1 Jn 3:2 - Chuj San Sebastian Bible

² Ex wu'tac, ex wanb' chamc'ojlb'il wu'uj, yunnaln̈ec xo Dios ticnec. Mant cojcoquec, chajtl yilx 'oj cajec. Palta cojquec to a yic 'oj jawc Jesucristo, lajn 'oj cajc yet'oc, yujto 'oj quilc wal chajtl yilxi.

Chuj San Mateo Bible

² Ex xajanab'il vuuj, yuninal on̈xo Dios ticnaic. Maxto nachajel-laj cuuj chajtil ol on̈ aj elc'ochoc. Palta cojtac to ayic ol jax Jesucristo, lajan ol on̈ aj yed'oc, yujto ol quila' chajtil yilji.

1 Jn 3:2 Iomraidhean Croise

Job 19:26

Wach'xam tzlajw 'el in tz'umal tic, palta 'oj wilch Dios yet' in niwnal tic.

Salmos 16:11

'Ix ac' wojcoc 'el jun b'e yic q'uinl 'a jun 'ejmn̈ej. Caw niwn tzaljc'ojlal 'oj ac' 'ayin, yic 'oj in c'och 'a ojltac. 'Ay tzaljc'ojlal 'a a tz'ey 'a jun 'ejmn̈ej.

Salmos 17:15

Palta an xo tic, yujto tojl in nab'en, 'oj ach wil yet' in sat; man̈x 'a tas 'oj in na', yic 'oj in pitzw pax chan̈ 'a ojltac.

Salmos 31:19

Caw niwn a wach'c'ojlal tzac' 'a eb' 'ay el'ch 'a 'a. Sat wal eb' 'anma', tza pojn 'ec' a wach'c'ojlal chi 'a scal eb' tzach 'a'n 'och yipc sc'ojol.

Is 56:5

toto 'ixta', 'oj wac' in wach'c'ojlal 'a eb'. 'Ay jun tas niwn yel'ch 'oj wac' 'a eb', 'ec'b'al yel'ch 'a yib'n̈ to 'ay yunnal eb', mto 'ay yisl eb'; a jun cha, may b'a'n̈ 'oj 'och wan sb'inax eb' 'a yol watut yu'uj, yet' 'a scal eb' in chon̈ab'. A jun sb'i eb' cha, may b'a'n̈ 'oj sat 'ejm yalxi, 'oj alxn̈ej 'a smasnil tiempo.

Malaquías 3:2

¿Mach wal 'oj techjoc yuj 'a jun c'u yic 'oj in jaw cha? ¿Mach wal 'oj stac' ste'wtzan sb'a yoch lin̈n 'a wojltac? Yujto a wopiso, lajn wal 'icha te c'ac' tzc'an eb' tzb'on q'uen oro, mto 'icha sawon tzc'an eb' tzju'wi.

Mt 5:8

A eb' may jac maysch'olnil 'ay 'a spixan, caw wach' yic eb', yujto 'oj yil eb' Dios.

Lc 17:30

'Icha wal 'ajnc jun tiempoal cha, 'ixta 'oj 'aj wal jun c'u yic 'oj in jaw an 'Ochnc in 'Anmal tic.

Lc 20:36

Yujto a 'a jun tiempoal cha, man̈x b'a'n̈ 'oj cham eb'. Lajn 'oj 'aj eb' yet' eb' ángel. Caw yunnal xoj Dios eb', yujto 'oj 'ajxc pitzwc pax eb'.

Jn 1:12

Palta ax jantcn̈ej eb' tzchani, eb' tzya'ch sc'ojl 'a 'a, a tzalni to 'ay yaln eb' yic yoch yunnalc Dios.

Jn 11:52

Man̈ yujocn̈ej eb' israel cha, 'ix schami. 'Ix chami, yic tzmolb'tzan jantc eb' Yunnal Dios t'un̈ctac yajcn 'at 'a yolyib'n̈q'uinl tic, sec junxn̈ej 'oj 'aj eb'.

Jn 17:24

Mamin, a eb' tzac' 'ayin, tzin nib'ej to 'oj 'aj eb' wet' 'a 'aj 'oj in c'ochi, sec 'oj yil eb' in wach'l 'ac'b'il oj 'ayin. Yujto chamc'ojlab'iln xon o'oj, yictax mantzac b'o yolyib'n̈q'uinl tic.

Ro 8:16

Cojc junjn on̈ 'a qui pixan, to yel yunnaln̈ec xo Dios. An̈jtona', tzyaln pax Yespíritu 'ayn̈ec.

Ro 8:18

An tic tzin na'a, a jun tzo'n̈ yailal wan cab'nec syal ticnec, caw matz tza'wni 'a jun swach'l Dios 'oj sch'ox 'ayn̈ec 'a jun tiempoal cha.

Ro 8:19

Smasnil jun tzo'n̈ tastc 'ay 'a yolyib'n̈q'uinl tic, caw tztan̈wj eb', tzmaclni eb' b'a'n̈ 'oj qui checlj 'el an̈ yunnaln̈ec xo Dios tic.

Ro 8:29

Yictax pecti', yojc xon Dios to yic on̈ec. At xo ta si'jnacn̈ec can 'eli, sec wach' caw lajn tzon̈ 'ajc yet' Yunnal. 'Ixta 'on̈ yutjec Dios, sec wach' ax Yunnal, a tz'och qui b'ab'l 'u'tacoquec qui masnil.

1 Co 13:12

Yujto a ticnec, mantzac nachj 'el wal yic Dios cujec. 'Ichan̈ej quilnec jun tzo'n̈ tas 'a junc nen q'uic'moynac sat, 'ixta cajec. Palta a yic jun tiempoal cha, 'oj nachjc 'el smasnil tas yic Dios cujec. Yujto si'mb'il 'oj quilc wal smasnil tas. A ticnec, mantzac tz'acw cojcanec 'el yic Dios, palta a 'a jun tiempoal cha, 'oj cojcoquec 'eli. A ticnec, yojc on̈c Dios si'mb'il. 'Ixta 'oj 'aj cojcanec 'el smasnil yic Dios ta'.

1 Co 15:49

A ticnec lajn qui niwnalec yet' jun b'onc 'a lum lum cha. Ax 'a jun tiempoal cha, lajn 'oj 'aj qui niwnalec yet' jun yic satcha'an̈.

1 Co 2:9

Palta tzyal 'ixtc 'a Ch'an̈ U'un̈: 'Ay wal jun tas sb'ojnac Dios, yic tzya'n 'a eb' 'ay schamc'ojlal 'a 'a. Mant 'a junc mach tz'iln junc chi 'ixta', mant 'a mach tz'ab'ni. May pax junc mach xnan 'el jun cha, xchi 'a Ch'an̈.

2 Co 3:18

Yuj cha, man̈x 'ayc 'och jun 'icha nip chi 'a qui satc qui masnil. A ticnec, lajn on̈c 'icha junc nen 'aj tzquil qui sat, yujto cujec, tzcheclj 'el swach'l Cajlil. Yuj cha, wan slajnb'i qui nab'enec 'icha Cristo, yujto wan xo stz'acw qui wach'lec 'icha swach'il. 'Ixta wan on̈ yutnec Cajlil, atn Yespíritu Dios.

2 Co 4:17

A jun tzo'n̈ tas tzjaw 'a quib'n̈ on̈, may jac yel'ch 'a qui sat on̈, 'e'lb'an̈j yeq'ui. Palta yu'uj, 'oj qui cha jun caw niwn yel'ch on̈. A jun cha, man̈ jantcoc swach'il, 'ayc'n̈ej 'a jun 'ejmn̈ej.

Gl 3:26

Yujto tzca'c 'och 'a qui c'ojol, yuj cha, yunnaln̈ec xo Dios, junxn̈ej cajc yet' Cristo Jesús qui masnil.

Gl 4:6

A Dios, ya'jnac cot Yespíritu Yunnal 'a qui pixn junjn on̈ec, sec chequel, to yunnaln̈ec xo. Ax Yespíritu cha, a yic tz'awji: Mamin, Mamin, xchi.

A Scarta San Pablo D'a Eb' Aj Filipos 3:21

A 'oj jelnoc jun qui niwnalec may jac swach'l tic, sec wach' lajn 'oj 'aj yet' jun yico', yujto a jun cha, caw niwn swach'il. 'Ixta 'oj on̈ yutquec yet' spoder, yujto 'ay spoder ya'n mandar smasnil tas.

A Scarta San Pablo D'a Eb' Aj Colosas 3:4

Yujto a Cristo, qui q'uinlec yaji. At 'a yic 'oj jawc paxi, ax qui jawc pax yet'oc. 'Ixta to b'i'an, ax stz'acw qui wach'lec 'icha swach'il.

A Ch'an̈ Carta D'a Eb' Hebreo 9:28

An̈jtona Cristo, jun 'ejm wal milxnac xajmb'alil, sec wach' caw niwn on̈ec tz'el qui mul yu'uj. A yic 'oj jawc 'a scha'ejmal, man̈x yujoc yi'n 'el qui mulec ax sjawi. Palta yuj on̈ scoln an̈ec wan qui tan̈wni sjapxi.

A Schab'il Carta San Pedro 1:4

Yuj spoder cha, ya'jnac can sti 'ayn̈ec. A jun tzo'n̈ tas yaljnac can cha, caw niwn yel'chi, til wal swach'il. Yuj jun tzo'n̈ cha, tztac' tzon̈ colchjec 'el 'a yol sc'ab' jun tzo'n̈ maysch'olnil tznib'j 'och eb' 'anma 'a yolyib'n̈q'uinl tic. Toto 'ixta tzon̈ 'ajec, caw lajnn̈ej tz'aj qui nab'enec yet' Dios, yuj jun tzo'n̈ tas yaljnac can cha.

1 Jn 2:28

A ticnec ex chamc'ojlb'il wu'uj, yowlal junn̈j cajc yet' Cristo 'a smasnil tiempo, sec wach' ma'oj qui xiwec ax sjawi. Ma'oj qui q'uixwec pax 'a yojltac yic 'oj jawc cha.

1 Jn 2:7

Ex wu'tac, ex wanab', a jun checnb'il 'oj walb't 'ayx tic, man̈toc at 'ijnoc 'oj eyab' tic. Yujto a jun checnb'il tic, alb'ilx 'ayex yictax eyoch yico'oc Dios. Eyab'jnacx jun checnb'il tic pecti', chajtlto yowlal tzqui chamc'ojlejec qui b'a.

1 Jn 3:1

'In caw tzon̈ schamc'ojlejec qui Mam Dios, yujto tzon̈ yalc yunnaloc. Yel toni, yunnaln̈ec xo. Ax eb' yic yolyib'n̈q'uinl tic, matz nachj 'el yuj eb', toto yunnaln̈ec xo Dios, yujto man̈ yojcoc eb' Dios tic.

1 Jn 3:10

'Ixta tz'aj scheclj 'eli, mach eb' yunnal xo Dios, mach pax eb' yunnal win diablo. Toto man̈ tojloc qui b'eyb'alec, toto matz qui chamc'ojlejec eb' quit creyenteal, wal yel man̈ on̈ yico'oc Dios.

1 Jn 3:21

Ex wu'tac, ex wanb' chamc'ojlb'il wu'uj, toto cojquec, to wach' qui b'eyb'alec 'a sat Dios, matz on̈ xiwc qui leslwi 'a 'a.

1 Jn 5:1

An̈ec tzca'c 'och 'a qui c'ojol, to a Jesús atn Cristo, an̈ec ton yunnaln̈ec xo Dios. Q'uinloc 'ay junc mamb'il tzqui chamc'ojlej, to 'ixta', wan qui chamc'ojlan pax eb' yunnal.

Apoc 2:28

An̈jtona', 'oj wac' pax jun niwquil c'anal sacb'sun 'a eb'.

Apoc 22:4

'Oj yil wal eb' sat. 'Oj 'och sb'i 'a snan̈l sat eb'.