A Ch'an̈ B'ab'el Libro Samuel 28:8 - Chuj San Sebastian Bible

⁸ 'Ix sjeln 'el Saúl spichl yic sreyal, sec matz nachj 'el yuj eb' 'anma', mach winac. 'Ix 'at chawn̈ xo winc yet'oc, yic tz'at yilnc jun 'ix chi 'a 'ac'wal. Xc'och eb' 'a 'ix, 'ix yaln win 'ixtic: —Tzin tew 'ayach, tzin nib'j tzawtj spixn jun mach 'oj wal tic, xchi.

Chuj San Mateo Bible

⁸ Ix sq'uexanel spichul vin̈aj Saúl chi' yic sreyal, axo yic eb' comon anima ix yac'och vin̈. Ix yic'anb'at chavan̈xo soldado vin̈ yed'oc, ix b'at vin̈ d'ac'valil yic sb'at sc'anb'ej sb'a vin̈ d'a jun ix ix chi', ix yalan vin̈ d'a ix: —Tzin tevi d'ayach to in gana tzavtej spixan jun mach ol val tic, xchi vin̈.

A Ch'an̈ B'ab'el Libro Samuel 28:8 Iomraidhean Croise

A Ch'an̈ B'ab'el Libro Yic Yab'ixal Eb' Rey 22:30

Ax win sreyl eb' israel cha, 'ix yaln win 'ixtc 'a win Josafat: —An tic, 'oj in jel-l in pichl tic, yujto 'oj woch 'a scal owal, ach xo tic, 'ayn̈j cab' 'och a pichl tic o'oj, xchi. 'Ix sjeln 'el win rey chi spichul, 'ix 'och win 'a scal owl cha.

A Ch'an̈ B'ab'el Libro Yic Yab'ixal Eb' Rey 22:34

'Ay jun soldado scomn julj 'at sjul-lab' 'a scal ewin soldado 'aych 'a owl cha, ax x'aji, 'echb' wal 'a 'aj tzchaj sb'a sq'uen pichl win rey Acab 'ix 'och tz'ab'njoc sjul-lab' win cha. Yuj cha, xyaln win Acab chi 'ixtc 'a win yamjnac sti no chej to'jnac te caruaje cha: —Toc' meltzjoc sti no chej tic, 'ij in 'el 'a scal owl tic, yujto niwquil in 'aj in lajwi, xchi winac.

1 Cr 10:13

'Ixta 'ix 'aj scham Saúl yuj smaysch'olnilal. 'Ix 'och smul yujto ma'ix syiclj schecnb'il Jehová. An̈jtona', a pax 'a jun 'ix 'ix tzc'umn spixn eb' chamnc 'anma', ata xit' sc'anb'c snab'en, man̈oc 'a Jehová sc'anb'ej. Yuj cha, 'ix smiln chamoc, ax 'a David yunnal Isaí, ata 'ix 'ajx can jun yopiso Saúl cha.

2 Cr 18:29

'Ix yaln sreyl chon̈b' Israel 'ixtc 'a Josafat: —A yic 'oj woch 'a owl cha, 'oj in jel-l in pichl yic in reyl tic, palta ach xo tic, 'aych cab' a pichl yic a reyl tic, xchi. Xlajw cha, 'ix sjeln 'el sreyl chon̈b' Israel spichul, 'ixta to b'i'an x'och eb' 'a owal.

2 Cr 35:22

Palta ax Josías ma'ix syiclj smeltzji, to 'ix ste'wtzej sb'a ya'n owl yet'oc. Ma'ix schaj yab' tas 'ix yal Necao, tic pax a Dios 'ix alni. Yuj cha, 'ix ya'n owl yet' 'a jun pan̈n 'a'lic 'a yol yic Meguido.

Is 8:19

'Oj laj yal eb' 'anma chi 'ayx 'ixtic: C'anb'jec eyab' 'a eb' tz'acn snab'en, 'a eb' tzc'umn spixn eb' chamnac, atn 'a eb' tzsajsni sc'umn sb'a sch'ocoj, 'oj schic eb'. Ax eyaln 'a eb': ¿Tas yuj man̈oc 'a sDiosal jun tzo'n̈ 'anma tic tzc'anb'j sb'a? ¿tas yuj a 'a eb' chamnc chi tzc'anb'j sb'a eb' pitzan?

Jeremías 23:24

May xon junc lugar 'aj wach' e c'ub'n 'el e b'a 'a in sat. An tic, 'aynn̈ej 'ec' 'a satcha'an̈ yet' 'a sat lum tic.

Ez 12:6

A 'a yic wan xo sq'uic'b'i, tza'n q'ue a pa chi 'a sjolm a quelab', q'ueln 'och eb' 'ayach yic tzach 'at cha. Tza mac a sat, sec matz uj eln can jun chon̈b' cha. 'Ixta tzach wutj ach wa'n 'och ch'oxnb'ilal 'a eb' et israelal cha, xchi 'ayin.

Jn 3:19

An tic, in 'eml 'a yolyib'n̈q'uinl tic wul wac' sacq'uinl 'a spixn eb' 'anma'. Palta 'ay pax eb' matz nib'n jun sacq'uinl tic. Yuj cha, 'oj cann̈j syailal eb' 'a yib'an̈. Cojn q'uic'q'uinl tznib'j eb' 'a spixan, yujto maysch'olnil tas tzb'o eb'.