yet' eb', yic xyaln 'el eb'. An̈jtona eb' ángel, tznib'j pax eb' tznachj 'el jun tzo'n̈ tic yu'uj.

A Sb'ab'el Carta San Pedro 1:3

Calc wach' paxti 'a Dios, atn 'a Smam Cajlil Jesucristo, yujto caw x'o'ch sc'ojl 'ayn̈ec. On̈ ya'nec 'aljoc pax 'a scha'ejmal, yujn̈ej to pitzwnac pax Jesucristo 'a scal eb' chamnac. Yuj cha, caw tzca'c 'och yipc qui c'ojol, to a 'oj 'a'nc qui q'uinlec.

A Sb'ab'el Carta San Pedro 5:3

Matz tac' ton̈j yajl tzeyutj e b'a 'a eb' creyente 'ay 'a yol e cuenta cha. Palta tze ch'ox jun wach' b'eyb'al yil eb', sec 'oj sb'eylb'oc pax eb' jun xo.

A Schab'il Carta San Pedro 1:10

Yuj cha, ex wu'tac, ex wanab', caw tzca'c quip cojcan 'el si'mb'il, chajtlto caw yel 'awtb'iln̈ec yico'oc, sic'b'iln̈ec xo 'el yu'uj. Toto 'ixta tzcutjec qui b'a, may b'a'n̈ 'oj juwc 'el qui nab'enec.

A Schab'il Carta San Pedro 1:19

An̈jtona', 'aycto sjaw Cajlilec, stz'ib'n can eb' schecb' Dios yab'xil. An̈ja 'ayc' Ch'an̈ Un̈ chi ticnec. A tas tzyal Ch'an̈ Un̈ cha, caw yel. Caw wach' tzcutjec qui b'a, toto an̈ja ca'nec 'och qui nab'en 'a tas tz'ib'b'il can yuj eb' cha. Yujto a Ch'an̈ Un̈ cha, lajn 'icha junc cantil tzqui tzic 'a 'aj caw q'uic'q'uinal. Tzyac' yoc 'ayon̈, masnto yic wan sacb'i, yic tzq'uel jun niwquil chac c'anal. 'Icha jun c'anal cha, 'ixta 'oj 'aj Cristo yic 'oj jawc paxi, ax swach' 'a'n sacq'uinl 'a qui pixnec.