1 Ti 4:1 - Chuj San Sebastian Bible

¹ A Yespíritu Dios tojln̈ej yalni, chajtlto a yic wan xo sjaw jun slajb' tiempoal, 'ay eb' creyente 'oj meltzjoc pax 'a spatic. Ax wal 'a jun tzo'n̈ cuynb'il caw 'es 'aj 'oj ya'ch eb' snab'en. A jun tzo'n̈ cuynb'il cha, a 'a ewin demonio tzcoti.

Chuj San Mateo Bible

¹ A Yespíritu Dios tz'alan sjichanil to ayic vanxo sjavi jun slajvub' tiempoal, ay eb' ol meltzaj d'a spatic. Axo d'a juntzan̈ c'ayb'ub'al es ol yac'och spensar eb'. Palta a juntzan̈ c'ayb'ub'al chi', a d'a eb' enemigo scoti.

1 Ti 4:1 Iomraidhean Croise

Gn 3:13

Xlajw cha, sc'anb'n pax Jehová Dios 'ixtc 'a 'ix 'ix cha: —¿Tas yuj 'ixta 'ix otj a b'a? xchi. Xta'w 'ix, xyaln 'ix 'ixtc 'a 'a: —A no chan in 'ixtn paxti', yuj cha, xin lon te', xchi 'ix.

A Ch'an̈ B'ab'el Libro Yic Yab'ixal Eb' Rey 13:18

'Ix yaln pax jun 'ichm winc chi 'ixtc 'a winac, yic tzya'n 'es: —An̈jtona 'in, schecb' in Dios 'icha ach tic. A jun yángel Jehová 'ix aln 'ayn 'ixtic: 'At 'ij meltzjoc winac. Wa cab' win 'a atut, yu' cab' win a a 'a atut cha, xchi 'ayin, xchi winac.

Is 2:2

A 'a jun slajb' c'ul cha, a lum switzl Sión 'aj 'ay yatut Jehová, 'oj q'ue wan lum 'a cha'an̈, 'oj 'ec' stel lum 'a jun tzo'n̈ lum niwc witz 'a stz'ey cha. Ax smasnil eb' 'anma 'a junjn nacion̈, 'oj c'och b'uln eb' 'a 'a.

Jeremías 23:26

¿B'a'n̈ 'oj yactc jun tzo'n̈ tzyalch sb'a in checb'oc chi yaln 'el 'es paxti cha? atn jun tzo'n̈ paxti tzna chan̈ eb' 'a mun yol yico'.

Jeremías 48:47

Palta an Jehová in, an tzwala, to ax 'a slajub', 'oj wi'x q'ue'ch chon̈b' Moab jun 'ejm xo, xchi Dios. Atn jun tzo'n̈ yailal tic 'ix yalcn Jehová 'a yib'n̈ chon̈b' Moab.

Jeremías 49:39

Ax 'a slajub', 'oj wi'xq'ue'ch chon̈b' Elam tic jun 'ejm xo, xchi Dios.

Ez 38:16

'Oj cob' ac' owl yet'oc, caw 'oj och oyn 'a in chon̈ab', 'icha tzyac' 'asn tz'och oyn 'a lum jolmctac witz. A 'a jun tiempoal cha, 'oj ach wi' cot 'a sat in lum cha, sec 'oj yil jun tzo'n̈ xo nacion̈ tas 'oj ach wutc ach in satn 'eli, ax yojcan 'el eb' to cojn in ton Dios in.

Dn 10:14

Yuj cha, ticnec in jaw 'ayach yic tzwul walnoc ab'i', tas 'oj 'ec' 'a yib'n̈ a chon̈b' chi 'a yic slajb' c'ual. Yujto a tas xel 'a jun a waych cha, atn tas 'oj ujc yic b'aq'uin̈, a chi xch'oxx ela', xchi 'ayin.

Os 3:5

'Oj lajwc cha, ax 'a yic slajb' tiempoal, 'oj yalx sb'a eb' wit israelal 'a Jehová qui Diosal jun 'ejm xo, ax schan pax sc'ojl eb' yoch junc yin̈tl David sreyloc. 'Ixta 'oj yutc yi'n 'ejm sb'a eb' 'a Jehová, ax schan eb' swach'c'ojlal.

Miqueas 4:1

A yic 'oj jawc jun slajb' tiempoal, a lum tzaln 'aj 'ay yatut Jehová ticnec. A jun tzaln cha, yel xo chan̈ 'oj 'ajb't 'a yib'n̈ jun tzo'n̈ xo lum tzalan. Ax smasnil eb' nacion̈ 'oj jawc eb' 'a 'a.

Nm 24:14

Caw wal wach' toto tzin pax 'a in chon̈ab', palta yic mantzac in paxi, yowlal tzwalcn ab'i' tas 'oj 'aj a chon̈b' tic yuj jun chon̈b'al eb' 'anma chi b'aq'uin̈, xchi.

Mt 18:7

'Oltac wal eb' 'anma yuj jun tzo'n̈ tas tz'a'n juwc 'el snab'en. Smasnil tiempo 'ay jun tzo'n̈ cha, palta a wal eb' tzc'anlb'ani, tzya'n eb' juwc 'el snab'en yit 'anma'il, caw wal 'oltac eb'.

Lc 17:1

'Ix yaln Jesús 'a eb' scuywum 'ixtic: —Yowlal 'ay jun tzo'n̈ tas tz'a'n juwc 'el qui nab'en; palta 'oltac wal eb' tz'a'n juwc 'el snab'en eb' yit 'anma'il.

Jn 16:13

At 'a yic 'oj jawc Yespíritu Dios caw yel, at 'oj 'a'nc nachjc 'el smasnil tas yel eyu'uj, yujto man̈ munoc 'oj yal 'a yol yico'. Jantcn̈ej tas 'oj alxc 'a 'a, an̈j 'oj yala'. 'Oj yal pax 'ayex, yuj tastc tot 'oj jawoc.

A Tas Sc'ulejnac Eb' Schecab' Jesús Hechos 13:2

A 'a jun 'el, wan yaln sb'a eb' 'a Cajlil, 'aych pax eb' 'a c'ajb'c'ojlal. Ax Yespíritu Dios 'ix aln 'a eb' 'ixtic: —Tze sic' 'elt Bernabé yet' Saulo 'ayin, sec 'oj munljc eb' 'a 'aj 'ix wa'ch yopiso, xchi.

A Tas Sc'ulejnac Eb' Schecab' Jesús Hechos 17:18

'Ay jun tzo'n̈ winc caw jelan, yujto tzcuy eb' sjelnal eb' tzcuch epicúreo yet' jun tzo'n̈ eb' tzcuch estoico. 'Ix syamn 'och eb' spaxtin yet' Pablo. Ax nan̈l xo eb', mun xyal eb' 'ixtic: —A win puch yec' paxtinc tic, ¿tas 'oj yal win 'ayn̈ec? xchi eb'. 'Ay jun tzo'n̈ xo eb' xaln 'ixtic: —Al qui nani, to tzwul yal win yab'xil jun tzo'n̈ chuc diosal, xchi eb'. 'Ixta xyutj eb' yalni, yujto x'ec' yal-l Pablo yab'xil Jesucristo. 'Ix yaln paxi, chajtlto 'oj pitzwc pax eb' chamnac.

A Tas Sc'ulejnac Eb' Schecab' Jesús Hechos 20:23

Palta wojtac, a 'a junjn chon̈b' 'aj tzin 'eq'ui, a Yespíritu Dios tzaln 'ayin, to yowlal 'oj woch 'a preso ta'. Til wal syal 'oj wab'i'.

A Tas Sc'ulejnac Eb' Schecab' Jesús Hechos 21:11

Xit' win on̈ sc'umc on̈. Yic wan qui c'umn qui b'a yet' win on̈, 'ix yi'n 'el win sjal-l snan̈l Pablo. 'Ix sjaln teln sb'a win yet'oc. Xlajw cha, xyaln win 'ixtic: —A Yespíritu Dios tzaln 'ixtic: A eb' israel 'a Jerusalén, 'ixtc 'oj yutc eb' sjaln pax jun 'ay yic jun jal-l tic. 'Oj lajwc cha, ax ya'n 'och eb' 'a yol sc'ab' eb' man̈ israeloc. 'Ixta tzyal Yespíritu Dios, xchi winac.

A Tas Sc'ulejnac Eb' Schecab' Jesús Hechos 28:25

Yuj cha, syamn 'och eb' spax 'a yatut, yujto ma'ix chaj sb'a snab'en eb'. Yuj cha, xyaln Pablo 'a eb' 'ixtic: —A Yespíritu Dios 'a'jnac yalcn Isaías 'a eb' qui mam quichmec pecti', yujto schecb' yaji. Caw yel jun yaljnac cha, yic yaln 'ixtic:

1 Co 10:20

Palta a jun tzwal tic. A yic tzya'n eb' man̈ israeloc xajmb'al, man̈oc 'a Dios tzyac' eb'. A 'a jun tzo'n̈ demonio tzyac' eb' xajmb'al cha. Palta tzin nib'ej, caw man̈ junc tzex 'aj yet' ewin demonio cha.

1 Co 11:19

Tecn yowlal 'oj e poj e b'a, sec 'oj checljoc 'eli, machx yel creyente ex.

1 Co 12:11

Til wal jun tzo'n̈ tas tz'ajx qui b'o'ec, palta junn̈j Espíritu tz'a'n qui b'oc jun cha. Chucchc tas tzyac' qui b'o junjn on̈ec, a tzyala tas tznib'j yac' qui b'o'ec.

1 Co 2:10

Palta a Dios tz'a'n cojcoquec 'el jun tic yuj Yespíritu. Yujto a Yespíritu tic, tzyojquej 'el smasnil tas. 'Ay jun tzo'n̈ tas yic Dios yaji, matz nachj 'el yuj eb' 'anma', palta ax Yespíritu yojtac.

2 Co 11:3

Palta tzin xiwi, toq'ue 'icha 'ajnc 'ix Eva yixtx paxti yuj sjelnal jun ya'jnac 'och sb'a chanil, toq'ue 'ixta tzex 'aj eyixtx paxti jun xo. Lemb'il yuj cha, ax eyi'n 'el e nab'en 'a Cristo. Lemb'il man̈x tojloc 'oj eyutc e b'a 'icha tznib'ej.

Dt 32:29

Q'uinloc 'ay snab'en eb', to 'ixta', tznachj 'el yuj eb', tzyojcan 'el eb', tas 'oj 'aj 'el'ch eb'.

Dt 4:30

A yic tox 'ix 'ec' jun tzo'n̈ cusc'ojlal chi 'a eyib'an̈, ax 'a slajub, 'oj e meltzj pax 'a Jehová qui Diosalec, 'oj eyoch yiclumal 'a 'a.

A Scarta San Pablo D'a Eb' Aj Colosas 2:18

'Ay eb' tznib'j 'oj 'i'nc 'ec' jun spac eyic 'oj yac' Dios, palta man̈ e cha tas tzyal eb' 'ayex. Caw 'emmquilal tzcob' yutc sb'a eb', tzya'n 'ejm sb'a eb' 'a jun tzo'n̈ ángel. Tzcomn 'a'n 'och sb'a eb' 'a scal jun tzo'n̈ tas man̈ yojcoc. Ton̈j tzcomn b'an̈j sb'a eb', yujto caw jeln eb' snani.

2 Ti 3:13

Palta ax eb' maysch'olnil sb'eyb'al, yet' eb' tz'ixtn paxti yit 'anma'il, 'oj wach' 'atcn eb' 'a maysch'olnil. Tzyixtn paxti eb' junc xo mach. Palta tz'ixtx paxti pax eb' jun xo.

2 Ti 4:4

Yuj cha, man̈x 'oj ya'ch eb' schicn 'a jun cuynb'il caw yel. Cojn jun tzo'n̈ comn 'ab'x 'aj 'oj ya'ch eb' snab'en.

Santiago 3:15

Toto 'ixta tzeyutj e b'a, a jun e jelnal cha, man̈oc 'a satchan̈ tzcoti, palta yic yolyib'n̈q'uinl tic, yic comn 'anma'. A jun e jelnal cha, yic win diablo.

A Sb'ab'el Carta San Pedro 1:20

Yic mantzac sb'o Dios yolyib'n̈q'uinl tic, yojc xoni, to 'ixta 'oj 'aj Cristo. Palta at 'a jun slajb' tiempoal tic, 'ix 'ajx checljoc 'el 'a yolyib'n̈q'uinl tic, sec caw wach' quiquec.

A Schab'il Carta San Pedro 2:1

A eb' wit israelal 'a pecti', 'ay eb' cob' yaljnac 'och sb'a schecb'oc Dios, palta yes eb'. An̈jtona 'ay eb' 'oj pitzwc chan̈ 'a qui calec, ax ya'n eb' cuyxoc jun tzo'n̈ 'es. 'Oj yi'ch eb' jun tzo'n̈ chuc cuynb'ilal 'a qui calec, sec 'ayn̈ec 'oj qui juwc 'el yuj eb'. Caw may jac yel'ch Cajlilec 'a sat eb', wach'xam a xcham stojloc smul eb'. Yuj cha, mun tzyij cot eb' 'a yib'an̈. Yajn̈ej, ax satcn 'el eb' 'a jun 'ejmn̈ej.

A Schab'il Carta San Pedro 3:3

A junx tic 'oj walb't tic, caw wal tzin nib'j tzeyojquej 'eli. A 'a jun slajb' tiempoal, 'ay eb' 'oj pitzwc cha'an̈. 'Oj comn b'uchwjc eb'. Cojxn jun tzo'n̈ maysch'olnil tznib'j 'och eb' 'aj 'oj ya'ch snab'en.

1 Jn 2:18

Ex chamc'ojlb'il wu'uj, 'ayn̈ecx 'ec' 'a jun slajb' tiempo. 'Ix cab'ec to a jun 'ajc'ojl yajch 'a Cristo, 'oj pitzwc cha'an̈. Ax ticnec, niwn xo eb' 'ajc'ojl yajch 'a Cristo tox 'ix pitzw cha'an̈. Yuj cha, cojquec to 'ayn̈ecx 'ec' 'a jun slajb' tiempo.

1 Jn 4:6

Palta an̈ec xo tic, yic on̈c xo Dios. Yuj cha, a eb' yic xo Dios quet'ec, tzya'ch eb' schicn 'a tas tzcalec. Palta ax eb' man̈ yico'oc Dios, matz ya'ch eb' schicn 'a tas tzcalc 'a 'a. 'Ixta tzcutjec cojcan 'eli, mach eb' yel 'aych Yespíritu Dios 'a 'a, mach pax eb' 'aych yespíritu win 'a'm 'es 'a 'a.

San Judas 1:18

yaljnac can eb' 'ixtic: A 'a jun slajb' tiempoal, 'ay eb' 'oj comn b'uchwjoc. 'Oj sb'eylb'oc eb' jun tzo'n̈ maysch'olnil tznib'j 'ochi, xchi eb'.

San Judas 1:4

Tzwalb't jun tzo'n̈ tic 'ayex, yujto 'ay eb' x'och 'a qui calc 'a c'ultaquil. Caw man̈ wach'c eb', yujto tzyal eb' 'ixtic: Colchjnacn̈ec xo yuj swach'c'ojlal Dios. Yuj cha, tzta'n̈j qui b'onec maysch'olnil 'icha tzqui nib'ej, xchi cob' eb'. An̈ec xo tic, cojxn Jesucristo tzon̈ 'a'nec mandar, cojxn Yajl yaj 'ayn̈ec. Palta ax eb' cha, caw tzpatquilj can 'el eb'. Tz'ib'b'il can yab'xil eb' 'a Ch'an̈ Un̈ 'a pecti', chajtlto yowlal 'oj 'atcn eb' 'a scal yailal.

Apoc 13:14

'Ix 'ajx spermiso sch'oxn jun tzo'n̈ milagro chi 'a yojltac jun b'ab'l noc' sb'i cha. 'Ixta xyutj yixtn paxti eb' 'anma 'a yolyib'n̈q'uinal. 'Ix yaln pax 'a eb', to yowlal tzb'o eb' jun yechl jun b'ab'l noc' sb'i cha, atn jun lajwnac yuj q'uen espada, palta an̈ja pitzan.

Apoc 16:14

A 'oxwn̈ eb' demonio cha, checb' yaj eb' yic tzch'oxn eb' jun tzo'n̈ milagro. X'at eb' yac' syam sb'a jantcn̈ej eb' niwc yajl 'a smasnil yolyib'n̈q'uinal, yic tzya'n eb' owl 'a yic jun c'u niwn yel'ch yic Dios, atn Dios tztac' yuj smasnil.

Apoc 18:2

Caw 'ip yaln 'ixtic: —¡Caw 'ix lan̈chj 'ejm chon̈b' Babilonia! Wach'xam niwn yel'chi, palta caw xlan̈chji. 'Ix 'och scajnub'oc junjn c'aj demonio. 'Ix 'och pax soc jun tzo'n̈ no ch'ic caw yajb'entac.

Apoc 18:23

Man̈x 'a junc cantil 'oj yac' sacq'uinl ta', man̈x 'a b'a'n̈ 'oj 'ab'xoc yel 'aw yuj junc q'uin̈ nupnel. 'Ixta 'oj 'aj jun chon̈b' cha, yujto a eb' chon̈wjum 'ayc' ta', yel xo niwn yel'ch eb' 'a yib'n̈ smasnil eb' 'anma 'a yolyib'n̈q'uinal. An̈jtona', c'uxn xlaj 'ixtx paxti eb' 'anma 'a junjn nacion̈ yuj yajchumal, yet' ya'm 'esal jun chon̈b' cha, xchi jun ángel cha.

Apoc 19:20

Ax jun noc' sb'i cha, 'ix b'ab'l yamchj muc'uc. 'Ix yamchj pax jun xcob' yalch sb'a schecb'oc Dios, atn jun ch'oxjnac jun tzo'n̈ milagro 'a yojltac jun noc' sb'i. Yuj jun tzo'n̈ milagro cha, yixtn paxti eb' chajnac 'och senyail jun noc' sb'i 'a 'a, eb' yaljnac sb'a 'a jun yechel. Ax jun noc' sb'i cha, yet' jun xyalch sb'a schecb'oc Dios, pitzn to eb', xjulx can 'at eb' 'a scal jun c'ac' caw tzn̈ilchj yet' azufre, 'icha pama'.

Apoc 2:11

Jantcn̈ej eb' tz'ab'ni, ya' cab' 'och eb' schicn 'a tas tzyal Espíritu 'a junjn iglesia. A eb' 'oj 'a'nc ganar ya'n techjoc, caw man̈x 'oj yab' eb' syal junx schab'l chamel, xchi.

Apoc 2:17

Jantcn̈ej eb' tz'ab'ni, ya' cab' 'och eb' schicn 'a tas tzyal Espíritu 'a junjn iglesia. A eb' 'oj 'a'nc ganar ya'n techjoc, 'oj wac' swa eb' jun maná c'ub'b'il 'eli. 'Oj wac' pax junjn q'uen caw sac 'a eb'. Ax 'a junjn q'uen cha, tz'ib'b'il 'och jun 'ac' b'i may mach 'ojtnac. Cojn eb' 'oj chanc yico', a eb' 'oj 'ojcanc 'el jun cha, xchi.

Apoc 2:29

Jantcn̈ej eb' tz'ab'ni, ya' cab' 'och eb' schicn 'a tas tzyal Espíritu 'a junjn iglesia, xchi.

Apoc 2:7

Jantcn̈ej eb' tz'ab'ni, ya' cab' 'och eb' schicn 'a tas tzyal Espíritu 'a junjn iglesia. A eb' 'oj 'a'nc ganar ya'n techjoc, 'oj wac' slo eb' sat jun te te yic q'uinl 'a jun 'ejmn̈ej. A jun te cha, 'ayc' 'a jun paraíso yic Dios, xchi 'ayin.

Apoc 20:10

Ax win diablo, win 'ix 'ixtn paxti eb' cha, 'oj julx can 'at 'a scal jun niwquil c'ac' tzn̈ilchji, caln yaj yet' azufre, 'icha pama', atn 'aj julb'il can 'at jun noc' sb'i, yet' jun cob' yaljnac 'och sb'a schecb'oc Dios. Sc'ual yac'wlil 'oj yab' eb' syal ta 'a smasnil tiempo.

Apoc 20:8

C'uxn 'oj 'ec' yixtc paxti win eb' 'anma 'a junjn nacion̈ 'a yolyib'n̈q'uinal. 'Oj yixtc paxti jun Gog sb'i yet' jun Magog. Ax jun tzo'n̈ soldado yic Gog yet' Magog cha, 'oj yac' win Satanás syam sb'a eb' yuj owal. Ax eb' soldado cha, caw niwn eb' 'icha yarenail sti a mar.

Apoc 3:13

Jantcn̈ej eb' tz'ab'ni, ya' cab' 'och eb' schicn 'a tas tzyal Espíritu 'a junjn iglesia, xchi.

Apoc 3:22

Jantcn̈ej eb' tz'ab'ni, ya' cab' 'och eb' schicn 'a tas tzyal Espíritu 'a junjn iglesia, xchi Jesús 'ayin.

Apoc 3:6

Jantcn̈ej eb' tz'ab'ni, ya' cab' 'och eb' schicn 'a tas tzyal Espíritu 'a junjn iglesia, xchi.

Apoc 9:20

Palta ax eb' 'anma ma'ix cham yuj jun tzo'n̈ yailal cha, caw man̈ jac 'ix sna sb'a eb' yuj smul tzlaj sb'o'. Ma'ix yactj can eb' yaln sb'a 'a ewin demonio. Ma'ix yactj can pax eb' yaln sb'a 'a jun tzo'n̈ yechl tzalx 'och diosal, atn jun tzo'n̈ tzb'o yet' oro, yet' plata, yet' bronce. Tzb'o yet' q'uen q'ue'en, yet' pax te te'. A jun tzo'n̈ cha, matz yila, matz yab'i, matz b'ey paxi.